WWW.TUNGZANGNEWS.COM

 
UN piak niding ki khinto :: UN Officer te’n nikhat in mi 600 takhawng alam et pen Zomi te kitamlua mahmah ahih manin ninihsung ihlut bekbektawh kalkhatsung Appointment Date dimto pahhi. Tuahang in 24 & 25 October ninihsung alutding ZAM Card tawi Zomi te aki khinto kikphot ahihi. 22 & 23 October ninihsung Tau aki bulhsaksa mi 3000 val te Interview ki bawlphotding a, amankhit ciangin adangte hongki samkik ding hi.


Appointment Date :: Tau bulhsa tepen Appointment Date 28, 29, 30, 31 October leh 01 November akipia vive hi a, tuate ani kikhelna omlo hi. Appointment Date ngahsa te zingsang 6:30 am lapsawm hamtang un. Na Tau (Wristband) uhzong hoihtak nakem un, na lakkhiat khakleh aki lutkik theinawnloding hipah hi. Interview niciang na Tangthu puakding mangngilhkha hetkei in.


Guihtheih khamtheih kideihlo :: UN minsanna piaknading in FGA biakinn sung akizang ahih manin omdan, khawldan theihsiamding kisam mahmah hi. Za teploding, Zu namloding, Khaini, Sahdah muamloding, Dainawl khawngah zun phengthak loding cihnengneng te kigengenzong maizumhuai mahmah hi. Thupuak ahzong tamveipi hongki genkhinzo himah taleh mipi lakah zatep pawlkhat omveve a, Officer te hehmahmah uhhi. Officer tezong gammite vive hizaw a, Muslim te'n zunelo uh ahih manin Zu, Zu namsa in nalut leh hongki hawlkhiakik dinghi.


Unau lutpih te :: Sanggam kum 18 nuai tebek kumcinglo in ki lutpih theihi. UN Officer te mihai hisamlo uh a, akum cingpipi kumcinglo cih khemding hilo hi. Kumcinglo in akhemte anih in ki ciahsak ziauziau a, UN alut theinawn loding hipah hi. Unau nahih uhleh nanu napa minkhawng uh akibat kulsam hi. Kumbangzah kihal nahi uhhiam hongkicihleh nadawntheihpah setsetding uhzong thupi samhi. Atelthei pahding in lamen hang.


Na Card ahing laihiam? :: Na ZAM Card zong ahing (Valid) ahihding thupi hi. Officer te’n ZAM Card asikhin atawite aciah sakkik tammahmah hi.


Lungduai leh thuman kisinni :: Nikhat mi 1000 leh 1500 kiimtabang alutden ahih manin ih mipi te uk hamsa mahmah a, tawmveisung bekbek ahi zongin makaite hongcihcih nathumang teta phot un. Hihteng ah kigualding acihleh nakigualpah un. Khua makai te leh Pawlpi makai te'nzong honghuhthei uh ahih manin ki lungdam mahmah hi. Kampau, mukpau kakhialh uhlehzong hongna telsiam photmai un, hongkinot ziahziah khading hi.


ZAM ah na sittel hiam? :: UN pan hongkisap hangin ZAM zumah nanu napa min hongkancian theilecin hoihzawding hi ci'n Thupuak ah ihsuahsakdet hi a, pawlkhat hongkanlo te buaina ompah hi. Anu apa min bangcipiak, aminpi maw, minneu citawh acimawh honkhat ompah hi.


Palik te hatmahmah :: Tusungpen Kuala Lumpur sungah UN Registration kipia cihpen Palik te'nzong natellua mahmah uhhi. Tua ahih manin koikiu pan manding, sum ngending cih hong ensimsim omden cih thei in. Meileng Station, Bus Station te ah miman te cidinghiam sumzongte cizawding hiam omden uhhi. Highway Bus Station te ahzong tuni akiman honkhat omhi. Lam napaiciang napai nading enkhol in.


ZAM Card tuh kiman (Fake Card, Imitate Card) :: UN minsanna ah a ngahding taktakpa, a ngahding taktaknu in angah theih nading deihsakna tawh ZAM palai te leh khua makai te, pawlpi makai te in hanciam takin misit telna or card sittel na nei masa uhhi. Nunginzong ZAM card taktak ahilo, bawltawm cardatawiNeih Kham (ZAM No. 15427)Sawm Tuang (ZAM No. 11876)ki mankhia uhhi.


