WWW.TUNGZANGNEWS.COM

 
"Palaite nasep zia hawmthawh huai, tua teh ZAM mahmah a min kilaihta ding; Kikupna thupi khat om ding...." hong kici-in, a koipan aa thu hong gingkhia masa hizel a'itam.... koi pan aa kua teng ii hong hanciam sawm hi leuleu ding hiam, a koilai aa a tanaute ahih kei leh a siate ahih kei leh sum le pai tha a hat mawhlo mi pawlkhatte muang aa hih thu hong phuang hiam, a bang ngimna taktak tawh hih thu hoihsa hiding uh hiam, kuateng a madawk hi aa, a simtham pan kuateng ii tawsawn ahi di'am, a simtham pan lai tawh, message tawh kuateng ii hanciamna hiding hiam.... pau dang, nam dang hi peuhmahlo, ei sungteng mah ki hanthot kul lailai lawmlawm maw le.... ci-in, ka ngaihsutsut laitakin, khanglo seisai ingh. Zingsang nai nga na satpan ahih manin, thawh hun nai samlo, ka mang mat dingin zong mat taakkei phial ee, ka cipah hi.


Banghang in, hih mang man dihdih ka hiam? A hunhunin Palaite kisapna, thanemna tuamtuam gawmgawm le'ng honkhat om nong ding hi. Ki hawmthawhna mit tawh en ihiam, bang mittang tawh en ihiam cih thupi ding aa, tua khit ciang, akuate, a bang minamte, bang nasemte tawh teh ihiam cih thu teng in zong ih muhzia kibang sak hetlo ding hi.

Hih ki tangsapna tuamtuam cihte hangin, hih mang man dihdih lo ding hi'ng! Banghang hiam cih leh, mipihte aa ding nisim aa kum tawntung hunbit nasem genloh, gam tuamtuam aa mipi aa ding vaihawmna ma a pang khat peuhpeuh ki tangsapna a muhsak phadeuh pawlkhat ki-om zelzel lel hi. Tua leh, banghang hih mang man dihdih mawk ka hiam?

ZAM a min laih le'ng ee, cihpen tuma kum tamsim lai aa kiza zelzel thu khat hi bilbel aa, a lungsim ah zong a ngaihsun kha omkul nawnlo ding zah aa ka tuat khat a mangmat kha hi bilbel. Kei zakkhak loh ahih kei leh cihloh, tuma kum nih/thum khawng pan petpet teh, tuadan kammal kiza nawn khollo hibek aa, Zomi Kipawlna mipi-in ih vaihawm khop ngeingai kum masa lam teng kum bangzah hiamkhat mah tuadan thu ahih kei leh kammal kiza kiaukiau thei hi. Hong ging hethat, hong dawk hethatin, hong lawhcing samlo uhhi.

A ngaihsut hak penpen thu khatah, namdang/paudangte khatpeuh ii hong vaihawm aa, hong hanciam hilo mawk hi; Ei kampau kibang sitset bek thamlo, tanau vai aa nasem ih omloh hang, ih tanau, ih beh, ih meltheih mahmahte khawng peuh hong hi zanzan thei lai! ZAM a min laih le'ng, ahih kei leh ZAM pen Zomi galtai cihna khat ki helsak lai le'ng, ahih kei leh ZAM mahmah thaksuah sak ni, ahih kei leh ZAM limlim piangkei pong cih bangin a tuamtuam tawh thu hong om kiaukiau theizel aa, lamdang kasak mahmah lai thu khatah, uham, thu ngaihsun thei lua ding, a zahtak huai picing khin pawlkhat beklo, biakna lam Sia/upa pawlkhat in zong hong hanciam mahmah mawk hi.

Tua pa, tua nu kihel aa, tua pa, tua nu in tua hun lai-in, tua bangin Zomi Kipawlna buaisak ding hanciam cih a pulak nuam ka hikei hi. Tuamah bangin, a tua pa, tua nu aci ding hi le'ng zong tuabang thute ana phawk kha nawn khollo tamzaw kha lel ding hi. Thu khat bel om hi; Tua bang hunte na phawklai aa, tudong mah a san'zia, a muhzia a kibat lai leh lah ama muhna tawh hiding hi.

Zomi Kipawlna (ZAM) hita kei leh, ih omna gampeuhpeuh ah Zomi kipawlna a thapia ih hihzawh kei leh zong a nawngkai sak tuam ih suahkhak hetloh ding pen dik asalo omlo hamtang ding hi.

Tua hi-in, galtai cih min ih vawh aa, galtailo cih min ih vawh zongin, min khat peuhpeuh ih vawh a hiphial zongin, kum 2006 khit leitungbup Zomi sungah, ki lamdan'na, khan'tohna, kiamsukna, gualzawhna, guallelhna, namdangte hong theihzawhna cih bangin khuahun hong kihei hethatna hang pen Malaysia ah galtai kisan'na hang hi aa, leitung gam tuamtuam pan Malaysia vai tawh a kipelh thei Zomi a innkuan/tanau in sim le'ng tawm cihtak tawm kha ding hi.

Tua thu lian bek ta ngial en le'ng zong, ZAM Palaite nasep zia, Palaite mipi-in ih kisap zia, Palaite nisim aa a mapan'na uh cihte aneng atawng in ih theikei zongin, Malaysia aa Zomi Kipawlna (ZAM) pen tha na piak zawhna a omkei leh zong thu tuam, tha nem leh lawhcin' loh theihna ding thu leh vai khatpeuh na vaihawm aa, kampau leh laigelhna khatpeuh tawh na lungkim sese leh khial mahmah ding hi teh!

Ka mangmat leh tuma hunkhat lai aa ka taktak aa ka tuahkhak thu le vaite sungpan, Kipawlna ii kisap taktak a ngaihsun khial kha pak mipih sanggamte pawlkhatin zong, a tawmpen tuma kum nih hun peuhmah pan, "ZAM min laihkul kei mah ee" cih thu mukhin ding uhhi. Tg. Kham

 


Comments




Leave a Reply