WWW.TUNGZANGNEWS.COM

 
Executive Committee

Dahna Pulakna : Pu Ngaw Khup (Kum 95)

Maryland State, Jessup khua a teng, Pi Cing Za Vung’ pasal, Pu Ngaw Khup (Khuasak khuami, Thatlang suan) in, Nov. 16, 2013 ni in, Howard County Zatopi panin a leitung nuntakna hong nusiata hi. Pu Ngaw Khup hong nusiat manin, amah a it, adah akap, a zi a tate, tu leh tate a kipan meeltheih tanaute, khuapih tuipihte leh pawlpimite tawh akibang in, Zomi Innkuan USA kipawlna, Executive pawlzong kidah mahmah hi.

Pu Ngaw Khup in ahong nusiat laitak in suan leh khak, tanu tapa (11), tu (23) leh tusawn (15) tawikhin a, kum (95) phata ahih manin a khangcing mahmah pasal ngalhat khat ahi hi. Pu Ngaw Khup pen Maryland State sung a teng Nu Zam Cing (Pa Mang Hen Thang), Ni Cingzahuai Suantak (Pa Ngocinthawng Suantak) leh Pa Tual Vum (Nu Cing Za Hau)-te pa ahi hi.

Pu Ngaw Khup pen khua leh tui in amuan Makai khat hi a, Khuasak khua Hausa semngei hi. Mangkang Galkap sung ah Santhum suang in na semngei a, gam leh minam a deihsakna hangin, Japan Galkapte pawlbawl in Mangkang kumpi ado ngei galhang khat ahi hi. Kum (95) dong nungta in US gam leitang tung ah ahong sihsan ahih manin, tangthu tuanthu tampi a kimansuahta ahih ban-ah, muntuam gamtuam pha in thu leh la tampi athei mi manpha mahmah khatin ahong nusiata ahih manin akua mahpeuh in na kisa mahmah hi.

Pu Ngaw Khup’ luanghawm pen Nov. 23, 2013 (Saturday) ni ciangin, Dignity Memorial haan ah kivui ding hi. Pu Ngaw Khup tawh hun nunung vaite athei nuam peuhmah in Pa  Ngocinthawng Suantak (Tel. 240 478 2280) tung ah kikan thei ding hi.

Pu Ngaw Khup hong nusiatna hangin adah akap, u leh nau, nu leh pa, lawm leh gual khempeuh, anungta Pasian in hong ompih in thathak hong guan tahen ci in thu ka ngen uhhi.

Executive Committee

Zomi Innkuan USA

Tulsa, OK.

November 20, 2013

 


Comments




Leave a Reply