WWW.TUNGZANGNEWS.COM

 
2013 Zo ngeina Khuado Pawi D.C Area ah picing takin kibawl

Kum sim aa Zomi ten i bawlden ahi Zo ngeina Khuado Pawi leh Zomi Innkuan D.C kum (12) cinna Pawi pen D.C Area (Maryland, Washington D.C, Virginia) kiim aom Zomite in October 19, 2013 ni Nitak lam in St. Steven Lutheran Church (Fellowship Hall), Baltimore ah Zomi Innkuan Washington D.C makaihna tawh nasia tak leh picing takin kibawl aa, tualai ah D.C Area om Zomi tampi ten vamuak thei uh hi. Tualai ah Zo ngeina laam lahna, Zo ngeina lasakna, Achievement Award piakna, Dr. Chin Do Kham phawkna hunkhat bawlna, 2014 Zomi Namni aading "Vote" piakna, Letsong (Special Present) hawmna, Lucky Draw honna te picing takin kinei thei hi. Zo ngeina lam lahna ah Zomi D.C Khangno ten Zo ngeina lam hoih mahmah khat hong laak thei uh aa, nopci kisa mahmah hi. Zo ngeina lasakna ah D.C Area om Zomi Lasa siam ten la ngaih no no hong sa ziah ziah uh aa, D.C Area om Zomite Music Band khat ahi "Cross For Freedom (C4F)" ten hong tum uh in, siam kisa mahmah hi. Dr. Chin Do Kham phawkna hunkhat zong kinei suak thei aa, Dr. Kham taangthu tom genna, Dr. Kham memorial Photos te lahna, Dr. Kham phawkna lasakna kinei thei bek thamlo in Dr. Kham phawkna leh zahtak piakna in "Minute Khat" daihna zong kinei thei hi. Achievement Award piakna ah degree/certificate/diploma ngah Zomi 14 te pahtawina kipia thei hi. A kizom in Zomi Innkuan D.C thu khensatna (Dated: January 27, 2012) tawh kizui in 2014 Zomi Namni pen Zomi Innkuan D.C makaihna tawh "bawl ding" leh "bawl loh ding" Mipi "VOTE" piaksakna kinei aa, hong pai mipi atamzaw in "bawl ding" in vote pia uh ahih manin 2014 Zomi Namni pen Zomi Innkuan D.C makaihna tawh Mipi atamzaw khensatna bangin kibawl ding cih makai lam pan taangkona hong nei thei uh hi. Pa Khai Cin Pau (U Khaipi) ii Special Present (letsong) hoih mahmah khat ta hawmna zong kinei suak thei hi. A kizom in Lucky Draw honna zong kinei thei aa, hunte 10:45pm kiim in nuamtak kizo thei hi. Khuado pawi in Zomi i hihna hong kilangsak bek thamlo in i Zo ngeina manpha kepcinna ahih manin Zomite in koi koi i tung zongin i om om na ah i Zo ngeina "Khuado Pawi" pen i bawl tek nang thupi mahmah hi.
 


Comments




Leave a Reply