WWW.TUNGZANGNEWS.COM

 
Picture
Zolia leh Zotaang in Zomi Khuado zeemta
Malaysia Zomi ngeina Khuado pawi nopcitak in 15 Oct 2013 ni in kibawl thei hi. ZAM makaihna dungzui in Pawlpi tuamtuam leh Khua kipawlna tuamtuam te hanciamna tawh vaidingzo ahihi.

ZinhMangpite

Tukum Malaysia KHUADO pawi pi pen Chief Guest te sungah Pu Hang Khan Lian, Rev Fr Robert Kam Hau, John Chin, leh Dr Chin Do Kham hi a, Dr Kham tutna awngpingpeng kimu hi.

Zolia Zotaang,

Zolia 12 leh Zotaang 17 ( 2013 Malaysia) Na siatak in kidemna om a, Deih Mang in makaih in Francis Khampi in panpihna nasia mahmah ahihi.

Thugenpi teng.

Zomi Khuado pawi ah thugenpiten Dr Cin Sian Pau in (Zongeina leh Khuado thu), Pu Hang Khan Lian in (Zomi leh Minam thu), Mr John Chin in (Ki-itna leh Kipumkhatna in gualzawhna) thu gen ziahziah hi.

Lasaknatuamtuam.

Khuado ni ahihmahbang in Khuaila, Khuadola , Anlaklak lam cih te ZEC sangnaupangten hong lak ziahziah uh hi. Muhnop kisa samahmah ahihi.Tuaban ah Zomisuang lasiam minthang te hong kihel lailai ahihman in nuammahmah cih khuadosimte in genziahziah bek ahihi.

Atuamtuam te ah

ZOCUS pu pi Dr Cin Sian Pau makaihna tawh Zongeina van tuamtuam te kilakzihziah a, zong kilei thei pahpah ahihi. Adiak in Daak namkim, phit namkim, Zokeu, Zokuang, Zobuuk, Zokhi, Zophit, Zomi Dingdong, te mipi muh theih ding in kilak ziahziah hi. Zo saihadial zong leitheihziahziah ding in koih hi.

Adiak in Zomi gualtungtuan na Taanghciing puanpi leh Khephiau phuan pi zong kilakhi. Dr Pau gen na ah Tanghciing puanpi pen Pu Chin Sian Thang in silh masapen a, Khephiau phuanpi pen Zomi Numeisung ah asilhkha ki omnailo ahihi cihi.

Vantuamtuam kizuak.

Adiak in Zomisungah akitangsam velvel Zolai gelhzia (Basic grammarbu), Topa ni, Sazuuk kipuak, Mitttaw sial khatlet cih laibu te kizuak hi. Zopuan, Zoniik, Puangial, Puandum, Tanghciing, cihte zong kizuak zihziah a, kilei nainai liang hi. Adiak in Zokhi kideih pen kicihi.

DVD tawh kipawl in Enhuai iinkuan, Ka Pasian, Nang ading ding Kazaideih, kizuak a, Journal pen ZOSUNNI kizuak in thuthak tampi kitheih lawh hi.

Sum ngahna

Khuadopawi anopci theihna ding Makaite vaihawmsiam natawh Pawlpi 23 pan in Rm 4400 leh Khuakipawlna 78 pan in RM 9500 tawh vai ding khia ahihi. Hih sumngah pen Khuado pawi program tungpan a, suakte pan hi a, diktaktak kici theikhinlo thei ding ahihi. Hihsang in tambei zaw ding ahihi.Sumzat pen hunpi sung ah ZAM thuzeekpi Mangsen in ahuampi in hong pulak khia hi.

Aneek leh Dawn tuamtuamte.

Khuado ading in pawisimte gilkhial dangtak te ading in anlimnono, Voksa, Bawngsa, Aksa, voksangawithalh leh singgahtui namtuamtuam duhzahzah deihzahzah akicing in kilei ziahziah kizuak ziahziah aa, Khuadosa lim mahmah hi kici hi.

Atuamvivel Khuado pawi paite muhna tuamtuam.

Dingdong Dingdong …Hellohello. Khuado bawlna innpi Chin woo sung lutphei leh Nungak melhoih nono in maimuak ziahziah a, nui seusiau peeknih, peeknih cih tawh awnsuan belh lianlian uh hi.

