WWW.TUNGZANGNEWS.COM

 
THE TRUTH SHALL SET YOU FREE John 8:32

Thupatna Background

2014 Census ading ZCD,GZA,ZBCM, ,UZO (Tamu, Kham Pat), ZRDP, ZOFA, ZOMUS, ZTS, TYF bek ahi lo Zomi te tengna khuate ah kipawlna om teng dongin Zomi sungah kipawlna khempeuh (Zomi Siamsin Kipawlna palo hi) in Zomi minam a itna uh tawh, ahun, a tha tang uh sitnei lo in, gim le tawl omlo in mipi sungah 914 Zomi thu telna dingin khut kilen in ki diangkhia laitak tek hi. Kawlgam sungah om nawn lo gamdang ah Zomi te (Chin suak dingte palo)in a pan theihna mun tek uh pan mapang pih uhi. Tua mah bangin, mite pawlkhat in politic party le census (C&P) gawm khawm mixed in 2014 Census ah C&P mixed na a om lo pi pen a om dan in upmawh thugen uhi. Census 2014 ah 914 Zomi cih pen politic pary ZCDte deihna hang hi, Kawlgam politic ah 14 state and divition kumpi policy le ethnicte Panlong Agreement tawphah 8 state policy cih bangin om nia nua lai in 2014 census buaina tam hi, 4xx Chin mah ci ni aci zong om hi. Judas in dangka 30 tawh Ferisaite lungkimna dingin Roma galakapte tungah Topa Zeisu a zuak mah bangin UZO kici Zote pawlkhat in media te tungah press conference sam in Zo bek om hi, Zomi cih om lo hi, ci’n a sanggam Zomi min hong zuak khin uhi, Zomi om lo hi cih zuau thuChin TV tawh zong kimu dingin a lawp mahmah laitak uhi. Phunom khua min tawh pawl khat in 2010 CCJ pan makai in a kitel Big Five pan hong piang khia ahi GZAte in Census Politic sem hi cih gensia in a sisan uh ahi 914 Zomi taisan in kumpi hong piaksa ka minam min uh tawh 4xx Chin kasuak ding uhi ci in ki itna nial tapa taimang suah tuak uhi. Kumpi te in ekne un ci leh ane dingte, na Pasian uh Mikang Pasian, na Topa Zeisu uh Jews te hi, ei Pasian hi lo, ei Kawlgamte pasian pen Buddha pasian hi, ci leh Topa Zeisu nusia in, Buddha pasian abia dingte suak hi. Aihang in Zomi atam zaw in 914 Zomi tawh kisai in mi tampi mah in a omom na mun uh panin minam ading athu pitna gen khia bek hilo, zuau thu kigente nial kik in thuman kigen khia tek ziahziah hi.


Census tawh kisai lo Politic le Census National Interest

Census vai ei gen ciang C&Pgawm khop ding hilo hi. C&P cih pen Chin National Party cihna hi lo hi.CNP party hi ta le zong Zomi sungah adeih ki om lo ding hi. Hi mun ah C &P cih ciangin C pen Census hi, P cih pen Politics hi. Atel nop dingin gen leng Ni le Kha abang hi, hunkhat in suak khawm thei lo uhi, a mun uh kibang lo, kigawm thei lo, ahimanin Ni le Kha a suahkhop theih loh mah bangin Census le Politics kigawm theih lohna pen Universal Truth hi(Exception: Norway gamte pawl danin zan kim nitangna gamte palo). Kawlgam sungah a kigawm thei lo thu nih gawm sawm khawm in 914 ZOMI vai mipi sung lungkat nading thu hong sung uhi. A thugen, alai at uh a thu tello pi in asim kha a ngaihsun khate tampi tak 914 Zomi tawh lungka zo mah ding uhi. A taktak in Cescus le Politic kigawm thei lo hi. Census ah politic party USDP pan mun lian pen pan pamah hi, amau kumpi sep sung hi’n a kumpi nasep uhi. ZCD aki pan Ethnic partyte in zong Cencus ading awareness diang mah ding uhi, minam vai pa ahimanin party interest ahilo national interest hangin diang uhi. Bang hang hiam cih leh


