WWW.TUNGZANGNEWS.COM

 
Japan te in a gam uh a minam uh a itna hong lak tangthu khat hi. Mite in a gam a lei a minam uh it mahmah uh hi.

Zomi te in Japan Gal ciin i ciamteh World War II hun a Japan galkap khat amin Mr. Hiroo Onoda pen Philipine gam ah a kisawl hi a, 1944 kum in gal sim dingin Lubang mun ah a kipuak hi. Japan Gal bei nailo hi cih upna lianpi nei ahih manin Galpi beita ciin a kigen hangin um nuam tuanlo in gamsungah kibu in a kim a kianga omte do in manlah mahmah hi. Amah uk galkap bu pa teekteek va pai in a va zol ciangin Japan Gal beita hi ciin um pan a, 1974 kum in hong ciah pan hi. Japan Gal pen Atom Bomb kikhiat ciang 1945 kumin a bei khinta hi a, aman bel um ngam pak lo, a bu pa sapna, genna bek a um ahi hi.

Japan Gal a bei ciangin galkap tampi leitung mun tuamtuam ah a om uh hi. Pawlkhat ciahkik in pawlkhat ciahkik nuamlo in pawlkhat gamsungah gal a bei lam theilo in a kim a kiang uh dodo lai uh hi. A kihilhna vuah "never surrender" (kipiakhia ngeilo ding) cih hi. Guallel a kipiak sangin sihna telzaw ding cih hi ngeu lel hi. Tua manin Japan Gal a bei ciangin tampi a gam vuah ciahkik ding maizum uh ahih manin amau leh amau kithat uh hi. Guallela ciahkik ding sangin galhanga sih pen a telzaw uh hi; tua zong a kihilhna uh hi. "Kong sap mateng uh hong ciah kei un. Thu kong piak mateng uh na sep ngei teng uh na sem un. Ko thu lo midang thu na um kei un," cih himawk ahih manin amau uk Bu te thu simloh midang thugen peuhmah zuau hiding cih upna tawh um vetlo uh hi. Onoda zong tua bang mi khat ahi hi.

Ama omna Philippine ah galven ciangin mi 5 nungta lai uh a, ahih hangin khat ciahkik in a dangte a kim a kianga khua omte a simna vuah, Philippine galkapte tawh a kikaptuahna ah si uh a, pawlkhat kiman hi. Amah pen kiman zolo in peng den hi.

Gal beita hi ciin sapna lai khak in mite kamtai in sawlta leh um nuam tuanlo hi. 1974 kuma a Bu pa in a va hopih ciangin um pan a, tua hun in hong ciahkik pan hi. Japan a tun kik ciang "Banghangin midangte in hong sap uh ciangin umlo na hi hiam?" a cih ciangin "Muanhuai dinga hong kisawlna ka pelh nuamkei hi," ci ziau lel hi. Minam adingin muanhuai taka pang ngam, pang pa himawk hi. Philippine ah a om sungin kumpi tawh kido in a kim a kianga khuate tawh kido himah leh kumpi mah in 1996 kumin Philippine kumpi in a gam vuah hawh dingin cial kik a, sum tampi pua in sangkahte panpihna ding leh khangnote pattahna dingin pia hi. Tukum 2014 ciangin kum 91 a pha in si hi.

Galkap lubawk khat leltak in hizaha a gam it, a kumpi uh Emperor adingin si ngam, pang ngam, muanhuai zo cih pen leitungin lamdang a sak mahmah khat ahi hi.

Minam a it manun Japan te a khangto mahmah uh hi cih hih tangthu panin kimu hi.



Hau Za Cin
Phuitong Liim
www.hauzacin.blogspot.com

 


Comments




Leave a Reply