WWW.TUNGZANGNEWS.COM

 
Knock, and It Shall Be Opened Unto You…….. Matthew 7:7

THUPATNA
2014 Census ah minam min nei nai lo Zomi te 914 ci dingmaw Chin hi zaw maw cih le adang mualtung minam dangte thute etkak in eitua ci in mite tua ci zaw uhi ven cih zong hong om se hi. Panglong ah State min tawh na kipai lo, mite State hi’n ei Special Division khawng peuh tawh hise kici ngeingai hi. Panglong ah Chin min tawh kipai hi, tun ei Zomi kici leng Panglong pan kingah phattuamna te kisum ding hi aci zong om hi. Zomi kici khin leng Kawlgam ah inntek pan lengla minam suak ding kici ngeingai hi. 914 Zomi vai ah Minam min le State vai tawh kop in Kachin le Wa tawh kigenteh in kikupna hong tam pen hi.


Kachin Minam Wa State le Zomi 914
Tua ahimanin theih dingah Kachin te in a neihsa uh State le Minam min tawh buaina ding nei nawn lo uhi. Kampau le lai kibang group 8 te Kachin minam min khat nei khin uh in, 914 azatna ding uh om lo mah hi. Amau buai pen Kachin gam piang suang manphate le van manpha tampi bek hi lo Irrawaddy gunpi anak dongin Kawlte nek tum sak sawmna pan kem in Panglong Thukimna tungah ki tawpha in a galdo laitak uhi. Kachin gambup neihsa, thuneihna vai hi, minam vai bek hilo ahimanin, Kachin gam ah minam om khempeuh, Kawlte zong kihel in KIO ah lut in galdo uhi.


Kawlgam ah Kawl galkap te lo buangin gal hatpen dinmun ah galkap standing army 30,000 val om in, gal piang leh a galdo thei lian ding training mansa tawh kigawm 100,000 val Wagam ah om hi.UWSA Spokeperson U Aung Myint in Inrawaddy Media tawh interview ah ‘Wa te in Shan hi lo, tangtawng in Shan sungah kihel ngei lo hi ung, tun State nget cih zong ka neih sa GAM uh angen kik hi ung, thau vui thau tang tawh galdo ding liang zong kisam lo hi’, aci hi.


Zomi le Wa deihna kinei tuak hi. Zomi te in Chin State kinei khin hi. Wa te in Census ah Wa code nei sa hi uh in buai lo uhi. Tupna deihna kibatna pen a ki neisa ahi MINAM MIN le GAM a ki ngen kik ahi hi. Zomi te ading Census ah 914 tawh ol zaw hi. Wa te State nget kik pen lam sau hi, ai hangin aneih sa uh ngah kik lo in ta lo ding uhi, Zomite minam min vai zong ki khawl thei nawn lo ding hi, ngal ha posa tum kik lo hi.


Tua ahimanin mipi sung ah gamthu paizia theihtel nading in Panglong pan le nidang lai pan kipan kik in a tom kim cingin tel masak kul hi. Kawl kumpi ading in Wa te State piak haksa lo hi, ahaksa pen Panglong thukimna hangin haksa hi. Panglong Thukimna cih pen Kawlgam Ganke te sungah Kawlgam mi ETHANICS (Kawlte zong) khempeuh thuneih kikimna cihna kici thei hi. KTuhun Kawlte bek thuneihna laih kik kul ahihna, Shan gam ki phelkhapna hi’n Wa State ngah kik ding gen hak ahimanin sisan naisan luang kha ding hi. Tua bek hi lo a si khin sa nidang Kingdom gamte ahi ngei Rakhine le Mon zong om lai hi. 2014 Zomite 914 Zomi pen sisan luangna ding om lo phot hi. 914 Zomi vai le Wa State vai pen thuman tung kingah in, khat le khat ahi zong, ei sung ahi zong ki theih siamna tawh sep ding ahimanin phim tawh dawt ding hei tawh ek ding hi lo pah hi.


