WWW.TUNGZANGNEWS.COM

 
"Puanpak silh tek ding" ciin hong theisak khol uh hi. Kei zong puanpak gina neihsa neilo ka hih manin nawhsa in ka lei tengtung hi. "Bang hangin puanpak kisilh hiam? Dahna hilo hiam? Nitumna lamte in puanvom a zat mana no Sen (Chinese) te in puanpak a zang na hi uh hiam ciin ka dong hi. "Puanpak pen thupi bawlna hi in puanvom pen dahna lahna hi. Tuni a misi pen Christian hi, vantung gam pai ding hi. Christian ahih man bek hilo in a nuntak sunga a sep suah khempeuh thupibawla pahtawina hizaw hi. Christian hih manin dahlo cihna hilo in, a nuntak laia a sep khempeuh thupitaka a kipahtawi theih hun khat ahih manin a dahlo hizawlo in amah a pahtawi kihi zaw hi. Christian thu um mite diakdiak a dah dingte hilo hi hang," hong ci uh hi. Lamdang kasa hi.

Sigalna mun ah nitak thum sung hun zang ngekngek uh a, tua lai ah misipa a nuntak laia a nasepte amah tawh a kithuahkha, amah a theite, amah a tel cian mahmahte in gen ngelhngelh uh a, thu tampi kitheihbeh in, a hanciamna leh a kuhkalnate, midangte a khualna leh midangte a huhnopziate, kumpi leh gam adingin na nakpi takin a sepziate, mizawng micimawhte a huhdan leh a kep a khoi ban ah a khual dante nakpi takin kigen hi. Si nailo hileh a sep dingin a gelkholh vai lian leh nasep mabante zong gen uh a, mi thupi i cihte nuntakna hibang himaw ciin kimu thei, kiciamteh thei hi.

Tua banga thugente in a gen ngelhngelh uh ciang mundanga sigal ka pai ngeinate tawh a kibatlohna hong kilang semsem hi. Dahna, kahna, lungzuanna bekbek gena kikhasiasak, kinehnosak nuam diak ka tenna Mizogam khawng tawh ka teh ciang Sente pen a khangto masa mah in na om mawk uh ei ka ci hi. Ahi zongin amau zong a Christian suakte ngaihsutna kidang bek hi a, Christian suak nailo pawlkhat sihna hun ah hunzatna bel dahna lam vive mah tawh hun kizeek lai hileh kilawm hi. Puanvom mah kisuang pah in lasa ding leh tumging tuamtuam a tum ding honkhat mah ompah uh a, sun tawh zan tawh amau hun seh khat simin lasa in khuangtum, daktum, gingthei tuamtuam tumin awng lialua uh hi. Dahna lahna in puanvom silh bek hilo in thangkhau ippi silh in a siahuai penin kizem uh hi. Zomi ngeina tawh a kibang mahmah pawlkhat om a, tuate lak ah misi luang omna, misite inn kiim ah puanza lianpipi suangin a misi a thupi leh puanza gol semsem hilel hi. Zomite in Kelsawn leh Tukpak i zat tawh a kibatna tampi om kasa hi. Khuang leh Zam mah tum in, dakbu zong zang uh hi. Zomi te pen Sente tawh kinaihna khat bel om hamtang ding cih ka upna lian semsem hi.

A lamdang mahmah Sente ngeina pawlkhat ka phawk a, deihsakna van leh nate a kipiak uh ciang nai/watch/clock/hunzeekna khat peuhpeuh kipia ngeilo mawk uh hi. Naungek a suah ciang naumin phuak ding pen a pi leh a pu mah na hi uh a, ahi zongin tuhun ciangin tua bang zang nawnlo semsem uh ahih manin khangham upate in khangthakte mawhsak uh, ngeina kemlo ciin kamtam thei uh hihtuak hi. Tua bek hilo amau pau mahmah zong a siam tawm semsem ahih manin khangham, upa lamte patau bek hilo in heh phial mai uh hi.

