WWW.TUNGZANGNEWS.COM

 


Ahun ihtel lohna banghang

Sial Sawm ahi a, Khuado ahi zong in Zogam ah ateng nawn lo te in paizia kitel nawnlo in kitel lua lo hi leh kilawm kasa hi. Bang hiam cih leh Sialsawm khuado, aci tawh, Khuado sialsawm aci tawh khangno teng ki gen zelzul lel hi hangh. Zogam om nawn lo tengnawn lo te in Lokho lo in nungta thei, Dawr te leh Companytuamtuam te, Factory te ah nun na khua man in Khai ci tuh hun , anlak hun ki theilo hipha ahihi.

Hih Sial sawm leh Khuado in Zomi puleh pahun lai a, nuntak zon na Lokho din mun tawh ki peemat mahmah cih ding ahihi.

Sial sawm i cihcih in bang ahiam?

Zomi te Zogam ah i ten kop liliai hun in khuazang bup biakna khat bek ah ki om hi. Dawi kibia ahihi. Tuaziak in beh kim, phung kim ah tulpi, siampi kinei kim tek ahih man in Siampi leh Tulpi te kipawl cing mahmah ahihi. Hih siampi teng an ne khawm ding hi leh Vok tuk 3 kicing' kikhom lo cih ding ahihi. Tua hih teh hih siam pi lianteng nekhom ding Sial gawh zong kul ahihi. Siampi 'tulpi ahon lom in kiom hun laitak ahihi.

Tualbawl nading Sial

Zomi pu leh pate hun tuma kumza val hun in Tualbiak, khuasiam kumkhat khatvei thoihna bawl uh ahihi. Tualbiak biakna, thoihna ah' ataktak inn khawi ganhing tawh kibialo kithoih lo in Zangsial tawh bia ding, thoihding athu ahihi. Tua ahih manin Zangsial beng ding in gamkuan uh hi. Zangsial sawm uh hi. Zangsial amat uh leh tua tawh Tualthoih ding agim lian pen ahihi. 

Zang sial man lo Sangak peuh amat leh zong Sial sawm hun ahih leh Zangsial man mah bang in mualsuah uh hi. Ahih hang tualthoihna in kizang theilo ahihi. Zangsial man lo ahih man in inn khawi ganhing tung tu in inn khawi ganhing tawh akicih mawhteh tualbawlna'thoihna, in zang pan ahihi. 

Azenzen in zang sial manin hi leh Tual bawl na ah asin alungteng akisam teng leh tulpi siampi te nekhom ding teng lakhia in tual thoihna ah huan uh hi. Asa dang teng khuazang in hawmto uh hi.

Tua tualbawlna thualthoihna sa akinek hun, akinek ni khuazang bup siampibup in cisawh lo in kine ahihi. Buhsih , Taangsih tawh ki meh lohi.Satui leh satakbek kimeh in Zeh kitang ahihi. Tua Tualthoih ni in khuazang bup miksii thovai pan kipan, nahteh te vulsak lo, Loono kiakte sisak lo, leigil saklo,leigilsuahlo in Zeh tang ahihi.

Banghang in zehtang uh hiam?

Tuhun ah upna in khauh mahmah ahihi. Tualbiak in khuasiam ahih man in lokho mite hausak thei upna, ankhingkikhomsakthei upna kipmahmah in nei uh ahihi. Tua tualbiak ni zeh tanman upna anuai abang nei uh hi.

1. Akivawh khaici te hong poma in ganhing zusa,simhbeng ,thankik,miksi te leh loono( kiak namkim) in nawngkaisak lo ding upna nei uh hi. Tua man in tualbiak ni- in bangmah miksithovai,leigilsuah lo sisaklo ahihi.
2. Akivawh khai ci in guahtui akisam zah lianbek angah ding lametna upna nei uh hi.
3. Akivawh khaici te apoma leh apozawh teh hawktui in ataih lohnading upna nei uh ahihi.
4. Akivawh khaici te avui lawk ataksa, agapcing ding lametna upna nei uh hi.
5. Kum khat lo khawh kum 3 kikhom in hau thei uh hi. Zeh nikhat bekbek tan hoih man in miinza aizo, taangza aizo ding upna nei ahih man in zong aizo tak pi uh hi.