Awnsuan kisuang masasa lutphei deudeu a, mikem Rela kici Security ten encik mahmah hi. Lutpheina kong khenkhit deuh a, Zomitawh kipawl vannamtuamtuam kilak om a, amungeilo khangno tampi te in lamdang sa in vel ngeungeu bek uhi. Adiak in Phitte Zomi Dingdong te, Tanghciingpuan leh khephiau phuan kikhuizia te ki lim et mahmah ahihi.

Tutna munla ziahiziah ta.

Khuado pawi sim te tutmun laziahziah ta uh a, ziat leh vei tengdim ta in aniamlam tutna te ah mipi kitu ziahziah ta hi. Amailam ah, tutna akangsitset ahoihnono atuam in nakibawl bawl a, tutna tungah atudingt te min leh khua cihbang kigelh deudeu hi.

Tua tutna mun te ah Zinh Mangpi te tutna, Khuamakai teng tutna, Pawlpi Siateng tutna, Khuado Committee tengtutna, Zolia leh Zotaangteng tutna cihbang in kikhen diimdiam a, akitheingeilo tampi zomi te tutkhawm khawl khawm in kimel theihlawhna tampi piangsak mahmah hi.

Hunkempa siamzia.

Mipi hongpawlcing mahmah ta in hunkipat hun hong cing petpet tahi. ZAM/ZSM nasem Siam Kam Mung in atutnapan hongding to in Mic hongla a, Tautungah hongpaito hi. Tautunghongtung tak ciang in.. Helooo, Helloolololo Zomite idamtek hiam? Acih leh mipi in Damtek ungei kici zeizai aa, OkOk kici in khut kibei zuahzuah hi.

Mipi khut kiletna alamdangpi khat kibawl.

Tukum khuado pen mipi khutkilet ding olkimlo ahihman in Sia Kam Mung in tautungpan akhut vangsang ah lamto in akhtmetawh akhawkna lamlam dingsak in khutlamsak sa tutna vei lehtak asang mun nih leh anuailam atu khawk thum tetawh khawk nga kipha pen dingtu matleh zet kipha in kiciim hetlo ahihi. Thum vei khitciang in kitu kimdimdiam a, kidai khikhe hi.

Lasakna kipanpah.

Sia Kam Mung in amic pan in laskan hongsam a, taangbang nadam maw cih la kisa ziahziah in zak nopmahmah in mipi khempeuh nui hiuhiau in kisiing letlet bek uhhi.

ZAM- Makaipi thugenna.

Hunkeem pan in ZAM President Sia Hau Khai thukonghonna leh Khuadopawi nbuamtak zat ziahziah na ding thupulakna aneih sak khit ciang in mipite in dai khikhe tak in Dr Chin Do Kham zaktakna kipia hi. Dr Chin Do Kham zahtakna kipiak sung in’ ZAM Advisor Pa Kam in Dr Kham Minsialna agingtak in hong nei tete a, mipi te khitui luakeuhkeuh hongkhat ki om in tissue in daihlo liang in tissue kihawm thiamthiam pawl khat ki om ahihi.

Zinh Mangpi te tunglungdamkohna.

Tutung Zolia Zotaang amasa pen kibawlna Khuado ah hongpai Zinhmang pi tea hi Pu Hang Khan Lian, Rev Fr Robert Kam Hau leh adingmaitangzahtak te tungah Sia Mung in“ KHUADO THUPHA” acih leh mipi Hongtung tahen! Sia Kam Mung “KHUADO THUPHA “ Mipi in Hongtungtahen kiciziahziah hi.

Lasakna kipan leuleu. Nuamboih.

Lasiam Nuamboih lasa ding Sia Kam mung in hong sap lian ciang in anunglamah tangval tebang thangahlua in hong awng khia beba liang zen a, Nuamboih in mic alak lian ciang in Mikhat in mipi sung ah “ New life for you Ministry” II Cor -5:17 lai hongkihawm phei lai tak in Numaboih in alahongsa a, lengthekhuangbang khelkhel ahihi cihi.

Nuamboih lasak hunsung in mipi inzong sakpih pianpain uh a, tualaitak in ZAM zumnasem Tha Mung Leh Kep Lian te in mipi lak ah tuisiang tholno khatta hawm in buai mahmah uhhi.

Zolia leh Zotaang Round masa kipan.

Hunkhenkilaih leuleu a, Francis Khampi in dawhkantung a kipheikoih mic hong la hi. Tautung mipi maiah nui hiuhiausa in hong paiphei denden a, Alai kimpawl hongtunteh Deih Mang in mic khatmah la in Francis Khampi namun tautunglam zuan in hongpai leuleu hi.