i) Census in national interest hi, state building hi, gambup phattuamna ding, gammi te phattuam nading hi. Kawlgam dan in minam nam kim om na ah minam kim phattuam na ding hi. Kawlgam ading zong mimal phazah, minam phazah le gam sung neihsa lamsa kithei khia ding ahimanin gam khantoh nading nasepna ah kizang thei mahmah pah hi. A diakdiak in 135 minam zuau kikhem a tam thuak pen 135 nam sungah 99% a kihel Kawlte ahi lo Mual tungmi (Ethnic)te ading phattuamna tam pen hi. 315 minam pan in 2014 Census man ciangin min omsa abei om dingin minam min athak hong om ding hi. 315 pen Truth hi nawn lo ding hi, aki pat aki pan zuau thu ahi hi.


Kawlgam sungah 2014 Census pan minam phazah aman pen hong piang khia ta ding hi. Tua ahimanin Census ah thuman ahi na minam min man gen ding thupi pen hi. Census cih pen minam phazah le mimal phazah kanna hi. 2014 Census ah1983 tawh kibang lo minam list a thak piang ding hi, tua in ei thugen C kici Census hi.


ii) (A) P thu gen ni. Politics hi, politic cih ciang a tom no in party bek tawh gen teh sai ni, Party kim in policy nei hi, dinna, ngimna, tupna,sepding tawphah cihna hi, policy tung ah kinga hi, minam kibat hang party kibang kei leng policy kibang khawm thei lo zaw hi. Tulai tak Kawlgam sung hong uk akizui politic in 1962 aki pan Bo Ni Win tuh khaici hoih lo teng ahi 14 state and division bek hilo 2008 Constitution dong ahuam galkap makaih Kawl minam pi policy ahi hi. Zomi sungah ZORO te Reunification policy kici Bangaladesh, India, Burma ah ki theh thang Zosuan te kigawm kik ding policy om hi. ZNC te no Chin but Zomi cih theih ding ahi sila min Chin nusia in minam min taktak Zomi kicih ding cih policy om hi. Tedim kam pau Zomi sungah zong kikhen na ahi 1974 khit hong piang Bo Ni Win hong pat silence policy ahi Divide and Rule Policy kici Kawlgam minam 135, Chin State minam 53 ah apa eimi kampau kitel sitset sungah nam 10 kipha hi. Tua hangin unau khat, pau kitel, beh khat phung khat na ngawn no le ko kici in minam tuam kisuak zen hi. Ei bek ahi lo Kawlgam bup ah thulu tuamtuam tawh mipi sungah tuni dong Divide and Rule Policy hong kizang hi.Tulai tak 2008 Constitution pen democracy tawh kituak mipi deihna bangin puah kik khelphat ding thu thang pen hi. 2008 Constitution kipuah kha theih baih mah ding hi. Opposition democratic pawl khat le Ethnicte deihna ahi Panglong Agreement bulphuh 8 State policy politic zong om hi. State le Division kigawm 14 puah hak ding ethnicte deih 8 state zong tung hak ding ahimanin tulai tak 914 Zomi tawh hong ging khawm ahi Zomi State piang thei pak lo ding hi. Chin mun ah Zomi min aki laih le bek Zomi State lamet om baih pen hi. Census pan in Zomi cih minam min taktak neih masak ding thupi masa pen phot hi.

