WWW.TUNGZANGNEWS.COM

 
Khe tattatna peuh ah Khe kingakna mun, Nasem takpi Khua-ul luang datdat a nektawn zonna mun Malaysia gamah Zomite' dinmun pen i nung, i mai, i vei, i tak ah dipkua kawmsa-a khuasakna gam hi-a, Gam-uk Kumpi te'n illegal ci-in, cikziat huaitak in ong ban mat ziahziah lel uhi. Mihing tektek Ganhing banga kibawl lawmlawm ci-in, ka ngaihsut khak sim-in ka khitui tak keuhkeuh hi. Hibang dinmun ah Zomi bekbek tulaitak in 500 valbang Thong sungah ki om lai hi. Ann zong gina tak-in kipialo-a, nat le sat hunah Zatui, Zaha a hun a phat in kingah lo lai hi.
 
Tua kawmkal ah i biak anungta tawntung Pasian' kepna hangin, Zampi Khuami Pa Thang Deih Lian tawh akibangin Zomi sinsen 30 val tuni, Nov. 22, 2013 Friday ni-in, hong suak takhia thei banah avekpi mah-un UN Card ngahsa le cidam tak-in ong suak takhia uh ahih manin, Zomite ong cing tawntung Pasian min i pahtawi phapha hi. Sang pen Pasian a min thang tawntung tahen!
 
Tuni-a hong suak takhia Zomi 30 valte pen Semenyih Camp vive pan ahi uh-a, nitak nai thum pawl-in Semeyih Camp panin UN zum zuan-in ong ciah uhi. Nitak nai nga valdeuh hun-in UNHCR zumpi Kuala Lumpur hong tung uhi. UN Card vai tawh nai khat le alang sung Officer ten abuai pih khit uh teh Sanggam melmak hun-in UNHCR zumpi pan-in, ong suak tasiang uh-a, UNHCR Card angah ban-vuah a lamsap ding-uh mi khat ciangin, RM. 30 ciat tawh UN te'n huh lai uhi.
 
Bangbang ahizongin Zomite ong nelhsiah ngeilo Israel te' Pasian pen Ei Zomite' Pasian ahihna ahunhun leh amunmun ah kilangh tawntung a, Eite ong angvan tawntung ahi, Pasian' itna pen Zomite adingin kicing tawntung ahihna kamuh ciangin, khasiatna khitui khempeuh lungdamna khitui hong suak hi. Thong sungah a omlai i mipih te' adingin, thungetna tawh ma panglai-ni, ci-in, kong muan Zomi akua mapeuh tungah kong tangko khia hi.
 
Dal Sian Hung
Kuala Lumpur, Malaysia.
Mob: 012-3536368; 016-6705999
 


Comments




Leave a Reply