WWW.TUNGZANGNEWS.COM

 
Picture
Leitungbup Zomi Innkuan Kipawlna
Executive Council

Zomi Nam Ni Thuphapuak



2014 kum Zomi Nam Ni, Zomi-te nilian ni in, leitung muntuam gamtuam a om, tuipi galkaai Zomi khempeuh leh Kawlgam Vaigam sung a om Zomi khempeuh tung ah cidam lungnopna, daupai mavanna leh lawhcinna thupha hong tung tahen ci-in Leitungbup Zomi Innkuan Kipawlna, Executive Council in Anungta Pasian tung ah thu ka ngen uh a, thupha kong puak uhhi.



2014 kum Zomi Nam Ni pen kum dang tawh kibanglo in, Zomi kici minam buppi a’ding in a tuamdang mahmah hun sung tawh hong kituak hi. Minam khat hihna tawh Minam Ni a kineih zawh, Zomi taangpi taangta in Minam khat ka himah uhhi, ka Minam Min uh “Zomi” ahi hi ci a, kipsakna bawl theihna ding hun, thukimna lahkhiat theihna ding hun, kipumkhat theihna ding hun tawh hong kituak hi. Lam khat panin, Zomi ih hihna kipulakna hun hi a, zumkong mangkong ah Zomi hi ing ci a ih kipulakngam ding a kisap hun ahi hi. Tua ahih manin, tu hun pen Zomi hi ing a ci peuhmah in, ih cihtakpina thu lakngam ding kisam a, tuamah bangin ih thutakna, ih thumaanna hong kisittelta ahi hi. Thu khat ah, Zomi hike’ng acite zong muhdah galbawl ding hilo a, itna tawh a deihna uh zahtaksak ding ahi hi.



Ni kum, October kha in India gam lam a om, Zomi laizom sanggamte in “Zomi” ka hi uhhi ci in, Minam khat hihna tawh Khawmpi bawlin na kipsak uh a, leitung buppi theihpih dingin na kipulak uhhi. Tu zawh kha khat khitciang in, Kawl gam lam a om, Zomi laizom sanggamte inzong Minam khat hihna sung ah kipumkhat in, “Zomi” ka hi uhhi ci in ih kipsak theihna ding hun hong kipia hi.



Tua hi a, tu kum, Zomi Nam Ni hun dung in, sak leh khang, sim leh maal a om Zomi-te, Minam khat hi takpimah nahi uh hiam, na Minam min uh Zomi ahi takpi hiam ci in hong dong hi. Hih Zomi Nam Ni hong dotna thu pen suakta takin, ih lungsim takpi tawh dawng ni ci in ka hong zawn uhhi. India gam sung a om Zomi laizomte in na dawngkhin uh hi. Kawl gam sung a om Zomi-te’n asawtlo in kidawng theita ding hi.



Zomi khempeuh, anungta Pasian in Zomi Nam Ni in suahta tak, cidam lungnuam takin in hong zang theisak henla, Zomi Nam Ni in ahong puak suahtakna zangsiam in minam khat hihna tawh kipum khatna dingin a teelsiam mite hong suaksak tahen.



Executive Council
Leitungbup Zomi Innkuan Kipawlna

Tang’in,

GSKhup
President

Tulsa, OK, USA
Feb. 19, 2014


 


Comments




Leave a Reply