WWW.TUNGZANGNEWS.COM

 
Ongsuak ding Kawlgam Thukhunpi leh ongsuak Zeisu
Lam Thang  
Zomi Thu-ummi khempeuh,

Kawlgam sung ah Kawlgam suahtaakna ngah aa kipan tuni dong akizom suaksuak khat in Kawlgam kumpi sem khempeuh leh Mualtung mite kidona, kithahna ahihi.


Banghangin hih kido, kikap, kithah bei theilo hiamcih leh Kawlgam ki ukna Thukhunpi hoihloh man ahihi.

Kawlgam Thukhunpi hoih henla, namneu namgol om kei in, minam tam, minam tawm kisim mawhna, kinetniamna, kithusimlohna, kigualheusakna, huaihamna, vompi sahawmna, thatang, molhtum suanna cihte om kei henla, ki-itna, kihehpihna, kitelsiamna, kideihsakna, Thuman thutak, picinna cihte om hileh kithah, kimat omhetlo in anuam mahmah Pasian gam amalep ding Pasian lunggulhna a nei gam ahiding i hihi.


Abeisa aa Kawlgam Thukhunpi kici khempeuh in mi namtamte gualzawh, gualheu nading bek aa kibawl ahihman in minam tawm adiakdiak mualtung mite' ngahding aa kilawm pianpih suahtaakna, thudang khat in gen lehang, Pasian in ama' lim leh meel sunding aa ong bawlna, khat mahmah zong ngahlo, ama' lim leh meel kilanglo ahihman in tuni dong buaina apiangsak ahihi.


Kawlgam suahtaakna laak laitak in Mualtungmi tengin, "Ko zong ka gam kalei uhtawh ong kipawl in suahtaakna lakhawmni in Pawlkhawm Kawlgam sat ni" ci aa kipawl ihihhang, hun ong kihei in Pawlkhawm Kawlgam hinawnlo in Kawlmang khutsung atung ihihi. To kilaih cih dinmun akitung ahihi.


Tuahangin ong PiangsakPa' lim leh mel muhkhaak in om nawnlo aa, suahpih mimal suahtaakna muh kha hinawnlo hi. Minam mangthang ding dinmun atung ihihi.

Topa Zeisu ong suahma kum 750 hun lai in Kamsang Isaih tungtawn in (Isaih 9:6-7), taangkona ong nei aa,
"Lamdang thulakpa
Vanglian Pasian,
Tawntung Pa,
Nopsakna Kumpi,"
kici dinghi ci-in ong taangkohi. Hihmun ah tutak ei bulphuh ding in, "Nopsakna (Daihna, kilemna) Kumpi - Prince of Peace cihpen ahihi.

Kawlgam ki ukna Thukhunpi hoih hileh Kawlgam sung ah kilemna, daihna Nopsakna omdinghi ci-in lunggulhna lian tawh gam leh lei a it khempeuh i kipeisan laitak ahihi.

Tua ahihman in hih nopsakna, kilemna, daihna tun nading Kawlgam ki ukna Thukhunpi icih in tuma kum 750 hunlai aa Kamsang Isaih ii taangko ong suakding naungek acihpen tawh akibang himawk loding ahihiam?

Kawlgam sung aa i lunggulhpi ahi, kilemna, daihna nopsakna ding aa akisam Thukhunpi sung ah Kamsang Isaih ong gen naungek ong kihel ding, ong sungtang ding, ong inntek ding lam ong lahding, a vangliatna ong kilatsak ding, atawntung aa ong ompih ding kisam hilo ihihiam?

Tua ahihman in Thu-ummi khempeuh in, "Hih Kawlgam Thukhunpi sung ah, Kamsangpa genkholh naungek aw, ong suaksuk in, alamdang in Thu ong lak in" ci-in nasiatak kiko aa Thu i ngetding thupi in ka um,hi.

Ka minam makai, ka gam makaite u'n "Nang deih bang ong deih sak in" ci-in thuumna i neihsak ding thupi dinghi.

Ei, mipi nautang mahmah inzong, "Vantung ah nadeihna akisep mahbang in ka Kawlgam vuah akisep theih nadingin, Kawlgam in mimal thuneihna kaneih zawh nading un, Kawlgam mite in nang' limleh mel ong bat theih nading un, akisam, nalunggulh, sephuai, lahkhiat huai na Thuthukte kote tungtawn in ong kilangkhiasak in, ong taangko khiasak in" ci-in huaiham, angsung theitak aa ki-ap, thu i ngetding, i sepkhiat ding, i hanciam ding i mawhpuak hi-in ka umhi.

Akipuahkiuk ding Kawlgam Thukhunpi sung ah ongsuak naungek in 
Lamdang Thulakpa ong sep ding

Vanglian Pasian ahihna ong lahding,

Tawntung thuneipa, mihingte tangthu keempa ahihna ong lahkhiat ding

Nopsakna, daihna kilemna Kumpi ong sep ding

I lungulhna pulak kawm in thungen, ki-ap in, thalehngal sit het loin i kalsuan dinghi.

"Nang deih bang ong deihsak in"

Hang Khan Lian

-- 
Hang Khan Lian
Block 646#13-115
Jalan Tenaga
Singapore 410646



 


Comments




Leave a Reply