Francis Khampi leh Deih Mang hong kiho in bangciding ihia cih khiteh Zolia Zotaang hongvai dih pih U Kaipi leh asen angkawi te hongsam uh a, tautungah mel kilah no hong bawl masa uhhi. Tutung Zotaang vaitawh kipawl in pahtawina hongpiaksak dingte ahi athumna Pu Hang Khan Lian, Anihna Pa Pau & Nu Cing te leh Akhatna Aungnandawr te thupulakna lungdam hong nei a, mipite kipaak ing kiawng zeizai liang hi.

ZoLia tawh kipawl in pahtawina Athumna John Mungpi te nupa , Anihna Khuado pawi Committee leh Akhatna Pu Phillip Muang ( Tuangzalat) te tung ah vai adinpihna lungdamthu kitangko khia ziahziah hi.

Kitelziadingleh thukhenmangte ding.

Zolia Zotaang 2013 Malaysia kitel zia ding leh thukhen ( Judge) asep abawlzia alading in Innteek Malaysia miminthang Belle Rahim, Janet Lee, Evan Siau, Chua Chong Aun, Susan Chan Yoke Kwai, Gennneva Tai leh Photographer& Video vaisai tem el kilahna Francis Khampi leh Deih Mang in hongmakaih in hongbawl khia ziahziah a, mipi in naupang pan kipan Uhamsamkangkang khinsa dong in mittang bempeupeu in etkiciim theilo in kien a, tha kingah mahmah hi.

Tua khit ciang in Zolia ,Zotang te aomnapan in tautungah hong paithei ta petpet a, mipi in Huaaaahuaaa huaaa.. ci ziahziah bek uhi.

Khuailakna kilahta.

ZEC sangnaupangte tungpan in nidanghunlai a, khuailakna honglak leuleu uh a, munop kisa mahmah hi. Khuaila hongsa uh a, Khuaibu nih tak hongzawn uhi. Akhuibu zawn te uh alian pipi in bawl uh a, vialthum vei apai khit ciang in aomna muntek azuan uhi.

Dr Cin Sian Pau thugenna.

Khuailakna ZEC in honglah khitciang in Dr Cin Sian Pau Ngeinathu, Khuado thu, limcitak in hongen hi. Honggen na ah Minam khempeuh in ngein a ciatna thu leh minamlian ihih nak leh ngeina hoih neihzia kepzia phuahzia te thuhilhna hong nei hi. Innsung ah ngeina kizang te, Beh sungah ngeina kizang te, Khuasung ah ngeina kizang ten leh gamsung ( Kam Hau) thukhun zatzia te limcitak in gen hong nei hi.

Tauban ah silh leh teen zia, lasak laphuah zia, minkitapzia, Khangsimzia, kiciantakin thuhilhna khangno tetungah nei a, khangno te in ngei na thupizia te tampitak kithei hi. Tuaban ah Khuado vai pen anlakpawi, Kumkhenpawi, Zin leh lengdo pawi cih namthumtawh hilhcianna hong nei hi.

Zomite nisimna zong kiciantak in hong gen a, Ei zokha simna leh mikangte khasimna kibang lo hi. Ei Zomi ten zong Zokha simna inei a, tua, izat pen Zawmah te khasimna ahihi cihi.

Sialsawm pen thupha nget hun , thuphanget pawihi a, aneihloh huntawh kituak den ahihman in sialsawmpawi bawl ding hamsa kisa ahihi. Thupha Zomi ten kideih a, Zangsial kingo thawh tualthoihna kibawl nuam ahih man in sialsawm pawi kicihi. Sialsawm hun in imahtsa peuhpeuh kimuahsuah thei ahihi cih thuhilhna hong nei hi.

Donalingling la pen kahla hi a, tamlawhna ala ahihi. Donalinglingisak ciang in nawhsak saisai ding ahi kei hi. Babylon lasa in lamziahziah pen ataktak in kahlah ahihi cih hilh diktelna kician anei hi.

Khuai thutawh kipawl in khuai inkumthei hicih upan kinei a, Khuai kiai hi. Khuai ai te asih ciang in misi bawmnam tho te khuai in petlumpahpah ahih theihna ding in khuai kiai ahihi cihi. Khuado cih pen daihawhna zong hi a, Asisa pi leh pute leiah kiphumlo a, aguh kikoih te kiphuahsiang in ankipuak ahihi. Dohan ah naubang kap cih in thukho pang ahihi cihi.

Thulamdangkhat in kigen leng hang ei Zomi te sila namte ihikei hi. Sila anei nasemanei minam te ihihi. Minasem ding ihi keia, einasem ding mite asam acial minam te ihihi.