(B) Bo Ni Win hun in 1974-1988 sung Socialist Communist System Kawlgam ah mipi sung kideih ahimanin Burma Socialist Programme Party phuan uhi, Myanmar nay Myanmar han Socialist system tawh mipi hong khem brain wash zangin mipi umsak uhi. Leitung ah mizawng pen gam Lowest Developed Country akisuah ciang mipi khanglo pan hi. 1988 khit Kawlgam sungah politic tawh kisai kisem thei lo, ei kam pan zong politic cih kilo ngam lo laitak hun in Bo Than Shwe hun 2000 kum khit kim pawlin EGRESS kici NGO khat kumpi phalna tawh hong piang khia hi. Tua Egress pan in Kawlgam ah kipau ngam lo POLITIC thu mipi sungah suakta tak in hilh thei uhi. Kawl galkap kumpi deihna tawh kizui, mipi DEMOCRACY kideih hun ahih ciangin democracy tawh kisai ideology thak tuamtuam phuahtawm le behlapsa hong piang khia hi. Politic kigen ngam lohna gam ah politic a gen thei Egress te gente zaknop kisa mahmah in, a diakdiak khangno te tampi in tuni dong um mahmah in nuntakpih uhi. Mipi deih democracy sangin galkap ki ukna le Kawl minam pi suahna atha pia democracy ideology aki pan ETHNIC mualtung mite sung minam itna kiamna ding, Panglong akipat thuman lohpan suahtakna ding le minam supsa hamphatnate ngahkikna dingin makaite, partyte nasep te telkhialhna ding ahi ei Kawlgam nuntak tawh kituak thei pak zo nai lo, azak nop mahmah gamdaih ding, ki itding, ki pumkhat ding bulphuh ngaihsutna manlo tampi brain wash thak EGRESS pan khangno te in sin uhi. Thuman le zuau kikop, pilna le ngaihsutna pai khial kikop, minam itna tawh kibang minam bup beina ding apiang sak thute cih bangin thu manlo tampite tel cian lo in, sinna pan khangno tampi in thu kithei sak in, minam vai om sim ngaihsutna kibang lo in, ki pilsak ki zangdawn muan in om uhi. A diakdiak in 914 Rohanger le Chin lo piang lo acici khangno tampi te EGRESS pan Brain Wash tuak vive tam pen uhi. Utopia kici thei One Chin Policy zong um khial in a nuntak pih ki om lai hi.


(C)Zomi sungah Kawlte brain wash thuakna le minam sung buaina hong kipat pen 1962 khit Bo Ni Win hun pan kipan phadiak ahi hi. Kawl mipil khat ahi tuhun ciang mipi in a deih nawn loh U Theih Phe Myint in, ‘Zomite pen leitung piancil khul hun pan in socialist hun ah thakhat in a khangto ziau minam hi. Tedim Zomi te sungah 1970 khit akipan ei pattoh ahi Burma Socialist Programme Party sungah cadre dingin pattah theih ding tampi mah ka mu hi’ci hi. Pattah nop, khem nop, thutak thei nai lo, akhuak siang lai bek hilo, akhuak sawp nop, ei deih bangin zat theih ding, nung zui kiciante tom gen leng BRAIN WASH theih te a cihna ahi hi. U Thein Phe Myint Zogam hong zin khit, amuh le apau thu te hi, Chin kici lo in, Zomi kici uhi, India ah zong tampi om uhi. MNF te India kumpi tawh kido zong na thei in, Tedim gam ah, Beh le Phung kibat loh, khua le tui, kam pau awkaih kibat lohna zong na thei hi. Tua nung zui in, Chin state minam 53, Tedim kam paute nam 10 asuak minam in hong khenkham thei pah uhi.


