WWW.TUNGZANGNEWS.COM

 
Picture
Nang Tung Hong Bawl Ding Na Deih Bangin Bawl In !
Hih kammal pen Khristiante bek hi loin, leitung ah biakna khempeuh in kinei ciat hi. Khristian te LST sungah zong Topa Jesu kammal ngiat ahih manin, nisim i nuntakpih ding thu laigilpi khat ahi hi. Kamdang khatin gen leng,,, hih kammal pen piakkhiatna le sepkhiatna taktak ahi hi. LST kam tawh a gen hi leng.. " Piak in na om le piakhia kik in / Na piak le piakin na om ding hi " (Gal. 6: 6-7) cihna hi a, sawlna le thupiak (Command) hi-in, khapna thupha ( Blessing ) tawh kizom pah hi. Piakhiatna i cih pen lungsim takpi, thumanna le cihtakna tawh kizomsuak den hi. Zogam lasasiam Lengtong Pauno in zong , " Nang tung hong bawl ding na deih bangin Bawl in ! cih laphuak in mi tampi thuman gamtatna ding lam hilh suak pah hi.
Thumanna le cihtakna sungah suahtakna om hi. Suahtakna i gen ciangin, pawlkhatte in biakna lam bekbek in kingaihsun thei-in, nam le gam nasepna lamah zattheih dingin kingaihsun kha lo thei mawkmawk hi. Tua ahih manin, leitung thu le Kha lam thu ah suahtakna anei mikhat pen hangsanna, thuman cihtakna kinei pahin, minam itna le Pasian itna akibangin nei thei pah hi. Minam a it mi khat pen Pasian a it taktak hithei pan hi. Tua bang mite pen Thuman Suahtakna bucing anei kici thei hi. Thuman suahtakna aneite in sepkhiatna le piaknopna tawh kidim nuntakna nei hamtang uh hi.

Kawlgam ah galkap kumpi thuneihna tawh abeisa kum tampi sung kampau ngam lo, khuahek ngam lo le lungsim kinencipna nuai ah i ngaihsutna nangawn kipulak ngam loin i omna pan, mipi thuneihna- kilungtuakna (Democrecy ) gam picing khat  asuak dingin kikhelna hunpi sungah kilutta hi. Tua bang a i mainawt laitak in, mipi lungsim sungah mai lam kalsuan zia ding kithei nuamin, Democrecy kammal hong lang mahmah hi. Tua bang akilimgen mahmah hangin, Democrecy i khiatna diktak nangawn a telcian mello honpi khat mah ki om hi. Democercy tawh kimakaih gam khat suahna dingin, bang teng kisam a, koici bangin kikhelna hong om ding cih mipite lunghimawhna bulpi khat ahi hi. Democrecy i deihna tuamtuam sung pan i lamet le i deih bulpi pen ahih le mimal / mipi suahtakna (or) Zalenna ( Freedom) mah hi dingin i lamen hi. Hih suaktakna cih kammal i gen ciangin mitphia vet lo, lau vetlo a suaktatak thugen theihna, laigelh theihna, biak theihna,paii theihna le naseptheihna cihte kihel ahi hi. A hi zongin a leh lam suahtakna ahi midang khat i thuneihna / tanhvo te bawlsia/ nencipsak ding le ut bangbang a gamta gawp ding cih lamah i kalsuanpih khak ding lauhuai mahmah zel hi. Kamdang khatin gen leng " Hong suakta phot peuh mah leng,,, hong dopbawl lo ding hi ing" cihte hi thei lo hi. Lengtong Pauno in, "  A khangto gam hong suak ding tua ni cingin, lungdeih teng Lii bang cingin Zogam hong paal ding hi " cih pen i ngaklahlah thu hi/in, tua pen a lampi mann tawh i kalsuanpih siam ding hong kisam ta hi.Kawlgam kikhelna zui in, mimal suahtakna (personal freedom) le i hihna ( Identity) te akipan kepbit siam semsem ding thupi hi. Hih bangin Kawlgam kihelna sungah vaihawmdan thak tawh kumpite in maban hong pan ta uh hi. Democrecy gam picing khat suahna ding i ngaklah hangin, i lungsim sungah launa le zuahtatna cihte in sawt hong lencip lua ahih manin, tukhang ading nuamtak kizangthei pak lo dingin upmawh huai hi. Bang hang hiam cih le Kawlmite bek hi loin, akipan Zomite dongah i nuntak zia le i ngaihsut ziate in Democercy kalsuanna sungah akizanghthei dingin picing zo pak hetlo ding cihnopna ahi hi. Kum tampi sung mah hun ngak kul kha dinga, kalsuan zia mahmah tawlkhat sung hong hoih toh khit ciangin, zatzia le nuntakpih zia kisiam pan bek ding ahi hi. Gtn: Tukim a Rakhine gam sungah thupiangte en pak hi leng,,,mimal pan kipanin mipi tungah kizel a, minam vai pan biakna vai ciang dong kizomin leitungbupin thei zawzen hi. Hih bang namte akipan i zattheih loh ding thu tampi om kha thei ding hi. I suahtakna pen kizangsiam pak lo ding cihnopna ahi hi.

