WWW.TUNGZANGNEWS.COM

 
Zomi 1000 kim dingbang in Zomi Nam Ni pawi bawlna, 2014 Febuary 20 ni-in, Tedim Baptist Church, Yangon khuapi ah kinei hi. Tua sungah hunzatzia atomkim in anuai-abang ahihi.

Hunzat dan atomin:

A. Hun hong makaih teng:

Sia Kappu
Sia Lianpi (ZOMUS Kipawlna pa'n) leh
Zolia nih te-in nopci takin hun hong makaih uhhi.

B. Hunzekna:

a) Zogam Lalpu (Co-President, ZOMUS) in mai muakna hong nei hi.

b) Rev. Dr. S. Pau Khan En, (Ph.D) in Zomi leh minam thupitna hong gen a, "Israel minam zong acil lai-in gamdang mite-in Hebrew cih tawh nasam masa uhhi. Ahi zongin Pasian in Israel cih tawh nakipsak hi," cih te hong gen hi.

c) Rev. Dr. Suan Za Khup (Vice President-3, ZOMUS) in, "Zogam, Sunni bangin hongtan ciangin" cih thulu tawh hun tomno hong zang hi.

d) Prof. Dr. C. Thang Za Tuan, (Ph.D) tungah Census vai, Mipi te'n dotna kinei ziahziah a, Siapipa in akidong khempeuh maltu takin hongdawng setset in, Mipite kilungkim thei mahmah hi. "914 Zomi ah kithukim tekleng ih vek a dingin lungkim huaipen dinghi," hongci ngeungau hi. U Khin Ye thugenna zong projector tawh mipi muh theih dingin kilak hi.

e) Zomi Singer honkhat inzong hongzai ziahziah uh a, "2013 Inmyet Sungya" ah akhatna angah, Tg Dika in Falam la hongsa in, Hakha te khat in Kawl la hong sa a, tualo teng bel gam ngaih la ngumngek vive mah kivat ziahziah hi. Ngeina lam tawh kisai-in, Zingsol tuailaite, Yuzana Zomi Innkuan leh Siamsin tuailaite hong lam ziahziah uh a, Media lamte zong honkhat hongtung henhan uhhi.

Yangon ah Zokam tawh Zomi Nam Ni akhat veina hi-a, nopci mahmah in mailam ah zoptoh zel dingin mipi lampan kilawp thei mahmah hi. Tutung hong tanu ahi, Central ZOMUS te tungah kipawlna khempeuh lungdam ciat hi.

Kalnih bitlo kithawina hi a, kipawlna kimpan, madawk makai tampi, mihau tampite in sum leh pai tawh piakhia ziahziah in, Norway Zomi Innkuan te piak tawh akigawm in Ks. 35 Sang val kingah hi.

Pawi bawlna nuai-ah Zomi ngeina tuamtuamte, CD, DVD, laibu tampi kizuak zihziah a, Tuate inzong, Zomi Pawipi ahihna picing suahsak sem hi. Tua banah mipi khempeuh buhsih leh sa vive tawh kivak zihziah lai hi.



Source: Pu Pau Khat Suan 

Edited: Dal Sian Hung

 


Comments




Leave a Reply