WWW.TUNGZANGNEWS.COM

 
Mary pa, (Dr Dokham)

1976 kim pawl hi in teh. Tonzang Tuiphum Khangno min tawh Phaitu gospel ih pai khawm a, nang zong Guitar tum kawmin la sa theilo in kei zong tua bang mah ka hi hi. La lah sa nuam ihih manin kitum sak tuakin la i sa hi.
Tua kum kim pawl mahin Tonzang zato innpi kilamin ki zo siang nailo a only cassette (tape recorder) neu khat tawh zan kim zan khangin uThanggolian te tawh la iva khum niloh a nuam i sa mah mah hi.
1984 June panin Insein Kawllai siangtho ka kah a Bauhthaw ah nipi tam veipi kong kikhawm hi.
1985 kum 'Taangko-Valeengin' khum ding isawm a kisapna khempeuh nong vansak hi. La zong dawng 2 nong sak pih hi.
Emmamuel ah crusade nong bawl masak penpen hunin kei leh Sia Khamsiankhup nong zawn a huhtheih bangin kong huh uh hi. Na tupa te khat (kua pen cih thei nawn keng) nai khat na puak na bag pi sung zong kawmkawmin Teizaang pau tawh na hopih ziahziah a, tua kawm mahin ko lam nga in crusade vai ding Tedim pau tawh nong hopih seisei phei kawikawi hi. Na nu na hopih cianginTeizaang pau tawh na hopih ni loh a na nu'n lah Tuimui pau in hong dawng hiathiat hi.
Mite kiangah 'Sia Dokham a zaipi a suahna thusim hih hi' ka ci zelzel hi. Mangpau kisapna munah Mangte bangin na pau zelhzelh a, Kawl paukisapna munah Kaelpau in na pau setset lel hi. Mother tongue a kici nang zatna munlemual na zuih zia sese thupi kong sa mahmah hi. (Pawl khatin a mun zui in zanglo in a mau kampau bekbek msh mun ci tengah zang uh a nang zat dan tawh kibang lo hi) ken nang zat dan hoih zaw ka sa zaw hi. Bang hang hiam coh leh na zaina, tampi na huam zawhna thu sim pen tua hi ding hi ci in ka um hi.
2009 in Sia Kapmang tungtawnin nang gelsakna tawh geelkhol lopi in US kong zin thei hi. Na innah hong la ngiatin zingtung an nang bawl sa tawh nong ne sak se hi.
Taangko concert bawl ding nong geelpih a, a mei zumsa pi nong khuatuah kik a nong zawhpih hi. Na buai mahmah kawmkal ah gimletawl teng na na si a, muhlengah teng igam ilei ah ken ka ciahpih hi. Ka ciah cisngin nuphalpa Gosawm tawh Tulsa vanleeng khawlna dong nong kha uh a, "leengla ka khak cilcil nang hi ciei lawm" nong ci tanghial hi. Ka angtang mahmah hi.
2010 US kong paikik ciangin Atlanta GA pan Pa Thangngaihlian hong leisak JBL 15" powered speaker bung 2 US pan Ygn dong nong puaksak tanghial hi. Ygn vanleeng khawlna bangah nang mahmah in tuah kawikawi cih hong ki nung gen a, kisuangin ka lung nuam thei nei hetlo hi. TU in tua tegel lisn mah tawh leengla na do ung ei Mary pa aw.
2011 GZA Khawmpi hun sungin no teng mah hong aam lua ka hih manin hun lopi leh nei lopi in vok khat go in KSCM sangkah kum zawhna in kikhop thugen leh nitak an ka vask a, nang mah kong ko hi. Hun kilawm zaw om mahmah ding hi napi neu lawm bangmahin nong aituam bawl bangin yu dong mah ka um a, hun nong pia uh hi. Thu na gen ciangin ka min mah lo tangtangin pahtak theihna ding om sunsun nong pulaak sak se a, zaknuamin ngaihnuam ka sa mahmah hi.
2012 US kong pai kik ciangin na zin na vak kawm kalah hong kan, hong contact tanghtangh in sunan nong neekpih kha thei hamtang se hi. 
"Mery pa aw, Zomi sungah biakna lam mskai kician kicing sa ing. Politician hong semin ci keng. Ahi zongin Zomi Pilitic lamah no GZA makai sung panin nang mah hi fing hi teh." kong ci a, na moh ne kawmin tawl khat na dai dide hi. Tua khit ciangin "ei mi pen kilang tai tawh kibang mahin ahi zongin thu ngenngen leng Pasian geelna khat om ding hi" nong cikik hi. Hi tawh a kibat hangin tu dong hizo nailo hi, ka ci nuam lai hi. 

