WWW.TUNGZANGNEWS.COM

 
Picture
Zomi Nam Ni 2014 Hong Naita:



Kumsim February 20 ni a hong tung den Zomi khempeuh i lungdamna ni pen tukum adingin zong hong nai mahmahta ahih manin Zomi Nam Ni muak dingin Zomi khempeuh kimanlah in kigingin eima kuam tek ah vai kinei ciat dingin ka um hi. India ah omte in New Delhi ah thupi takin zatsawm cih kiza khin hi. Mizogam sungah zong Mimbung khua ah Zomi Nam Ni nopci takin zang dinga Minister tuamtuam leh Zomi ulian bek hilo kumpi lam pan ulian pawlkhat in zong uap ding hi cih kiza khin hi. Lamka ah zong kizat sawm a bangcianga thupi a kibawl ding hiam cih pen a hun ciangin kithei ding hi. 

USA ah zong nasia takin Zomi te omna khua tuamtuam ah kizang dinga thugenna limci mahmah leh Zomi Ngeina lahna hun leh thugenna hun, lungdamkohna hun in kizang ding hi cih kiza ziahziahta hi. Gamdang a om Zomi lak ah UK ah zong kizang dinga, Europe gambup ah gam tuamtuam ah Zomi omna te in zong amau khuamun leh amau omna mun ciat ah zang ding cih kiza hi. Asia gama Zomi te omna Japan, Korea, Singapore leh Malaysia te ah zong kizang ding hi. Kawlgam ah zong Zangkong leh Kawlpi, Mandalay, Tedim, Tonzang, Tuithang ah leh mun tuamtuam ah amau hih theih zah ciat in kibawl ding cih kiza hi. 

Asia gam sungah Zomi Nam Ni zatna ding teng lak pan minam a hong bawl Pasian tungah lungdam kohna hun in a zang tam pen den zel hi. 

Zomi Nam Ni pen Zomi khempeuh adingin minam vai a hunnuam i zat khop hun ahih manin Ngeina tuamtuam lahna, Ngeina la tuamtuam sakna, Zomi leh Zogam ngaihna la sak hun leh minam thu leh minam tangthu, gam leh lei tangthu genna in a kizang den ahi hi. Tutung in zong Zogam leh Zomi itna thu leh la tawh mun khempeuh ah itna leh ngaihna la kisa in thu kigen dingin lamen hang. Pasian in hong kem in Zomi te tuma kum 50 hun pek in minam khangto a suak khin ding, minam lian a suak khinsa hinapi tuni tantan hong kiluai in hong nungtun ahih hangin a lungdamlo thei ihi kei hi. A khangto minam, a kalsuan minam, a mainawt minam i hih manin minam a bawl Pasian tungah Zomi a hong bawl lungdam i koh khialhloh ding thupi penpen ding hi. 

Zomi cih ciangin kuamah midang omlo hi hang. "Cimnuaia sa kibak Geltui ah kithuk" ciin Zomi pu leh pate in na gen den uh hi. I ten masakna Cimnuai hi in tua panin Geltui ah kitai in tua pan Tedim ah kitengto leuleu in tua pan Kawlzang khawng damdam in kitungsuk leuleu hi. Kawlzang khawng i tun ciang a gamla zaw a paizote in Gunkhawm khawng va tungsuk uh a, tuate hong ciah uh ciangin, "Gunkhawm khanglamah zong khua omlai hi" a cih uh ciangin khamtungah a omlaite in lamdang sa in 'Gunkhawm khanglam ah khua omlai kici zen veh aw" ciin na kigen uh hi. Tuate a sawtlo in gunkhawm khanglam pekpek va tungsuk uh a Mandalay ciang dong tungin va teeng uh a, Zangkong dong va tungsuk in va teeng uh hi. Zomi sungah laisiam masa leh tuipi gal kah masa Sia Rev.S.T. Hau Go bang tuipi gal kan in USA ah sang va kah vangvangin pilna mu masate kiangah pilna va sinin Master degree ciang bang va la mawk hi. Tua hun khawngin ngaihsun leng Zomite Pasian in hong lapsangna nakpi in lamdang himawk hi. 

Sia Hau Go hun zawh ciangin damdam in leitung pilna sin kibehlap in gamdang ah a zin leh pilna sin kibehlap a, sum zong pai zong kibehlap in tuhun ciangin bang a zin bek hi nawnlo in a teengsuak zong kitamta hi. Zomi te Pasian in i tenna mualdawn panin hong suktuaksak in tua pan a to len dingin hong lawnto a, gamlapipi i kidennata hi. Hihte khempeuh mimal hih theih hilo a minama hong bawlpa in hong lapsangna ahi hi. 

