WWW.TUNGZANGNEWS.COM

 
Daw Aung San Suu Kyi in a thugenna peuh ah Kawlgam kalsuan zia a gen ciang in “pilvanna leh lametna” tawh Kawlgam kalsuan zia lungngai ding in leitung gam tuamtuamte tung ah vaikhak hi. Tua bang mah in Zomite in zong pilvanna leh lametna lianpi tawh Kawlgam khuahun hoih laitak hun i zat siam ding kisam hi. Mimal hi in kipawlna hita leh tuhun laitak in suakta leh lametna tawh nasem in Zomite khantoh na ding leh kiukna hoih zawk na ding hanciam leng deih huai hi. A diakdiak in mimal tawh kisai a nei a lam Zomite in zong sumbawl hun laitak ahihi.

Kawlgam a hoih tohtoh leh gamdang panin “investment” tampi hong lut ding ahihmanin na sumte uh a meet ding in khah khia un. Ahizongin na neih khempeuh uh meet bawl sawm pah loin pilvang takin summeet bawl ding kisam hi. Zogam leh Zomi puah nuam dingte in zong tuhun laitak mah in huhna leh kizonpih ding kipawlna gamsung hita leh gampua lam pan hita a zon hun laitak leh a nasep kipat hun hita hi.

Nung in Chin State class X result hong suak in Tedim gam ah pass percentage hoihpen a, ahizongin tua pen 20% val deuh khong bek hi. Bangciang in 100% pass percentage tung ding i hi hiam, ki gen thei kei mah leh, lametna tawh education lam zong nakpi takin nasep ding tampi omlai hi. Education loin gamkhangto leh minam khangto i suak ngei kei ding hi. Khangnote lakah 20% bek in Class X pass ahih mah un, 80% bang pen lungkia leh thanem in om cihna ahihi. Kuate’n hih 80% teng thapia in i hanthawn ding hiam? Bang sem in bang bawl le hang lametna pia thei ding i hi hiam, ngahsut hun ta hi.

Kawlgam sung galkap ukna sung ah Zomi sung ah zong kilamdanna tampi hong piang hi. Tuate lak ah khat in “economic disparity” ahihi. Cihnopna ah, sum leh pai zonna leh, nei leh lam ah Zomi tektek pen a hau mahmah leh a zong mahmah kiom a, tuagel i nuntakzia tampi in kilamdang khin a, a lametna uh leh deihna uh zong tampi in kilamdang khin hi. Bangci leng hih “kikhaih luatna” neusak/beisak thei ding i hi hiam cih zong “issue” khat hong suakta ding a, tua manin Kawlgam hun hoih leh hun pha leh kiukna hong hoih semsem leh a nei a lamte in Zomite leh Zogam sung mahmah ah “economic opportunity” midangte a ding zong i bawlsak kisam hi. Cihnopna ah sep a pia thei sumbawlna (employment generating investment/business) tampi i kisam hi.

Tua ding in Zogam sung mahmah sum zonna nam tuamtuam a om kisam a, tua munte ah Zomi khangnote nasepna piak ding leh sinsak ding i tavuan in ngaihsun ni. Suu Kyi in pilna siamna lo tawh sum-le-pai khantohna pen bangmah a hih loh zia tel mahmah a, investment sang in pilna sinna leh “democratic institutions” te ah hong huh un ci-in British House of Commons ah thum hi.

Tua mah bang in Zomite in zong i kipawlnate zong ettel kisamta a, democratic institution bangteng nei a, bang zah kisam lai cihte pan in, kiukna leh nuntakna hoihzaw leh democratic values pen i sinthak ding kisam hi. Galkap ukna sung ah khangkhiate in zong i gamtatna leh vaihawmna te sittel kik in i theihloh kal in i deihloh socialism leh dictatorial kiuk zia leh vaihawm zia tampi i kawm khakte nusia in, paikhia ni. Kum khat, kum nih sung bek in Zomi sung zong hong democratic pah samlo ding a, ahizongin a lampi maan i tot ding kisam phot ni. I hat pah in, i siam pah nai kei zong in a lampi dik in maan sak lehang khangthakte in hong zomto thei in,hong dawn pah thei ding uhi.

Gampua ah a om Zomite in zong Zogam sung a om u-le-naute lametna leh deihsakna pia ni. A hoihlo lamte leh a piangtheilo thute gengenlo in, a piangthei ding thu hoih kikum in mailam kalsuan ding deihsakna pia ni. Sum tampi na khak sangin tawldam huai zaw kha ding hi. I Topa Jesu hong hilh leh hong piaksa “lametna” khahsuah loin, tulaitak kiukna hoih laitak khaksuahlo in kalsuan ni. Tun i khahsuah leh khang bangzah nungin hih bang “lametna kong” hong ki hon ding ngak kik leuleu ngai kha ding hi.

By: Carey Suante


 


Comments




Leave a Reply