WWW.TUNGZANGNEWS.COM

 
* (66)th Aniversary ZOMI NATIONAL DAY' 20 FEBRUARY 2014'
* Amun: Chinwoo Stadium' Kuala Lumpur, Malaysia.


* Hun keem Francis Khampi & Siama Deih Mang'
* Kipatna lasakna Phat un' Phat ve un.
* Kipatna thungen/Paaina Rev, Khup Cin Pau.

Hunkeem te hong ding to kik leuleu in hungelna teng hong gen ziahziah khit ciang in Honhun thugen na nei ding ZAM Makaipi/ Tanupi Sia Hau Khai hong sam ta uh hi. Sia Khai hunhon thugen na hong kipan hi.

Hunhon thugenna Sia Hau Khai, ZAM
Hello! Hello, Zomi nadam uh hiam?... Satu.. Zomi , Satu.. Zomi' Singgapore pan hong paiten Satu cih bel tel lo thei ahihi. Sim leh mal, Sak leh khang kampau kibanglo awsuah kibanglo ihih hang minam khat hihang, Zomi hihang aci nuam ihihi. Tu kum 66 veina Malaysia leh Singapore Zomi Nam ni bawl khawm thei ih hih man in lungdam kong ko hi. Gamnih kingawm Zomi nam ni ahih man in nop cisak mahmah ding hihang. Singapore pan hong pai Zomi te hongding dih sih vua leh" Wuwaa...Ok... Ok, Lungdam ei' 15 tak hong pha ei' Malaysia Zomi Nam ni apian zawh nading vaihawm upateng hong ding sin vua leh'.... Kalaikalai,Kalaisai thupi thei lua hi. Gamtuamtuam pan hong pai teng e leh hong ding dih ve vua ... Ok Zomi vive hihang ei..


A(66) veina Zominam ni hong pian theih nading in khatguak bek vaidin na leh nasepna hilo in Khua kipawlna, Pawlpi tuamtuam pan kipawl na, thatang leh sum leh paai tawh kipanpih tek ihih man in hibang in Zomi Nam ni abawl khawm thei ihihi. Eiteng mah in anopcisak Zomi Nam Ni ahihi.. Eiteng mah in ahoihsak Zomi Nam ni ahihi. Tua man in Zomi Nam ni nopcitak in thapiak ciat ding kong han tawn hi. Kalungdam!.

ZEC Lasakna La leh laamna kisui diamdiam' Tuailaite.

..Kekekeke thu kihong khin ahih teh... Bangebange.. isep ding. Thu azom la hilo dia! Kua e'Kua e.... ZEC te e.... aw koilai ZEC e. ZEC zailua ahih teh ZAM Zumkim om Zomi sangnau pang te ai ve ... Hymmmmm' okok..

Zominam ni tuang hongtungta' cih ZEC Zosuantuai laite'n lasak leh laam tawh music kituak tak in hongsa uhhi. Mipi tha kingah mahmah in kidai khikhe aa, la kingai in' kiphiaphia, akihoho om selo in ki en ziahziah ahihi.


Lasa ZEC te pasal no 11 leh Numeino 9 pha in lasiam in laamzong siam thei mahmah hi.

Zero Band te kisamta!
Sia Kham hongpai lianta" Kekeke.. Ano teng khelkhel' Zero Band nacih uh nadeih na uh hong gen dih sin vua le... Na Min bang hipak' Khuata.. 0 ii mai ah 1 koih in ahizong 1pan 9 koih in ahizong' anungah 0 bekbek koih leng tam semsem ahihi. Tua mahbang in Zomi te kikhenlo in 0, O peuh leng kuamah hong khenzolo in kitam semsem ding hi cih na in Zero Band ka ci uh hi. Khuata.. lead, Tungpi ..Drum.., Muan Sang KB, Siam.. Bass, Langkhup.. Ahuh' Ok ... Lasasiam kua teng nei naivua le' Frns Kham..adot leh' O band..in Saw Bua Mung, Pum Pau..nei ung..Lungdam zai phei vooo leh!


Sawbua Mung in ladawng nih kizom leh U PumPau.. Ka minam ni, Zomi nam ni, Ka Khan tawn ka it ding.. cih la nop citak in hong sa hi. Zolaam in hong lam kiaukiau aa, Lasate aw li, awkim in hongsa hi. Siam kisa mahmah in Zolia teng bang in phone pan khumsimsim uh ahihi.