Minama hong bawlpa in Amah a mangngilh peuhmah a tuahsak thute Israel te tangthu pan kician takin kimu thei hi. Amah a mangngilhlo dingin Zomi te zong hong deih ahi hi. Pasian hoihna simsim leng Zomite a lungdam diak dingte i hi hi. Mualtung ah hong teeng sakin huih siang hong dik sak a, i cidamna hoih diak in pilna sin leng zong zawhlah i nei kei hi. Singgah lohing ne in i cidamna hoih in to a kum tampipi kinungta hi. Mualkuam gam leh tui siang luanna gam ah a ciim kilkel tuisikte luang ahih manin tuidawnna pan gilna cisa cihte kiza  ngeilo hi. Nek leh dawn siangtho in vuikhu, chemicals cihte kihello ahih manin gilpi meima cih bang tam omlo hi. Tuhun ciang khuapi ah pem in lo pan a piang hilo, sumbuk ah kizuak saphuklai tawh kitun meh theih peuh kimeh in thawl sungah kithun nek theih peuh i nek ciangin gilpi natna, lutang natna, sisan nitna cih bang natna hong tam deuhdeuh hi. Zogam ah anteh lohing singgah kicing a kinek laiin tuate tu a zah in tamlo hi!

Zomi Nam Ni hong tun ciangin Topa hoihna leh minam a hong bawlna lungdam ko lo in omlo ding hi hang. I tenna mun leh mualte a kibat nawnloh hangin minam i hihna kikhel theilo in i sisan kikhel theilo ahih manin minam khat i hihna khat mah lenkhawm, kip khawm, hikhawm ding hi hang. Gal Ngam, Hangsai, Neino leh Nantal te tangthu a nei tingteng minam khat i hih manin tunai a mikangte hong khenzakna kammal leh i tenna khuamin tawh i kilawhnate nusia in a pilzaw Zomi te in a thupi pen a tangzai pen a gol pen a lian pen a huamzo penin kalsuan khawm ding hi hang. Pankhawm hatna hi a, pangkhawm minam zahtakhuai hi. Minam a kalsuan khawmte thupi a Zomi zong tua banga kalsuan dingin Topa in hong deih hi. 

Nek ding a om leh a ne khawm ding minamte i hi hi. Sep ding a om leh a sem khawm dingte i hi hi. Zomi leh Zogam hong nawk a om leh  dal khawm ding Zomite i hi hi. Bah leh gui in a om a, tha leh ngal a kisap leh a pia ding Zomi nang leh kei i hi hi. Zomi Nam Ni ciangin tuate i vek in kisaan khawm in semkhawm, pangkhawm, zuun khawm ding hi hang.

Minam banga kal suan a kulna a om leh minam bangin kalsuan khawm ding hi hang. Kuamah kitaisanlo in minam khat i hihna lak in kalsuankhawm ding hi hang. Minam kalsuanna leh lam ah kuamah gamta lo dingin i kizawn a, a gamta i omloh ding zong ka lamen hi. Minam gamtatna lehdo lama gamta a om leh a kamsiat huai mahmah thu hi a, a tangthu hoih hetlo hi; banghang hiam cih leh minam khat lehkalh a gamta ahih manin. 

Tua ahih manin Zomi zong khangto khawm in mainawt khawm in leitung mit leh leitung mite mai ah Thupha Ngah Minam, minam lian khat hi cih lakkhia ding hi hang. Zomi Nam Ni ciang bek hilo in nisim in Zomi i hihna thupisak in a khantohna dingin hanciam den ding hi hang. Nang na khantoh leh Zomi a khangto hi a, na innkuan uh na khantoh uh leh Zomi a khangto hi a, na khua uh a khantoh leh Zomi a khangto hi. Tua ahih manin Topa muang kawm in hangsan tak, kip tak, kho tak in kalsuan ding hihang. 

Zomi na it manin midang a mudah cihna hilo a, Zomi na it manin midang a dem cihna hilo a, Zomi na it manin midang a itlo cihna hilo hi. Zomi it peuh lecin midang zong na it siam ding a, Zomi khual peuh lecin midang zong na khualsiam ding hi. Zomi khangto sak peuh lecin midang leh leitung khantohna ding zong na sem ziahziah thei ding hi. 

A sim mimal kim tungah Zomi Nam Ni nopna leh lungdamna thupha hong tungta hen. 


USA a Pu King Mang cih den zel mah bangin, kei zong, "Z = Zomite hanlungciam, khangto diam" 


 
 
 
Hau Za Cin
Phuitong Liim
www.hauzacin.blogspot.com
 
He Knows How You Feel
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.
 
He is able to run to the cry of those who are being tempted and tested and tried.
Hebrews 2:18 (AMP)
 
Whatever you are facing, He knows how you feel.



__._,_.___

 


Comments




Leave a Reply