Mary pa aw, 
US kong pai masak ka ciah ciangin "Tua leh Sia Dokhamin bang sem lian shia leh" hong kici a, ka lungsim tawh kituak kasak loh te, "A sep lian ki dong kha het kei ung" na ci ing. Pawl khatte kiangah "Pasianin Zomite avaan dingin mi muanhuai khat a biakna (AG) hakkol sutkhiatsak in Zomi Hakkol guan maek veh aw" na ci ing. 
Mary pa aw;
Zomi mah it pen ing na cih lam ka za ngei kei a, Zomi te khawmin thukhat, sakhat asuah nadingin hong kici sim giapgiap ta leh na pang tinten hi.
Nang zakloh thu pawlpawl zong ka za kiaukiau kawikawi a, ahi zongin nang lamah ka na ding den hi. Na hihna hang guak hilo in nasepna ka muhna hang zong ahi hi.
Kong theih khakna zing khempeuh ah 'thuum' cih bang kong za ngei kei hi.
Na mai a gum lam zong kong mu kha ngei kei hi.

Mery pa aw na luang/na han pen Kawlpi na innhuang sung uah kikoih leh ka ut hi. Nang tawh kisai Tape, CD, DVD, leh na Lai Siangtho bu, nang vanzat tuamtuam a om thei bangbang kikoih leh ka ut hi. Ih theih kholloh na khutma na khema mitampi in zong kem ngel ding hong hong kipuak zuazua ngel ding hi.
Nang han pen han a koih ding ka phsl kei hi. M namdang ten zong a tua uh tua cih uh hi ven coh thu tawh nang kong teh kei hi. Nang pen nang hi na pi nang na hi kei hi. Na innkuanpih te a' guak zong na hi kei hi. Tulsa te a', Tedim, Kawlpi, Saipimual bulh theih na dinga kilaemin ci leng na kilawmna mun nang bang om lo ding hi ci in ka um hi.
Kawlpi na inn uh ka deihna pen lam tun nuam hi. Han hilo in inn hi. Nang pen inn tawh a kilawm na hi hi. Han a nusiat ding pa na hi kei hi. Na han tung khawngah tu in kong hawh zelzel nuam ding uh hi. Khat veivei ka lungsim peuh uh zong phun tuptup in kong puak nuam ding uh hi.
Mundang a na om sangin Kawlpi ah hong om le cin Zomi, Kawlmi te in nang kua cih hong theih khak sialin na innkuan, na mipih te hong theihpih tuam ding uh hi. (Haka a Sangmangbhan sangin hawhna nuam ka sa mahmah ding uh hi. Nang pen Khangthak Sangmang na hi hi).
Mary pa aw, hong cingcing nuam ung. Hong gengen nuam ung.
Mary pa aw, Zomi khantohna ding vai khawngah ki kumkum lo in kitawngtawng mawk ung. Ki zol bawl lo in ki tawtbawl mawk ung. Nang bangin maitai teitei in kiniam khiatna tawh na ki zawnzawn ta nung maw.
Nang bang mahin ko a ciat bek na ci tentan nawnlo in na ki sansak siam ta nung maw. Nang bangmahin hong kideihloh pianpianna te bang nawh phak zawin hong kideih dong kitel siamna na hanciam nung maw.
Mary pa aw, 
Mary pa, hong tua ci lai le teh kong cihna ding uh thu tam, vai tam lua mahmah lai mawk ei.
Sing omlohna ah gua kizang ki ci in, 'A hang nungah a hang mah khang' kici na ven maw,.....

Mary pa aw phone mai neu khat tawh kong at hi in ka mit mial keei ta ei. Laimal zong ka gelh phatphat kawmkawm mahin khial lai tham in teh. Nang na lem kawmkawm aw maw.

Tuan Khan Mung
Founder & Principal, 
Kalaymyo School of Church Music cum 
Music Director, ZBCM
Kalaymyo, Myanmar
 


Comments




Leave a Reply