WWW.TUNGZANGNEWS.COM

 
Picture
ZIUSA kipawlna pan Khuado Thupha puakna
Khuado Thupha
 
K’ong it, tuipi galkai, Zomi khempeuh,
 
“Dam maw, Zomi”
“Lungdam Khuado Pawipi”
 
ci-in, Zomi Innkuan USA kipawlna Executive Committee tang’in itna lianpi tawh kong muak hi.

Hibang Khuado hun sungin, muntuam gamtuam a om, tuipi galkai Zomi khempeuh in, cidam lungnuam takin, khua do in, ih biak Pasian hong piak thuphate simkhawm a, lungdam ako theiciat dingin k’ong lam-en hi.
 
Zomite in Khuado ih kham ciangin, akhang akhang in, pupa ngeinate ih luahsukna hi a, tua ngeina hoihte tungtawn in anungta Pasian bia in, thupha ngenkhawm thei ihih manin ngeina manpha mahmah khat ahi hi. Amun mun panin Khuado pawi ih khamna tawh ei, tuipi galkai Zomite’n, ih suan le khak leh ih khangnote’ tungah ih Zongeina thupinate a pantah ihih lam kiphawksak phapha hang.
 
Leitung mun tuamtuam ah amun amual, kim leh paam thute tawh kituak in, Khuado ih bawlzia, ih muakzia, ih zat dan a kibanglobek hi a, Khuado ih bawlnopna thu a kibang vivemah ahi hi. Tua in minam dangte lak a, ih thupi’tna, minam kician khat ih hihna hong kilangsak hi.
 
Kawl gam sung a Mualtung mite enle’ng, ei Zomite zahin, Khuado a limbawl, a uangbawl, a thupi sak phadiak omlophial ding hi. Tua hi aa, ei, Zomite in, ih Zogam ah suakta takin “ei le ei ki-ukna” (Self Determination/Federal System) neizo thei bang hi le-hang, leitung bup ah ani ahun  a kibang-aa a bawlkhawm thei ding cih ih ngaihsutteh lawp huai mahmah leh ngaklah huai mahmah ih sa uhhi. Tua ahih man-in, mailam ah akua mahpeuh in ih ngeina hoih sungah ih kipumkhat theihna ding in hanciamciat ni.
 
A hoihlo khempeuh mangpha khak, nusia-aa, ih kibatlohna khempeuhte nusia-in, ih kibatna ahi ih Zongeina sungah kipawlkhawm aa, ankuang umkhopna Khuado Pawipi amuak sate hi taleh, amuaklai ding akuamah peuh tungah, anungta ih biak Pasian in kumsawt tampi amuak theilai ding-in, thupha hong pia tahen ci-in, Zomi Innkuan USA kipawlna min tawh;
 
 “Happy Khuado Pawi” ci-in, tuipi galkai Zomi khempeuh tungah “Khuado Thupha” kong puak uh hi.
 
PS. Ih Zongeina Khuado Pawipi ih muakna tawh ih Minam itna kipsak ni!
 
Executive Committee
Zomi Innkuan USA, Inc.
 
Tang’in;
 
Sd.
(Thang Tul Mung, Pa)
Vice President
 
Fort Worth, TX, USA
October 9, 2013

 


Comments




Leave a Reply