WWW.TUNGZANGNEWS.COM

 
Zomipih Ute naute

Zomi nam ni pen online pan i muhsa mah bangin Tedim ah kibawl ding hi.

A kibawl ding tawh kisai-in a thu i tel ding pawlkhat om sa ing. Khat bek min maw, pawl khat bek min aw or kua hiam khat min cih dan-a i angtan pih ding dan theihhuai pawlkhat hong hawmsawn nuam ing

Zomi Nam Ni (Kawllai in Chin Amyotha nih) pen Kawlgam bup sunga gamkhen, tulaitaka Chin State cih gamkhen sunga minamte' Ni a hi hi.

Tua a hih manin Zomi i kici-a, Chin i kici-a, Lai i kici-a, a dangdang i kici zongin Chin State sunga teeng te' Minam ni a hi hi. Tua manin Chin kici nuamte or kicite, Zomi kici or Zomite, Lai kici or Laimite, Asho kici or Asho etc..... te' Ni a hi hi.

Zomi Nam Ni pawl ding pen a diakdiakin Tedim ah bawl ding hoih kisa tek napi lungsim tha, sum tha, mihing tha kithanem a hih manin deihzahin picing taka vaihawm zawhna kinei lo a hih manin Zogam (Chin State) ah a zumhuai phial Khuapi khat kitung hi.

Tua kawmkal ah, ZCD in Zomi Nam Ni bawl theih nading appointment ngena ngah hi. Tua teh a kua kua kithuza kim zo lo a hih manin CNF in zong Tedim ah bawl ding (Chin Amyotha Nih, cih min tawh) bawl ding geel uha, Halkha ah CNF in a bulpi buah budget tul za 75 (tein sawm sagih leh nga) geelkhia uh hi. Tedim adingin Tein khat sehkhia uh hi. A hi zongin tua tein khat tawh (tul zakhat) tawh tulai sum zat zia dungzui-in Tedim khuapi huam zo dingin kibawl zo lo ding hi.

ZCD in zong mihing tha leh sum tha tawh kibawl zo lo ding hi, ci-in geel haksa kisa hi. Tua teh Township Administrator in bawl ding thu hong lunggulh pih mahmah hi. Amah zong Zomi (Mindat?) khat a hi hi. Ama lunggulhna ah Khuanu Khuapate makai-in bawl ding lunggulh hi. Tedim khuanu khuapa te lampan aw hong gingkhia zolo hi. (Sumtha leh a tuamtuam hang ci ni) Tua teh khangno nih leh thum a vei mahmahte in TYF makai-in bawl zo lehang cih kigen teka TYF makaipa Pa Nung Sian Tuang in a vai sah lua (tulaitak Unicef lam pan sangnaupang list, a khuakhua pan laak ding leh van ding) ahihna tawh makai zo lo ding a hihna genkhia hi. Tua teh Khangno bek tawh a kisai lo ZOZUUN min tawh kibawl leh cih thu a hi hi. Ahi zongin Administrator pa ii ngaihsutna hoih kisa-a Party khat bek, or kipawlna khat bek vaihawmna bek tawh i minam bup Ni bawl ding sangin i minam bup a huamin i vekpi (Chin State Bup ii Ni) huam zo ding hi leh cihna tawh Feb. 14, 2014 nitak in Sia Kham Lian Thang(Sia Thangpi)' inn ah kimuhtuahna khat kinei hi. Tua tak ah USDP, ZCD, CNF leh ZOZUUN cihte leh Khangno pawlkhat kimukhawmin a nuai-a bangin Zomi Nam Ni bawl ding kigeel hi.

Zomi Nam Ni Bawl nading
President - Hau Suan Cin (ZOZUUN)
V-President - Sum Suan Lian (ZCD), Do Lam Mung(a) Munglek (Manipur Store)
Secretary - Nang Hau Mang (ZOZUUN)
Asst. Secy- Nang Hau Mang (ZOZUUN)
Asst. Secy- Lal Chhung Pui-a (ZOZUUN)
Treasurer- Gin Sian Khai (ZOZUUN)
Asst. Trea.- Gin Suan Nang (ZOZUUN)
Auditor - Tual Khen Kham (Ka Zaitha Secretary)
Auditor(2) - Lang Za Mang (CNF)
Member - Vungh Pian Thang (Township Development Department Head)
- Thang Kim Khai (Principal- Government Technology H/S, Tedim)
- Nang Kim Sang (Siamsin)
- Sia Kham (Taxes Department)
- Administrators (Tedim four Yatkwets)
Music - Cin Lam Tung + Pau Teng Khai (Mei tawh kisai hong vaan pah ding uh hi)
Security - Suan Sian Dal + Khai Thang

Hungeelna leh panmun tuamtuam

February 20 ni in Zomi Nam Ni kibawl ding hi.
A mun ding - Zolengthe Naipi Tau ah - (Kam Hau Kimawlna Innpi a lem leh kilaih thei)
A hun - Kimawlna leh gualnopna tuamtuam pen 9:00 Am hunin kipan ding hi.
Nitak - Zomi Nam Ni thu tawh kisai thugenna Tedim Township Administrator leh Siap ThangKimKhai.
Stage lam ding - Township Development Department Head kiangah huhna ngenin, Nang Hau Mang, Hau Suan Cin, Gin Sian Khai, Sum Suan Lian, Lal Chhung Pui cihte kiseh hi.

