WWW.TUNGZANGNEWS.COM

 
ZOMI & Myanmar Census 2014

2014 sung aa akibawl ding, Myanmar Census vai ah, ZOMI i legalize ding vai, ZOMI khat kahihna tawh, mimal mawhpuak( Individual Role) bangzah ta-in lian cih, mi mawkmawk(Civilian) dinmun pan-in, kong at nuam hi. Banghang hiam? Makaite, ZOMI makaiten na a ongsem khinta ahi hi. Amin in vawh ding hileng, ZNC/ZCD hanciam-na hi ding hi. Ahizong-in, mun khem peuh aa, ZOMI makai khempeuh ii hanciam-na zong ahi hi. A tom-in, makaiten na ong semkhin hi. Minam sung ah, minamvai peuh mah ah, makaite vaibek hi lo aa, minambup vai ahi man-in, makaite sep ding bek ahi kei hi. Mipi sep ding zong a om hi. Thasial kei ni. Hamsa lawmlawm lo hi. A hamsa teng, makaiten ong khitpih zo hi. Mipi(Civilian) icih tak ciang-in, Politician hilo, Expert hilo cihna ahi hi. Ahizong-in, ZOMI khat ihih-na, i hihna bangbang(Zomi Identity) ilah nang-in, pil masak veva akul ahi hetkei-aa, a makai nahih masak ding zong, akul hilo hi. Tua ahih man-in, minam khat ihih-na lah khiat nang-in, mimal khat ciat mawhpuak omhi cihte, nisim nuntakna pan, tuahna thu, muhkhiatna thu tungtawn-in, kong hawmsawn nuam hi.

Amasa penpen-in, ZOMI ihih leh, banghang-in, CHIN kici, ong kici ahi hiam? Kilehkik kik(Loop) ding ahi kei hi. Tua a cinuamte tung, "CHIN" cih kammal akhiat-na kong dong nuam hi. ZOMI bek tham'lo Hakha, Falam, etc kua mah-in, a genthei kei ding hi. A gen leh azuau ahi hi. Kawlpau bek-in, akhiat-na aom hi. Kawlpau in, CHIN banghi cih, I theikim tek hi. Minam min a khiatna neilo, minam khiatna nei lo ihi ding hi. ZOMI in, pauleham nei hi. Ngeina nei hi. Leitang nei hi. Kawlgam aa sangkah kha ten, i thei ding hi. Kawlgam tangthu; 16th Century, Taungoo Dynasty hun lai-in, a galhat mahmah, Bayinnaung hun, 19th Century Kongbaung Dynasty hunte khempeuh ah, kua maa uk-na nuai aa, a om ihi kei hi. ZOMI , ei le ei aki-uk minamte ihi hi. Britisih ten, ong Colonized khitzawh lam phingphing teh, hih CHIN cih kammal, ZOMI uk-pi te beina pan, CHIN HILLS ACT cihmah bangmah ong om panbek ahi hi. Tua zom ah, 1948 kum U Nu kumpi tawh Democratic Nation khat aa dinhun, 1962 Ne Win ii Burma Socialist Programme Party hunte ongtun teh, zawhthawh thu tawh, CHIN min apai suaksuak ahilel hi. Gammi thu-theihna(Civilian Education) kinei lo lua lawmlawm ahih man-in, ong kicih bangbang i nuam phangphang aa, i minam anat lam tak aki thei lo, ong kisuktuah ong kitotuah na teng tawh, minam meima lianpi inei aa, tuni-in, hizah ciang a tung ihi lel hi. Burmanization cih thu khat simtham' aa ong bulphuh na tungtawn-in, kawlte Ethnic Cleansing Game ong kimawl uh ahi hi. Minam thahat lo' theihtheih nading, ong vaihawm ahi hi. Gentehna-in, Tedim, Saizang cihte peuhmah pen, code numbat tuampiak liang-aa, minam min ahih lo' lamtak ithei tek hi. Tua pen, Gam, khuamin ahi hi. Tua bang-in, ong khenkham ahi hi. Phadawm lai hi. ZOMI ten behlephung ineih lamtak natel lo uh nahi ding hi. Na theikha zen le uh, ZOMI te buaipih phatdeuh behlephung in, ong khenkham zo mahmah ding ahi hi. Ahizong-in, i minam le pawlpi, i minam le i khua, i minam le i awhkaih, i minam le ibeh cihte khempeuh i khentel theih ding athupi pen ahi hi.

