WWW.TUNGZANGNEWS.COM

 
Picture
Zomite Minam Kician khat ahihna ZIUSA in Pulakna
(TZN) - Zomi Innkuan USA kipawlna, Board of Directors pawl in May 19, 2012 (Saturday) ni in, Teleconference zangin, 2011~2012 kum a’ding a (4) veina Thukikupna pen lawhcing takin bawlzo hi. Board of Directors pawl pen ZIUSA kipawlna in tawh akipawlkhawm, US gam sung a om Zomi Innkuan kipawlna (30) panin akipuak Tangmite (Representatives) leh ZIUSA kipawlna Executive Committee panmunlen teng tawh a kilam ahi hi.

Thukikupna sung ah tu laitak a Kawlgam sung a thupiang khat ahi, Zomi National Congress Party pen Kawlgam kumpi’ Election Commission in “Kawlgam sung ah Zomi kici minam omlo hi” cih thu/paulap siksan in Political Party khatin a san’lohna thu tawh kisai kikupna kicing takin kinei hi.

Zomi Innkuan USA kipawlna Thukhunpi sung a Ngimna Bulpite sung ah; “Zomi-te in minam kician, minam picing semsem dinmun khat atun’ zawhna dingin kipawlkhawm in vai hawmkhop theihna ding in Zomi Innkuan USA kipawlna kiphut hi” cih thukhun a om bangin, a tung a thu tawh kisai in Zomi-te in minam kician khat ahihna hong kithusim lohna ahih manin tuipi galkai Zomi-te in limtak in kikupna a kibawl hi a, anuai a bangin thukimna leh thukhensatna kinei hi.

(1) Zomi National Congress Party in Zomi min suang Minam Party (Nationalist Party) khat ahihna tawh kituak in; “Zomi-te in minam kician, minam picing” khat a hihna kip takin len a, Kawlgam sung ah minam picing khat dinmun leh minam khat hihna tawh thuneihna bukim akingah zawhna dingin ma ahong pan’na dingun kihanthawn hi.

(2) Kawl gam sung ah Zomi-te in minam khat hihna tawh dinmun kician khat nei a, minam khat hihna tawh a kituak panmun picing khat a kingah zawhna dingin, tu hun laitak a Kawlgam sung a thu luan’ zia leh amun amual tawh kituak in; Zomi-te in minam khat a hihna thumeilet in anei, Zomi min kipsak in a gum, gam leh minam it in a hu ding Zomi-te’ Party khat ahong piankhiat theihna dingin kideihsak hi.

(3) Tu hun laitak in Zogam sung ah gam khantohna (Development) ding vai hawmna, gal leh sa (Military/Militia) lam tawh kisai vai hawmna tuamtuam om ahih manin, hibang thu leh la vaihawmna khempeuh tawh kisai in Zomi-te in Zogam sung ah thu aneih theihna dingin Zomi-te kipumkhat in ma pankhop theih ding kisam kisa hi. Zomi-te sung ah pianna khua a kipan khuapau leh ham tuamtuam tawh kideidanna, beh leh phung siksan in kilangpanna, biakna leh leitung thu tawh kituam bawlna cihte paikhia a, minam khat, si khat sa khat, sanggam unau laizom khat hihna kipsak in, kithutuahna leh kipumkhatna a om theihna dingin hanciamciat dingin itna tawh Zomi khempeuh kizawn hi.

(4) (i) Zomi-te sung ah gam leh minam vai, khua leh tui vaite tawh kisai in ma pankhopna a om theihna ding, (ii) Zomi taangpi taangtate gam leh minam itna a pantah ding, lam alak theih ding, (iii) Zogam leh Zolei a hu ding, khua leh tui a gum/dal dingin mun tuamtuam a om Zomi khangno kipawlna khempeuh a kigawmkhopna kipawlna lianpi/phungpi khat a kiphuh ding kideihsak hi. Hih kipawlkhopna (Umbrella Organization) ahong piankhiat theihna dingin Zogam sung khuapi tuamtuam a om Zomi khangno kipawlna khempeuh itna, muanna leh zahtakna tawh kizawn a, ahi thei zahin panpih dingin kithukim hi.

Thupuak;

Executive Committee
Zomi Innkuan USA, Inc.

Tulsa, OK. May 22, 2012 

 


Comments




Leave a Reply