WWW.TUNGZANGNEWS.COM

 
PictureZIUSA Thupulakna: 2014 Myanmar Census & Zomi Movement
Zomi Innkuan USA, Inc.
Executive Committee

Thupulakna
January 14, 2014

2014 Myanmar Census & Zomi Movement

1. Zomi Innkuan USA kipawlna in “2014 Myanmar Census & Zomi Movement” Maban lianpi khat kalsuan dingin Executive Committee in vaihawm hi. Hih Maban alawhcin’ zawhna dingin muntuam gamtuam a om Zomi Innkuan kipawlna khempeuh, Zomi kipawlna khempeuh, Zomi-te Pawlpi khempeuh, tuipi galkaai Zomi khempeuh ma akhawm dingin hong kizawn hi.



2. “2014 Myanmar Census & Zomi Movement” maban Ngimnate (Objectives) anuai a bang ahi hi.
(i) Zomi Innkuan USA kipawlna Ngimna Bulpi khat ahi; “Zomi-te in minam kician, minam picing dinmun khat atun’ zawhna dingin kipawlkhawm in vaihawmkhop theihna ding” cih thu tawh kituak in 2014 Myanmar Census (Kawl Gambup Kisimna) ciangin Zomi-te in minam kician, minam picing khat hihna a kikipsak zawhna ding leh minam min pen “Zomi” a hihna kician takin a kikhum theihna dingin hih thu kivaihawm hi.
(ii) Zogam a kipan Kawl gambup a khantohna dingin a kisampi pen khat ahi, Kawl kumpi leh UNFPA pawlin a vaihawm 2014 Myanmar Census (Kawl Gambup Kisimna) alawhcin’na ding tha pia dingin hih thu kivaihawm hi.




3. “2014 Myanmar Census & Zomi Movement Fund” dingin tuipi galkaai Zomi-te tung panin, Zomi Innkuan kipawlnate tungtawn ahi zongin, mimal in ahi zongin, panpihna sum leh paai kikaikhawm ding hi. 2014 Myanmar Census ciangin Kawl gam sung a om Zomi-te in Kisimna Ciaptehna Laipi (Census Questionnaire) sung ah Minam khat hihna tawh, Minam min pen “Zomi” in a khum theihna dingin vaihawmna leh mapannate ahi thei zahin sum leh paai tawh papanpih ding hi.



4. Minam khat hihna leh Zomi min thu Laihawm kihawmkhia ding hi.

Zomi Innkuan USA kipawlna min tawh Zogam mun khempeuh a om Zomi-te tung ah; Kawl kumpi in minam tuamtuam in ahong khenkhapna uh ahi, (401) Chin, (407) Khuano, (413) Guite, (414) Ngawn, (415) Sihzang, (417) Saizang, (421) Zo, (424) Tedim, (425) Teizang, (427) Thado, (429) Dim, (440) Lusei, (447) Hualngo cih ciaptehna teng pen a mun a mual, khang simna, beh leh phung zui a kilawhna bek a hihna, tua mite a kigawmkhop ciangin minam khat ih hihna, minam khat hihna tawh minam min khatbek in kiciapteh ding a kisapna, ih minam min pen Zomi a hihna cihte a thu a la tawh limtak in hilhcianna bawl in laihawm tawh taangkona kinei ding hi.



5. Zomi Congress for Democracy Party tung ah anuai a bangin lai phah in kicial ding hi.

Zomi Congress for Democracy Party in; “Kawl gam sung ah Minam (135) om hi”, “Chin State sung ah Minam (53) om hi”, “Tedim, Tonzang, Cikha, Kale, Kalewa, Tamu, Homalin gam bekbek ah Minam (13) bang om hi” ci-a kiciaptehna leh Kisimna Laipi sung a khumna pen thumaan hi peuhmahlo hi ci in thupulakna (Statement), taangkona (Press Release), thukimlohna (Objection) limtak in ahong bawlna dingun kilunggulh hi. Tua thupulakna pen Kawl gambup President a kipan kumpi thuneite, kilemna bawl uliante, UNPFA leh Kawl gam kumpi kisimna lam a uliante, Parliament innpi dawl nih makaite, Kawl gam sung a om Media khempeuh, Kawl gam sung a gamdang zum (Embassy) khempeuh ah theihsak ding kilawm kisa hi.



