WWW.TUNGZANGNEWS.COM

 
Gensiat siam mi kisam den hi

Gensiat siam mi tampi om khollo hi. Gensia ut pongpong bel mi tam lel hi. Gensiatna gen ngam khempeuh gensiat siam hetlo leuleu hi. Gensiat ding a thei den a om mah bangin gensiat ding a thei kikeuhlo mi zong om leuleu hi. Gensiatna bekbek a nuntakpih hih ding lah hoih kei e, gensiat ding zong a mu ngeilo limlim mi hih ding zong hoih tuan kei e. Gensiat ding a om ciang a gen ngamte hangsan bek hilo in a pil hi a, gensiat ding thei napi, gensia leh hoihna piang ding hinapi gensia ngamlote lah a dawilok leh a sem ngamlo hi zel e. A taktakin bel thu khat peuh ah gensiat ding a siam mahmah mi, phat ding ahih leh zong phatna ding a hoih mahmah a thei mi kisam den hi. Tua bang mite mipil hi a, miciim hi in, zahtakhuai a, ettehhuai in tampi neihhuai hi. Tua bang mi tampi neih ding kisam hi hang. Amau nasep 'ne-da-lo' hi (neulo, thuneulo hi).

Vai khat peuhpeuh a tangtunna dingin a mukhol (dreamer) a om kul a, a semkhia ngam (realist) a om kul a, a gensia ngam (critic) zong a om kul hamtang hi. A mukhol mi in ngaihsutna seksol nono leh nuihzakhuai pipi hong genkhia in a piangtheilo ding leh a om ngei nailo vive ahi nuam diak hi. A ngaihsutna te hi bialbual tawh kibangin a kipatna ding, a lai ding, a tawpna ding cih zong gen theihloh tawh kibang hi. A semkhia dingte in tua bang ngaihsutna lamdang nono kawm lak pan koi teng hoih, koi teng kizang thei ding, koi teng pan kipan ding cih tengkhia siam a, sepna zong kipan pah hi. A gensia siamte in a mangmatpa mangmat pan a leh gen hihetlo in ngaihsutna tuam leh a lehlam pan a etna khawng tawh nawkgawp in phu gawp a, lawhcing hileh bangci ding, lawhsam hileh bangci ding cih bangin ciik tak in dong sensen hi. Tua in mangmanpa (dreamer) pen a ngaihsutna khuak sa sak semsem hi. Ahi zongin tua khuak sa sitset kawm pan a hoihzaw ngaihsutna thak a lamdang nono hong pusuak hi.

Gensiat siamte in lungsim a ngaihsut ziau pen sepkhiat a hih tuan kei leh a khiatna omlo hi ci uh hi. Vantung pan suk et bangin mite ngaihsutna khempeuh muhsak thei uh a, a neng a tawng in sit gawp pah hi. A ngaihsunte adingin zakdah huai, luvaih huai, heh huai in gimhuai sak mahmah taleh a hoihzaw ding ngaihsutna lam ah tonpih in a hoih leh hoihlo ding buhtang leh buhvai bangin khaihsiangsak hi. A kideihlo pen leh a phun hat penin a kingaihsun gensiat siampen in a kisam pen a hoih a piangsak ngaihsutna na hikik zel hi.



Gensiat na sawm leh hih thute limtak ngaihsun masa in:

1. Mite in hih bangte kisam takpi hiam? cih dong hamtang in. Piangthei ding, hithei ding cih a ngaihsun a mangmat khat in a upmawh pen bingphut gawp dingin kithawi pah thei hi. A sem siamte in zong sem peuh leng piang ding hi ciin ngaihsun kician mello in kipan buatbuat thei hi. Ahi zongin a gensia siam mi in hih bang ngaihsutna pen bangci sep leng bangteng kisam ding, bangteng sia ding, bangteng hoih ding, bang teng piang ding, piang takpi hileh mite in a kisap uh a hu takpi diam, a mawknapi leh sum leh pai leh tha leh ngal mawk beina a suak ding hiam ciin ngaihsun detdet in a ngaihsutna te deu hetlo in hangsan takin pulak khia ngam hi.

