WWW.TUNGZANGNEWS.COM

 
ZOMI & MYANMAR CENSUS 2014 VAI MIUSA-PR-01/2014
Mun Tuamtuam Aa Om Muizawl Khempeuh Tung MIUSA Pan Thuzak Sak-Na

Myanmar Census 2014 ah, Kawlgam le leitung gam tuamtuam-te tung “Zomi” cih i minam min diktak-aa i lahkhiat ding-pen, Zomi mimal khatciat ii vaipuak a hih mah bang-in, Muizawl-te vaipuak zong ahi pah hi. Muizawl khuami Zomi-te, tangtawng hun lai aa kipan, tu-ni ciang dong ki-itna ki-pumkhatna tawh, si khat sa khat aa, a luangkhawm khuami-te i hi hi. Muizawl khuami ah, code # 424 Tedim-mi, code # 417 Saizang-mi, code # 407 Khuano-mi, code # 429 Dim-mi, le Phaileeng-mi cih bang-in i om aa; beh le phung in; Hatlang( Tedim-HL, Saizang- HL, Dim-HL), Gualnam, Songpuut, Samte, Suante, Thatmun, le Thang-ungh ci-in namkim bulkim, le phungkim tak-in a teeng khawm-te ihi hi. I minam Zomi sung aa, namkim, awkaih-zia kim tawh a teeng khawm-te i hi hi. Biankna le upna lam pan-in zong, Zomi sung aa i neih le i sanzia-te ahi, RC, Baptist, ZBCM, SDA, le Laipian cih-te, a kim-in ii om-aa, khua le tui, gam le nam aa ding-in, sanzia-tek tawh, thu a ngen khawm thei, akalsuan khawm thei khuami-te i hi hi.



Minam picing khat i cih-in, pau le' ham nei hi; gamh le' lei nei hi; ngei-na le' biakna nei hi. Zomi-te'n i pauu Zopau i nei hi. Awkaih-zia tuamtuam tawh ham i nei hi; i gam Zogam, i lei Zoleitang i nei hi. I ngeina Zongeina i nei hi. Hih i neih khem peuh in, minam picing minam-lian Zomi i hihna ong lahna ahi hi. Zomi-te, tangtawng pupa hun lai-aa kipan, kua ma'khutnuai, kua ma' ukna nuai-aa a om te i hi kei-aa, ei le ei ki-ukna tawh Ukpi te makaih Zomi-te ihi hi. Zomi-te pen, i minam it bek hilo-in, minam khem peuh zong a it’sak, a it thei, minam picing Zomi te ihi hi. Tua mah bang-in, Zomi-te pen tanglai hun aa kipan cikmah hun in, mindang tuamtuam tawh i minam min lawhna le sapna i nei ngei kei-aa Zomi mah akici ciatciat-te ihi hi.



Hunkhat lai-in, Kawlgam thunei-te in, minam netniam nopna tawh minam kitapkhap nang, minam thahat lo' theihtheih nang, le minam abei nang-in, Zomi sung-aa khua min le awkaih-zia tuamtuam-te minamke in ong bawl nop-na; “Chin” cih kammal sung ah, i minam pauu-te bei-in, Kawlpau zangh-aa i om ding, Kawl-te thusim lungsimkhel hang-in, “Chin” cih kammal ongpiang ahi lel hi. “Chin” cih kammal pen, i ngeina pauleham sung ah a om ngei kei hi. Akhiat-na zong a om kei hi. Tuaban-ah, cikmah hun-in Zomi te ei le ei “Chin” ikici ngei kei hi. Zomi sung ah, ipu ipa te, “Chin” in, min ana sial ngei kei uh hi. Ahi zong-in, namdang-ten, Zomi-te pen, i minam sung-aa kammal akhiat-na neilo “Chin” in, ong sam mawk ahi hi.



Tuni-in, i minam makaite sunlezan hanciam-na tawh minam min ahi Zomi icih theih hun ding, minamdang ten Zomi aa ong lawh ong sap hun ding ong tung petpet ta ahi hi. I nuam hi. I ki pak hi. Kum tampi sung mah netniam-na thuak-in Zomi te i om kha-aa, sawtveipi mah ong peizo uh-aa, tuu-in zong, ong sutuahzo mahmah lai ding ahih man-in, Zomi i kicih ding ong nawngkaisak kim le paam pan ong tam mahmah kha ding hi. Zomi iki cihna-in, gammmi suahna le suahlo'na tawh buai-na ahi kei-aa, Zomi-te peuh mah pen, i min taktak ong sam theinailo te tung, i min Zomi ikipulak khiat-na ahi hi. Awkaih-zia kilamdan-na in, pau kilamdan' na ahi kei-aa, Zomi ong beisak nuam te-ii, hanciamna ahi lel hi. Minam vai a hih man in, nang leh kei vai ahi pah hi. Zomi party khat ii hanciam-na ahih hang in, Party khat vai ahi kei-aa , Zomi-bup vai, i minam vai ahi hi.



Tua ahihman-in, Muizawl-te peuh mah-in, 2014 Census ah Zomi ikici ding aa, i ki'im i pa'am aa i sanggam atel lo' te zong i hilhcian ding aa, Zomi’salpha Muizawl-te ihi ding hi. Party khat, kipawlna khat tung aa, akinga hilo, biankna le sanzia khat tung aa aki nga hilo, minam bup aa ding, Zomi lam’sang, minam pahtawi, minam phattuam nading agel, Zomi kipawlna khempeuh le Zomi makai khempeuh a panpih, a nungzuih siam Zomi’ salpha Muizawl-te ihi ding hi.



Zomi itna, Zomi pahtawi nopna, Zomi aa ding a nungzuih-siam salpha ihih nopna hang-in, ong ki-zahpih phial hen, i thuakzo ding hi. Ong ki-mudah in, ong kiko phial hen, i thuakzo ding hi. Zomi ihih-na i ut-man, i teel ahi kei-aa, ong piangsak Pa Pasian-in, Zomi aa ong piansak man ahi hi. Zomi itna in, ong piangsak Topa tung pan, Zomi khempeuh ii thupha ngah-na hi ta hen-la; kipumkhat-na tawh Zomi-te ong luangkhawm sak-ta hen.



Muizawl-te peuhmah, Zogam le Zomi sung ah, Democracy le Human Rights, Freedom le Self-determination, Culture le Literature, Religion le Belief a lamsang-te, a thupii’t bawl-te, a kemcing-te ihi ding aa, Zomi salpha minam salpha-te i hiding hi.



Zomi i it na in, mimal ong phat-tuam pih kei leh zong, Muizawl mimal khat ciat-in, Zomi a phat-tuam pih gam-mi hoih(Civilian)-te i hih zawh nang hanciam ni. Zomi i hi aa, Zomi i it hi.

Sim dan a nuam zaw ding in, hehpih-na tawh, Attach File na hon sak un.

MIUSA tang' in,

Nicholas Pau

 


Comments




Leave a Reply