Tulai khangthak te utut in kizeem, sansak vomsak , tonsak, kilsak, maansak, Khedap zatulsang bulh, ahihang Zomi ih veve, Pasian bawl Zomi hi veve, ka minam min ikhel theilo, inn leh lo, Niik leh puan kikhel , omna kikhel, nasep kikhel ahih hang Zomi ka hih na kikhel theilo cih la zai ziahziah hi.

Lengtong Pauno. Hongkipan to leuleu in' hongzai phei ziahziah. Hymmmm.

Francis Kham' U lengtong nong lasak ding bang hipeuh mah e..' Deih Mang kalai kalai' zanuam lua kisa kabil bang ling deldel.....
Lengtong: Kong lasak ding pen tuma kum (30) lai ah lamal hi napi'n tuun ah' hong tangtung panpan la leh thu hi in' La mal bel Lamka ah Pu Gui Za Thang hong bawl khiat lamal hi in' hong sa ning ei' Zogam hong paal ding cih ahihi. 1984 kumin akisa akikhum khin hi a, kum(30) khangham ta hi. Zogam Paal nading in Zomi paal masak kul ahihi. Lengtong Pauno.

Dr. Hau Za Cin' Zomi vai thugen na tom lak.
Lungdam hi' Zomi khempeuh nakhut taklam uh ka honglen hi. Kei konggen ding thulu in Zomi thu hi a, Zomi cih teh Zomi hipah hi. Adang om nawnlo ahihi. Zomi ihihi. Zopau zangte/teng, Kamphem kulloteng Ngeina leh Laizat kibangteng Zomi ihihi. Thudangdang zong ci kei ni in Zomi Cup ah bawlungsui dingbekbek tul kipha a, thupi ka sa hi.


Hih Zomi cup bawllungsui ding te nang kua nahia? kici leh' Huate kua te kici leh Zomi kici ding vive ahihi. Zomi ikicih nop na in minamdangte nuai nenh nopna hilo hi. Minam dangte simmawh nop man zong hi sese lohi. Langpan nop man zong hi sese lo hi. Tua mahbang in minamdang te in zong Zomi simmawh nading thu omlo hi. Zomi te mailam khak tan nading thu omlo hi. Hong kikhak tan nuam pian leh kihat semsem lel ahihi. Eiteng Zomi hihang cih pen thupi penpen kam mal ahihi.


Zomi ihih na pen Pasian in hong piak hi. Gal hongtun dinglam theikhol leng kua man hongbawlsia zolo gal kinang zo ahihi. Zomi te in hunhoih laksiam kisam hi. Hunhoih atawntung in hongpai hilo ahihi.Hunhoih alasiam te in akhanggui kizom in nuamsa paisuak ahihi. Zomi cih in ihihna kilahna ahihi. Khuavak aom leh khuazing zong om ahihi. Zomi hikei ve teh aw, hong kicih leh hi mah veng aw ci le cin' Hongzo ngeilo ahihi.


Zomi hihna in kampau hang hilo gamkhen na hang hilo Isisan kibang hang ahihi. Tu in Zomi te hun hongtungta hi. Zomi te ading hunhoih lak siam ni. Tu laitak Zomi hun ahihi. Satu Zomi Saipi pai in' pai in, Zogam hongpaal lunding hi. Kalungdam!

Lasakna Eden Zogam lasakna. nopcitak in hongkisa ziahziah hi. 
Singapore pan Zomi ngeina laam leh Modern laam tuamtuam honglak hi. Lasak te, =Sawngpi/Sangpi kakap ni'n kagual lai ah athang masa kei hing.
= Kakhaw khai maitang e' 
= Huisai liim lian..
= Tuan a, pupa mabang patsa
= Eiteng khawl khawm atuam omlo. cih Singapore pan laam tawh honglak ziahziah uhhi.


Dr. Chinkhanlun Guite. Zomivai thu genna tomlak!
Amasa in ah' Zomi Chibai... Zomi hizahta mukha kahih man in kakipaak hi. Zomi hizahtak mai ah thugen ding in nong seh uh ka kipaak hi. Ahihhang thugen siam taktak nailo ka hihman in, a tangval lai ka hihi.