2010 Indianapolis, Indiana ah, tanaute khat dammawhvai-in, zato(Hospital) ICU natung hi. Indianapolis khuahun luanzia athei ciauciau i omkha ding hi. I sanggamte makai atamzaw le a zumpi, a phualpi atam zaw ahi hi. Zato pen, Catholic zato hi-in, Chapel zong om hi. Nitak khat, Catechist khat ka lupna vuah ong hawh-in, " Kei pen, hih zato Chapel aa, nasem kahi-aa, ko nasep-in, cinate khalam(Spiritual) lam pan tha apia nuam kahi uh hi." ci-in, ong kigen hi. Tua ciang-in, " No, kuami or koi gam pan nahi uh hiam?" ong ci hi. "Ko, kawlgam(Burma) pan hi ung" ka ci uh aa, "Burmese maw?" ong cihteh, "Hilo"; "Chin, maw?" ong ci-in, kadawngvat keiuh-aa, "Chin version or translation pamphlet, nei kahih man hi" ong cihtak-teh, theinuam kahih man-un, ka la uh hi. Ahizong-in, English version zong kala veve uh hi. Chin version ka sim tak-uh teh, mal khat na leng zong ka tel kei hi. Ka khasiat ong suak mahmah hi. Kei Chin kici-in, ka lai, kei simtheih na hikei zen-in, ka pau, kei tel pau na hikei zen-leh, minam abei bei hi ve ning ci-in, hih theih tawp(by any means) ZOMI promote ding cih bekbek ka lungsim ah ateng ahi hi. Mipi(Civilian) dinmun pan ahi hi.

ZOMI te, pawlpi sanzia kibat lo' vai ah, i kitottot laitak-in, lawmten, na tampi nakhin-aa, amau tamna(Dominate) na mun khempeuh ah, Health and Human Services cihte aa kipan, Public High School te nadong ah(U.S. sung cihna hi.), amau aituam lai te, na let, na koih khin mangta uh-aa, mun tuamtuam ah, Campaign tuamtuam tawh NGO le UN dong ah, na luut khin uh-in, minam hamphat nading khempeuh, na la khin, na phu khin uh ahi mawk hi. Hih munsan ah, kawlte ong minpiak Chin khat-in, akituat pak hi leng, nuam nasa mawk diam? Na minampau athei vetlo-aa, kawlpau azang hile cin phamawh lo hi. Minam pau thei pipi-in, minam sung ah, kiho nang, kawlpau bek zat zah dong ding in, Kawlte ihi kei hi. Kawl na ut mahmah zong-in, nahi ngei kei ding hi. Minam neu ahizong, minam lian ahizong, ong nen-niam peuhmah, minam gal ahi hi. I minam; mi netniam; mi simmawh lo' nang; vang i piak kul hi. I tawisang kul hi. I pahtawi kul hi. Minam neu ahi zong, minam lian ahi zong, minam ong itsak peuh mah, lawm hoih ahi hi. Tua ahih man-in, minam itna tawh, minamdang muhdah ding zong, ahi pah kei hi. Kawlten, Monte, Rakhinete, Karente, a lomlom aa, athah lamtak itheih kul hi. Cihnop-na ah, minam icih-in, ut man hilo, teelzawh, teeltheih ahi kei aa, i hihna bangbang ihihna, kitheih-na ahi hi. Upna(Religion) lam pan genleng, Topa, ong piansak na dandan aa, ahi ihi hi.