Panglong Background Thu
Panglong hun lai in aki hel pen kuamah STATE om nai lo hi. British ukna nuai pan gampi khen nih bek om hi. Kawlgam ah sanglai ah kisin danin British te hong khen khap hi lo hi. British hun ma in zong EI GAM TEK tawh ki om sa hi. British gal ki lelh ciangin British ukna nuai ah system khat tuak tawh gam veng ဗမာျပည္မ le ေတာင္တန္းေဒသ ci’n Governor khat nuai ah kigawm hi. 1947 Panglong Thukimna panin gam thak khat hong piang ahimanin UNION of BURMA ျပည္ေထာင္စု BELPAWL GAM kici gamte kipawlna kigawmna gam cihna hi. Suahtakna lak khit gam khat in aki din khop ciangin State om pan hi. 1948 Constitution hun lai in ei Pu le Pa te State level in na din ngap nai lo uhi. State khat cih pen akisam infra structure tampi om hi in, ei Pu le Pa te na ngap lo uhi. Bo Choke Aung San in Ta Khin Wan Thu Maung kiangah သခင္ဝမ္တူးေမာင္ ေျမပုံဆြဲရတာ ရႈပ္တယ္ဗ်ာ..ခင္ဗ်ားတို ့ခ်င္းျပည္ႏွင့္ ျပည္မႏွင့္ ခ်င္းတြင္းျမစ္ကိုနယ္နိမိတ္လုပ္မယ္..na ci ngei hi. Tua pan in na bangci dawn uhiam cih leh ..ဟာ ဗိုလ္ခ်ဳပ္ကလည္း အဲဒီလို မလုပ္ပါနဲ ့အဲဒါဆို က်ေတာ္တို ့က ရုံးစာေရး အလုပ္ေတာင္၇ဖို ့မလြယ္ဘူး.. ci'n na dawng uhi. Lai tan nei kitawm lai lua hi. Gun khawm dong Zogam suak leh Kawlte mipil tampi na om khin ahimanin, Zomite mun kingah lo ding launa tawh Kabaw gamkuam kinial hi.


Satan Kawl Ngian thei zaw Kachinte in Kawlgam ဗမာၿပည္မ tawh suahtakna lak khop ding ngaihsun zolo uhi. Zomite in Kawlzang tawh gam khat tuak in kikhen leng CI ngahna CI puakna ding haksa zaw ding cih thu bul pen tawh zong Kawl tawh kigawm ding ki ngaihsun hi. Tangthu ah kisin ထီးလင္းေက်ာက္ထု ခ်င္း-ဗမာညီလာခံ bangah Kawlte in CI bekbek mual zah vum venvan sak in hawm ziahziah uh ci hi. A sanggam Zomiတိုက္သူၾကီးte in Panglong ah Kawl tawh kipawl ding a utteh Kachin apa pan ahi hi.Panglong thu kikupna ah ျမစ္ၾကီးနား ခရိုင္ le ဗန္းေမာ္ခရိုင္ pen ဗမာျပည္မ sung pan Kachin in a nget uhi in, ngah pah uhi. Zomi, Kachin apa teh Shan in asang thei pan ahi hi.Tuabek tham lo tua hunlai Shan khangno siamsinte atam zaw in Kawl tawh kigawm in gamkhat suah ding bekbek ngen in buai sak mahmah uhi(tua hunlai Shan gam siamsin khangnote atek sih dong uh amawhna uh ki sik mahmah uhi). Panglong ah Feb 11 nidong phial ki thukimna ngah zo lo uhi. Aki ngah zawh kei leh Plain Burma bek in Independence lak ding General Aung San in sawm ta ahimanin Feb 12 ni aciah nading vanleng vaikhak khin kici hi. Panglong Thukimna hong ngah uh ciangin leitung ah Kawlgam Thak kici thei Kawlgam, Shan gam, Kachin Gam, Zogam (Hill Chin Area ), Karenni (Kayar)gam cih Gam 5 kigawm Union of Burma asuak hi. 1948- 1974 kikal aki zang Kawlgam flag ah FIVE STAR akhiatna tua hi. Minam min bek lian sangin gam 5 cihna hi zaw hi. Pu Thawng Za Khup Panglong pai pen Ukpi Pu Pum Za Mang tangin apai hi. Chin min tawh hi peuhmah lo in, tua lai in akisapna min ahi Sukte Kamhau gam ukpi pa tangin apai ahi hi. British kumpi in Sukte Kamhau gam mite min pen agam zui in Sukte mi, Kamhau mi cih tawh hong tam ciapteh pen hi, Beh, Khua le Awkaih kampau tawh hong khen kham lo hi. Tonzang gungal te om na pen Guite kual kici in Guite mi zong kici sam hi. Sihzang ukpi 5 om in, Sihzang gam Sihzang mi ki ci hi. Tua Kamhau, Sukte, Sihzang, Guite kual uk pen British hun in Tonzang inn pi pa ahi hi. Tonzang innpi Pu Pum Za Mang in 1925 kum a Kam Hau Upadi laibu bawlna ah a vek in ahuam ei minam min Zomi na ci hi. Tua in zong Kam Hau Upadi huam nuai ah om te bek a cih na hi lo, Zosuan khempeuh All Chin min Zomi kici zaw cih ngaihsut nate kipsak zaw pah hi.


