WWW.TUNGZANGNEWS.COM

 
PicturePlanet Shakers - Gospel Music Concert
Dec.10-14, 2013 Tahan SHS No.2 Bawlung tualpi ah kibawl ding Healing
Crusade & Planet Shakers Gospel Music Concert hong tung petmah ding hi
ta hi. Committee leh vaipuak neite a munmun ah buaisim tham ta uh hi.

Australia pan a hong pai ding ih zingmangpi ding teng pen mi 18 hong
pha ding uh hi. Dec.9, Monday ni Yangon pan hong tung nuam uh hi ta
leh vanleng dang om lo a, vanleng neu te khat ah lah mi 14 bek kita
ahih manin tua ni hong tung thei lo ding uh ahih manin a zing teh
Dec.10 ni hong tung ding uh a, tua nitak pan kipan pah ngiatngiat ding
ahi hi.

Hih pawivai ah vaisai makaipi ahi, Revd Go Za Nang leh Main Committee
teng hi a, tuaban ah khangno lam a kipan sub-committee tuamtuam kikoih
hi. Khangno lamte in lasinna leh vaituamtuamte hong vaan uh hi.
Kalaymyo sunga om pawlpi tuamtuam 20 bang pan a kimapang khawm ahi hi.
Zomi, Falam, Mizo leh Khalkhak cihbangin kipang khawm hi.

A thulupi ding pen ahih leh, "We are One in Christ" Khazih sungah
pumkhat i hi, cih hi a, thangahhuai mahmah hi. Poster zong kisuang
kawikawi a, laihawm tuamtuamte ah zong kitangko zelzel ahi hi. Hihte
pen a Video a enkha ngei te'n a nasiat lam uh limtel diak uh a,
keibang a tuantual pawl ka hi a, tutungin ka cian zak pan mawk hi.

Nitak sim hi ding a, Revd Dr Thimothy Hull in hanthotna pia ding a,
Revd Cin Khan Thang (a) Thangpu, Hallelujah A.G Church (Monywa) in
kamphen hong sem ding hi. A tapa Sangpi zong vaidang a om kei leh hong
pai thei ding cih thu kiza a khangnote a lawpsa uh ban ah lawp beh
sawnsawn lai ahi hi.

Security lam tawh kisai-in a hithei zahkhopin sepsawm, kiginkholh sawm
uh a, Pa Gin Khan Pau Admin.Kalay District (Rtd) makai in vaipuak
kiguan hi. Pawibawl nading vai tawh kisai amah mah in tungsiah
lampanin phalna hong ngahsak ahi hi. Palik honpi khat in thau tawi
kawmin veengsung hausa leh lungchungzi te tawh ma hong pangkhawm ding
uh a, Thong Motor zong a baihsa-in kikoih ding ahih manin eimau tanau
sung peuhmahtua motor ah a lut khak lohna dingun i hanthawm kawm ciat
ding hi.

Praise & Worship tawh kisai pen Sia Thang Piak Lian' makaihna tawh
khangno tampi in mun hong la ding uh hi. Amau committee sungah Sia
Pian Lian (AMC), Sia Thang Mung (Emmanuel), Am.Tha Niang (Leipi), Sia
Lianpi (BAG), Taungphila pan leh Mizo lam panin zong om dimdiam uh hi.

Kigin ni zingsangin pawlpi tuamtuam pan khangno kiseh teng mi za valte
in a mun ah a kisam bang sem ding kuankhawm ding uh hi. Steward teng
leh hibang teng pen T Shirt kipia ding a, uni form vive tawh vaipuak
nei teng a kithei linlian dingin kigel ahi hi. Mipi lak a zuak ding
pen silh 30 khawng bek bawl tuak mawk uh ahih manin a deih hamtang
te'n pilvan kul ding dan hi.

Stage lamte'n zong zo pianpian ta uh hi. Stage tung a kilawm thei pen
dingin Sm.Ciang (LCEC) makaihna tawh vaipuak hong laksak uh hi.

Ih pawibawl nading pen Tualpi hi mawk a, leivui tam mahmah ding ahih
manin a khu lo thei pen dingin a hun masial in tanu pawl in motor tawh
tuibuah vaipuak hong laksak ding uh hi. Hih hun ah Sia David Suum leh
Pa Hang Lian Khup kiphawk mahmah hi. A hun teh hong kihel thei a om
vua leh Media committee min tawh mipi theih dingin a tuamin a sam ka
hipah uh hi.

Pawi hon ni pen thupi leh a kilawm thei ciang khat tawh hon ding
lunggulhna om a, a lemtheih a leh tungsiah lam panin ulian simte khat
honsak dingin geelna kinei ahih manin a hunzui-in i kizasak lai ding
hi. Ih omna mun ciat pan pantheihna lamlam tawh mapang khawm ciat ni, ci-in i kizawn hi.

Internet, online lam tawh kisai pen keimah vaipuak hong pia uh a, tua
lo ih Weekly News sungah suahsak dingte pen Tongsan, Zomi Times leh
ZYA weekly news te in zong hong kihel a, a kisam banga hong suahsak
ziahziah ciatna dingun ka zasak uh hi. Service tawh kisai Bulletin ka
bawl khit uh ciangin a kicing zaw-in i kizasak lai ding hi. Hong kihel
zozo hong kihel ta un, ci-in kong sam uh hi.

Sum tampi leh hun tampi bei a i mapannate Topa'n hong lawhcinpih ding
thungetna tawh hong na phawkpih ciat ta un. Lungdam.

Peter Khampu
Media Dept. (Tel: 09-33503356)
Healing Crusade & Planet Shakers Gospel Music Concert
Dec.10-14, 2013 Tahan, Kalaymyo.


 


Comments




Leave a Reply