WWW.TUNGZANGNEWS.COM

 
Picture
Zomi Dinmun Khangkhaan Nading
Laaizom Zomi Akuamapeuh-in I-lungngaihding I-dinmun:

Malaysia-a 2012 Zomi Nam Ni thugenna (keima' gen hisaam taleh hong malmat kiikleng, banghanghiam cihleh tapkual thugen hilo-in Zomi tuul 3 kiim' maaitang-ah ka' pulaak ahihman-in) - ah;

"Zomi bang/kuate ahihiam?(What/Who is/are Zomi?)" cihthulu-tawh pulaakna-ah, Zomi akhiatna suutna (defining Zomi)-pen toii asa-zong omkha theiding-a, hi asa-zong omhi. Bangbang ahizong-in internet pan-in hitaleh press/media tuamtuam pan-in tua definition alangdo omlo ahihman-in Zomite kuate I-hihiam cih ataangpi kitel mahmahta hihang ci-in I-kipaak uhhi.

Political history enkiik paklehang, mas-sah-lah hunsung Zomite Chin State sung-ah alungtanglam-ah om ahihkeileh abullam vive tuhngahkha ahihna tungtawn-in mah-sah-lah hun-a Zomi uliante-in Chin State buppi-pen Zogam ahihkeileh amite Zomi cihtawh ahuam zoding, anelhsiah zoding, avukcip zoding-in khamuanna nana nei-khat uhhi. Tua ahihman-in aneupen lahpakding khat: Chin Capital/Office -pen Zozum ci-in, mite' hongcihpih kholloh Zo Vuanzii khawng nana-ci zaanzaan uhhi.

Hun hongki kheel-a, Zomite Chin State bulpi lam-ah adin/a-om zawh nawnloh ciang-in hia hunlaai-a I-political concept ana thuuk luatlohlam kiphawk-in, tua hunciang-in ziakaai mahmahta, mi' nung delhding dinmun kitung-hi. Hihbang kawmkaal-ah mipawl khatte-in amau' minam min koihkhia pak-in I' State sung-a satanh khempeuh ahuam theihna ding-in "Chin" min hong buplaak liuliau-a, tua hunciang-in, "ei Zomite" hongci deksuailo thamlo-in, "khe-mia doh Zomi di neh nga-doh Khyin di ma tu bu naw" ci giahgiah lelmawk-hi.

I-political concept-pen gualbaan hetlo-in, Zomi kicihding hi-lah sa simsim ahihkeileh hi sa mahmah, a-Zomi milip tha-tawh phuutding omleh lau, pataau, lunghiang, a-Chin kicih taktak dinglah kizo saamlo (pawlkhat kizo mahmah bilbel mahtaleh minam it zawdeuhte Chin kici-nuam saamlo), vom-maw kaang-maw cih nangawn aki khentel theilo dinmun ahi lamkaal-ah I-ding laaitak uhhi.

Tuabang hunsung-in Kawl Gamukte-in "Zomi omlo" hongcih man-in I-omlam pulaakding cih geelna hong-om ciang-in alunghiang I-om mahmah "pusa' luheek tuak" acihte I-mawk I-hiam ci-in laainat-huai I-sa mahmah-hi. Midang elna omlo-hi, Kawl Gamukte langpanna hilo-hi, kiphatsakna hilo-hi, tuapipi-mah banghang-in I-hihna pulaakding lunghiang lawmlawmding I-hihiam? Ahihkeileh Zomi kheng(beyond Zomi)-a nasep/sumbawl nading "kuam" ageel kholkhol I-hihiam? Mi pawlkhat-in ama' mipihte' nasepna tung-ah ameet la-thei uh-a, "hihthu va-nial sinvua" ci-in amah'n, "hih thunialte bangmah hikei" ci-in nana lehluut thei-hi. Hihbang mite gam-ui ahihi.

Tu laaitak I-Zomi dinmun kitheikim ciatding hihang. Chin-ahlah luutzo khollo, Zomi-tawhlah dingkip theilo, tua-hun sung-in I-minam pulaakna I-neihzawh keileh Rohinya te-mah banglelding hihang, atua ding-a minam sidawn cnf te-in Kawlte kaap ngeilo pipi kizuaktawm-in kilemna abawl ahihi. Hihbang zawhnua-ah "chin ka' hihi" nava-cih hang-in hong letcip zawhnading a-muhkei buangleh hongdeih peuhmah loding uhhi. Tua takteh va-ak utong aki-neih suak taktak tading na' hihman-in a-chin te'nlah deihlo, a-Zomi te'nlah lipkhap dinmun na' tung dinghi.