Tualgal Piangna le Minam Tuamtuamte Gamvai Tanghu Pawlkhat 
A taktak in STATE min akhiatna pen GAM ျပည္ acihna hi. Kawlte in amau lai in ၿပည္နယ္ hong suah ziau uhi, Panglong Thukimna a neu sek na uhi. တိုင္း cihte pen ၿပည္ nuai ah a om ding hi. Tu a om တိုင္း ၇ le tulai Karen, Rakhine, Mon state te pen ဗမာျပည္မ nuai ah om hi. 1974 Constitution tawh 7 state le 7 division hong piang hi pan hi. Division pen state tung hong koih in zalian sak zaw uhi. KNU te Kawlgam galdo kipat pen Karen State ngim na deihna hi. Plain Burma sung pan Karen State a deih uhi. 1974 ciang amin in Karen State hong ngah uhi. A min bek mah hi, ahawm pi ahi hi. 2008 Constitution ah State te structure pen amin in hong sangkoih zaw deuh sam hi, aihang in State Chief of Minister ding pen President in 1948 khit parliament hun laid an in ama deih koih se hi, State Power bangmah omlo cihna hi. 1948 Parliament hun lai in Pu Captain Mang Tung Nungte party in kitelna ah Zogam bup ခ်င္းေ၇း၇ာဝန္ၾကီး mun dingah Falam pan Za He Rian na lel hi(a min malgawm khial kha ning).Kachin State sung kitelna ah a zo ဇန္ထားစိန္ pen ကခ်င္ဝန္ၾကီး ah koih lo in ama mi Kachin te khat mah Kachin Minister apia U Nu in ama PM power tawh adeih koih ziauziau mawk hi. ဖိုးတုန္းႏုန္း ခ်င္းေ၇းရာဝန္ၾကီးလုပ္..က်ေတာ္ ခန္ ့ေပးမယ္ ana cih leh Pu MangTung Nung in nanial hi. U Nu thu khensat sangin State power le State ah mipi thu neihna, zahtak zaw hi. Tudong a etteh tak thu le Kawlgam buaina tualgal kipat gen leng genteh den ding ahi hi. Panglong thukim tawh kibang lo in Kawlte tatna hong man loh pen Karenni, Kachin le Shan gal apiang khiat kipatna na hi.


KIO piangna bang pen U Nu le Bo Ni Win hang hi pen hi. U Nu in ama thu tawh Kachinte deih loh te Kachin Minister in koih hi, tua bek tham lo Buddish biakna pen gambup minam bup biakna dingin hong sawm na ahi metang deihna tawh kitelna ah zawhna ding me zong hi. Panglong Thukimna tawh ki leh ki lian hi.Tua bek tham lo 1948 Constitution pen Kawlte thuneihina ding bek ki at ahilam ki thei tek ta hi. Parliament dawl nih ahi upper le lower (Congress le Senate)ah MP kitelna pen mimal phazah tung kinga ahimanin Kawlte bekbek in mun tam ngah pen den uhi. Na khempeuh party aki bat loh uh hangin Kawlte thu asuak hiau hi. Gam nga tawh Gampi khat kisuak ahimanin congress ah mimal bulphuh in MP koiih ding le senate ah minam le gam bulphuh in MP koih ding kisam hi. Tua hi leh mimal tamna tha tawh kip um zawh cihna pan a ki leh kimna dingin minam le gam bulphuhna tha tawh kidem zo pan ding hi. Bo Ni Win in amah khat guak thu neihna tawh Kachin gam sung huampi khat စဝ္ေဆာင္ပနား gam teng Sente pia ziau hi. Karenni vai pen atuam hilai hi. Amau Englih khut nuai ah tung ngei lo hi. Lao gam France in uk in, Burma lam English in uk ahimanin akikal uh ah Karenni gam asit uhi. A gam uh kizom leh gal piang thei ahimanin akikal ၾကားခံနယ္ေျမ Karenni gam suak hi. Panglong ah Karenni ukpi thuneite ahi lo midang khat na kah in Panglong ah THUKIMNA SIGN hi. Karenni kipawlna KNPPte in tudong Karenni Governmet zangin makai Chairman uh President ci in department makaite Minister ci uhi, Faderal Union vai agen hak pen minam ahi uhi, tu in bel Federal taktak ahi leh sang thei khin uhi. Mon, Karen le Rakhine pen Plain Burma sung pan hi in, State nei lo uhi, Bo Yoke Aung San le Kawl makaite in tua hun lai in a thahat pen Karen te kihel in gam khat sungah om khopna dingin က၇င္ တစ္က်ပ္ ဗမာ တစ္က်ပ္ cih tawh na kai uhi. Tu tua kammal in tang thu suak hiau hi. State and Division 14 hong phak ciang Kawlte in 7 ngah in adangte in khat ta ki ngah ahimanin, vompi sahawm ..ေ၇ာ့ညီေလးတစ္က်ပ္..အစ္ကိုတစ္က်ပ္ ..cih kammal hong thang hi.