Minamvai le akizomto ukna, thuneihna vai ong om lai hi. Tuni-in, Democracy icih kammal-in; mi'n citah ci-aa a cici zong i omkha ding; a awngawng zong i omkha ding hi. Phamawh lo hi. Ahizong-in, Democracy ii bulphuhpi-in, "Majority Rule, Minority Rights" ahi hi. Atamzawten uk, atawmzawte pibawl cih ding ahi hi. Kawlgambup ah, ZOMI milipsim tawmzaw khamah ding hihang. Phamawh peuhmah lo hi. Ahih-hang, ZOGAM ah, (ZOGAM omkei aci te aa ding-in), ZOMI atam zaw ten-na, munte ah, ZOMI ten i uk kul hi. Uk icih takciang, i khan'to' nang, ong khaktan nate khempeuh, hongkhia mang aa, septheih sepmawh khempeuh tawh i sepzawh nang, thuneih-na akisam ahi hi. Tua ahih-leh, ZOMI ten ngeina nei, pauleham nei, leitang nei, i-pau i-ham atheilo khat, i-ngeina zialetong athei lo khat-in, ong bangcih uk ding, ong bangcih khanto' pih ding ahi hiam? Party khempeuh in Policy nei hi. Kipawlna khempeuh in, Policy nei hi. ZOMI ahilo gamvaihawmpawlPolitical Party khat, kipawlna khat-in, bangzah ciang dong, ZOMI ong it aa, bangzah ciangdong ong lamsang zomah ding ahi hiam? Freedom, suahtakna le Obligations, vaipuak akithuah tawntung ahi hi. Political Party ahi zong-in, kipawlna khat peuhpeuh ahi zong-in, Democracy Principles zui ding icih-leh, a tamzaw deihna aki zui ding ahi hi. Tua ahih man in, i gam ah, ZOMI atamzaw ten-na ah, ZOMI in thuneih ding ideih-leh, A-Myo-Tha Hlutdaw ahi zong, Pyi-Htawng-Su Hlutdaw ahi zong in, ZOMI MP(Member of Parliament) i tam kul hi. Hih thuhawm-na zumpi phualpi te ah, ZOMI aa ding, ZOMI satan ding, kikim tak aa ingah nang, ZOMI tualsuak Party, minam Party bek tawh, i kalsuanlo' phamawh ahi hi. Namdang ibeh(Kachin, Cinphaw), dek(Karen) etc. cihte in, amau satan ding nanei khin lua uh hi. Federal Army aa ding bang zong, minam galkap nanei khin uh hi. Azenzen-in, tu-aa kikupkupte tangtung-in hi leh, U.S.A dan in, Federal Galkap le State kim ii neih, State galkap or, National Guard cihte danlian aa ong pai ding hi-in, tua munsan ah, ZOGAM National Guard ding zong, i kisam beh lai ding ihi hi. (Tua ahih man-in, WZC mapan na zong, dawi lo ahi hi.)

Hih Census vai ah, mipi khat ii dinmun pan, amun mun aa, ZOMI kipawlna le ZOMI makaite pahtakna, pahtawina kapia hi. Adiak-in, ZNC/ZCD ii mandate te a support ahi GZA, ZOMI Innkuan U.S.A te tung, mipi aa ding in, lungdam huai kasa mahmah hi. Mundang aa om ZOMI makai le kipawlna te tung lungdam lo' na ahi kei aa, bulphuhpi ahi ZOMI igen nopluat man ahizaw hi. ZOMI Innkuan U.S.A in Campaign te ongbawl-in, biank-na/pawlpi makaite tawh ong kizom, huhna ngen, cialna nei cihdan in, ong kalsaun-na te ong muibun mahmah hi.Banghanghiam cih-leh, tuhun hunluanzia tawh kizui-in, ZOMI sung ah, ZOMI Politicians te sang-in, ZOMI biakna/pawlpi makai te in, mipi(audience) hau zaw hi; pawlpi makai, biakna makaite cih bangbang-in, a ki-gamta tamzaw ahih man hi. 8888 Generations te-in, "Human Rights & Democracy" a nuntak zawh nang, ka omcih tawntung ding uh hi acih mah bang-in, ZOMI sung aa kipawlna khempeuh, biaknalam kipawlna, pawlpi kipawlna, khualetui kipawlna, beh kipawlna cihte khempeuh in, i ZOMI, i IDENTTIY i omcih tawntung ding, i lapsang(promote) tawntung ding i vaipuak ciat ahi hi.

ZOMI Census vai ong man tak teh, i Lai(Literature) limtak aa i lapsang ding ong kisam ding hi. Tua ahih man-in, ZOMI sim ding, ZOMI/ZO LAI aa ki-at laibu tampi i kisam ding hi. Lai at tampi i kisam ding hi. Fiction, Non-Fiction, Magazine, Textbook ..etc.. cihte tampi iki sam ding hi. U.S.A le Europe gam ah, ZOMI tam mahmah ta ihi aa, khangthak(New Generations) ten, i-pau, i-ham ong theih zawh nang, a sim ding uh, laibu tampi, a zakding uh, "aw" tampi, amuh ding uh "Movie" tampi kisam ding hi. Hihte khempeuh, ong lamsang ding, mipi tawh ong zom ding, ZOMI Media ong thupi-pen zel hi. ZOMI tV ong thahat semsem ta hen. I thahat nang, kipawlna i hat kul hi. ZOMI minpua kipawlna khempeuh ong hat semsem ta hen. ZOMI khempeuh CIVIL EDUCATION thutheih-na, bulkim pilna in, ong tuamkim ciat ta hen.

2014 Myanmar Census vai ah, ZOMI , i IDentity; kawlgam bek hilo, leitungbup in, ZOMI ong theihpih-na hita hen. ZOMI te kipumkhat-na i lahna mualsuang ong hita hen. ZOMI , ZOMI, ZOMI.
ZOMI kahi-aa, ZOMI ka-it hi.


Nicholas Pau 
www.zomiblogger.com

 


Comments




Leave a Reply