Hoih mahmah ding hita leh a sem dingte in a deihtakpi ding hiam. A zeek dingte in a zeek nuam takpi ding hiam. Thugen ding hileh a gen dingte in a gen nuam takpi ding hiam ciin a ngaihsutsak ding hi. Thuhoih mahmah tampi a hoihna hang bek tawh gen khit kisam tuanlo hi. Van hoih khempeuh zong kisam lo thei hi.

2. A za dingte in a kisam takpi uh hiam? cih zong ngaihsut ding ahi hi. Thu khat kigen ding hileh a za dingte in a phattuampih ding hiam? A za dingte in a za nuam takpi ding hiam? A thei dingtein a thei nuamtakpi ding hiam cihte a kipulak ma in ciktak in ngaihsut masak khit ding ahi hi. Van bawlna ah hi in, thu leh la ah hi in, nasepna khat peuh ah hitaleh a zang ding, a zeekte deihna zong thupi a thuneu koihsak theih hilo hi. Tua manin gensiat siamte in limtakin a ngaihsut sak khit ciangin a genkhiat uh pen a tamzaw ah phatuam mahmah hi.

Tua ahih manin a phunphun, a gengen, a lehpanpan, mite a kan-kuat den cihte pen a hoihna tampi tak mah om hi. A thukimpih khinlote ngaihsutzia ding hong musak in, muhna thak, ngaihsutdan thak hong lak hi. Thuneu in ngaihsut ding hilo a, hehna in zong neih ding hilo hi. Hong engbawlna, hong enkona leh hong bawlsiatna zong hikhinlo hi; a hoihzaw ding ngaihsutna leh nasepziate a piangsak ding thu leh la zong hithei hi. Tua manin gensiat a siam mahmah mi koi mun peuh ah kisam den hi.

Mite gennop loh teng mite pulak noploh teng, mite zumpih leh mite gen ngamloh teng hong phuangkhia, suakta taka hong kikumsak thei gensiatna gen siamte bang nakpi takin thupi in pahtakhuai hi. Tua ahih manin ut in ut takei lecin hun sim in tua bang ngaihsutna nam tuamtuam na neihding leh gensiat dan ding na theih, na ngaihsut a kul hun om hamtang ding hi. Tua bang hun ciangin - a phatuam diam, a kizang thei diam, a meetpih diam, a piangsak takpi diam, a hoihlam in a piang diam a sia lam in a piangzaw diam cihte khinkhai dimdiam in kidek hetlo, kidaam hetlo in genkhia, pulak, phuangzak ngam lel in. A nek hak mahmah hangin zatui kha bangin damna ding hithei a, a khum mahmah hangin sihna ding gutui zong hithei hi. Tua manin a hoihzaw ding a lamlak thei gensiatna a zangthei leh a gensia ngam, a gensia siam mi tampi Zomi bek hilo leitung mite in tampi i kisam hi.

Zomi te diakdiak in i kisin, i limzat semsem ding leh i zatngam semsem ding kisam hi. A puksak leh a kaisuk lam hilo in a lamto leh a phongto, a laamsang lama gensia ngam mi kisam deuhdeuh hi hang. Minam khangto dingte in gal tawh a kipelh ding hilo a, a galte a zawh ding ahi hi. Tua bang gal zawhna dingin hih bang mite kisam pha diak hi.

Hau Za Cin
Phuitong Liim
http://www.hauzacin.blogspot.com

IOM pan Contact ki ngahlo :: Thang Za Khup (MY-108387) pen IOM zumpan ki nawhkan mahmah hi. Amahpen Khaksawh sitkikding hi a, atheikha na om uhleh ZAM zumah hong zasakpah un.

ZAM Card nong bawlciang :: ZAM Card hong bawl ding peuhmah in nulepa min, khamkhua min, suahni suahkha leh kumte banah na mangngilh nawn loh ding na min hong theihsawm hamtang in. Phone numbat na piak ciangin nang phone numbat leh nang hong kin pen dinga na upmawh na tanaute phone numbat zong thun ding mangngilh kei lecin mailam hunah nang aa dingin tampi tak pha tuam ding hi. Khamkhua icih ciangin gentehna in Kawlpi, Tedim, Tahan na cihmawk leh hamsatna banglo khat tuak kha lecin tua khuamite'n nang hong thei kei kha leh hong lungkham huai mahmah ding hi.