Ka pian na lamka khuapi hi. Kamin Chinkhanlun Guite ahihi. Zomi pen sepding thupoi mawhmahmah om hi. Zomi pen kingawm khopna tamveipi amunmun ah om hi. Zogam leh Zomi ading in panmun laksiam na kisamhi. Panmunlak siamna cih ciang in min leh zaa neihna hi zawlo hi.


India om Zomi paidan leh Burma om Zomi paidan te ah panmun laksiamna kisam hi. Ngasa sikhat hang in huih kici tengteng uih ahihi. Ut bangbang in min neihna leh omna in migina hilo hi. Mikhat in mintampi neih naleh nam khat in min atampi neihna in thupi himasalo hi. Mintuamtuam kawlmin, mangmin nanei zong in nasisan in Zomi ahihi.
Tulaitak in Chin min deihmahmah niteh. Chin kici taktak te in Zomi mah hong civeve ding ahihi. Nang leh nang kitaw lemlem in na hoihlohna te milak ah akilaklak na hihi. Ahihhang in Zomi mah na higige hi. Zomi numei mintuamtuam nei in kilo in' kawllak vailak ah vakizuak leh tua akizuak nu pen amin in akisap hang Zomi kizuak mah kici veve ahihi. Na sisan in Zomi mah ci in nakampau ah Zomi mah ci hi.


Mawtaw sungah aom nathemno khat kipelh in kisia leh tua mawtaw ahoih mahmah zong kizang theilo ahihi. Zomi ading in akizangthei hihna kisam hi. Tua in Panmun laksiam na ahihi.


Zomi sungah igenbangbang sep kul ahihi. Agen nuam in' asep hamsa kisa tek napi asem te makaite ki hawmthawh thei hi. A gennuam mikitam in azuih haksa kisa hi. Mimal khat in isep ding teng ihsep khit leuleu ciang in tua isepna tungtawn in ataksuah, agahliimcii asuah ding kisam ahihi. 
Ihsep ding bang hihiam? Bang poimawh ahihiam? Makai ding leh Nungzui ding ki om ahihi. Nasep ding mun ah' nang leh kei kitel siam ding kisam ahihi. Kitel siam keileh kilawh sam hi. Gamdang ah innsung nasem te kiniam muh mahmah , Kineu muhmahmah kei un. Napu te sep theihloh leh sepzawhloh nasem zo pa,zo nu nahihi. 
Eite pen kimuanglo in' Midangte kimuang hi. Ahih hang in Minam dang te in anasem ding in midangte zong muang zo ahihi. Zomi ading in ihotu te ahai kuamah omlo hi. Nasep na mun ah nasep pih te muang in. Sabeng ding te in satang hawl ding leh satang paang ding kimuang tuak tak teh adeih gamsa man zo ahihi. Apoi mawh mahmah thu in nasepna ah kimuan kul na ahihi.


Minten hongpiak nakhat peuhpeuh thupi kisa in ei leh ei ikipiak na te thupi kisalo thei ihihi. Mi atamzaw te kisiat nading in ngamta kei in. Kampau kei in. Media Laigelh kei in. Thu gen siam Makai siam hong kicih leh nuam pah kei in Athu ngai leh anung zui te lak ah zong mipil tampi om ahihi.


Mualpi leh Zulei nikhat hong kitawng hi. Mualpi in Hei' Zulei namel neu lua vaci hi. Tua leh Zulei in Mualpi aw hih singah nasuh kham thei hiam? acih leh mualpi in singah suhkham theilo hi. Tua man in idin muntek ah isep theih nakhat ciat om ahihi.


Pawlkhat in ama ngaihdan pen pomcip velval thei hi. Hi kisa mahmah hi. Amau hoihsak apom velvel na thuhang in mitampi masuan maikhak thei, mitampi kipuak thei cih ngaihsut sak vetlo thei hi.


Ka thukupna ah Pasian muang ni. Pasian muang cih teh Pasian muanna pen na mipih teng tungah kilangsak in. Na minam pih te muang zaw in. Lungdam ei'

*Zomi Vocal Band. Innkuan khat lasakna..
* Zongeina laam, Tonzang lawm leh ZEC ( Kakhaw khai maitang ei' Vuisai liim lian la nopcitak in hongsa hi.