Nikhat zehtan na i aman phatna

1. Khaici namkim kivawh te bangmah ganhing in susia lohi.
2. Loono,kiak namkim te kihem khia thei ahih man in' lolai ah kiaktampi polo lel hi.
3. Tua man in ankhungte atha nuam hi. Dawng mikmek hi. Adep aliah bang mah om se lo hi.
4. Khat vei ansawl la ci in lociing zagolpi khat singsawl khiak ziau tawh an la thei uhhi.
5. Sial sawm hun ah gamsial (zangsial) tawh athoih man in ankung agap avui hunteh , Vom, Zawng, Ngau,Ngal,Zusa, Zulei,Thetee, Gitta, Vaki, Va-ak cihte khuasiam in hem khia lel ahihi.
6. Tuukhun sung lolai miinciim se lo hi.

Hun nununglam Sialsawm

Hun nunung lam ciang in Zomi bup biakna khat kihi nawn lo in Dawikiphiatta ahihi. Tua hun hong tun teh Tual thoihna ding Sial Sawm zo nawn lo ahihi. Vok bek tawh tual thoih hun tung hi Kua man zeh tang lo hi. Akung te ading biak tuamtuam pan akibang nikhat thunget cih te om lo hi. Zeh kipit ta hi. Anki zawng hi. Anki taw hi. Zomi te lo lai ah Zusa vasa te sin so hi, Gahing man kim in ankung susia in kizawng hi. Loopaa te leh sawlpaang te in na an kungte khum ciphi liah ciphi. 

Ankungte sawlpaang kawm ah zendikdek in agui agap picing zolo hi. lolai te miin ciim lel hi. Ankungte hawktui in nil siang kolh thei hi.

Sialsawm icih Lawm annek hilo

Khua khat leh khua khat zat dan kibang lo ahih ziak in Sial sawm lawm anek aciki om hi. Nidang in Lawm annek acih pen atuam in omlai ahihi.

Khua khat ah lo kikho kim tek ahih man in nungak tangtang val te lokhawh kilawm uh hi. Munkhat lokho azawh teh alawm te lo mundang khat lokho uh ahihi. Tua lokho lawm ta teng lokho kilawm te in tuuk tun teh hunkhat la khawm in amau kizawl ,kilawm ta teng Lawm annek khop acihihi. 

Lawm anek khopna ah Tualthoih na om kilkel lo ahih man in Sialsawm leh Lawm annek akibang lo ahihi. Lawm annek na ah Zehtan cihzong omlo hi. Sangbeng mualsuah cih zong omlo hi. Tuhun teh lokho kilawm cih omlo Sialsawm Tualthoih zeh tan cih omlo ahih ziak in Khangthak te in lozong kikho lo in kikhua sa ahih ziak in Sialsawm lawm an neek kicih khawm kammal kigawmkhawm kha ahihi.

Khuado

Khuado izat dan atatak in Lungdam koh hun' nuih ziahziah hun, Lamziahziah hun Zomi te ading anuam penpen hun ahihi. Nidang in Khuado akibawl ciang in ni7 sung hunla ahihi. 
Banghang nisagihsung hun lathei;

Tualthoih, tualbiak hun ah athupha nget uh miim guilawk taangguilawk thupha Zu akhum thei pen in sa uh hi. Tua zu pen Saibel ci in Khuado hun teh Zucik mahmah alup pen ni7 teh peeng pan ahihi. Hih pen thukhat hipan ahihi.

Khuado hun Meilah sat ni, Pansik ni, Khuai lak ni, Mualkuan ni, Khuai thak tan ni, Daihawh ni, Khek leh ni cih ni7 om ahihi.

Meilah sat ni

Khuado kipat ni hun teh khuado hunsung ah meiphual sat in lasa uh ahih man in meilah, taakkungciim tam pi kisam hi. Kaudeng ahih man in meikuang sa meilah det kul ahih man in Meilah tampi sat in kikhol ahihi.Anitak teh khaudeng, Kauhawl,kau nawt kipan pah ahihi.

Pansik ni

Khuado hunsung nekzihziah ding sakigo ahih mah in tuani pansik ni suak sak in sawmtung, sawm nuai , sawm lai cih bang asawmsawm in kipawl in sago ziahziah ni ahihi. Sawm tangvalte daak tum in sawmtung, Sawm lai Sawm nuai kidem bawl in Khuazang bup in Khuang, Zam, Daak ,Sialki ging khuagal pek dong ah kiza ziahziah ta hihi. Sa kiem ahih man in mui nam viauviau a, khuazang bup muikhu kizel to zingzeng hi.

Nitak teh tua ni a akigo , akilup zu te khawlh in sathau tata kampidim let in ki bak pah phiauphiau ahihi.Saki bak pen it penpen atheih loh kikal kikhum khiankhian in sathau bekbek kampi dim kibak benban ahihi.