(3) 2014 Census ah 914 om pen 2010 akipan Kawlgam democratalization kici democracy pian thakna born again kici thei gam kikhelna agah hi. System lui nusia in, ki ukna kilaih ahimanin Census ah nasep dan kilaih in abeisa 135 nusia bek hi lo, minam min taktak hong gen khia sak 315 khialhna puah in minam min man deihte ading in lampi hong honsak ahi 914 hong om hi. Bangmah ZORO te ZNC te, 1974 Bo Ni Winte, 1947 Panglong Agreement policy cihte hang hilo in zong kisai lo hi. Bo Ni Win policy ahi 14 State and Division policy tawh kipai hangin tua pen Census tawh kisai lo hi, Bo Than Shwe hun Egress pan Brain Wash tuak khangno honkhat in kipil sak lua kisa 914 Zomi vai ah minam sung buai nading gen le sak hong hau zaw uhi.


Minam 135 vai le Nidang Censuste

Sanggam 914 vai alung khamte in ngaihsut ding le theih ding kisam pen khat phawk lo in a mang ngilh kha uhi. A taktak in 2014 Census ah census ngeina ahi thuman hong zongin, thuman tung hong kinga zawkna khat ahi 914 Other pen politic kici thei lo hi. Census sepna ah a ki zui ding Rule and Regulation te azuih na uh le UN a Indigineous People Right a zuihna uh hangin, 914 hong om ahi hi. UN te IPR tawh 914 Other pen a ki bat lohna ah UN adan in Kawlgam minam thak min kum 10 ngak kullo ding hi. Ei a omsa, hong ki thei sa hi, Zomi cih kammal ki laih, ki behlap ding kisam bek hi, kum 10 hunla in kan ding omlo hi. 2014 Census ah 914 om hi, nidang om lo ding hi. A beisa Census te pen ei minam min ei gen hi lo Up-Down tungsiah kumpi thu neihna tawh hong kipia hi’n Zogam ah minam 53 pha in gambup ah 135 pha mawk hi. KawLgam minam 135 phasak pen Bo Ni Win makaih galkap kumpi kiukna military system tawh pai khawm one party dictatorship system hi.Gam mite le leitung a khem na uh ahi minam 135 phasak in, tua zah minam tam pen khauhtak in ki ukna om kei leh minam 135 pan gam 135 ah gam kikhen kham ding hi ci'n a zuau gen uh a um tampi na om hi. 1983 kum khit Bo Ni Win akipan Kawl kumpi te in 2013 kum dong Census sem ngam lo uhi, Kawl minam kiam ding launa le mualtung mimal tam in tha hat ding dalna akipan, hong khen khapna in minam 135 policy len uhi.


2014 Census le 914 Zomi

2010 kitelna pan in U Thein Sein makaih mipi telsa kici mipi kumpi democracy kumpi hong piang hi. Mipi lam etna te zah aki kal suan zawh nai loh hangin, kikhelna tampi hong piangin, khantohna suahtakna 2010 kum ma sangin kingah zaw hi. Tutung 2014 Census zong apa hi. 2014 Census pen Down- Up hi, ei minam min ei gen hun hi ta hi. 2014 Census pen Kawlgam kikhelna democratization agah ahimanin, mipha zah, minam phazah kanna bek hilo in, a diakdiak in 135 minam phazah puahnopna hi. Kawlgam ah democracy picing taktak tawh gam ki uk ding hi leng minam 135 pen van gikpi ahi hi. Tu laitak a om sa တိုင္းရင္းသားေရးရာ ဝန္ၾကီး te kicing lo hi, minam 135 ading in aki cingin , minister koih sak kul hi, tua minam 135 bek hilo, minam tuamtuam tenna State and Division te ah minam kim ading Minister koih sak kul lai hi, state and division 14 ah a tawm pen တိုင္းရင္းသားေရးရာ ဝန္ၾကီး 150 ki sam ding hi. Tua bek tham lo in, tua minam 135 te ngah ding phattuam na te piak kul lai ding hi. Tua vangik pen Kawlgam bangin mizawng gam bek ahilo gam khangto gamte in zong puak hak sa ding uhi. Tua hangin minam 135 kiphiat pah thei lo ahimanin Census ah 914 Other ci in ki khelna lampi aki hong ahi hi.