Lasakna kipan leuleu.

Lasiam..Thawnpi hong kipan leuleu a, amasak khit teh lasiam Cinpi leh alawmte mithum lasakna neileuleu in lakhuang kelkel bek hi. Cinpi te zawlta teng in Zomi aw cih la sa ahihi.

Amautengthum hongmankhit teh Sia Kam Sang leh alawmte hong kipan leuleu a, music bang …teeeeeeek….ciakciau…..ciu cih kunana liang hi.

Amauteng mankhit the ZEC pan anlak laam lahna kinei leuleu hi.

Lungdamkohna ZAM Thuzeekpi Mangsen.

Tutungkhuado tawhkipawl lungdamna thu ZAM Mangsen in hong nei a, Khuakipawlna, Pawlpi tuamtuam, Music tumte, Maan leh Video khumte, Tutmun honggulhsak te, tunglungdamna thu phulakna nei hi.

Tuaban ah Khuado vaitawh kipawl sumzatna te hall kawmna Rm 5500, Music tuamtuam kawmna 4500, Rela Security cialna 1300, khuado pawibawltheina permit 500, Zolia & Zotangvai ah sumzat Rm 900, Banner leh anengneng 1000 cibang pulakna kinei hi.

Amimanglo Acard mansuah.

ZAM pan thukizakna akineikhiteh Sia Mun hongkipan leuleu a, banghiamkhat tawi vauvau hi. Hikatawi pen ZAM card 21058 leh ZAM 35431 hi a, UN card zong hilai ahi amansuahten hongla un cih tangkona nei hi.

Rev Fr.. Robert Kam Hau thugenna.

Card vai hongtangko khit ciang in Fr Kam Hau thugen ding hongsam ta hi. Fr Robert Kam Hau pen tautung hong patio ta a, Zolia khat in Pualaisan angawngha okhsak khiciang in hunzat hong kipan ta hi.

Kei ka minpi Kam Khua Hau hi. Dimlo khua mi kahihi. Cih kipulakna hongnei hi. Thugensiam lua in mipi nui ngekngek sak a, pawlkhatte bang khuikhui haaaa ci in nuisak kalkal hi. Athugenbulpi in Pasian gawmsate kuamah in khenkei hen cih ahihi.

Zolia & Zotang Round nihna kipanta.

Zolia leh Zotaang round nih hong kipat ding hita a, Tg Siansin in alunglenhuai simsim leh zaknop huai mahmah la khat damtak in hongsa hiauhiau hi. Tualaitak in vantungmitawh kibang zolia leh zotaang te damdam huihkhisem hiauhiau bang in hong pai diaidiah ta uhhi. Tautungtengah hongdim uhciang in lengla Zinh mangpi tengtawh maankilakna khatnasiatak in hongbawl uhi.

Round nihna ah mark 1663 tawh Monica Mua Muan in photogenic leh Ztaangpan in mark 2173 tawh tg Pau Muan Lian in liimsun pahtawina ngah uhi. Amaute nih Deih Mang in minute khatsungta lungdamna thu gensak hi.

Zotaang Topten kitelna kipanta hi. Tua Zotaang Topten ah Thawng Deih Kim , Michael Tuang , Khual Sian Mung, Thawng Hat Lal, Tuan Za Mung, Pau Muan Lian, Tuan Za Mung, Pau Biak Siam, Tung Sian Muan Tuang, Khai Cin Hau, kihel hi.

Zo Lia top5 kiteng khia leuleu a, Uk Lian Cing, Lun Sian Cing, Ciin Suan Niang, Monica Mua Muan, Mary Hau Nuam hiteng kikhia leuleu ahihi.

Knowledge Tuamtuam thudotna.

Hih muhna theihna thudotna nasiatak in kibawl a, amaulam ethet lohpipi knowledge hau ding in mimuan huai Deih mang in mi 10 tel khiatsa in nei in dong a, dong pakpak thei lo honk hat ki om in mipi kiawngziahziah hi.

Akidong thute atamzaw in gam leh minan itna , kimakaihzia ding Zolia Zotaangte ngaihsutna , gampua om naupangte pattahzia ding, Dr Do Kham tungpan etteh huaithu, Dr Do Kham in Zomi leh Zogam ading mailam nasep zia ding agimna Australia apai hun a, agen thute,(Zomite masuanah sep ding)te, Tua ban ah Zopau siamzia cih Pu Hang Khan Lian in dotnate,Dr Pau inadot’ Na itmahmah tung ah nagenkhiatngam hetloh lohthu te ( adiak in lawmngaih haudiakte cihnopna) thudotna ki bawlhi.