ZAM Card tuh aki lim etcik mahmahna ahang ahihleh Card tuh abawlbawl tepen sumzonna in anei uh hi a, min khatciang khatbek bawlhetlo in tampi nabawl hamtangding uhhi. Tua Card aleikha tepen OPE, DHS Interview ah min kibang in kiatlawhding uh a, ih minam in maizumlawhding, zumvai minamvai tampitak nawngkaina omding ahih manin thumanlo ki deihvetlo a, aki lim Check mahmah ahihi. A ngahding taktak khatin ngahlohlawh in akisailo khatin angah pen lungdam pihhuai hetlo hi. Thuman thutak tawh ih kalsuanding ki hanthawnding hihang. UNHCR in zongFraud Casezakdah mahmah hi. Kidawm mahmahding hihang.

ZAM Card khatciang RM50 :: ZAM panin UN Card vaitawh kisai sum pekkhatzong ki lalo a, UN Card ngahtheih nading sum hongki ngetleh thumanlo hi cihzong mipi te'n natheih pahding uh ahihi. Tuaban ah ZAM zumah nong zaksakpah nading un mipi tungah kongthuum uhhi. Tuni akiman ZAM Card tuh tezong khatciang RM500 tatawh ki leisak cihi. ZAM Card bawlnading RM50 bek kila ahih manin tuasang atamzaw hongngen aomleh thumanlo hipah hi. ZAM Card tuh abawlte zong aki sulzuih laitak hi a, maizumlo takin hongsepsuak teitei uhleh akisam bangin zumpan kisemto dinghi. Zomi leh Zomi thusia kibawlnuamlo ihhih manin abawlsakpa hongkidop ding akhuapih tanau te'nzong na genpih un. Abawlsakpa zong UN Card neikhin cihzong kithei a hongkidop keileh UN zum ahzong akisapleh ki Report dinghi.


Lungdam kohna :: John Mungpi (Klang Zomi Ansai) te innkuan in Thupuak bawlnading RM200 hongpia ahih manin ki lungdam mahmah hi.


Kamphen te panpihna :: Malaysia Zomi Churches Association (MZCA) panin UN minsanna ah kamphen te panpih nading RM1290 honghuh uhhi. Niang It Lian leh Niang Lian Dim te lawmta inzong UN Tau angah uhciang in lungdamlua uh a, Kamphen cialnading in RM50 tuak hong piakhia uhhi. Mimal leh Pawlpi pan panpihna hongpia te tungah ki lungdam mahmah hi. Adang hong panpihnuam aomlehzong lungdam takin ki sangding hi.


MZCA Calendar & Ordination DVD :: MZCA pan akibawl 2014 kum ading Calendar ki ngahta hi. MZCA Ordination piakna DVD zong ki ngahta hi. Adeihte’n 017-334 2760 ah ki Contact theihi.


Dr. Do Kham sihgalna :: ZAM makaihna tawh Malaysia gamsung aom Zomi te’n ih Zomi makaipipa phawk na Memorial Service pen ZAM Hall ah October 19 ni in kibawl hi. Malaysia gamsung pan Dr. Do Kham sihgalna akigawm RM4000 bang ki ngahkhin a, apianuamlai aomleh November 04 nidong hongki ngakding hi. Tuani khitciang in akingah khempeuh USA ki khakding hi.

Zolia leh Zotaang in Zomi Khuado zeemta 
(Khuado Pawi Report - nungkal pan azom)

ZAM Makaipi thugenna :: Hunkeem pan in ZAM President Sia Hau Khai thukonghonna leh Khuadopawi nuamtak zat ziahziah na ding thupulakna aneih sak khit ciang in mipite in dai khikhe tak in Dr Chin Do Kham zaktakna kipia hi. Dr Chin Do Kham zahtakna kipiak sung in’ ZAM Advisor Pa Kam in Dr Kham Minsialna agingtak in hong nei tete a, mipi te khitui luakeuhkeuh honkhat ki om in tissue in daihlo liang in tissue kihawm thiamthiam pawl khat ki om ahihi.

Zinh Mangpi te tunglungdamkohna :: Tutung Zolia Zotaang amasa pen kibawlna Khuado ah hongpai Zinhmang pi tea hi Pu Hang Khan Lian, Rev Fr Robert Kam Hau leh adangmaitangzahtak te tungah Sia Mung in “Khuado Thupha” acih leh mipi Hongtung tahen! Sia Kam Mung “Khuado Thupha“ Mipi in Hongtungtahen kiciziahziah hi.