Sigalna ah zong a hoihlam in thu ngaihsun uh a, a kibawl thei nawnlo ei hih theih zong hilopi ah kikhasiasak in kidahsak gawp in kihehsak gawp sese lo uh hi. A hehtheilo i sak leh lah a hehna ding munte ah heh mahmah, nak heh siam lua zawzen zel uh hi. Haksatna sungah a hoihlam ding bek gel sawm uh a, dahna ding hun ah a lungdam huai thute thupibawl zaw siam se uh hi. A dahlo, a kaplo i sak leh nak dahlua, nak kah lua uh hi. Ahi zongin mipi mai ah a misi nuntakna pan a hoih a muh khempeuh uh gen uh a, mite nehno nading cihte khatzong gen ut sese lo uh hi. Tualo khat a lamdang mahmah lai khat pen, thusia hi in thuhoih hita leh a kisaipih uh ahih kei leh kikum tangtanglo mawk uh hi. A theihnop uh leh lai kigelhte pan sim uh a, kam tawh kigengen selo mawk uh hi. Thu kidongdong cih khawng zong zanglo mawk uh hi. Mite thu zong midang kiangah gen sawnsawn cih omse lo hi. Lamdang ka sak hong tam deuhdeuh a, a hoihna khat peuh om kasakna bang hong tam deuhdeuh hi. Galkap sungah ahih kei buang leh tualsung nuntakna ah kam kisawl cih bang tam hetlo mawk hi. Upa, naupang cih bang kideidanna om lualo tawh kibanga, amau gei ah sep ding khat peuh a muh uh leh a upa, a naupang cih genlo ngaihsunlo in sem pahpah lel uh hi. Mite bel a civilization uh kum tampi na hikhinta hiven maw! cih bek in om hi.

Sigalna ah mi khat in sum, van tuazah pia cihte gelh tuam seselo in a lomtangin a paikhawmte bang kithawhlawm in khatvei piak in pia uh hi. Tua ahih cianga kua in tampia, kua in tawmpia cih kitheilo hi. Galna piak ding thupi sa lel uh a, bangzah tawh kigal cihte thupi in koihlo uh himawk hi. Mite in gal lo hileh zong a khasia lo ding bangin om siam uh hi. Picing gamtat ka sakna tampi om a, ka en giugiau pawl zong om hi. Ahi zongin innkuan, meltheih tanau cihte tam neihlo uh a, amau innkuan sung bekbek khawng mah himawk hi. Zomi te in u leh nau, beh leh phung, khua leh tui i cih diatduatte na nei nawnlo mawk uh hi. Tua manin a sih uh ciang bel Zomi te ngeina tawh i tehkak ciang gamdai kisakpih mahmah hi (amau bel ngeinaseh lel uh). Kigiahpih cih bang om seselo a, siluang pen nitak sigalte hunzat khit nai 10:00 P.M. khit ciang ciah mang khin a, inntekte bek om uh in, siluang a cing ding, a hung ding zong om mello in siluang bek khawng zan giaksak uh a, amau lupna tungah lum lel uh hi. Siluang gei ah a giahpih thei ding khangno hiam, pasal hiam a om leh bel giahpih veve sam uh hi. Siluang pen mihing hinawnlo cih ngaihsutna nei uh a, a nungta laite kikhual ding, cidam ding cih khawng thupizaw ciin ngaihsun himai ding uh hi. Zanhak a naptui, ihmut cimlo a cinat lawh cih bang neih khak ding kidawmzaw uh hi.

Leitung pen a munmun ah a mualmual ah hei dan, gamtat dan, nuntak dan na kidang kawikawi himawk hi. Nung leh ma khualsiam taka nungta thei diak zong mimal bek hilo in minam zong na om lua cih ka muhna hong kibehlap hi. A pil, a khangto, a khangcing dingte in a hoihlo nate nusia in a hoihzaw ding nate na delh uh a, a kimang theilo dingte nusia in a kimang thei ding a theih uh leh pom in la in zang uh hi. Zomi Paunak ah, "Mittaw sialkhau let" cih bangin a zatngei, a hihngei khat uh na pomcip tentan tuanlo in "a hun leh a mun" tawh kituak, kizui in na kihei siam uh hi. Tui luang na bang uh cih ding hi. Tui pen a thahatna a kigen ciang lui leh guamte a suk leh taihat, a zaal leh dam luan, a neu leh kineusak, a gol leh kigolsak, a sing a suang tawh kilem in na kikhengkheng thei hi.


Hau Za Cin
Phuitong Liim
www.hauzacin.blogspot.com

 


Comments




Leave a Reply