Karen le Mon in Federal State deih hi. Rakhine bek in bel Independence State adeih hi, Tua hangin tuhun Rakhine te buai pen Federal le Confederation ahi hi. Nidang Rakhine pen Kingdom gam taktak hi’n ဘိုးေတာ္ဘုရား kici ကုန္းေဘာင္မင္းဆက္ a vang pha pen ဦးဝိုင္း in Rakhine gambup na zo in Rakhine Kingdom bei hi. Mon zong Kingdom gam mah hi'n အေလာင္းဘုရား cih pasian suak dingpa U Aung Zay Ya in Hantharwaddy Mon gam a sat khap bek hilo..a minam zong abei dong athat hel hi. Nidang Mon gam ah minte le tuhun Kawlgam minte bang pen Dagon pen ၇န္ကုန္ cih ..Mon gal beina min napia hi. Shwe Dagon nuai ah ေသြးေဆးကန္ ..cih pen a temtawng uh a..Mon sisan tam lua keu cip in khut ki la khia thei lo ahimanin tui ah diah in asawpna uhi. Shwedagon nuai mah ah ေအာင္ေျမ ci in Mon gal zawhna in gal aihna mun om hi. သဃၤန္းကြ်န္း cih pen Dagon a om Mon Phunggyite khempeuh phial ding a lom thahna uh ah phungzite siluang tawh kidim cihna pan min apiang hi.Mon minam beina dingin mithatna panin က်ဴပင္ခုတ္က်ဳငုတ္မက်န္. kammal hong thang suak hi. Hantawaddy Mongam tudong ding kik zo nawn lo hi. Mi pawlkhat bek in Hantawaddy Gam phut kik ding ngim na nei uh in, atam zaw in Kawlgal federal sungah State khat in ut zaw uhi. Shan te in Sawbwa tawh ki uk uhi, Sawbwate neih khop khuapi mun 32 bang om ding hi.Shan Sawbwa a tam zaw in Kawl kumpi te kiang ah akhang akhang in to va kai den zaw uhi. Shan Saw Bwa khat in bel Kawl gal zo in Inwa na uk ngei sam hi. Kalay zong Shan Sawbwa Kyi Taung Nyo ukna gam hi. Kalay cih pen Shan pau ကာေလး pan ki la ci uhi, Kawlpau in ေစ်းတန္း acihna ci hi. Rakhine, Mon, Karen, Shan, Asho-Chin tampi minam dang tawh kiteng na pan in Kawl asuak zong tampi om hi. Bo Ni Win in Kawl minam pi kip nading 1973 Census ah Kawl minam deih tak in hong kan khiat le Kawl minam sitset na tam pen lo in, minam kigawm kahbia atam ciangin Kawl minam sitset kan hong khawl pah hi. Kawlgam ah minam min kician nei lo le kahbiate Kawl asuak na hangin Kawl minam a tam pen hong suak hi.


