WWW.TUNGZANGNEWS.COM

 
Picture
Upmawh lohpi leh kigintaakna om hetlo in ih Makai it mahmah Rev.Dr.Chin Do Kham in,Pa kiangah ong ciah san ta hi.Mimal kim ciat ih dah mahmah aa,ei tumtakin ih lungneu in ih mailam ding khimkhua ong zing mahmah mawk hi.Kua tung heh ding,khasia ding cih lah om theilo ahih manin ei tumtakin ih lungkhawng tom pong hi.Ih lungsim,ih lungtang ong kuaizo mahmah ih Makai Pa ahi hi.

Amah pen Zomi te' khalam aa ding ih Pa,pilna leh khantohna dingin ih Pa,gam leh minam aa dingin ih Pa,lasa leh music siam te' aa dingin ih Pa,a zawng a genthei eite aa dingin ih Pa,USA aa Zomi te aa dingin ih Pa ahi hi.Pasian bawlsa ih minam aa ding Moses banglian mahin Gam leh Minam makai taktak ahi hi. Ama thu pen ei Zomi te leitungah aom laiteng ki gengen dingin bei ngei nawnlo ding hi.

Ong nusiatna leh a innkuanpihte ten-na USA ah,ama luanghawm khakna pen Saturday(19th Oct ) in geelna nei uh ahihna zong ih zakhin ta hi.Hi thei leh Innlam,pianna Zogam mahah ong kivui leh ih lunggulh pipen ahi hi.A hi zongin kumpi vai,lemlohna leh haksatna tuamtuam hangin Zomi te' khuapi mah ahi Tulsa ah kivui ding ahih manin ih lungdam leh ih lungkim veve hi.

Tua mah bangin,amun ah ava kihel khalo ding ihih manin, ei mun Singapore panin khakna hunpi khat bawl dingin ih geel hi.Singapore aa om Zomi khempeuh leh mun tuamtuammaa om Zomi mimal kimciat,a zin a vaak mimal kim,ih Makai it mahmah Rev.Dr.Chin Do Kham khakna hunah nong pai hamtang nangin zahtaakna lianpi tawh kong zawn uh hi.

Ei te tawh(Singapore) ong om khawm Tg.Kham Sian Lian(Dr.Do Kham'min tamh,a U tapa) tungah hita leh,USA aa innkuanpih khempeuh hita leh,Kawlgam aa om a innkuanpih khempeuh hita leh,mun tuamtuam aa om a innkuanpih beh leh phung aa dingin hita leh,amah a it, a ngai, a zahtaak ei mimal kim tungah ih biak Pasian in hehnepna ong pia kim ciat ta hen..Amen.

Ani ;19th October 2013 (Saturday)
Amun; Foochow Methodist Church (ZIS biakpiak kikhopna)
Ahun ;6:30-9:30pm

A vot leh moh pen hun kipatma in,ki vaihawm ding hi. 
Gaalna sum zong kipia thei ding hi.

Dahna lianpi tawh
Khup Lian Thang
Singapore


 


Comments




Leave a Reply