WWW.TUNGZANGNEWS.COM

 
Aung Suu Kyi nungak lai...  Amah zong Zolia te mah bangin mikang tangvalte in a hel tak ciang na kidekzo samlo in "aw" bel na ci hi peuhmah ding hiven maw... amah zong Zolia mah hi a ci pawl om hilo hia! Tuate bel thudang ci phot ni.

 Kum 24 sung vingveng a muh nawnloh gam hawl kik dingin hong pai ciang a lungsim ah bangteng a om tam? A it a ngaih a angkawi tawh a nautual kaihna gam, pilna siamna sina a lawm a gual tawh a kikholhna gam, khua leh munte hong veh kik cileng - a lung a leng diaiduai veve sam tam maw!

 "Lawm luite mu ding leh munluite veh dingin kong pai hi," a cih hangin a pasal Michael Aris tawh a lenna gam leh munte amuh ciang a lungzuan khuangaihna kiukiu zong om kha mai ding hi. Banghang hiam cih leh kum 1972 kuma kiteng kum 1999 in a omloh kikal in a pasal in sihsan in, a nat a sih laitak in zong a kiangah om theilo a, a kivuina ah zong va kihel theilo hi. A pasal nungsangah a khatvei kikna ahih manin 'haksa' a sak hun om tham ding hi. A pasal a sihma in a zi kiang zin nuam in visa ngen den taleh kipia nuam nawnlo a, amah a pasal kiangah zin dingin bel kisawl mun bilbel hi; ahi zongin amah zinkhia ngeilo hi - a kik theih nawnloh ding lau ahih manin. 

A pasal in zong a zi in a gam leh a mite ading a septheih om bangbang sem hi cih a muh ciangin telsiam mahmah a, si dinga lupna tungah a omlai in zong a zi kiangah ama mite mah adingin sem masa ding leh amah ngaihsunlua lo dingin vaikhak hi. A kiten cil un zong, "Ka gam leh ka mite in kei hong kisam uh ahih leh amau na ka sep ding nong phal ding hong ngen ing," ciin a pasal kiangah a gen ngeisa hihtuak hi.  

Nu ahihna khahsuahlo A pasal Michael Aris leh atapa nih Alexander leh Kim te tawh kikhen kipat cil lam un zong a tate in a kisap a om ciangin phone tawh hopih in, a tate hopihna zong dawng den in 'nu' ahihna khahsuah ngeilo hi. Ama pianna nu 1988 kuma a damloh ciangin UK pan Kawlgam hong ciah a, tua zawh a nu gim deuhdeuh ahih manin hong ciah zihzehta hi. A nu cina hospital ah kem leh khoi-a a omlaitakin gamsung buaina hong pianga, mipi in kumpi tungah a deih uh ngen in hong kinawk tak uh ciang Suu Kyi zong gamsung kilumlet ding a deih pawlte in a makai hidingin va zawn uh hi. Tua hun a kipan a pasal leh a tate nih tawh a kikhen suaksuak hita a, a kimuhkik uh tam hetlo hi. 

Kawlgam pan India ah Kum 14 a phak laitak, kum 1960 kumin a nu Khin Kyi pen Kawlgam ambassador dingin India ah kisawl a, anu zuiin Delhi ah a om uh hi. Zangkong a sangkahna Methodist English High School (tun Basic Education High School No. 1 Dagon) pan Convent of Jesus and Mary School, New Delhi ah kisuan a; tua zawh ciang Lady Shri Ram College, Delhi mah pan Politics tawh kum 1964 kumin degree ngah hi. Tua pan England ah pai in St. Hugh's College, Oxford pan Philosophy, Politics leh Economics tawh BA mah 1969 kumin zo leuleu hi. Tua pan New York khuapi UNO office ah sem a, a lawmte uh tungtawn in tangval khat nisim lai a khak hi. Tuapa pen a lawmngaihpa, a nungciang a pasal ding Michael Aris ahi hi.

 England ah sangkah dingin a pai lai class room ah a mu masa ngei numei Ann Slater kici nu in, "Ka tutna langkhat ah hih numei melhoih mahmah, nik teng, sam hen, sam vom, mit hak sitset khat ka mu hi. Zingsang sim in a sam siang sitset a, etlawm mahmah hi," ci hi. England ah sang a kah sungteng nu leh pa banga a zat Patricia Booth (a pasal zong England ambassador in Kawlgam ah a sem) in, "Sangkhak ciangin inn ah hong giak a, innkuan mi khat mah in ngaihsun ka hih manun aman zong tanu banga kingaihsun in ankuang a hem khin zel hi. Innsung nasep limlim koh hilhtawm kullo in a nu in a sinsaksa ahi hi. Amau minam ngeina bangin amah sanga uzaw mai peuhmah ah a kun masa den 'ka tanu' uh ahi hi," ci hi. "A pasal neih dingin zong a nuno te khat hong pai in a lawmte dang pawlkhat tawh a mopuan ding uh bawltawm in koh innsungah a kiteng ziau uh ahi hi. Amau biakna siampi in a kisam teng phuisam a, mei kim ah vial pai khit ciang buh lom a ne in tua zawh ciang Hotel ah mikang ngeina tawh mopawi kibawl kik hi."

 A kiten khit uh ciang Oxford khua ah teng suak in inn lam uh a, tua sungah a tate a kem to uh hi. Lengla do siam mahmah ahih manin a inn ah a hawhte tawh kawlgam thu tuamtuam kikum thei zel uh hi. A lengla te lak ah UN Secretary-General sem ngei U Thant tupa Thant Myint zong kihel hi.

 Mangngilhlo ding

Tun, a pasal neihna gam, a tate tawh a kikeptohna gam uh; UK mahmah in zong a gammi banga ana khoi leh a pattahna gam hong veh kik cileng a lunglenna bel tampi om lua ding hi. A khuangaihna zong tampi om ding hi. A phawk thu tampi om dinga, a mangngih theihloh thu zong tampi om ding hi. Tua a mangngilh theihloh lak ah a pianna zuapa nangawn in a luang taan lianga a hanciampih gam in leitung gamdangte bangin khangto in suakta leh cih kihel
pelmawh ding hi.    

Hau Za Cin
Phuitong Liim
http://www.hauzacin.blogspot.com/
 


Comments




Leave a Reply