WWW.TUNGZANGNEWS.COM

 
Gam pua ka pai khiat zawh kum 20 khit, 2009 kum December sungin Kawl gam ah ka hawh kik pak hi. December 31 ni-in Kawlpi panin lawp takin Tedim ka pai to aa, ahih hangin lampi ah ih gam sung ah sing tampi abei ta ka mu hi. Kum 20 sung bekin hizahin singte bei leh, mailam kum 20 ciangin bang suak ding cih bekbek ka lungsim sung ah om hi. Sanggam, lawm leh gual tawh ki muh kik ding ka lawpna teng sangin singkung beina hangin ka lung hihmawhna ong tamzaw sem -sem hi.

A thai ciang, 2010 January ni 3 ni ciangin Kaptel Hausapa, Pu Do Za Tuang leh upa thumin akhua uah ong sam uh aa ka vapai hi. Gungal khuate nangawn singteng bei khin ka mun ciangin ka lungsim gim semsem hi. ‘Na khat pepeuh bawl loh phamawh cih ka ngihsun hi.

Tua hun laitakin, Kaptel khua ah micro-hydro neu, veng nga ah om khin zo hi. Ahihhangin, tuate tawh mei taang bek kingah aa, an kihuan thei lo ahih ciangin, sing om sunsun kitomin, sing bei semsem ahih manin singzung nangawn kito ta hi.

Hausa pa kiang ah “ Tui kicing ding a om leh Hydro lian khat kong vaihawm sak ding hi” ci-in a sum ding om lo pi-in kamciam ka pia hi.
2010 March kha ciangin, ElectricalEngineer, Pu Mang Piang in anen-asi aa atuatna lai ong khak uh hi.

Tua ciangin, huhna ngetna lai khat ka hawm khia aa Australia gam, US, Canada, UK,Hong Kong leh Taiwan gam teng ah ka zi leh kei sang kahpih siahuante kiang leh meltheih lawm leh gualte kiang pan in huhna ka ngen kawikawi uh hi. Asawt lo-in $ AD 16,000 val ka ngah uh aa tua ciangin nasep ka kipan sak pah uh hi.

Thanuam mahmah, tha hat mahmah uh in, hanciam takin nasep kipanpah uh aa keen dang suang tumpi lak ah tui laakna, canal, tai lang val asau khat leh pi 245x20x6 apha tuibem, reservoir, bualpi khat kum nih maa-in ong piang pah deedaa hi.

Tua khit ciangin, sum om teng tawh, meiset koih nading inn khat ki lam pah aa, dat khau khun nading concrete khuam pi ki sung aa, sum teng ong bei hi. A kisam lai, mei set, transformer 4, dat khau kualpi tampi, kahkam leh atuamtuam, azah thum val teng, kei lah nasem nawn lo ka hih ciangin ka zi, Dr. Maisie Dong in ong piak sak tawh aki zo siang ahi hi.

Hih Hydro Project aa bei zah atung aa kong gente sung ah khua mite hanciamna, thaman, azat uh vante leh aneek adawn uh ki hel lo hi; sumtangin kituat hileh sang ( lakh, teng ) aza tampi pha lai ding hi.

2012 kum December kha 27 ni-in hon pawi nasiatakin ki bawl aa, Chin State vuanzi, Pu Cin Lian Pau, Minister for Electricity & Energy, Pu Nang Za Mung, Minister for Planning & Revenue leh Pu U Ba Maung, Minister for Social Welfare, vuanzi thumte tawh ka va hong uh hi.

Tu-in Kaptel khua ah, Hydro tha tawh, buh kihuan, vaimin ki-uii, meh lim ki bawl, niangtui kisuang in, set tawh puan kisawp, puan ki taih aa, sa, singgah leh antehte vot dikdekin kikem in heater tawh khualum ki awi, lettama na kisem ta aa, nungakte’n sam nangawn kiil sak ta lailai uh hi. Hih te khempeuh gam khangtosate mah bangin switch mek ziau bek tawh ahih uh hi ta hi. Bangzahin nuntak ki lamdangin nuam hiam!!

Alungdam huai thu khat lai ah, sing tawh an huan nawnlo uh ahih ciangin, kuamah singtom, singpua in pai nawn lo ding aa, tha maangin nuntak nakpi takin ol ding ban ah asawt lo-in agam uah sing ong niim diildial kik tading aa, khuahun ong hoih ding hi.

Hih pen ih Khamtung gam, Chin State, sung bek genloh, Kawlgam sung ah ih khuapi liante nangawn ah, ani-anai ciangtanin, aveeng aveengin electricity kihawm aa mi tampi in sing mah tawh an ki huan lai hi. A kilamen ngei lo, sun leh zan, nisimin inn 500 val in electricity tawh an kihuan masakpenna khua Kaptel khua ahih manin huhna ongpia leitung mun tuamtuam pan ong deihsak, lawm leh gualte tung ah lungdamna kong ko uh hi. Nong deihsakna uh thupha hangin, na nuntakna uah leitung thupha mei bangin taang ta hen.

Khuakiim khuapaam in zong va-veel, va-ettehin hanciam ciat nading ka deihna uh bulpi ahih mah bangin, khua dangte’n zong ki hanciam ciat leh asawt lo-in ih Khamtung gam sung ah anop nuntakna ong tung thei ding cih ka lunggulh uh hi.

 


Comments




Leave a Reply