WWW.TUNGZANGNEWS.COM

 


Thu patna
Tanglai-in i pu i pate khua khat leh khua khat phu na kila-in lutang na kibeng (head hunting) uh aa, sila-innteng in na kikhawi-in, ukpite in siahtung-siahphei na kai uh hi. Hih suangthu bang-aa a pokhawm ngeina hoihlote leh kideidanna tuamtuamte tu-in beimang khin ahih manin tua in ih minam sungah ih hamphatna lianpen khat ahi hi. Ahi zongin tu laitak ih nuntakna ki-enkik lehang khantohna tampihtak ih neih mah bangin laptoh ding thu tampitak mah ih neilai tham hi. Tuate sungah ka lungsim hong sukha tawntung thu khat om aa, numeite’ dinmun lapsan ding, cih thu ahi hi. Ih bangkua sungah ahi zongin, ih behsung-phungsung leh ih pawlpi sung nangawnah numeite’ dinmun kiniamsak lai mahmah cih pen nial theih ding thu hi lo hi. Tua hi-a hih thului sungah numeite dinmun lapsang theih nadingin lai sim mimal hong hantawn nuam ka hi hi.

1. Numeite’ Dinmun a Niamsak Thute
1.1 Zongeina
Ngeina ih cih pen a hoih a om zah khatin a sia pawlkhat mah na om hi.A hoihte puah-aa a siate ih paihtheih ding ahi hi. Gentehna-in India-gam bangah a pasal a sih ciangin meiphualpi sep-a kihaltumna, sati, kici ngeina bang nei ngei uh hi. A zi hangin a pasal si hi ding hi ci-in a ngaihsut man uh ahi hi. Tua mah bangin naupang khat a suah khit teh a ci a sat zenzen leh dawi lut hi ci-in nithum sung innpua-ah koih uh aa, nithum a cin khit ciangin naupang a naklai leh kep dingin la kik pan uh hi. Ni thum sung an-le-tui ngawlin khuadam-vuuknuai lakah kikoih ahih manin naupangte asi tamzaw hi.Ngeina ih cih pen a hoihlo na om tham hi. Tua bang ngeina hoihlote sangmang William Carey in na phiatsak hi.

Zomite ih ngeina sungah numeite a kiniamsakna tampi tak mah na om hi. Ih paunakte leh ih thuciinte enlehang kimuthei hi. “Numei khat leh zabel khat: numei hangsan akpi kihta; numei sat ngeina zam tum ngeina; numei khua leh sakhi khua; numei khem leh vamin khem; numei thu leh sialpiki-in kilam lo: numei vakhat thusia zong; numei in zawhlah neilo; ” cihte pawlpen numeite’ hihna (dignity) niamsak mahmah hi.Taseel manin zite a kimak banah tapa neikeileh zong kimathei mawk hi. Kamsiatna tawh a pasal in sihsan leh kikaikhia tangial mawk hi. Numei in pasal ma cih om ngeilo-in pasal bek in mathei se hi.Gamh leh gou kitan lo-in innpi-dolcial kiluahsak lo hi. Behsung-phungsung khang kisimna ah kihello hi. Numei lo-in khang piangtheilo hi napi’n numeite tawh khang kisim ngeilo hi. Mi’phungsung tangsung tung ding kici ahih manin pilna-siamna kisinsaklo hi.“Numei peuh, numei leltak, numei san,” cih bangin neubawlna kam hoihlote tawh kihopih thei niloh hi.A lawmngaihpa tawh kitengsak lo-in utlopi-in ngaihloh khat tawh kitanggawm hi.Tua bang ngeina(culture), ngaihsutna(mind-set) leh innkuan(family) sung pan khangkhia ih hih manin tuni dongin numeite kipampaih mahmahlai mawk hi.Tua ahih manin numeite kibawlsia-in kisat gawpgawp aa, nupa omkhop (sex object) nading bek danin ngaihsutin pasal tawh liangko kikimsak zolo-in ih niamsak(inferior to man) den hi.I tual nuntakna sungah numeite pen pasalte sangin kiniam koihzaw( lower status) ahih manin a lungsim ngaihsutna uh zong na niampah lian hi. A teel theihloh uh numei hihna tawh niamsakna leh pampaihna thuak uh hi. Hih bang ngeinate pen pasalte’zawhthawh tual nuntakna (male-dominated) sung panin hong piangkhia ahi hi.