Gualnopna tawh kisai - Gin Khan Thawn in Management hong sem ding hi.
Ngeina Lam tawh kisai Anlak lam pen Dimtui Ngeina Makai Siama Ning En Hau in tavuan hogn la dinga, Hualngo, Laipian, Mindat, Falam, Matupi ngeina lamte a hih theih leh kilak ding hi.
Zo Ngeina lam, Phit lam pen Pa Gin Lian Kap in hong makaih dinga, Daklam pen UPC pan Sia Langh ing hong makaih dingin kiseh-in, Lamvui pen Pa Khup Lun in hong makaih ding hi.

Announcer pen Khangnote pattahna in kisinsak dinga sangnaupang lam pan kiseh ding hi.

Zomi Nam Ni a pianna leh thugenna pen Township Administrator leh Siapi Thang Kim Khai in hong nei ding hi.

Sum leh pai fund om lo ahih manin Committee te in pawisum ding zonna kinei ding hi.

Genbehna:
*Zomi Nam Ni pen Galkap hun sungin Tedim Momno Sub-Committee in kibawl dena, Stage Laisuanna ah Kawllai in a kigelh teh State Day kici zel hi. A nuai ah Zolai tawh Zomi Nam Ni mah ci-in kigelha kibawl den hi. TYF hong khan teh TYF in hong makaih to hi.

*Tukum teh i Gam kikhelna tawh kizui-in Zomi Nam Ni or Chin Amyotha Nih kici lang theita hi.
Tua tawh kisai-in ZCD in appointment a ngetna ah tua ding mahin ngena ngah hi.

*CNF in zong kumpi tawh agreement ah Chin National Day cih ding thu point khat-in kihel a hih manin amau ngetna hang tawh National Day cih kammal a hingkik hi, ci uh hi.

Zomi Nam Ni tawh kisai pen kuakua in a siau, a ngen zongin a mipite ( a minam ding ) a thupipen a hih manin Party khat, pawl khat cih bang aa bek hi lo-a, Zomi (Chin State sunga minam khempeuh) ii Nampi Ni a hih manin mipi a om mana National Day a kici thei hi zaw a hih manin pawlkhat leh Party or a kuakua ii minphat nadinga zat ding pen a hoihpen khatna hi lo kha ding hi.

Tua ahih main Chin State sunga om minamkimte' minam Ni a hih manin USDP ah i om-a, NLD ah i om-in CNP leh ZCD ah i om-a, CPP leh NUP ah i om-a, CNF ah i om zongin i vekpi ii neihsa i Minam Ni a hih manin ZOZUUN in zong amau bek min pua lo-a Tedim khuapi-aa om Khangno khempeuh ii min tawh a kibawl ding hong suak hi.

Tua pen Administrator pa ii deihna zong a hi hi. Pawl khat bek ii minphat nadinga bawl ding hoih sa lo hi. Tua mah bangin minpha tuam i om lohna in i vekpi a kipumkhatna leh Minam Picing i hihna a hi hi.

Thu khat ah nidang hun Momno min tawh a kibawl lai-in kha khat khat nih kiginkholhna leh geelkholna tawh a kissem hi-a tukum a hih leh lametna leh ngaihmuanna a omna pan hong pian theih loh teh committee kineitawma kisem ding hong suak kik a hih manin kigin hun sung ding mi 6 sung bek kinei a hi hi. Tua banah Kawlgam kumpipa hong pai ding tawh a hun kituak toto ahih main minam mimal tawm Zomite' adingin lamet zah leh kicing, nopci lo cihte a om khak leh zong veina tawh a kisem tek bek hi, cih Zomipihte in nong telsiam tek ding uh kong tangko hi.

Tua bek tham lo in, Gullu vai, June kha teh Zosuan Tuailai Khawmpi ding vai tawh kithuahin i nisim nuntak zonnate tawh kibuai tek a hih main a kicing lo hi nong cih ding uh lameetna lianpi tawh

Hau Suan Cin
President
2013 Zomi Nam Ni vai Committee
Tedim
 


Comments




Leave a Reply