WWW.TUNGZANGNEWS.COM

 


Zogam (Chin State) pan India, Mizoram lamah a zuak ding Zomi nih in Bawng 6 tonpih in Champhai District, Ngur khua lam zuihpih uh a, Ngur khua tun ma Zanglei Lobuk khat panin Kawlgam galkapte 2 in Bawngte matsak in, bawng luangkhat Kawlgam sum Ks. 50000/-, Luang 6 ,Ks.300000/- tawh kitansak/ sum ngen cih thu kiza hi. Tua bang a sum tampi a nget ciangun, Bawng neite in akicing piak ding nei lo ahih manun, Champhai (Tonsim) khua a teng ameltheih te' kiangah sum leiitawi dingin pai uh ci hi. A hi zongin a meltheihte' kiangah sum leiitawi nawn loin, Champhai khua phualsat a om Assam Rifile galkapte tungah thupuak uh a, Assam Rifile galkapte in nung July 3,2012 ni-in, amau puak AK-47 khat tawh man uh a, Champhai khuapi a om Mizo Palik (Police) te tungah pia sawn uh cih kiza hi.

Tua akiman Kawlgam galkap 2 te pen Zogam (Chin State), Falam sp., Rih khuadar ah phualsat a om Khah- Hlah-Yah (304) pan Galkap nautang U Myint Naing (Kum-34) le U Zaw Oo (Kum 35) te ahi uh hi. Tua banah tua Kawlgam galkap 2 te pen Mizoram Police te in (1) Thumanlo a gamgi kantan in India gamah guklutna hang., (2) Zawhthawh thu le guta bangin mite sum laksakna cihte tawh thubawl in Champhai Police zumah kem uh cih thu Champhai Police Officer tung pan kiza hi.

Hih thu tawh kisai-in, Kawlgam kumpi lam pan thuneite in tua galkap 2 te pen Kawlgam lam apiakkikna dingin ngetna nei cih zong kiza hi. A hi zongin Mizoram thuneite in maban koici sep ding le kalsuan ding cihte bang mah genkhiatna nei nai lo uh ci hi. Kawlgam galkapte in abeisa hun khat lai pek akipanin India-Kawlgam gamgi ah Zogam (Chin State) pan Bawng zuakte thuman lo le akilawmlo zah dongin, matsak bek tham loin sum tampipi ngenbeh lai uh ahi hi. Kawlgam galkapte bek hi loin, tulaitak a Kumpi tawh kilemna abawl leh Zogam, Tedim gam sungah Liaison Office a honsawm CNF/A te in zong tua bang mahin gamta ngei uh cih kiza hi.

Source: KNT News
Translated: Kham Khan Suan (Tongsan Translator)

 


Comments




Leave a Reply