2014 Census ciangin a nunung pen 1983 Census list 135 kipaikhia masa thei lo ahimanin kumpi in 135 bulphuh in na hong sem hi, 135 khialhna mikim theih tek hi in, 914 tawh puahphatna behlapna kong hong kihong hi. Tua bek hilo, minam list thak hong om ta dingin tuzawh kum 10 teh Census kik ah135 om nawn lo ding hi, 2014 census pan apiang khia list tawh code homng pia ding hi. 2014 in Chin State ah Chin nuai ah i lut leh tu zawh kum 10 ahi 2024 Census kik ciang ei minam min le code pen Chin bek hong hita ding hi (Kachin te deih zawk tua hi, Pawite in zong thei in deih mahmah uhi). Dim, Tedim, Sezang,Saizang, Guite, aki pan Chin State ah nam 53 sung pan atam zaw in minam min taktak Zomi a ki ngah kik kum ding pen 2014 ahi hi. Kawlgam bup ah minam 135 list bei dingin minam phazah list thak hong piang khia ding in, Zomi in zong code kinei ta ding hi. Chin list ahi 4xx ah lutteng Chin minam khat in hong suak dingin code khat ah om ding uhi. Zomi hi napi Zomi amawk utlo phadiak le a langpan ataih phadiak Sihzang,Zo le Khuano pawlkhat tepen a lungtup uh tungin Chin cih official in suak ta ding uh ahi hi. Tangthu ki lumlet dan ding tuadan hi, ei khut le kam in ei tangthu a at hi, Zomi kepna le paihna 2014 ahi hi. Chin state ah Zomi te thumuh dan amu a om nana ah minam list hong kikhel ding hi. Breaking Zomis in the Name of Zomi hi lo in, Saving Zomis in the name of Zomi ahi hi. The Return of History cihte History repeat Itselft cihte hi lo in, People Power changed the Zomi History and Born of the National Revival 2014 ahi hi. Zomi sung bek thu piang hong hi lo ding hi, Kawl gambup ah piang ding hi. 2014 a lap lo te, a tello te tu zawh kum 30 ciang minam min piakna ding chance om kik pan ding hi. Tua hun ciangin Zomi sung pan tapa taimangte zong hong ciah kik nop uh ciang Zomi sungah official in kisang thei pan ding hi. Tua ahimanin 135 hangin 1962 khit Bo Ni Win pat dictatorship system in minam tuamtuam hong khenkham, hong ki thutuak saklo in, gam ukna nop sa tuam uhi ta leh 2010 khit U Thein Sein kumpi akipan Kawlgam democracy ki ukna ah 135 tawh kipai thei lo ahimanin ki laihna in UN thukhun om mah bangin 914 hong piang khia ahi hi.