Lasakna kipan leuleu Nuamboih :: Lasiam Nuamboih lasa ding Sia Kam mung in hong sap lian ciang in anunglamah tangval tebang thangahlua in hong awng khia beba liang zen a, Nuamboih in mic alak lian ciang in Mikhat in mipi sung ah “ New life for you Ministry” II Cor -5:17 lai hongkihawm phei lai tak in Nuamboih in alahongsa a, lengthekhuangbang kelkel ahihi cihi. Nuamboih lasak hunsung in mipi inzong sakpih pianpian uh a, tualaitak in ZAM zumnasem Tha Mung leh Kep Lian te in mipi lak ah tuisiang tholno khatta hawm in buai mahmah uhhi.

Zolia leh Zotaang Round masa kipan :: Hunkhenkilaih leuleu a, Francis Khampi in dawhkantung a kipheikoih mic hong la hi. Tautung mipi maiah nui hiuhiausa in hong paiphei denden a, Alai kimpawl hongtunteh Deih Mang in mic khatmah la in Francis Khampi namun tautunglam zuan in hongpai leuleu hi. Francis Khampi leh Deih Mang hong kiho in bangciding ihia cih khiteh Zolia Zotaang hongvai din pih U Kaino leh asen angkawi te hongsam uh a, tautungah mel kilah na hong bawl masa uhhi. Tutung Zotaang vaitawh kipawl in pahtawina hongpiaksak dingte ahi athumna Pu Hang Khan Lian, Anihna Pa Pau & Nu Cing te leh Akhatna Aungnandawr te thupulakna lungdam kohna hong nei a, mipite kipaak in kiawng zeizai liang hi.



ZoLia tawh kipawl in pahtawina Athumna John Mungpi te nupa , Anihna Khuado pawi Committee leh Akhatna Pu Phillip Muang (Tuangzalat) te tung ah vai adinpihna lungdamthu kitangko khia ziahziah hi.

Kitelziadingleh thukhenmangte ding :: Zolia Zotaang 2013 Malaysia kitel zia ding leh thukhen (Judge) asep abawlzia alading in Innteek Malaysia miminthang Belle Rahim, Janet Lee, Evan Siau, Chua Chong Aun, Susan Chan Yoke Kwai, Gennneva Tai leh Photographer& Video vaisai tem el kilahna Francis Khampi leh Deih Mang in hongmakaih in hongbawl khia ziahziah a, mipi in naupang pan kipan Uham samkang khinsa dong in mittang bempeupeu in etkiciim theilo in kien a, tha kingah mahmah hi. Tua khit ciang in Zolia, Zotang te aomnapan in tautungah hong paithei ta petpet a, mipi in Huaaaahuaaa huaaa.. ci ziahziah bek uhi.

Khuailakna kilahna :: ZEC sangnaupangte tungpan in nidanghunlai a, khuailakna honglak leuleu uh a, muhnop kisa mahmah hi. Khuaila hongsa uh a, Khuaibu nih tak hongzawng uhi. Akhuaibu zawn te uh alian pipi in bawl uh a, vialthum vei apai khit ciang in aomna muntek azuan uhi.

Dr Cin Sian Pau thugenna :: Khuailakna ZEC in honglah khitciang in Dr Cin Sian Pau Ngeinathu, Khuado thu, limcitak in hongen hi. Honggen na ah Minam khempeuh in ngeina ciatna thu leh minamlian ihih nak leh ngeina hoih neihzia kepzia phuahzia te thuhilhna hong nei hi. Innsung ah ngeina kizang te, Beh sungah ngeina kizang te, Khuasung ah ngeina kizang te leh gamsung (Kam Hau) thukhun zatzia te limcitak in gen hong nei hi. Tuaban ah silh leh teen zia, lasak laphuah zia, minkitapzia, Khangsimzia, kiciantakin thuhilhna khangno tetungah nei a, khangno te in ngei na thupizia te tampitak kithei hi. Tuaban ah Khuado vai pen anlakpawi, Kumkhenpawi, Zin leh lengdo pawi cih namthumtawh hilhcianna hong nei hi. Zomite nisimna zong kiciantak in hong gen a, Ei zokha simna leh mikangte khasimna kibang lo hi. Ei Zomi ten zong Zokha simna inei a, tua, izat pen Zawmah te khasimna ahihi cihi.