ZAM Card pen UN Card hisam lo ahih ciangin ahih theih leh ZAM Card na bawl ciangin na minpi leh na nulepa minpi gelh ngekgnek leteh hong deihsak mahmah ingh, ahizong nang sinthu hi! Suahni, suah kha leh suahkum cihte zong khel themthum loh dingin hong bawl le uhcin no aa dingin na mailam kalsuanzia uh hong noptuam mahmah zaw in um ingh. ZAM card tawi a innlam aciah khinte munah midang kilutsak thei lo a, min leh puam leh suahkum alaih nuamte zong ZAM Card a neih khit uh hangin Form thak ki Fill-up sak kik tangtang hi. Hih pen Card neite khual man hizaw hi. Malaysia hong tung thakte'n zong ZAM na bawl ding ciangin hong bawlsak dingte tungah a kisamte kician takin na theihsak uh thupi mahmah ding hi. Tua ahihkei leh kikhuanung buaibuai thei hi. Deihsakna tawh ih kigen thute ih ki saankhelh khak loh ding ka thungetna bulpi hi.

ZSM Meeting kinei :: Zomi Genvai (ZSM) Quarterly meeting 18/ 11/2013 ni in kinei thei a, 2013 kum beisa hunsung teng nasepna sate etkikna kinei theibeklo in ZSM kumcin khawmpi bawlni ding zong khensatna kinei thei hi.

ZSM kumcin khawmpi leh kiteelna ding vai sapna :: Topa hong kalsuanpihna tawh 2013 kumbei dinghi ta a, tukum sungin Zogam pan Malaysia ah galtai ih sanggam te mihing (27) in Malaysia gamsung panin hanmual hong liamsan uh ahih manun amaute phawkna leh ih dahna ih pulak hi. Migam mi lei ah hong nusia ih sanggam te'n hanmual atan zawh na'ngin 2013 kum GENVAI (ZSM) kipawlna ah RM10 tawh ih kihel manin amau te in hanmual atangzo hi uh a, ei mimal leh ih innkuanpih te adingin thupha bawl leh nahoih sem ih hihi.

Tua hi a 27/12/2013 Friday ni in ZSM kumcin khawmpi leh 2014 kum ZSM palai kiteelna neih dingin thukhensatna kinei a, tua ni mahin 2014 kum ZSM kipawlna laibu zong kihawm khia pah ding hi. Pawlpi tuamtuam pan makai Upa te leh Pawlpi kemsia te, Khua kipawlna tek panin makai te leh Zomi a it mipi khempeuh zong nong kihel theih hamtang nangun zahtak na lianpi tawh ZSM kipawlna pan' tangko in kongsam uhhi.

ZSM laibu ngetkikna :: 2013 kum hongbeiding hita ahih manin ZSM laibu akemlai Pawlpi makai, Khua makai te’n December 10 ma hamtang in acianlai laibu te ZAM zumah nongpuak nading un kong zasak uhhi.

Nasep tawh kisai pulakna :: Abeisa nungkal sungin, ZAM card tawi Zomite’ honkhat in Kajang leh Balakong lamah nasep hong ngah thei uh hi. Tulaitak (1). Kajang Ansai ah, Zomi pasal pau tawmtawm thei mi 5 kideih lai hi. Omna leh An pia, kha sum RM1000/-, Kha 1 nih vei off. Nai 11 sung nasem. (2). Company ah Welding nasem ding Zomi pasal 4 – 6 kideih, Nitha RM40/-, Nai 8 sung semding, nisim OT nai 2 ta semding, OT nai khat RM5/-. Omna leh An pia. Public Holiday leh Nipi ni sim off. Kizopna ding: Sia David Mungno: 017-333 4320

Lungdam Kohna

1) Zomi Catholic (ZCCM, St. Joseph Church, Sentul) pan tukal Thupuak bawlnading RM50 hong piakhia uh ahih manin lungdam ihko hi. ZCCM Pawlpi tawh naki zopnopleh: Francis Khampi 016 269 1351

2) Thang Khan Mung (Tualzang) pen thongkia hi a, ZAM Palai te hanciam pihna tawh hong suaktakhin in UN Card zong hong ngahpah hi. Lungdam kohna in Thupuak bawlnading RM50 hong piakhia hi.