Minam cihpen revolution a-om keileh phulaam ngeilo, kuamah'n thei ngeilo, kipholaak ngeilo-hi. Bristist, German, French, American hihte amau' om mawkmawk-a a-omte hilo-hi. Akizuakzo, akipholaak, akipulaak zote, gam akeekzo minamte ahihi. Zomi cih kammal ama' thu-a leitung-ah aminthang theiding, mite' theih leh zaak-a omtheiding hilo-hi. A-Zomi akici mihingte-in tawisaang-in, pulaak-a, apiicinsak kei-ngaalleh ama' thu-a akilangh henhanthei hilo-hi.

Minam cihpen gui/phung khat aneikhawm mihing pawlkhat hi-a, tua mihingte' sinphatna/haangsanna/nam-itna leh tui leh sisan akhen sinsen mite' ziakbek-in minam kilanghkhia-in mi' theihlehzaak-in omthei bek-hi.

Tua hi-a, "Zomi Hihna Pulaakding" cih geelna-ah Zomi peuhmah hong awilo omlo dinghi, banghanghiam cihleh keima' lungsimbang ding-in ka' seh ciang-in kei ka' hihngamloh hang-in Kawl Gamukte' maai-ah anngolh lungphona asihdong abawlngam khatlehnihbang omleh naakpi-in ka' uut-hi, banghanghiam cihleh kei ka' hihzawhloh hang-in amau' ziak-in Zomite' sinphatna leh cihtakna kilanghkhia hamtangding ahihman-in ka' angtang mahmah dinghi, banghanghiam cihleh Zomi kahihman ahihi. Zomi ahilote inbel 'haii' salel khamah dinghi.

Minam enthuah pakni. "Zomi" -pen I-minam min ahihi. Eizong Zomi kicihding I-angtang uhhi, a-angtanglo te-in hih ka' laaigelh hong kuppih vetkei tahen!

Chin State-a mite "Chin" cihmawk-pen ahaiivaai (ridiculous) mahmah khat ahihi. Chin State khanglam-ah Kawlte naaktam mahmah ta-hi, tua Kawlte Chin State sung-ah a-om man-in "Chin" kici ding-in I-um uhhiam? Naak haiivaai lua-hi! Lashio Khuapi-ah Zomi khat asuah man-in "Shan" kici theiding ahihiam? ahihkeileh Kawlte khat Mit Kyi Na-ah ateen man-in "Kachin" kici theiding ahihiam? Chin State-a omte Chin cihphauphau mawkpen mibatlohna leh haiina lianpi khat hilel-hi. Gamukte' thuneihna zil-a I-cihciang nangawn tamlua khin-hi.

Thuneihna leh thahaatna (authority and power) I-neihlohman hikeileh leitung buppi-ah, "Zomi hi-ung, Zopau pau-ung, Zogam-ah teeng-ung, Zo-ngeina zangh-ung, Zola leh Zolaamte zangh-ung,,," ci-in akitaangko-nuam ahihi. Thuneihna leh thahaatna I-neihloh man-in, atung-a suahkhiatna (expression)te 'lo' tawh 'do' pahlian takeilehang apaam-a khat ''''''hihang, mite' hong theihna...''''' I-minam sung-ah I-thunsawm tantanleh anti-Zomi hipahding hihang.

Bangbang I-suutsuut hang-in deihna bulpi "Zomi acidam minam asuah nading" bek-mawh ahihman-in deihna kitukalhna a-omleh kidamho tozeel lehang minam phattuamna piangkha mawhlo dinghi.

Zomi Pasian' Thupha!

Zokhai
23/05/2012

*********************************************** 
T. Zokhai ITNA-IN GUABANG HINNA-HI 
60 Narr-Maen Drive 
Croydon Hills VIC 3136 
Melbourne, AU 
Tel: +61 39723 0460 
Mob: +61 420 800 560


 


Comments




Leave a Reply