WWW.TUNGZANGNEWS.COM

 
Picture
GZA Makaipi Tung Pan Thu Zaksakna (GZA Makai Khawmpi Vai)
Leitung bup aom kongit ka Zo mipi khempeuh tungah thukong ngetsak hi. A masa pen in ih Biak Tung Pasian in daihna thupha note tungah hongtung sak kim ciatta hen!

I it i ngaih leh i zahtak GZA Thuzekpi Rev. Dr. Do Kham in hong nusiat vat ciangin Zomi khempeuh i dah a, cihna ding mel theilo in i omtek hi. Ama’ nuntakna ahih leh a it leh a-na a sepsak Pasian deihna bang a, honglaksak hi a, ei cih theih bangmah om nawnlo hi. Ih minam bup in i dah a, a diakdaik in GZA nasepna ah a mahmah hong makaih ihih manin i goih mahmah ding hi. A nusiat a zi leh a tate gel leh a sanggam khempeuh ading thungetsak tek ni.

Tu-in Dr. Do Kham i it i ngaih bek hilo in GZA nasepna hong kipelh nakhat hong om pah lek hi. Amasa in GZA Makaite kikhopna pen i Tedim khuapi ah November 14 – 17 ni dong neih i sawm hi-a, a mahmah in hong geelin hong mapi toh den ahihi. Tu-in amah in binglo halo in hong nusiat vat ciangin hih GZA Makaite kikhopna zong ih geelsa bangin hong piang theinawnlo in ih khintoh phot hong kul ta hi. Zindo ding leh innteek sem ding Tedim GZA Local Committee te bel lawptakin khutkhat tawi khekhat khai bangin na-navaihawm nasate uh kana zaden uh a, ka lunguh dam mahmah hi. Hithei liai hileh ka kipelh sak nuam kei uh hi. Ahizongin tutadih in idah ikah in hong vuknelh in vaihawm zo mahmah lo ihih manin Tedim Local Committee te’n nong telsiam dinguh kong thum ngetngut hi.

GZA Thuzekpi huh (Associate General Secretary) Rev. Dr. Do Suan Mung leh Rev. Dr. JM Paupu te tawh kana kiho uh-a, hih meeting pen a manlang theithei a, neih kik baih nading leh amun amual (Venue) ding zong mudang sawm hetlo in i Tedim khuapi mah ah neih dingin kana khensat uhhi. Mailam ah hih vaitawh kisai-in thu hong zasakkik nung.
Dahna hang a, ih geelsa bang hong pian theihlohna pen akua mapeuh in nong telsiam dinguh hong thum phapha ing.

Itna takpi tawh,

Rev. Dr. S. Pau Khan En

GZA Makaipi 18 OCT 2013

 


Comments




Leave a Reply