3) Thang Sawm Pau (Tualzang) zong thongkia mah hi a, ZAM Palai te hanciam pihna tawh hong suakta in UN Card zong hong ngahpah hi. Lungdam kohna in Thupuak bawlnading RM50 hong piakhia hi.

UNHCR-SPF Meeting :: November 28, 2013 ni 9:00am pan 12pm Chines Assembly Hall ah SPF meeting kinei in ZAM panin palaite nih kihel thei uh hi. Tukum sung SPF project la teng lak pan Top 10 ngah teng pahtawh na leh Numeite pahtawina piakna nei thei hi. Maikum project ten nuamte ading a kisam teng zong genna hong nei uh hi.

NGO pan nasem ding kideih :: Omna piak anvak kha sum RM 1000/ pia ding. Nipi khat 1 vei off om den. Vai na neih a leh kha khat ni 2 offday kipia. A lunglut ten hih 016 245 3490 ah kiho thei.

Khual gamla pan CO Class nakahleh :: US nalending ciangin Tentan (Culture Orientation Class) hongki kahsak hamtang khading hi. Tua CO Class nakah ciangin Kuala Lumpur leh Selangor pualam pan ahi gentehna Ipoh, Johor pan nongpaileh nongpaina Bus Ticket, Train Ticket te hoihtak kem khinkhian in. CO Class natun ciangin Kamphen te kiangah laklecin asumbeizah hong piakikding uhhi.

Zomi Movie Thak kihawm khiata :: USA pan a(1) veina Zomi Movie, Anopdan: Director David Pauno, Kineih siamte: Muangta Zotang USA 2012, San Cing Zolia USA 2010, Sian Cing Zolia Atlanta-GA, USA 2013, pen tuni a kipan in ZAM zumpi leh Zosai te panin kingah ziahziah thei ta hi. Hih Movie in gamdang tung Zomi Khangno te ii nopsak na leh inn lam pan hong lamen tawntung Nu leh Pa te' lunggulhna lianpi te hong musak aa, ngaihsut huai thu tampi hong phawksak hi.

Zolia & Zotaang DVD ki ngahta :: Tukum Khuado Pawi hunsung ah atuamdiak in ihbawl ahi Zolia & Zotaang kidemna DVD ki ngahta hi. Adeihpeuh in Zolia & Zotaang kidemna ah akihel te tungpan ahi zongin Aungnandaw, Taungzalat, ZAM zum leh Zomi te kikhopna biakinn pawlkhat pan ahi zongin ki leithei dinghi.

Zolia & Zotaang Calender :: Zolia & Zotaang te pahtawina in akibawl ahi 2014 Calendar zong asawtlo in hongki hawmkhiading ahih manin akua mapeuh in tha piaciat ni. Nangkiang ah hongki zuakkhak leh Zolia & Zotaang te pahtawina in naleisak hamtang unmaw.

Kimat kihen natuahkhakleh:
⦁ Sia Tuangpu : 016-254 4093
⦁ Sia Thaa Mung : 016-646 5375
⦁ Sia Kam Mung : 016-995 6231
Zato vai kisapna aomleh:
⦁ Sia Khoi Tuang : 010-286 6189
⦁ Sia Kam Sang : 016-918 9692
⦁ Sia Kep Lian : 014-369 4897 
Nasep leh Bank Card vai:
⦁ Sia David Mungno : 017-333 4320

Address:

155A Jalan Maharalela,
50150 Kuala Lumpur
Office Tel: 03-2142 6659
Hotline: 016-293 9027
Email:  zomiassociationmls@gmail.com

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

Thupuak Volume 8, Issue 26 (01 December 2013)

 


Comments




Leave a Reply