WWW.TUNGZANGNEWS.COM

 
Tutung Kawlgam bup census ding tawh kisai-in, ei Zomi thu kizakna tuamtuam te ah veina leh lunggulhna thu tampi mah I mu hi. Tua te sungah kei mimal veina tawh kisai I sepzia ding ka lungngaih thu te in:


1. Code number 914 munah Zomi ci’n din kim ding mah dik kisa kim tek ahih manin, tua sung mun san takah, Kham le zang a om Zomi a kuama ciat in, ki lungkhat in I kalsuan’ theihna dingin, a masa in Zomi census vaipuak la ding te in, Zomi bup te’nna khua hausa te kiangah, (census la ding a pai kumpi lam leh sang sia/ma te tung’ a paima un,) code 914 ah Zomi ci’n fill up hamtang dingin, vaikhak huai ahih zia gen huai sa ing. Bang hang hiam cih leh kawlgam a om nu le pa te pen lai thei lo tampi mah ki om aa, bek tham lo in, tungsiah pan thu nei khat peuh thupiakna tawh I lamet bang lo in, thu kawng hong kihel khak ding lau huai sa mahmah ing. (gtna: Pyidawtha- Yauhchokwin khua te bang Zomi bup te’nna ahih manin, census sim hun ciang tungsiah pan hongpai a om leh hausa te’n gencian in, ko ka khuabup un, minam khat, paukhat zangkhawm te hi ung aa, tua manin, code 914 ah Zomi cih fill up ding nangawn a telsiam lo om ding ahih manin, tua munah Zomi ci’n fill up ding hi) cih dan khat eimi bup te’nna khua hausa te’n pansan honglak pih dingin, kawlzang eimi khua te diakdiak tung’ gen cian ding leh tua ni in, khua sungah mimuan’huai a teitang zawdeuh te volunteer in paisak mai-in, kician takin, thu leh la I lungtupna zui in, I geel kholh kei leh Kawlgam penKawl U Lian hai khat peuh in, a theih loh man peuh in, Chin ci un or a omsa khatpeuh guang un hong ci mawk leh I Zomi pen kisimna ah kiam tuam ding ka lauh man hi. Khua ta lam a te’n Kawl pau zang Ulian khatpeuh lau mahmah lai mawk ahih manin, Zomi kipawlna in, pansan lak zia ding kong pulakna hi.

2. Gamdang om teng in, internet tawh thu I ki zakzak hang, I gam aa om I mipih te internet zang 1/10 om nai het lo ding hi. A zang sunsun te nangawn gmail leh facebook ciang tungsiah, Zomi online news tuamtuam te kuama’n sim kha ngei lo ahih manin, inn lusik phial ah Census ding vai, gencian ding zong kisam sa ing. Tua Census pen leitung bup theih pih dingin, a khatveina ahih manin, nakpi in zong thupit bawl zong leng, fund a kisap leh zong Association zui, section zui, Convention leh pawlpi lian te tungtawn in ahi zongin, eimi sungah a nei zawdeuh te tungtawn in, ei ang sung ding hilo minam a ding ahih manin, huhna ngen leng tampi mah hong luang lel ding hi.

3. Ka vei mahmah thu in, ei paukhat zangkhawm thei, minphuah dan a kibang teng I kipum khat nangin, a diakdiak in, Sihzang sungah, Zo sungah leh Thado-Kuki sungah zong, khua lutang te leh biakna lam, leitung lamah a makai te uh tawh kikup khopna bawl huai kasa hi. U zaw lungsim zangin, kiniam khiatna tawh I minam- Ipau a tangzai nang, ei Zomi sung teng mahmah zong, I pumkhat theih nang, ki muh khop, ki pawlkhopna zong kisam mahmah sa ing. Tua bang mun te ah zong, hongpai un thu kikum ni ci’n a sam ziau hilo in, amau kiang mah ah va zuan zo in, thu le la kipum khat nang kikum khawm ding pen kisam mahmah sa ing.

4. Tutung Census tawh kisai in, khat lam pan I ngaihsut dingah, Zomi cih tawh a ding a tamzaw om in, Sihzang, Zo, Thado-Kuki cih bangin, a tuam din’ I om zilzul leh kumpi ciaptehna sung’ mimal 50,000 cing zolo te zong’ ethnic khat in, hong ding to suak ding uh aa, ei Zomi a kici phadiak te sung nangawn ah kipum khat ding penhong hamsa semsem lai ding hi. Tua manin, ei Ciimnuai Zosuan teng beek I ki thutuah theih masak na dingin, tutung Census ah Zomi tawh I din’ khop theih nang, kimu khawm ki kup khop sawm hamtang ding hi hang. I “Laimi” lam te’n, ZBC deih lo pipi in, kum tampi hongzui tentan uh aa, khatzong kikhen thang lo in, kipum khat hilhial in, Zomi pan Chin ah a khek bangin, ei zong thusau tawh kalsuan in, kikhen bawl lo in, no na ut kei uh leh phamawh kei cih lam hilo zaw in, I kizol, I kihuai diamdiam ding ei Zomi te’n ngaihsut pi in nei thei leng tutung Census in, hong gawm kik thei ding hi cih keima muhna hi.

Kaino @ Thang Khua Kai

 


Comments




Leave a Reply