Zomi Census vai thugenna: Pa Khup Khawm Mung.(tomlak)

Tu laitak in leitungbup ah Zomi Census vai kilunglut mahmah ahihi. Tu ni in Census vai konggen hang in athei pen zong kahi kei a, Census zum nasem zong ka hi tuan kei hi. Tua hi in 914 kongcih leh Zomi hong ci un la, Zomi kongcih leh 914 hong ci un. Ok 914... Zomi3, Zomi...914' 914' 914'..


2010 zawh kawlgam hongkikhel zatzat in manglang mahmah ahihi. Kumpi nasem tengbang kha sum hongkhang nop tuam mahmah kisa hi. 2013 leuleu ciang in siah kipia nawnlo siah kimapna zong hong om ahihi.


Alungdam huai thu ah' Abeisa hun aa, census bang hilo in tutung a, pen world level mahmah ding in hong kibawl khia Census ahihi. Zomi ading in Pasian hongpiak thuhoih thupha kum ahihi.


Zomi ading in code omloh pen khasiat huai lo zaw a, lungdam huai zaw ahihi. Code 53 lak ah Zomi code khat in hong kihel zen leh kikhen mang ding hihang. Zomi ading code omloh na in hong kipumkhat sak hi. Koi ah kipumkhat sak ding hiam cih leh 914 ah hong ngawm tuah ahihi.


914 in akizang suak ding hilo in tu aa, Census kisim hunsung a, zatpak ding code ahihi. Tua code in sung pan Zomi cih minam hong din khit ciang mailam hun ah Zomi ading code om ding a, tu aa, munmin mualmin Pau leh hammin zui in code te teng bei ding omlo ding ahihi. Ahih hang awsuah kampau asang aniam te abei ding hituan lo ahihi.


Tua manin innlam om te kiang ah Bang minam ci in hong kidot leh Zomi cisak tek ding hihang' Kawlpau in Balumeu le hong cih leh Zomi cihsak ding ikisam hi. Icikim tek i kikhum tek ding hi. Tua a, hongkipia mualminzui code, Kampau awsuah zui code te nutsiat ding hamsa sa kei un. Nusia phot un. Tua code aomloh hang ei ami kiom veve ahihi.


Zomi code omlo, 914 ah nagelh leh peemta hiteh Rohingya hiteh hongkici thute lunghimawh kei un. Lau huailo hi. Kawlgam ah minam 135 kiciamteh lak ah minam atang ahikhate in' 1823-34 pan kipante kawlgam sung om minam te minam ki ci ahihi. Ei hih leh 1823-24 gen loh Ciiimnuai ah iteen hun AD1420 Ciimnuai mualsuang tungah ki gelh hi. Tangtawng in iteen nasa gam ahihi.


GZA, ZCD, ZYA in Zomi hihang acih man in Zomi akici kihituan lo a, hih kipawlna aom mapekpek in Zomi hihang akici khin minam te ihihi. Tua man in Census hun ah innkim ah hong pai in bang minam nahiam? hong kicileh Zomi hi ing ci tektek ei mau kammal pan agingkhia kisam ahihi. 914 ah Zomi ihih nakiplet nading leitungbup muntuamtuam om Zomi in akiplet zo ihihi. 914 ah minam mangthang peuhmah lo ding ahihi. Census hunsung a, code neilo teng kiciamteh napak hi in tua 914 ah Zomi bangzah kipha cih kisim kikna tuamtel khiat na bek om ding ahihi. Tuakhit itu ita khang hun ah Zomi code hong kia khia, kingah khia ta ding ahhi.


Tua man in Pau nak ah Buipi leikeei in zong khua ngai acih leh, Sakhi in atat nang kuam kua khual cih khangluite thuciin paunak ngaihsut tinten ding kisam ahihi. Late 170; Paunak 31:21 tawh kizui in Pasian hongpiak isisan sung ah aom Minam min lapto ding hihang. Pasian thupha' Kalungdam.

ZEC pan Zongeina lam namtuamtuam lahna.