Chin Special Division le City of the State Thu 
Panglong Agreement agah Kawlgam suahtakna lak khit 1948 Constitution kigelh ciangin State kila ngam lo,ခ်င္းျပည္ kila ngam lo ahimanin State hamphatna sang lo in mi ngah zah kingah lo hi. Ki niamkhiatna tawh phat tuamna zonglo, angsung khuat lo in, Kawlgam sungah hong kipawl khawm ci’n Kawlte in eibek atuam in hong phat se uhi. Tua hun lai-in nuntak ki nuamsa lai in CI om peuh leh nuntakna kicing kisa hi. Kawl ngyan tel nai lo zong ki hi leuleu ahimanin တိုင္း ciang kila mah hi. ခ်င္းတိုင္း cih min ngaih lo lua mahmah ahimanin.. Kawl makaite in min hong phuah sak tawm in ဝိေသသ English in SPECIAL cih min hong behlap sak uhi in bangmah akhiatna tuam omlo hi. A lawh nop, a et lawm ciang hi, kinuam mahmah lel hi. Zozumpi zong Zangkong ah kihong hi. 1962 khit Bo Ni Win hun ciangin State Zumpite Zangkong pan agamtek uh ah ciah sak hi. Bo Ni Win in Chin Special Division khuapi dingin Kalay hong pia hi. Col Khen Za Moong na hai lo ahimanin Tedim na ci lo, Kalay deih ana cih hi. Col Van Kulh in Haka khuata no khat Chin Special Division khuapi dingin deih hi. Kalay ah Zozum kihong masa hi. Col Van Kulh in galkap North West Command ah Second Commander a sep lai hi'n ana phutphut ciangin Haka ah Zozum tuah ding ngah zo hi. Haka ah motor lam tung nai lo pen ki to tawm hi, ki tuah kawm uhi. Col Khen Za Moong in ana phut kik ciangin Kalay ngah kik hi napi, Kalay ah om suak ding , Haka pai loh ding cih Zangkong pan sik khau kisat pen, tualai Zozum ah lai at Pawite 1 in nasel hi. Haka atun veve uh Zangkong pan aki zak ciangin buai thu kisit in, a thu akan uh leh sik khau lai kisel ana hi hi, tua sikkhau lai selpa ခ်င္းဝိေသသတိုင္း pan နယ္နင္ဒဏ္ kipia hi. Mite in a minam ading tuaci sep ngam uhi.Haka ah Zozum kihong suak hi, Haka aki tuah ma in Kalay ah teng Kawlte nahai lo in, Chin deih lo cih lungphona neih kipan man uhi. Zomi te hangin Kalay khantoh lawh hi, vanleng tual, angah pen bang Chin State City ading kipia a zom hi.


Na Kiuh leh Hong Kihon Ding Hi 
Wate in State a cih uh pen aneihsa GAM uh anget kik ahih mah bangin Zomi min ei cih zong ei neihsa min Official in zatkik na ding ahi hi.2014 Census ah minam min peuh tawh abuai tam het lo hi. Kei phawkpak ah Zomi, Shan San, Ta Ang (Palaung) om hi. Mi nam min bek ahi lo, minam thak hong lut ding pen nidang aki mang ngilh kha le tun Thai tawh bang kituh pih liang in a om ပလွ်ဴး te om hi. Kawlgam mi mah ahih hang un, a tam zaw tuisung ah teng zaw in, tuipi sung ah kulhte tung le tuisung ah gunkuang tungah teng ngabeng minam ahi hi. Census ah 914 kikoihna tua dan thu tampi hang ahi hi. 914 Zomi na cih hangin Chin State Pan supna, Myanmar citizen pan supna om peuh mah lo hi. Chin aki cici nuam teng tawh kisiatna, ki itna kiamna ding om lo hi, amau Zomi aki ci nuam lo bek hi zaw uhi. 1947 Kawlgam kiphuat thak dingin Kawlgam sungah Ci vai patauhna tawh gammi in alut C:Ci omlo sa limlo aci Zomi te khempeuh in 2014 Kawlgam hunthak ah C:Chin omlo ei pianglo cih ding hi lo in 914 Zomi cih ding ahi hi. Topa Zeisu in zong na kiuh uh leh hong kihon ding hi ci hi. Vakna pan inn tungteh kong khakpi bangzah ta in tawh kikilh ta leh kong hong kihon ding hi. Ei inn ahiman ahi hi. A ki kilh cip Pasian hong piaksa minam min, Pasian tungah ki ap sa minam minin kihong nuam lua ta, leitung minam dangte lak ah ciaptehna kihel hun luata ahimanin Zomi minam min kong khak in 914 nambat tawh na kiuh ding hong ngak hi.


Kiu un na kiuh uh leh hong kihon ding hi….. MATTIU 7:7
Itna tawh
Kim Tuang
13 March 2014
6:00 PM

 


Comments




Leave a Reply