WWW.TUNGZANGNEWS.COM

 
Picture
ZIUSA Kipawlna Thupulakna: Minam vai tawh kisai kalsuanna
Zomi Innkuan USA
Executive Committee


Thupulakna: Minam vai tawh kisai maban kalsuanna


Lamka khuapi ah, Oct. 24~27, 2013 ni sung teng a kibawl ding, The Third World Zomi Convention khawmpi ah US gam sung a om Zomi buppi tang’in khawmpi akah dingin, Zomi Innkuan USA kipawlna in Dr. Chin Do Kham, Palaipi dingin kicial/kiseh hi. Dr. Do Kham in Oct. 23, 2013 ni in Lamka khuapi zuan in Yangon pan dingkhia ding a, ZIUSA kipawlna in ama lamsaap ding kisik ding hi. World Zomi Convention khawmpi bawl ding vaihawmna in Zomi-te minam kician, minam picing khat hihna leh minam min in “Zomi” a hihna hong kipsak a, pumkhat hong suaksak ahih manin Zomi Innkuan USA kipawlna tang’in Palai akipuak ahi hi. Hih khawmpi in sim leh mal, sak leh khang, inn leh gam a kipan tuipi galkhat a om Zomi khempeuh minam khat hihna sung ah kipumkhatna dingin vai lianpi ahong hawmzo dingin kilam-en hi.



Zomi Congress for Democracy (ZCD) Party in 2014 Myanmar Census a kibawl ciangin, kisimna min khumna sung ah minam min dingin “Zomi” min a kikhum theihna ding kumpi thuneite a kuppihna, a thusunna leh a vaihawmnate, Zomi Innkuan USA kipawlna in kithukimpih a, maban a lawhcin’ dong ahong zomto dingin kihanthawn hi. Hih thu a vaanna dingun abeisa hun a kumpi zumpi omna Nay Pyi Daw khuapi akuan aciahna leh zumlai bawlna tungtang ah abei sum leh paaite, Zomi Innkuan USA kipawlna in kisik ding hi.


Global Zomi Alliance kipawlna in Tedim khuapi ah 2013 GZA Khawmpi bawlin, 2014 Myanmar Census ciangin Zomi-te in minam min dingin “Zomi” min khumkim theihna ding vaihawmna nei ding ahih manin, Zomi Innkuan USA kipawlna in hih vaihawmnate kithukimpih a, maban a lawhcin’na dingin thu kingetsak hi. Hih Khawmpi ah Zogam sung a khua tuamtuam pan khua hausate kikaikhawm in, a thukikupna sung ah ih minam min dingin Zomi min khumkim theihna dingin kihanthotna, thusunte pen tuipi galkai Zomi-te inzong kithukimpih ahihna kipsakna dingin Zomi Innkuan USA kipawlna in sasi taaksak in, Khawmpi akah mipite bawng khat kigawh ding hi.


Executive Committee
Zomi Innkuan USA
Tulsa, Oklahoma, USA
October 11, 2013


 


Comments




Leave a Reply