ZCD pan Makaipi Philip Khai thugenna tomlak:
Zomi Nu leh Pa U leh Nau, amoi aham , ateek akhang mimal akua mah peuh ibiak ipaai Pasian tungah daihna nopsakna thupha hongpia kimta hen! Zomi te minam lian in hongbawl man in phat in om tawntungta hen!
Zomi nam ni vaihawm upate makaite, ZAM, zum nasem te, Khua kipawlna, leh pawlpi kipawlna makai te Sia leh mipi nakhut uh konglen masa hi.
Zusa kumpi nu in, tanu ading apasal, zonsak na genteh tangthu tomno hong gen hi. Zusa kumpi in atanu avanglian penpen tawh atanu kitengsak nuam in atawptawp ah zusa te ading in zusa te mah vanglian pen ahihi cihna tangthu tawh kizom in' Zomi alaamto atawisang ding Zomi mah ihihi.
Zomi hi napi a, Zomi cih ding alau, hampahtna kitan ding cih alau, supna om kha leh cih na, metna nungdelh sawm te, aom khak leh hihthu' nagen sawn sak un. Kei ka hih leh pilna nei zong ka hih kei a, Upadi tel zong ka hih kei hi. Ahihhang in Zomi ah kipumkhat in Zomi ah kingawm photphot ni.
Hihlai a, ahongpai Zomi hi ing akici khempeuh hong ding dih sin vua" Mipi thakhat in kiding zeizai... Lungdam ei. Na tu kik un. Makai te cihbangbang in Zomi acih leh tu adinbang in dinpih ding ahihi. Haksakna omlo in gual izo keiding hi. Gualzawh loh in Hamphatna kingah lo, agah kilo theilo ahihi. Zomi ading in gal do na hihi. Zomi te in Kumpi avui atangtawh ado te ihi kei hi. Khangsawn te ading in galdo te ihihi. Khangsawn te hamphat na ding nawl khin lo ding hihang. 
Apiang theilo omlo hi. Lungkiat nading omlo ahihi. Nungkik nading zong omlo hi. Khanglui ten Paunak na nei a, Gal lu kihta gallutuak ci hi. Haksak na, Supna baina koikoi ah iom zong in kipelh theilo hi. Zomi hihna hang in Census hun ah Zomi nagelh loh hang in namdangte meetna om tuamlo a, Zomi mah kisumh ahihi. Sep khopna pan in gual zawh na kimu pan in hamphatna kingah pan ding ahihi. 
Tu a, isep ding in Zomi census vai ah ei akikhum ding hilo in innlam om te tung ah hoihtak vaikhak ding hihang. Pasian in thupha hong piaksak ta hen! Lungdam.

*Kei kua ka hiam? Bang minam kahiam?
Hih Kei kua kahiam? Bang minam ka hiam? Cih Drama hoihtak kilak hi in ahun om bang in Zomi Nam Ni vaisai ten video hoihtak hongbawl ding a, Leitungbup Zomi te muh thei ding Census hunma in hong khah khia ding ahoih mahmah thu hi. Rev, Gin Do Khup in hong gel khiat kineih siamna ahihi. Mu kha le ci'n kisik kei lua niteh" Leitung ah Zomi nam ni akibawl hang hibang dan kineih siam leh kammal hoih zatzia amasa pen hi ding hi.



*Janet Lee Mikang la leh China ngeina lapi tawh Zomi Nam Ni Pah tawhna .Zomi Nam Ni ah China la kisa masa pen leh asamasa pen zong Janet Lee hi kha ding ahihi.

* Zomi Cup te pahtawi piakna abanban in.


Lasakna..


*Hunzawhna Lungdam kohna Dr. Cin Sian Pau.

Atuamtuam.

*A(66) Kum Cin Zomi Nam ni February 20 ni Malaysia ah Zomi tulnga val kipha kipai dingcihi. Tutna in cin vet lo hi. Gamnih kingawm ahih man in nop ci mahmah hi.
* Zukham kitawng kilaai cih omvetlo in siangtho tak in Zomi nam ni kizo siangthei hi.
*Zomi nam ni ah Zo an voksa, Vok ngawi, Aksa liimnono, Vaimiin ciim kizuak in gil khial cih omlo hi.Kilei thei ziahziah hi. Avot zong kizuak in aliim nono akhum nono tampi kizuak ahihi.

*DVD, te lak ah Zomi Nam Ni in lengtong pauno DVD 100 val kilei cih kiza hi.
*Adang DVD leh Zopuan Zoniik zong kizuak kilei thei ahihi. 
* Zosunni Journal zong kileithei ziahziah ding in kizuak hi.
* Adiak in Zomi nam ni ah Naupua liang in kipai ahih man in thupi phadiak ahihi.

* Hunzatna' lasakna te liim cii thei mahmah hi.

Reported by Hau Thang (Media, Zomi Nam Ni Committee)

 


Comments




Leave a Reply