WWW.TUNGZANGNEWS.COM

 
Operasi….Operasi….Operasi
Tukha 21/01/2014 akipan Operasi hong laang ding cih thu pen phuaktawm thu hipeuhmah lo ahihman in Zomi khempeuh UN card nei leh neilote ih vekin kidawm mahmah dingin a kigen phapha hihang.


Tuni 18/01/2014 in H.E.I (Health Equity Initiatives) zumpi ah Operasi vai kikupna om a, tualai ah Mrs. Wai Ling genna panin “Tutung Operasi hun sungah Immigrationte in Malaysia sunga laibu lo tawh om khempeuh mat siang dingin khensat uh hi. UN card nei leh neilo khentuam lo ding a, deidanna om het lo in hong man ding hi. Hih hun sunga mat a tuak kha khempeuh amau gam ciatah ciahsak kik ding uh hi ciin Tadensa in gen hi.” ci hi.

Mipi lampan in “Tua ahileh hong man dingte Immigration te bek maw, ahihkei leh Rela leh Police tezong kihel ding uh ahiam?” ciin thu kidong hi. “Police te’n migilote bek man thei uh hi. Ahizongin tutung Operasi hun sungah Immigration te’n Police te, Rela te leh Civil Defense te zawn uh a, amauteng tawh kipawl khawm in Malaysia sungah phalna om lo a teeng teng luak siang kiuhkeuh ding uh hi. Numei naupang leh nupi gailaite naleng zong inn kawngkhakte kalkhia in man ding uh hi.” ciin dawng hi.

Papi khat hong dingto leuleu a “Community lampan in mat tuakte sum tawh tat theihdan lampi a om diam?” acih ciangin Mrs. Wai Ling in hibang in dawng hi “Tua bangte sum tawh ih tatpen thumaan hi lo hi. Golhguk apiapia kisuak hi. UNHCR laibupi sungah galtaai (Refugee) 120000 val Malaysia gam sungah om hi. A dangte tawh gawm khawm lehang tam mahmah hi. Tua ahihman in a kiman khempeuh sum tawh tan pahpah mawk le’ng Rela leh Palikte zumsung sumlut a pung saksak ih hihi.”

“ Mat leh hen tuak in H.E.I te hong zasak le ung no ong bangci huh ding?” ciin khat in dong leuleu hi. “Ko lampan in Upadi (Law) tawh hong panpih ding hi ungh. Sum piak kul lo hi (Free Service).” Ciin Mrs. Wing Ling in dawng leuleu hi. Hibang in thu kikupna kinei hi. Hun mankuan ciangin Mrs. Wai Ling in whiteboard tungah Phone Number thum hong gelh hi. “Mat leh hen na tuak zenzen uleh hih kong number piak tengah SMS hong khak unla hong Call hamtang un. Na kipawlna zumpi uhzong na theisak pah hamtang un. SMS ah na min, na UN numbat(or na Community card numbat leh min) koih kholhsa in nei inla, hong matna mun leh veng zong na theihsawm hamtang un. Hong mante min leh numbat hong khak pah thei le ucin ko a dingin nasep nuamtuam mahmah ding hi.

Phone:Wai Ling (H.E.I)-016 323 8095,
Moses (H.E.I)- 016 211 5691 
Vijay (H.E.I) - 016 211 5742”

Hibang teng tawh hun hong bei in nitaak nai 4 hong sat ta hi.

Reported by Francis Lamthang/ZAM iNFO

 


Comments




Leave a Reply