Ka neulai-in ka nu in , “Bawi ka nik hong tupsak ve,” hong cithei hi. Kei zong ka nu’ niik pen kihbawlin akciang tawn tawh tepin ka piase hi. Ka nu in, “ Bang hangin tuacih hong piak sese na hia? Niik sung pan-aa piang hi lelo na hia?” hong cingei aa, tu’n ka ngaihsut teh ka nu’ hong cih nak manlua mahmah aa, tual nuntakna leh ngeina hoihlote in hong hilh hitah maw ci-in ka nung pawk pha mahmah hi.

1.2 Biakna
Leitung biakna tuamtuamte ih et ciangin numeite kineubawl mahmah hi. Judah pasalte in, “Pasian aw, numei-in nong bawlloh lungdam ing,” ci-in thu bang ngen uh hi. Numeite in kha neilo peuh cizanzan uh hi.Kawl biakna bangah zong, “ Nibann tun nadingin numeite pasal-a piang masa ding, “ cih bang upna na nei uh hi. Pasalte pen innsung pasian( ein-oo-nat- head of household spirit) in koih uh aa, pasalte bek vang( hpon-power/glory) nei hi ci uh hi. Tua manin pasal vangneite( phonggyi-monk) ci uhhi. Islam biakna sung bangah biakinnah apai theih loh banah, khuasung kongzin nangawnah kivaksaklo hi. Ei Khristian biakna sungah zong numei nenniamna tampi mah na om hi. Pasian’ lim-le-meel nei pen pasalte bek danin kingaihsun hi. Pianpih mawhna pen numei hang hi, kicita sawnsawn hi.A nungta Pasian mahmah zong pasal dan dingin kingaihsun hi. Pasian’ siampi dingte zong pasal bek dingin ih ngaihsun hi. Ih Laisiangtho mahmah in zong pasalte bulphuh-in thu na sung-aa na ciamteh hi. Gentehna-in mihing tul nga Jesuh in a vaakna ah numei leh naupang kihello hi, ci-in kiciamteh hi (Matthai 14:21). A taktakin numei leh pasal kisim leh Jesuh’ nasepna tua sangin a minthang zawlai suak ding hi. Laisiangtho a gelh mi pawlkhate zong Judah mite’ ngeina sung panin pusuak khia zonai lo ahih mahnin pasalte bulphuh(androcentric) a kigelh ahi hi. Numeite bangzah ta-in pilin degree ngah ta seleh Nipisang laihilh ciang bek mahin kikoihlai mawk hi.

1.3 Numeite Mahmah
Numeite’ dinmun a niamsak thu khat in numeite mahmah ahi hi. “Ei numei hi ve hang; ei a cingtak lote hi ve hang, bang paungam mah ding; bang vaihawm zo mah ding?” cih lungsim vom uh ahih manin tua in a lungsim uh niamsakin (inferiority complex) kimuanna neizolo uh hi. Khensat ding thute khensat theilo-in vaihawm ngam ding thute vaihawm theilo uh hi. Lokhokho ding leh singpuapua ding bek mahin kingaihsunsun lai uh hi. Buukteptep ding leh tuibuk muanmuan thei ding bek mahin kingaihsun khalai uh hi. Mipil-misiam hih ding ngaihsun ngamlo uh hi. Tua manin tualsung-khuasung leh pawlpi sung khawngah numei makai thei khat a om hangin ih zahpih lai hi. Numei’ makaihna nuai-ah numeite mah om nuamnailo uh hi. “Numei peuh pau kaka dah henla: omsuk peuh leh ai’ve” ci-in numeite mah phun masa uh hi.Thuhoih-lahoih a hi phial zongin numei’ gen ahih leh kimangnuamlo lai hi. Khatvei Khuado pawi bawl nadingin innnuai-ah papi khat in vok a mat leh a zi in, “ A bil pan man ve, “ a cih leh a pasal in a zi thu a man ding ut lo ahih manin a mei pan man aa, a khut kitol aa vok gamlakah taisuah ahih manin tua kum khuado pawi kibawl zolo hi,” kici hi.

