WWW.TUNGZANGNEWS.COM

 
Abeisa 1962 kum U Ne Win hun akipan Kawlgam sungah Galkap thuneihna (Dictatorship) tawh nung 2010 kum ciang dong kimakaih hi. Hih bangin kum 60 kim ki-ukna-ah Kawlgam sung a om mualmite le Kawl mite kikal kituambawl/ kideidanna nsia lua mahmah ahih manin, minam buaina le sisan naisan kisuah in, tuni dong kizomsuak hi. Tua bang a Galkap kumpi ukcipna nuai pan suahtakna ding lunggulhna tawh a khangkhang in Siamsin sangnaupangte sung pan lungphonna le deihngetna kinei den a, sangnaupang makai tampi in sisan naisan le a nuntakna a pia tampi om khin ta hi.

Tuate sungah Zomi (Chin) min puate sung pan abeisa 1974-1976 kikal pawl a CLCC makaipi khat ahi Asho Chin ahi Salai Tin Maung Oo makaihna tawh Yangon Universty pan Lungphona kinei a, U Ne WIn kumpi in deihlo ahih manin, man pahin Insein Thongpi ah koih hi. Thusitna zong tam neih loin, a sawt loin, Khau tawh khailum uh hi. Hih bangin Kawl galkap kumpi in a khangkhang in minam makai Siamsin mipil, misiam tampi hong thahlup sak uh hi. Tua hi in, hih Salai Tin Maung Oo sihna pen gam le minam bup Sal hihna pan suahtakna ding lunggulhna tawh thahna athuak ahih manin, Kawlgam bup le Zomi (Chin) buppi in tuni dong kumsim in Phawkna ni nasiatak kibawl den hi. Salai Tin Maung Oo in kampau thupi mahmah khatin, " No, galkap khedap maiah cikmah in ka kun ngei kei ding hi " cih ahi hi.Tua hang mahin kiman in,khailupna a thuak ahi hi.


Tukum 2012 kumin Salai Tin Maung Oo sih zawh kum 36 cing ta a, tukum ading phawkna ni pen June 26,2012 ni-in, Kawlgam sung le leitung mun tuamtuam ah thupitak kibawl in, adiakdiak in India gam New Delhi khuapi a om Chin Student Union te makaihna tawh Zomite le Kawlmi khempeuh kigawmin nasiatak kibawl in, gam le nam makai mimal 70 val kihelthei cih kiza hi. Tua hunpi sungah Salai Tin Maung Oo phawkna paakkual piakna le zahtak piakna in apai mi khempeuh minute khat sung kikun zihziah hi. Tua zomah a zaknop le a mulkim huai mahmah Salai Tin Maung Oo tangthu sim khiatna leh statement simkhiatna te akineih khit ciangin, 1990 kum a MP ngah Dr. Tint Swe in thugenna nei hi. A man’ a genna ah, " Salai Tin Maung Oo pen Kawlgam bup level ah a zahtak huai le mihang san mahmah khat bek tham loin, tuhun khangthakte in etteh huai " ahihna thute limgen hi. Hih bang hansanna tawh Kawlgam Democrecy i ngahna ding mapang khop huai ahihna thute gen hi.

Tua banah ABSL pan Ko Kyaw Tan in zong, Salai Tin Maung Oo tawh kisai a ma muhna le zahtaknate genin Kawl gam kumpi ii hoihlohna leh a khangkhang in mipite leh, a diakdiak in Siamsin sangnaupang te abawlsiatna ziate pulakkhia hi. Tua manin, Chin(Zomi) khempeuh in tuni dong kipumkhat in gam le nam ading mapankhop kisam lua ahihna thute tawh mipi hanthotna nei hi. Hih Programe sungah, Chin Student Union pan, lasiam tuamtuamte in Salai Tin Maung Oo pahtawina lai hoih nonote zai ziahziah uh a, ZCF pan Pastor T.K. Lianpu in hunnzawh lungdamkohna nei-in, Salai Tin Maung Oo sih zawh kum 36 cin phawkna hunpi nitak nai 3:30Pm hunin nuamtak kiman in, Chin Student Union te thusiamna tawh apai khempeuh tuivot(cold drink) leh moh khamtak kivai zihziah cih kiza hi.

Reported By : Sia Min Thang

New Delhi ( Tongsan Reporter)

 


Comments




Leave a Reply