WWW.TUNGZANGNEWS.COM

 
Zomi Innkuan USA
Executive Committee
 
Thanksgiving Lungdam Thuphapuak
 
United States gam sung a om, Zomi laizom, u leh nau, nu leh pa, lawm leh gualte aw,
 
“Happy Thanksgiving”  hong tung tahen ci-in “Lungdam Thupha” kong puak uh hi.
 
US gam sung a om mivom mikang, mizawng mihau, numei naupang, taangpi taangta in kumsim in akimang, ngeina hoih mahmah khat ahi, Lungdam Kohna Ni, Thanksgiving Day ni lianni hong tung kikta ahih manin, akua mahpeuh in hih hun sung ah cidam lungnuam takin Anungta Pasian in ahong piaksa thuphate simin, lungdam kohna hunnuam angah dingin ka hong lam-en uhhi.
 
1620 kum kiim pawl-in, biakna lam suahtakna ngahna ding hanciamna tawh US gam leitang atung masa, Pasian thu-um mi pawlkhat in, gentheih haksatna tampi atuahkhit uhciang, Pasian ompihna tawh kum khat khit kum khat cidam in a gualzawhna hangun Pasian tung lungdam kohna pawi na bawl uh hi. Tua ngeina hoih pen US gam ah tuni ciangdong akimang toto hi a, tu-in US gam atung Zomi-te inzong, US gam leitang atung masa thu-um mite ngah thupha hamphatna bangbang sangin, kum khat khit kum khat gualzawhna ngah tozel ihhih manin, Anungta Pasian tung ah Lungdam Kohna tawh Thanksgiving pawi ih kham theih ding thupi hi.
 
Hih bang-aa Lungdam Kohna, Thanksgiving pawi ih bawl theihna ding-in, Pasian thu-um mite’n, haksatna tampi thuak in, a nuntakna nangawn uh suplawh, sihlawh uh hi. Tua hunlai-in, galtai thu-um mite in, leitang thak tung ah nuntak zia ding theilo in, haksatna tampi natuak uh hi. Tuamah bang-in, ei  Zomi-te inzong ih gam ih lei pan-in, haksatna tampiban ah sihna manna tampi ih phukha khinzo hi. US gam sung a nuntak zia ih theihloh manin nisim haksatna zong ih tuak hi. Hih haksatna tampi tuakkhin himah lehang, tu in ei Zomi-te, US gam sung ah lungmuang takin ahong teng sak, ih biak Pasian leh US gam kumpi thuneite tung ah lungdam thu ih ko hi.
 
Ih biak Pasian in ei, Zomi-te hong ompihna leh hong itna lian mahmah hi cih phawkkawm in, Lungdam Kohna Ni pen ih innkuan ciat-in ahi zong, ih khua leh tui buppi in ahi zong, ih Zomi Innkuan kipawlna ciat-in ahi zong, cidam lungnuam takin amuak thei ding-in, Anungta Pasian in thupha hong pia tahen ci-in thu ka ngen uhhi.
 
Kumsim, hibang hun atun simin, ih san’sa thuphate simkhawm a, Anungta Pasian tung ah lungdam ako tawntung thei dingin US gam sung a om Zomi khempeuh tung ah Anungta Pasian in athak in thupha hong pialai henla, cidamna, khansauna leh ki-itna, kikhualna, kipumkhatna thuphate hong guanbeh tahen ci-in, Zomi Innkuan USA kipawlna min tawh Lungdam Thupha kong puak uhhi.
 
Happy Thanksgiving!
 
Executive Committee
Zomi Innkuan USA, Inc.
 
Tang’in
 
Sd. xxx 
(Thang Tul Mung, Pa)
Vice President
 
Fort Worth, TX, USA
November 24, 2013
 


Comments




Leave a Reply