WWW.TUNGZANGNEWS.COM

 
Leitungah mihingte koikoi itunga, bangbang isem zongin, ihun acin ciangin asi ding vive ihihi. Hih leitungah inuntak sungin, ngaihsut theihna khuak tawh thu ngaihsun in, na khat peuhpeuh isem thei hi. I sih khit ciangin bangmah kimanna nei nawnlo in, mihingte tawh vaihawmkhop, sepkhop, gelkhop theih peuhmah om nawnlo ding himawk hi.



Tua ahih manin, leitung mihing khempeuh lametna tawh kinungta kimciat hi. Ahi zongin ilametna leh ilametzia pen atuamtek hi-a, kibangkim khinlo hi. Tua ziakin Religion kici Biakna hong piang ahihi. I lametna leh ilametzia kibangkim hileh Biakna tuamtuam omlo in, upna khat sungah Pawlpi khat ah kipumkhat ding hihang.




Leitungah apaipi in biakna lian mahmah li om a, tuateng sungah Christian kici biakna zongh khat in kihel hi. Hih Christian sungah minam vai leh gam vai hangin, upzia leh kimakaihzia kikak zilzial in, amau kalsuan ziate pen Milky Way Galaxy mah tawh akibang ziaizuai ahihi. Tua sung panin, Ei Zomi atamzaw pen Christian upna tawh anungta mite ihihi.



Lametna icih tak ciangin, apiangthei lametna om a, upmawh lametna zongh om veve hi. Apiangthei lametna icih pen i nisim nuntakna ahihi. Zingsang simin, ni hongsuah mah bangin nitak teh ni hong tumin, khua hongzing ding, cih lametna pen mikim in isantheih lametna ahihi. Naungek khat hong suak a, mihing ahihna tawh nikhat ni teitei ciangin si ding, cih ilametna pen mikim in, isan theih lametna ahihi.



Chrisian kici mite' lametna pen isih ciangin, ikha silo in, Vatunggam or Hell gam khat zaw teitei tung ding, ci-in lametna nei uhi. Hih lametna pen Laisiangtho tungtawn a amuh khiat uh ahihi. Tua Christian kici mite zongh upzia, sanzia, duhzia, deihzia, muhzia leh kalsuanzia kibangkim vetlo uha, amau tumtek in, apai melmel vive ahi uhi.



Bangbang ahi zongin, apiangthei thute tungah lametna ineih pen angeina hi-a, apiang nailo tungah lametna kician ineih theih pen ei mahmah kihampha hilel hi. Lawmte khat Pasian thu genlua kisa in, "Ute naute aw, Vantunggam pen om takpi hi, ci-in umlel dih un. A om keiphial lezongh isup nading peuhmah omlo hi," ci-in, nasiatak in sermon hi.



Lametna sungah nungta leteh lungnopna leh khamuanna nangah dinga, lungkham sinkhamna tampi in nang hong buaisak zolo ding ahih manin, leitung nuntak tomkal sungah nang le nang mah ahoih thei pen dingin kalsuan a, lametna kician tawh na nuntak ding thupi kasa mahmah hi.



Dal Sian Hung
Kuala Lumpur, Malaysia.

 


Comments




Leave a Reply