Hih thu tawh kisai in Zogam sung a om Kawl kumpi in ahong khenkhapna ahi minam tuamtuam kici pawl khat pen a mun a mual zui-a kiciaptehna, khang simna leh beh leh phung tam a kilawhna hibek a, Minam dinmun hilo a hihna gentehna tawh hilhcianna bawl dingin kilawm kisa hi. Bama kici Kawl minam sung ah Yangon mi/ta, Pagan mi, Shwebo mi, Inwa mi, Mandalay mi/ta, A-nya mi/ta cih bangin a mun a mual zui in, a kilawh uh hangin, Yangon minam, Pagan minam, Shwebo minam, Inwa minam, Mandalay minam, A-nya minam cih bangin kikhen peuhmahlo uh a, Bama minam khatin ding uhhi. Tuamah bangin Zomi-te zong Tedim mi, Teizang mi, Sihzang mi, Dim mi, Saizang mi cihbang in a mun a mual zui in a kilawh hangin, tua miteng a kigawmkhawm pen Minam khat hi a, a Minam Min pen Zomi ahi hi ci in ZCD Party in kiptak in a pulak ding kisam kisa hi. Hi bangin vaihawmna ah a kisam sum leh paaite ahi thei zahin kisik ding hi.



6. Zomi Members of Parliament (MP-te) tung ah anuai a bangin lai phah in thu kisung ding hi.

Kawl gambup Parliament a dawl nih leh Chin State Parliament ah Zogam panin mipi tangmi in akah MP-te tung ah; “Kawl gam sung ah Minam (135) om hi”, “Chin State sung ah Minam (53) om hi”, “Tedim, Tonzang, Cikha, Kale, Kalewa, Tamu, Homalin gam bekbek ah Minam (13) bang om hi” cih thute maan peuhmahlo hi ci in a Parliament ciat uh ah Zomi taangpi taangta tangin thu asun’na dingun kilunggulh hi.



2014 Myanmar Census bawlna sung a kizang ding thu leh la ciaptehna Kisimna Laipi sung ah Zomi-te pen a mun a mual, khang simna, beh leh phung zui in minam tuamtuam in a kikhenna pen diklo hi, Kisimna a kibawl ma-in manlang takin laihkul ding hi ci in a Parliament ciat uh ah thukin asun’na dingun kilunggulh hi.



7. Global Zomi Alliance Makaipite tung ah anuai a bangin lai phah in thu kisung ding hi.

Global Zomi Alliance Makaipite in; Kisimna Laipi sung a kikhum ahi (401) Chin, (407) Khuano, (413) Guite, (414) Ngawn, (415) Sihzang, (417) Saizang, (421) Zo, (424) Tedim, (425) Teizang, (427) Thado, (429) Dim, (440) Lusei, (447) Hualngo cih ciaptehna teng pen a mun a mual, khang simna, beh leh phung zui a kilawhna bek a hihna, tua mite a kigawmkhop ciangin minam khat ih hihna, minam khat hihna tawh minam min khatin kiciapteh ding a kisapna, ih minam min pen Zomi a hihna cih thute kiptak in pulakna ahong bawlna dingun kilunggulh hi.



Global Zomi Alliance Makaipite in 2014 Myanmar Census ciangin Zomi khempeuh in Kimsimna Laipi sung ah ih minam min pen “Zomi” ci in a kikhumkim ciatna ding hanthotna ahong bawlna dingun kilunggulh hi. Tuamah bangin, Zogam sung a om Pawlpi khempeuh pan Siapite, Makaite, Upate kaikhawm in, Pawlpi mi khempeu in Kisimna Laipi sung ah minam min pen “Zomi” ci-in a khumna dingun thupiakna ahong bawlna ding kilunggulh hi. Hici bangin vaihawmnate ah a kisam sum leh paaite ahi thei zahin kisik ding hi.


Executive Committee

Zomi Innkuan USA, Inc.


 


Comments




Leave a Reply