Sialsawm pen thupha nget hun , thuphanget pawihi a, aneihloh huntawh kituak den ahihman in sialsawmpawi bawl ding hamsa kisa ahihi. Thupha Zomi ten kideih a, Zangsial kingo thawh tualthoihna kibawl nuam ahih man in sialsawm pawi kicihi. Sialsawm hun in imatsa peuhpeuh kimualsuah thei ahihi cih thuhilhna hong nei hi. Donalingling la pen kahla hi a, tamlawhna ala ahihi. Donalinglingisak ciang in nawhsak saisai ding ahi kei hi. Babylon lasa in lamziahziah pen ataktak in kahla ahihi cih hilh diktelna kician anei hi. Khuai thutawh kipawl in khuai inkumthei hicih upna kinei a, Khuai ki ai hi. Khuai ai te asih ciang in misi bawmnuam tho te khuai in petlumpahpah ahih theihna ding in khuai ki ai ahihi cihi. Khuado cih pen daihawhna zong hi a, Asisa pi leh pute leiah kiphumlo a, aguh kikoih te kiphuahsiang in ankipuak ahihi. Dohan ah naubang kap cih in thukho pang ahihi cihi. Thulamdangkhat in kigen lehang ei Zomi te sila namte ihikei hi. Sila anei nasem anei minam te ihihi. Minasem ding ihi keia, einasem ding mite asam acial minam te ihihi.

Lasakna kipan leuleu :: Lasiam Thawnpi hong kipan leuleu a, amasak khit teh lasiam Cinpi leh alawmte mithum lasakna neileuleu in lakhuang kelkel bek hi. Cinpi te zawlta teng in Zomi aw cih la sa ahihi. Amautengthum hongmankhit teh Sia Kam Sang leh alawmte hong kipan leuleu a, music bang… teeeeeeek…. ciakciau….. ciu cih kunana liang hi. Amauteng mankhit the ZEC pan anlak laam lahna kinei leuleu hi.

Lungdamkohna ZAM Thuzeekpi :: Tutung khuado tawh kipawl lungdamna thu ZAM Mangsen in hong nei a, Khuakipawlna, Pawlpi tuamtuam, Music tumte, Maan leh Video khumte, Tutmun honggulhsak te, tunglungdamna thu phulakna nei hi. Tuaban ah Khuado vaitawh kipawl sumzatna te hall kawmna Rm 5500, Music tuamtuam kawmna 4500, Rela Security cialna 1300, khuado pawibawltheina permit 500, Zolia & Zotangvai ah sumzat Rm 900, Banner leh anengneng 1000 cibang pulakna kinei hi.

Amimanglo a Card mansuah :: ZAM pan thukizakna akineikhiteh Sia Mung hongkipan leuleu a, banghiamkhat tawi vauvau hi. Hikatawi pen ZAM card 21058 leh ZAM 35431 hi a, UN card zong hilai ahi amansuahten hongla un cih tangkona nei hi.

Rev Fr.. Robert Kam Hau thugenna :: Card vai hongtangko khit ciang in Fr Kam Hau thugen ding hongsam ta hi. Fr Robert Kam Hau pen tautung hong patio ta a, Zolia khat in Pualaisan angawngha oksak khitciang in hunzat hong kipan ta hi. Kei ka minpi Kam Khua Hau hi. Dimlo khua mi kahihi. Cih kipulakna hongnei hi. Thugensiam lua in mipi nui ngekngek sak a, pawlkhatte bang khuikhui haaaa ci in nuisak kalkal hi. Athugenbulpi in Pasian gawmsate kuamah in khenkei hen cih ahihi.

Zolia & Zotang Round nihna kipanta :: Zolia leh Zotaang round nih hong kipat ding hita a, Tg Siansin in alunglenhuai simsim leh zaknop huai mahmah la khat damtak in hongsa hiauhiau hi. Tualaitak in vantungmitawh kibang zolia leh zotaang te damdam huihkhisem hiauhiau bang in hong pai diaidiai ta uhhi. Tautungtengah hongdim uhciang in lengla Zinh mangpi tengtawh maankilakna khatnasiatak in hongbawl uhi. maikal ah zoplaiding >>> Sia Hau Thang

Address:

155A Jalan Maharalela,
50150 Kuala Lumpur
Office Tel: 03-2142 6659
Hotline: 016-293 9027
Email:    zomiassociationmls@gmail.com

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

 


Comments




Leave a Reply