2. Zomi Numeite leh Pasalte Liangko Kikim Na’ng
2.1. Numei Hih Ding Kiteeltheilo
Numei hih ding a kiteelthei hi lo a, Pasian’ hong piak letsong lianpen ( intrinsic gift)ahi hi. Tua ahih manin numei hihna hangin kisimmawh, kizawnsak leh kinenniam nading thu omlo hi. Liangko kikim tak-a nuntak nading hi zaw hi.Numei-a a kibawl manun pasalte’ neih theih hetlo naubu aa kipan nawizu cihte leh naukepdan cihte pen numeite manphatna ( inherent value) taktak ahi hi. Leitung thu-ah zong numeite kiniamsak ahih manin gam makai ding kiteelna ah zong me(vote) kipiasaklo hi.Tua manin numei pil masa ahi Hubertine Auclert, Sojourner Truth(1797-1883), Elizabeth Cady Staton(1815-1902), Lucretia Mott(1793-1880), Susan B. Anthony(1820-1906) leh Carrie Chapman Catt(1859-1947)-te’ hanciamna tawh numeite in mee a piak theih nadingin America gam panin hong hanciam uh aa, 1893 kumin New Zealand gamah numeite in mee piak theih nading thukhun bawl uh a, leitungah a masa pen gam hong suakpah hi.Tua zomah 1906 ciangin Finland gam, 1918 ciangin Rusia, Canada leh England gamte in numeite mee piaksak theihna thukhun hong bawlta uh aa, 1920 kumin America gam in hong zom uh hi.

2.2. Pasian’ Lim leh Meel-aa Kibawl Mihing
Numeite zong Pasian’ lim le meel (imago dei)mah tawh a kibawl ahi hi. Piancil sungah mihing kibawlna thu mun nih ah om a, a khatna-ah numei leh pasal a kibang lianin thakhat thu-in na kibawl in (Pian. 1:27), a nihna ah ahih leh pasal na bawl masa-in a nakguh panin numei na bawl hi(Pian. 2:22). Tu ni dongin numeite kiniamsak nuam ahih manin a nihna bek Khristiante in kibulphuh aa pasal a huh a kem dingin numei kipiangsak hi cih danin kikhia hi.A taktakin a huh a kem ding cih pen pasal kicingtaklo hi, cihna hi zaw aa, numei lo-in pasal bucing theilo cihna hi zaw hi. I Laisiangtho mahmah zong pasal thupina(patriarchy ) leh ultungna(male-domination) bulphuhin a kigelh ahih manin Pasian na ngawn pasal ding bekbekin tuni dongin kingaihsun hi.A taktakin cileng Tothum Pasian hihna sungah numei hihna (feminine) na om mawk hi. Pasian in leitung a piansak cilin a Kha tui tungah laam(hover) hi, kici hi(Pian. 1:2). Hebrew lai-in hih Pasian’ Kha cih pen Ruah kici aa, numei nam(feminine noun) na hi mawk hi.Tua mah bangin Greek lai-in Khasiangtho cih pen Pneuma hi aa, tua in numei nam(feminine noun) mah na hi leuleu ahih manin Tothum Pasian ih cihna sungah Kha Siangtho Pasian pen a nu danin kigenthei ding hi.A taktakin Pasian pen pasal hi ding hi, ahih keileh numei hi ding hi, cih pen mihingte in lai sungah ih ciapteh theih nading leh kampau tawh a kilawhkhiat theih nadingaa (linguistic animation) a kibawl hizaw hi. Pasian ii hihna taktak mihing pilna tawh theihzawh ding thu hi lo aa, “Numei hi: pasal hi,” cihna galpek ah om lai zaw hi(God is really beyond gender).