Zopau kisiam hetlozia leh tanglai kamal te akikanloh zia Zogam ading minam a ding ngaihsutna ineihlohzia kilangsak mahmah aa, khangno te tungah hongki lang khia mitampi in khua phawk kikna athak neisak mahmah ahihi.

John Chin Thugenna:

John Chin tautung hong kah tota a, mic atawi khitciang “ Mingalaba” Dammaw hong ci masa ahih man in mipi Dammm ci zeizai hi. Khua do thupha notengtung hongtungta hen, Ki-itna kilemna, kipumkhatna in masuan vangsak hi. Gualzawhna hi cih bulphuh in hanthotna kiciam tak nong nei a, Topa’n thupha hongpia kimciat tahen ci-in short speech tomno hong nei hi.

Pu Hang Khan Lian thugenna;

Pu Hang Khan Lian in atamzaw in minamthu limcitak in hong nei hi. Zomi nam in kilawhding leh GZA, ZCD, 3rd ZC khawmpi the ah thulimcitak in ineih theih na ding in innlamomte tung ah thuvaikhak na kician neih hamtang ding kisam ahihna thu hong gen khia hi.

Zomi in Zogam kinei nailo ahihna leh akikhawmtawm leitangh tungah akiteng ahihna hilhciandiktak in hong nei a, leitangh neihna ding leh ineihsa leitangh tungah thuneihna anei Zomi isuahna ding hanciam hamtangding akisap na thu mipi tungah limcitak in hong hilh ngekngek ahihi.

Hongtung ding 2014 hun ah kawlgamsung om minamte amau minam diktak tawh kisapna kiphalzo kihongzo ahihna thuzong honggen khia hi. Tua hihman in Zomi ci-in kilo ding hanga, ZCD Tedim apaizong NLD Tedimapaizong in minam min te ah Zomi cih hamtangding kisam ta hihi cithu hilhna nei hi.

Tuaban ah Kawlai in Zomi hong kikhensak hi . Bang hiam cih leh Zomi pau tawh min kigelh Cun BiK bang pen Yangon ah lampi min in akigelh ciang in mannawnlo zo ahihi. Tua mahbang in Zaw akici te Zomi hina pi kawllai in minam hong kikhensak ahihi cih hilh diktelna nei hi.

Etteh ding in Mizoram ah Mizo bekmah teng in namdangte munleh mual leitang neihna pai hetlo ahih man in akip ahihi cihi.

Ladawng thum kizomsakna.

JK zom, Lentong Pauno, David Mung leh alawmte in lasakna dawng khatpai tek nei uhhi.

Tua lasak khit phet in Sia Kam Mung In adeihzangzah in agingtak in awng a, KUATE KHUADO” Mipi in “ ZOMI KHUADO” nihveita kici ziahziah hi.



Zotaang 2013 Malaysia te

3. Mat 820 tawh Tg Khai Cin Hau in athumna ngah a, Trophy, Sash, Bouquet leh Rm 300 pen Pu Hang KhanLian in pahtawina pia hi.

2. Mat 860 tawh Michael Tuang in anihna ngah a, Trophy, Sash, Bouquet leh Rm 500 pen Nu Cing Leh Pa Pau in pahtawina pia hi.

1. Thawng Hat Lal in akhatna Zotaang 2013 Malaysia ngah aa, Trophy, sash, Bouquet Rm 700 pen Aungnandawr in pahtawina pia hi.

Zolia 2013 Malaysia kitelna te .

3. Mat 810 tawh Ciin Suan Niang in athumna ngah a, Crown Sash Boquet leh Rm 300 John Mung te innkuan in pia hi.

2. Mat 820 tawh Lun Sian Cing in anihna ngah a, Trophy, Crown , Sash, Boquet leh Rm 500 Khuado Committee in pia hi.

1. Mat 985 tawh Uk Lian Cing in akhatna ngah a, Trophy, Crown, Sash, Boquet leh Rm 700 Phillip Muang ( Tuangzalat Restaurant ) te in pia hi.

Source: Zomi Daily . co


 


Comments

mart
03/12/2017 09:46

hi

Reply
05/21/2017 18:41

I can't get the main idea, but it's really helpful for additional information.

Reply
06/20/2017 20:33

When I saw this web, it's really different than the other. Great Job!

Reply



Leave a Reply