Khuai lakni

Maikum ah hauding maw? zawng ding? Khuai tungah aisana kinei ahihi. Tangval teng leh siampi teng in khuai vala uh hi. Khuai pen Tunhpi khuai, Ngalthen khuai, Ngaltun khuai, Tunh pi laikang, Zanta khuai hih te kitamzat penpen ahihi.

Khuai akilak hun in khuai te ataktak in ki thatlo in kihawl khia bek a, ano deihzah akingah teh kitai zaw ahihi cihi. Khuai lak pen kizekai thei ahihziak in nikhat aseh uh ahihi. Khuai lak olte tunimah mual khuan pah uh ahihi.

Mual kuanni

Khuaila te in innciah pih masa lo hi. Khuamual ah mual kuan pih hi. Khua mual atun ciang in Taangthau sam hi. (Taangthau, sakap na thau hilo) Tangpi tangta te kihau hi kithau hi. Miinkung taangkung te guipha hi, taksa hi, thau hi.) cihna ahihi.

Taang thau e, Taang vom tangthau e, Taangsan taangthau e..... ka pialsak awng lai e.. kapialkhang awng lai ee... kamiim bem awng lai e... Kataang bem awng lai e..... Ka miim bem ah hong tum aw, kataangbem ah hongtum aw..Natun nagei hi e Naban nangei hi e. cih siampi khuai buktawi pan awng ahihi.

Khuai la te mual ah an kipuak hi mual ah an nekhawm uh hi. Mual ah lamkhawm hi. La asak ma un phit mutsa in mual lam uh hi.Phit tum te mai ah khuai kilam pih viauviau ahihi.

Lasa kipat ding in Khua mualpi la samasa uh hi. Lamkawila, Khailiangla, Lokuan dainawk la, lohunla, Thanghola, Tuibunghla, Liahel la,Tuak khial la, Ngaihno bekbek la, Vaiciah la , Lamkawila, Tual omp lakaih la ( siampi tengbek saktheih) Tual omp latawina la, cih te sa uh ahihi. Hih khuado hun akisa la te adang zola sak te tawh awng kibang lo hi.

Lia hel la sak pak ni

(a) Liaka hel aw, Liakahel aw e' sesum lo a, lia kahel aw e..
(b) Sesum lo a, Lia kahel aw e, Sesum nei te' lianu'n ngai hi e... cih te kisa ahihi.

Khuai thaak tan ni

Hih khuai thaak taan ni in khuai om zia maikum ah khua lal ding ahau ding khua i nisuah na lam , nitum na lam , khua lu lam khau tawlam om zia lungnuam tak ahau ding ki lam en tek ahihi.

Dai Hawh ni

Dai hawh ni in sisa pi leh pu te lutang koih na ahan ah misi lu teng kaikhawm in sathau zut in ankhuang luina bawl ahi. Hih thu tampi kizom tom lai ahihi. Tomgen inhi leng Thangho in Lian do han ah pai in akah kawmkawm in lasak hi.

(a) Dona lingling Donalingling gual in kumkhua do nalingling..
(b) Gual in kumkhua do na lingling Dohan ah nau bang vakap tang e..

Khek leh ni
Hih khek leh ni in khuado hunsunga, innbuan inn niin teng kiphiat siang, Zu lupna zubel te buah siang, pho keu ni cih in ki tom lak thei pen ding ahihi. Um leh bel kizang kikawm teng anei te kiang tekah kipia kik ni kiap kik ni ahihi.

Tu hun ciang Khuado

Tuhunciang khuado cih anlak zawh hun cih gampua ah om theilo ahih hang in anop cipenpen anuam penpen in ngeina kip nei ngeina la te thu te kihilh kimop ni Khangte tungah akipsemsem a, kipat tah ni Zomi te khuado nithupi sak semsem ni ahih ding han ciam huai mahmah ahihi.

Sial Sawm Leh Khuado

Sialsawm hun in Thupha nget ni , thupha nget hun Zomi te ading atuamvilvel hun, Khuado hun in Lungkoh ni kipaak ni anuam penpen hun . Ngeina thu ngeina la te kihilh kimop hun leni te ahihi. Hih sialsawm khuado pen ani kibang kimlo ahih mahbang in khuakhat leh khuakhat tatdan lasakdan them tek kilamdang ahihi. Hih thu atamzaw Kakhua uh ah tualphuisam nunung penpen Pu Nengzathang Naulak (kum78) 1997 sikhin tung pan hongngen te zong kihel ahihi.

Hau Thang
ZomiDaily

 


Comments




Leave a Reply