2.3. Numeite in Pasalte Sangin Hihtheihna Hau Zaw
Mihingte ih pumpi kilamzia leh ih hihtheihnate enkik lehang pasalte sangin numeite in hihtheihna neizawlai uh hi. Pasalte’ neih theihloh taibu na nei uh a, tua panin mihing kipiang hi. Mihing-a min piangte ih nuntak nadingin pasalte’ neih theihloh nawizu na neilai mawk uh hi. Kha sawm sung bang naupaite ahih manun tate itna leh khansuahna ah pasalte’ sangin siamzawtham uh hi. Tua ahih manin numeite pen manpha mahmah aa, hih theihna tuamtuam (potentialities) a neite ahih lam uh kimutheih hi. Zomite’ ngeina sungah numei lo-in khang a kisim hangin numei lo-in khang piangtheilo hi, cih ih pawk gige ding thupi mahmah hi.

3. Zomi Numeite’ Dinmun Bangci Lapsang Ding?
3.1 Pilna Sinsak Ni
Pilna ih cih peh thupi mahmah hi. Laisiangtho in zong na gen hi (Paunak 1:7). Pasian pen a pil Pasian hi aa, Pasian in mipilte mah na zang aa, Laisiangtho mahmah zong pilna bu hi pah hi. Tua ahih manin sangmang Joseph Herbert Cope in zong ei Zomite pilna tawh hong pantah ahi hi.A beisa hunin gam khat ii hauhna pen sum-le-paii, neih-le-lamh leh leisung sumpiang tawh kiteh hi. Tu hun ciangin tuate tawh kitukteh nawnlo-in mipil bangzang om cih tawh kiteh ta hi. Bang hang hiam cih leh sum-le-paii cihte pen zang lehang a beibei hi aa, pilna ahih leh zang lehang hiam semsemmawk hi. Pilna ih cih pen nget in ne theilo-in, kekseu thei lo-aa kiguksak theilo hi. Zang semsem lehang hiam semsem bek tham lo-in kimeet semsem laimawk hi. Gentehna-in Singapore, Korea, Japan ih cihte pen gamneu leh leisung sumpiang a tawmna gamte vive ahih uh hangin mipil tam uh ahih manin khangto mahmah uh hi.Singapore-te bangin a tuinek uh pen Malaysia panin a lei uh hi, kici aa, amaute in tui siangtho-in(drinking water) bawlin Malaysia gamah a zuakkik uh ciang tampi tak meet hi, kici hi. Kawlgam bang leisung sumpiang a tam mahmah hangin mipil ki-omnawn lo mawk aa, mipil sunsun teng lah gam dang pai mang(brain drain) ahih manin leitungah gam zawngpen khat suak hi. Kawl gam sungah Zogam in leisung sumpiang a tawmpenna mun ahi hi.I gam leh minam ih lapsan nadingin pilna ih hanciam ding kisam pen hi.Pilna tawh ih minam puah dih ni. I leisung sumpiang pilna hi sak ni.