Behte Engna le Chin State ah Minam Neu Suah Khakding Patauh vai

Kachin Behte in 914 deihlo, amau minam 8 pen Kachin khat suahna pan kikhen nuam lo minam khat in ding zaw ding uhi, ci’n a ettak huai, a en huai thu kigen hi, man mah hi, aihang in ei Zomite tawh Kachinte kibang lo hihang, ei zong Zomi sungah minam min kibang khat ei suah masak ding kisam masa hi. KIO hangin Kachin te in Jein Phaw pau Common Language nei khin uhi, Mangkang kumpi hangin minam min kibang ahi Kachin min zong nei khin uhi, ei Zomi te tua dan ki tung nai lo hi. 2014 Census in minam min khat neih nading lampi 914 tawh innphual ah hong puak hi. Ei Zomi te in Haka, Falam, akipan Southern lamte tawh kigawm Common Language ei neih zoloh hangin, ei neihsa Tedim pau nei khin hihang, mi tam tenna lak ah Tedim pau mah hong kizui pen hi, Kalay khuasung kampau kizang pen Tedim pau hi. Tulai tak Kachinte dinmun ei tunna dingin 914 Zomi ah kipawl masak kul hi. Kachin te in Jane Phaw pau zang khawm napi, minam bup minding Jane Phaw minam kicih zang lo uhi, Tedim pau zang Zomi te in, minam bup min dingin Tedim minam cih zatloh ding hi. Tua bek hilo, Khuano, Sihzang, Zo te bang phadiak Zomi a lut kei zongin milak ah Tedim Chin mah kici lel dingin Pawite in Tedim, Zomite na ci veve ding uhi. Zomite limlim, Kawlgam bek hilo, leitung ah Zomi aza ngeite longal in, Burma, Myanmar, Chin, Tedim Chin hong kici hi. Zomi taisan in Chin a lut hangun mite in Tedim Chin mah hongna kici veve ding hi. Kachin Behte aileh pawl 8 aphak uhhang in Kachin kici tek hi, amau sungah minam vai ki zahtak in ki theih siam uhi. Zomi sungah zong minam min khat i neih khop hang beh le phung khua le tui, kampau awkaihte zui in, a om sa ei ngeinate mah bangin ki nungta suak ding hi. Chin sung lute bel Chin suah loh ngal adang haksa ding hi.


Chin State sungah tu laitak a om minam 53 ah, Tedim kampaute mimal atam pen hi. Township in kikhen leng zong mimal aki tampen hi. Chin State bup 3 in 1 val population pen Tedim kampau Zomi te hi. India Zomite Kuki longal phial in Zomi Council sungah kigawm khin uhi. Chin State ah tuni dong kitelna om le Township zui in MP kikhen hi.Tedim ah MP kingah zah in Tonzang ah kingah nai lo hi, tua bek tham lo Cikha min tawh MP kingah nai lo hi. Tedim, Tonzang, Cikha ah MP akim in ngah leng Chin State minam sungpan Paliament ah MP majority mun ah ki om suak den ding (tu in zong party kibat loh hang atam pen lam)ahimanin ei lampan in panna lam pan Chin State sungah decision making apia thei mun ah ki om den ding hi. Citizen supna om lo bek hilo, Chin State sungah thu neihna kinei zaw ding, gambup ah zong Chin State makaih zo ihimanin thu kinei veve a, minam neu suahna ding om vet lo hi.


Chin State mite Reconciliation


2014 Census pan 914 Zomi tawh Chin State 53 minam list laih khin in, Tedim kampau nam 10 pan minam khat(a tam zawte) in ding khin leng, ei sungah no le ko cihte hangin nam kibang lo cih lungsim om giu giau ki lemllohnate paih bang lel ding hi. Tua pan in Chin State mi Zosuan khempeuh kilem kikna National Reconciliation ki ngah kik ding hi. Tedim kam pau sung bek hi lo in, Pawite, Southern lamte tawh ki zopna nuam zaw ding hi. Ei ki pumkhat khin leng Pawite in hong nopneh ngam, hong neubawl ngam nawn lo ding uhi, hong zawh loh lam uh athei sa uh ahimanin ei ki pumkhat ding adah mah uhi, ei ki pumkhat theih loh sungin hong zo thawh mah uhi, ei ki pumkhat khin leng a kampau, agamtat uh kikhel in, hong nopneh ngam nawn lo in hong pawl bawl zaw ding uhi. Southern lamte zong, nidang banglo thu mu zaw, pil zaw ta uh ahimanin, thuman hong pang zaw ta uhi. Census ah 4xx Chin sung lut ding zong haksa sa mahmah uhi, a minam min taktak mah uh tawh code deih zaw ta uhi. Nidang zah in Pawite nung zui in Tedim kampaute hong langpang nawn lo ding uhi. Chin Sate sung minamte sungah 914 Zomi hangin Reconciliation bawl tangtang kullo in a kingah toto ding ahi hi. Pianna Zogam leitang ah kilem kikna hong tung le Zosuante tenna mun khempeuh leitung ah hong lawh in, khat le khat mawh ki maisak in ki lemna taktak ngah nading lampi in 914 Zomi ahi hi.