Democrecy pen Liangko kikim nuntak/ khuasakna hun a hih manin, a hau, apil, asiamte le a thuneite bek kampau ngam ding cih hunte bei ding cihna ahi hi. Hihte zong a hun tawh kituak in, damdam in i siamto lel dinga, khat le khat kizahtak tuahnate hong khang ding hi. Hih kizahtakna om theihna dingin, thuman suahtakna kisam hi. Thuman suahtakna sungah launa le zumnate bei hi. Thumanna in mikhempeuh ukcip ding cihna ahi hi. Thuman thutak le Democrecy cih kammal pen akikhenthei lo Sammetna Temteh tawh kibang ahi hi. Kamdang khatin gen hi leng.. Democrecy pen LST tawh kituak mahmah a, mipi deihna cih zong kipumkhatna i kipatna bulpi ahih manin, LST tawh zong kituak Pasian deihna mah ahi hi.

 Tua ahih manin, Democrecy gam sungah thuman lopi tawh mipil, misiam, mihau , U zaw nau zaw cihte khat peuh ukcipna le makaihna hangin kihtakna le launate kinawlkhin dinga, khat le khat kizahtakna le kithupibawlnate khang ding hi. Kipawlna , biaknate le innkuan sung nangawn ah kideidanna le kisimmawhnate om lo ding ahi hi. Hih thuman suahtakna sungah adiakdiak in mimal suahtakna tawh kisai, khuahun khantohna tawh kizui-in, thukizakna ahi ( Infromation and Media) tungtawn in thuman kigensiatna le kimawhsaknate zong hong om dinga, tua hun ciangin thuaksiamna zong thupi mahmah ding ahi hi. Thuman pen thuman mah tawh hangsan tak panngamna kisam ding ahi hi. 

Democrecy ukna i cih pen leitungbup mite deih hi a, LST tawh kituak mahmah zong ahi hi. Democrecy tawh gam kikhelna a om mah bangin, mimal le minam bup sungah lungsim ngaihsutnate zong nasiatak kikhelna kisam hi. LST sungah hong uk kumpite thuman ding cihte zong zatsiam kul ta dinga, Kumpite ading thungetsakna cihte akipan kisam pha mahmah ding ahi hi. A beisa galkap kumpi ukna sung pan Democrecy ukna gam picing khat i suahna dingin, Zomite bek hi loin, leitung gam tuamtuam in thungetna hong neihpih uh hi. I thungetnate Pasian in hong dawng taktak ta in,Kawlgam ah suahtakna/zalenna in mun hong la ta hi.

A beisa galkap kumpi ukna sungah, thuman suahtakna cihte kigalmuh loin, i ngah ding hamphatna/ tanhvo cihte kingah peuh mah lo hi. Tua pen a kilekkim lo ki-uknacipna  le launa le zumna tawh kalsuanna ahi hi. Mi khempeuh liangko kikimna (Democrecy) tawh kimakaihna sungah thukham le thukhun kicite khempeuh in i mimal hoihna le khantohna ding kitehna ( Pidan) taktak ahi hi. LST. Matt. 7: 12 sungah, " Nang tungah hong bawl ding na deih bangin midangte' tungah Bawl in ! cih kammal pen Democrecy kalsuan zia tawh kituak taktak ahi hi. Tua mah bangin, i gamtatna zui-in hamphatna , hamsiatna thaman kingah ding ahi hi. Midangte tungah na hoih le nang tungah midangte zong hong hoih ding hi. Kamdang khatin gen hi leng... Democrecy adeih mite adingin " Pia in Hong Dim Ding Hi " cih LST kammal pen kizangthei mahmah ding cihna ahi hi.

Tua ahih manin, Kawlgam in Democrecy gam thak sungah kilut taktak ta ahih manin, Pasian deih nuntakna ahi khat le khat kizahtakna tungtawn in Pasian le minam itna lamah khanlawh ding kisam hi. I khua hunin tu khanghun le hong tung ding khangthak hun ading hong kalh thu pen Thuman suahtakna tungtawn in, piakkhiatna le sepkhiatna hong hi ta ding ahi hi. Mimal kim tungah hong kipia lungsim le pumpi suahtakna pen sepkhiatna le piakkhiatna tawh lahkhiat/ zatkhiat ding ahi hi. Minam le Pasian ading gammi hoih khat suah ding akisam mahmah khat ahi hi. " Nang tung hong kibawl ding na deih bangin Bawl in ! Laisim mimal kim Topan thupha hong pia ciat hen.

Democrecy hunthak sungah,


Sia Khampeek (Tongsan Pu)


 


Comments




Leave a Reply