WWW.TUNGZANGNEWS.COM

 
Paunak khat in “Great Men Never Live Long” na ci hi. A himah ahi hi. Hih Paunak pen Dr. Do Kham tungtangah kilangh mahmah hi. Mi thupi taktakte ih cihte pen a khansau tawm mahmah takpi uhhi. Ih Topa Zeisu mahmah zong leitungah kum 33 sung bek hong nungta hi. Thuthuuk ngaihsun zo teng lakah tuni ciang dong a kiphawk lai Greek mipil Socrates zong asih in kum tam nai lo a, leitung gambup phial a uk zo dektak Alexander the Great mahmah zong kum tampi nungta het lo hi. Gam makaite lakah zahtaak kai leh a etteh huai US President Abraham Lincoln mahmah zong asih in uham lua nai lo a, John F Kennedy inzong moi mikmek lai mah in leitung nusia hi. Kawlgam suahtaakna hong ngahsak ahi Bogyoke Aung San mahmah zong a thahat laitak mah in hong si hi. Leitung a mi thupi taktakte tangthu sim lehang 90% phial pen sih hun nailopi a site na himawk uh hi. Ei Zomi sungah zong hoih takin ih tangthute kankikkik lehang pammaih ih sak mahmah hanmual hong liamsan mipil leh mi thupi na om khinkhian ding uh hi. Hihbang mite pen mi pammaih taktakte hi uh a, amau tawh a kibang ding mi tawm mahmah uh hi. Khang khatah a tampen leh nih leh thum kaan piang lo mawk hi. Ahizongin eite’n pammaih ih sak hangin Pasian hun ciangtan zah cingta ahihman in hong nusiat loh uh a phamawh hi ta hi.

Mi thupi taktakte kum tampi a nuntaak loh uh hangin a nuntak sung un nahoih tampi na sem man uh ahihman in asih uh hangin amin uh si ngei lo a, amau nasepte cikmah hunin ki mangngilh nawn lo hi. Bang hangin hibang mite ki mangngilh zo peuhmah mawk ding! Khuadak khia lehang amau khutma leh khema te mun khempeuh phialah muh ding om a, laibu khat leem lehang amau tangthu kigelhna na hipahpah thei mawk hi. Amel uh zong muh theih dingin innsung baangtung khempeuh phial ah na kisuang ahihman in mangngilh sawm ta lehang kimangngilh thei lo a, ih zuih dingin ei maiah lampi na sial khol khin uh ahihman in hawhna ciahna khempeuh ah amau tawh aki omkhawm den mah tawh kibang hi. Dr. Do Kham in hong sihsan zenzen hangin Zomi te lungsim sung leh mitkha-ah cikmah hunin mang ngei lo ding hi. Ahizongin Dr. Do Kham tawh cikmah hunin mel kimu in holim khopna om thei nawn lo ding cihpen ih ngaihsut ciangin na kisa ciat ngaungau a, Zomite ih khitui hong luang hi.

“Great Men Never Live Long” mi thupi taktakte a khansau tam het lo uh hi. Kum tampi nuntak ding a thupi hi masa lo a, ih nuntaak sungin mi phattuamna ding na hoih tampi ih sep zawh ding a thupi penpen ahihi.

Dr. Chin Do Kham zahtakna lianpi tawh,

ZomiDaily Media
www.zomidaily.com

 


Comments




Leave a Reply