WWW.TUNGZANGNEWS.COM

 
Sisanpih Ngaihteng,

Nung khasawn-a kipan internet laaimaai ahuampi Zomi leh a-omsa code kaalthu vive hi-a, gengen talehang gaw seemseem, pawlkhat-inlah bangmahlopi innteek bang-a pau guapguap cihte ka' simsim ciang-in I' minam cidam naai hetlo, laainat-huai laai mahmah, khasiat-huai laai mahmah-hi ci-in ka' laaina mahmah-hi.


British teleh Kawlte' khenthaangna code te-pen I' hihna maanpen ahi, "Zomi"-ah luankhop nading hong daaltan lingte ahihi. Hih lingte-pen "Ko' hihna maan ahihi" I-cih leuleu theihding Kawlte' ngiimna lianpen ahihi. Minam cihpen abawlpa Pasian-in namdangte' khenthaang ding-a abawl hilo-a, minam kihualding, minam paukam ciat-tawh amah kibia, kiphatding adeih ahihi. Kawlte' khenkhapna lamkhun (policy)-pen minam kip I' hihna lahkhiatna-tawh thukhaamzil (lawful/legal) tak-a anawkding I-hihi.

Kachin te-bangpen code omsate-ahlah gelh sawmlo, 914-ahzong gelhsawm tuanlo-in khauhtak-in pansawm uh-a, amau' ading adiak-in thautawi gaalkaap lianpi aneite' ading-in tua athupipen ahihi. Kachin State-ah Kawl Gammi hihna Census Form kihuu keileh "Kachin Gam-pen Kawlgam hilo" cihna hi-a, thau mah-tawh kisual tosuakding cihna hi-in, leitang angenkiik minam' ading lamkhun maan khat ahihi.

Zomite'a leuleu-pen thau-tawh kido kuullo phot-a, "914-ah akigelh minteng pan-in min kibang khempeuh alomlom-in kikoih ding-a, tuate' sung-ah Kawlgammi hihna Hmat-Pong-Tin anei minam leh aneilo kinam khenkhia-in, aneite Kawlgam sung-a minam khat ahihna kiphungvuh dinghi" cihthu ahihi. Tua thu' ziak-in naakpi-in "Zomi-ah luankhop nading" akigeel, akisep laaitak-in, "Code nei khempeuh-in amau' code ciat-ah gelhding" cihtepawl-pen naakpi-in I' haiina hizaw-in ka-ngaihsunhi, banghanghiam cihleh minam it-a amapang Kachin makaaite bang-in census boycott nading vaaihawm liang-a, ei'n tua code te I' lungkimpih mahmah mawkpen alaainat-huai mahmah, "pusa' luheek" acih taktakte I-hihi.

Zomi sung-ah behte enpak beklehangzong code omsate' lak-ah "Guite" longaal minam gui-tawh kizom hi kilkel lo-hi. Beh akhiatna athei khempeuh-in automatic-a theihcian pahding a-ol mahmah-in ka' seh-hi. I' mitte bang-in hong humsak-a, I' lungsimte bang-in hong zuutmual mawk ahihiam?

Kei-pen Dim awsuah zangh-in "Dimmi" hong kici-hi. Dim-in code nei-hi. Tua ahihleh minam kikhen-in "Dim bek-in leitang ngahding" kici zenzenleh Saaizaang, Teizaang, Sihzaang, Zo leh Paite-a kipan awsuah themcik ka' kidanpihte sung-a Gualnamte, Naulakte, Haatlanghte, Phaaipite, Suksakte cihte' ading khual nawnlo-in, "Hoihlua, Dimte bek-in leitang ngahding" ci-in mapang phangphang mawkleng mihingzia hinawnlo-hi cih kei' muhlehsaanna ahihi.

Hihthu lungngai tiuteu-in, maailam khutzan khat akheng deuh-in I' muhsawm teutau ding-in khatvei thusung kiik hihang! Ka' phawkkiau thu-in, code omsate a-it mahmah bang-a laaigelh zeelzeelte honkhat-pen Census ciang-a "Zomi" aci luading om khiinkhian ahihman-in "Zomi I' itdaan siam"-in kineumuhna leh simmawhbawlna laaimalte I' naakzat hetloh nading I' lunggulh mahmah-hi.

Zomi Pasian' Thupha!

Zokhai


*********************************************** 
T. Zokhai ITNA-IN GUABANG HINNA-HI 
60 Narr-Maen Drive 
Croydon Hills VIC 3136 
Melbourne, AU 
Tel: +61 39723 0460 
Mob: +61 420 800 560 
***********************************************



 


Comments




Leave a Reply