GZA 914 Zomi le John 8:32

Minister U Khin Ye in zong Zomite tawh kisai MRTV te dotna adawnna ah .. ‘nidang a lui list te ah om lo uhi, kazon hang zong mu lo hi ing, tun Census ciang a minam min man mah uh gen uh hen, minam min taktak tawh code nei nai lo gam mite in a minam min man uh agen khiat nak uh leh nidang in a paloh hangin amau deihna bangin na kisem in tu a minam list ah kiguang ding hi ‘ aci hi. Tua thu agen mapek in 2014 Census ah Code 914 Other mun pan ei minam min taktak kizang thei ta ding cih thu aki theih ciangin ki nuam lua ahimanin, minam it khempeuh in Zomi Movement ci’n adiang hi, ZNC policy ki zui hi lo zaw in minam sung khan lawnna National Revival hong tung hi. Minam itna aki nei teksa pen 2014 Census ah 914 Other hong om ciangin minam itna, khanlawhna te ki ip zo nawn lo zah dongin, puak kham in, Meitei guntui aluang bangin kuama dal zawh ding hi nawn lo hi. A diakdiak in ZCD a hilo sung panin amakai pen mun ah GZA hong diang hi, Kawlgam ah Pasian nasem te, kumpi nasemte politics ah kihel thei lo hi, aihang in tuni GZA in Census ah Zomi hong makaih thei hi, Census le Politic kisai lohna GZA nasep en leng kitel pah hi. Cope topa Kum 100 cin Jubilee hunin minam bup in minam makai dingin Pasian mai le mipi mai ah aki ap BIG FIVE a kim nawn loh hang tuni in Zomite ading akisap penpen hun in GZA in minam hong makaih taktak thei ta hi. Tua hi’n C le P bangmah kisai lo Ni le Kha bangin kigawm thei lo cih thu atung ah thute en leng kitel sitset in thuman kilang pah hi. Zomi te Chin State sungah minam neu suak ding cihte, Zomite in ei ngahsa citizen right supna piang ding cih zuau thute tawh hong pai ding Census ah 914 ZOMI tawh kisai mipi sung lungzing sak in khensatna khial sak loh ding kisam hi. Mipi sungah gen ding thu in 914 Zomi cih thuman sepna in Zomite hong khangto sak ding ahi suahtakna, minam bup sung ki lemna hong puak zaw ding hi.Tua ahimanin 2014 Census ah Pasian hong piaksa ei minam min taktak gen khiat dingin lauding, patauh ding thu om vetlo hi. Pasian deihna ahi thuman gen teci panna bek ahi lo, Zomite nuntakpih ngeina ahi thuman thutak genna ahi hi. Zomi min kiptak in nei khin leng 2014 khit akipan Zomite khang tawntung leitung bei dong nopsa in, khat le khat ki itna khang ding hi. Tuhun lai MP te bangin Tedim District vai ah a party kibat pih uh le adang party kigawm Pawite bup, Southernte bup le galkap MP te vote tang kigawm khawm ki lel nawn lo ding hi. MP te Tedim District ngah ding mun pan supna lianpi tawh lungtang kitam kham gual-lel sa in Haka pan khitui naptui tawh ciahna om nawn lo ding bek hilo, Zomi te a beisa hunte mah bangin Haka ah ki gualzo ding hi. 914 Zomi cih thuman gen in thuman tungah ding na hih lam ding Pasian kammal khat phawk den ding kisam hi.


Thuman taktak zong na thei dinguh a,tua thuman thutak in note hong suakta sak ding hi…
JOHAN 8:32 
Itna Tawh
Kim Tuang 
11 March 2014
8:55 PM

 


Comments




Leave a Reply