Nute tawh ih kithuahna tampen ahih manin Zogamah mipil tampi a pian nadingin numeite in nakpi takin pilna asin ding uh kisam aa, pilna a nei numeite zong amah tawh kituak panmun leh za ih piak ding hun hi ta hi.Kumpi nasepna, tual sung nasepna leh pawlpi nasepnate ah a pilte a pilna tawh kituak-in panmuh guan aa, ‘amah numei hi lel,’ cih ngaihsutnate ih paihkhiat ding kisam ka sa hi.Tedim kampau Zomi numeite sungah pi Don Khaw Cing pen pilna sin masapen hi dingin kigen aa galpi nihna ma-in Monywa ah nausuak zato pilna lam na sinkhin hi. Kawlgam-aa sangmang masa khat Burman Baptist Missionary Convention-aa thuzeekpi sem ngei Erville E. Sowards 1950 kumin Khamtung gam hong pai hi. A ciahkik ciangin hi bangin thu na sung hi: Hakha ah tan 7 numei khat bek ka mu aa, Tedim-aa F. O. Nelson Lai siangtho sangah numei li kah in, nihte (Pi Luan Za Cing leh leh Pi Niang Khan Ciin) in kumli sinin zokhin uh a, khat(Pi Niang Khan Ciin) Assam ah zato pilna sin hi cih ka theih manin ka nuam mahmah hi. Khamtung gamah sangnuapang 6 ciangin numei khat bek in pilna sin zo hi, ci-in thu na sung hi.

3.2 Siamna Sinsak Ni
Zalom 21st sungah ih lut ciangin na khempeuh kidemna vive hi a, a pil a siam, a kivate bek in mun hong ngahta mawk hi.Khutdawh ngente nangawn siamna khat neihkul ta hi. Tua bang hun sungah Zomi numeite in siamna leh kivakna khatpeuh mah ih siam ding kisam hi. An huan mehhuan-a kipan nisim nuntakna-a kizang na khat peuhpeuh ih sin ding thupi hi. Khauphan leh puankhuai ahi zongin kizep-kipuah dan dongah midangte etteh-aa siamna ih sin ding kisam hi. Tu hun ciangin na khat peuhpeuh ih sep nop leh Mangpau leh computer ih siam kul ahih manin tuate a siamsa vive ih hih ding thupi mahmah hi.

3.3 Numeite Panmun Pia Ni
Numeite’ dinmun i lapsang theih nadingin panmun i piak theih ding kisam hi. Kipawlna khat peuhpeuh leh pawlpi nasepna sungah numei le pasal panmun a kikimin(gender balance) panmun i piak ding kisam hi. Mailam ah zong a pil a siamte a pilna uh tawh kituakin za leh vang i piak ding kisam hi.Tua ciang bekin i nasepna hong tangzaizo zaw pan ding hi. Pasalte leh numeite dinmun ih kikimsak ding(gender equality) kisam mahmah ta hi.MIT sang ka kah sungin Student Council ah kum nih sung makai-in ka kihel aa, makai ding ka kiteel ciangun numei leh pasal a kikimin kiteel ciatciat hi. Tu laitak leitung gam makaihzo numei tampitak a omlam zong i khuadak ding kisam hi. 2009 December kha sungin Dawei-baik Kayin Baptist Churches-te sungah MIT sang min tawh gospel ka pai leh pawlpi kem numei tampi a om banah upate sung nangawnah numei tampi a kihel ka muh ciangin lamdang ka sa aa, theihhuai tampitak hong theisak hi. Tu kumin Tedim Baptist Church-Yangon in zong upate sungah nupi nih hel ahih manin thu tampi hong hilh ka sa aa, ka angtang tuam mahmah hi.

Thu khupna
Tu hun pen thatang zang-aa nasep hun hi nawn lo-a khuak zanga nasep huh hi ta hi. I tutmun panin internet tawh leitung mun khempeuh kizin kawikawi theita hi.Leitung pen khuata (global village) hong bang takpi mawk hi. A pil a siamte a pilna leh a siamna tawh kituakin panmun kipiak huh hita hi.Tua hi-a, i minam sungah liangko kikim takin na sep hun hi a, a hoihlo ngeinate pai-in a hoihte puah aa, ih Pasian’ thu theihnate zong zaisak zawdiak in, tualniam Zomi numeite’ dinmun ih lapsanna in kumzalom 21 sungah hong tou tham ih masuan lianpi khat hi, ci-in ka hong theisak nuam hi.


 


Comments




Leave a Reply