WWW.TUNGZANGNEWS.COM

 
Malaysia Operasi leh galtai pemta te’ dinmun (Alunglut te’ simding) Malaysia mimat cialpi (operasi) in galtai pemta te bangciang hong nawngkai sak, hong lau thawngsak hiam cih them ikikum nuam hi. Khanglui te’n, ‘thutang gen leh
sazaang kap’ acih mah bangun hih operasi vaitawh kisai igen ciangin amaan mahmah azaknop lo, apatauh huai pawlkhat omse hi. Hihbang igen ciangin aki patau saknuam ihi kei a, ikhawphawk nading leh pilvang takin  idopsiam theihding lunggulhna hizaw hi.


Amasa in Malaysia kumpi in gamsungah omtheih nading laidal neilo te, passports neilo te, passports ahunval khinsate, atuamtuam etc., leh gamsungah thukhun tawk kituak lopi a om gamdang mi peuhmah matmang dingin mimat cialpi (operasi) ahong bawl uh hi cih izaksa ciat ahi hi. Tua matding te lakah galtai gambel (refugees)
te leh UN minsanna angah khinte (asylum seekers) kihel khalo hi. Tua banah, galtai kipawlna khatpeuh tawh ki nahvawh khate zong UN te’n hongvaan/honghu thei cih izaksa hi.


Ahi zongin hih mimat hongkipat taktak ciangun, galtai gambel (refugees) tampi manlo in akhah hangun, pawlkhat pen UN card atuh pihi cihdan khawngin paulap tuamtuam tawh man vetse uh hi. Kimat mawkmawk dan hilo in operasi tawh akiman khate sumtawh kitan khiathei khollo hi. Akiman gamdang mi peuhmah amanlang theithei-in agam alei uh puak kikding acih uh hangun galtaite leh UN tawh aki memat kha mi peuhmah puak kik samlo uh hi. Nidang leilam senpi lai-in galtai mi nangawn Thai gamgi puak kik ngeimah uh hi, UN leh gamdang tuamtuam te’n avau
luat ciangun kuamah leilam tawh puakkiknawnlo uh hi.


Akiman galtaite leh UN tawh kizom mite apuak kikloh hangun immigration te’ gilbem (Depot Immigration) ah khumcip mawk uh hi. Meeltheih sanggam tenangawn tawh kizopna khaktan uh hi. Aphual ah vapai mahleng zong kal (2) masiah kuamah tawh kimuh theilo cilai uh hi. Tua kikal in mundang khawngah napuak ahih keileh thukhenzum (court) khawng napuak thei uh hi. Akamsia vanglak te bang tuahun sungin thukhenzum khatpeuh ah paipih uh a, bangmah neilote mah bangin (illegal stay) tawh mawhsak in, atel lohpi mah in khialmah ing acih khakleh thong
kiadingin thu khensat ziau uh hi. Khialkeng cihleh thu khensat nailo in zum paikik hunding zasak in, a kimatna gilbem mah puak kik veve hi. Malay pau tel keng kamphen hong kawmsak un cileh Kawlgam Palai Zumpi (Myanmar Embassy) pan akicial ngiat ahih manin akha bangin ngak kul a, tuahun sung gilbem mah ah koih veve uh hi. Hih Passport Case 6 (c) tawh thong ikiat leh atawmpen kha 3-6 bang sawtthei a, akam siate ciangduai tawh sat (caning/whipping) ngah theilai hi. Keizong akamsia pawl ah kana kihel ngei hi. Tuhun tehbel ciangduai zat kidawm mahmah sam uh hi.


Mat-le-hen tuah ciangin ikoh theihzel ahi UNHCR, adiak in OPI te ahi hi. Amau zong kimat kihen natuah uhleh athu ala akicingin (Gtn; amin apuam, UN number, ani akha, akimatna mun, gilbem, thong, etc.) hong zasak pah un ci-uh hi. Enzong kimat kihenna ituah ciangin OPI te’n hong delhpah ding, ahih theihleh hong tankhia pahding cih ilamet pi ahi hi. Ahi zongin ataktak ciangin tuaci pahlo bilbel hi.


Hihvai tawh kisai in katuah khak thu pawlkhat hong hawmsawn nuam ing. Sanggam te khat khuasung vak kimlai operasi tawh akimat ciangin athu ala akim in OPI tekiang kapuak pah hi. Amahpen UN Card ngahsa hinapi na Card atuh hi ci-in  naman mawk uh hi. Tuazawh asawt lo-in akikoihna mun immigration te’ gilbem kavahawh leh kal (2) khit masiah kimu theilo ding hong cise uh hi. Tua kal (2) sungin OPI ah 2 vei bang athu ala kavapuak beh hangin, OPI lampan in bangciang kivaihawm khin, bangci ciang hongsepsak khin uh cihpeuh mah honggen ngeilo uh a, ka thupuak simin hong dawtsa teng mah uh aza ngeilo bangin apatna pan atawpdong hong dong kikkik uh hi.


Kal (2) acin ciangin Immigration te’ gilbem kavaphak leuleu leh na sanggam pa/nu thukhenzum kipuak khin, hiah om nawnlo hong ciziau uh hi. Tuaciangin koilai kipuak hiam kacih leh Putrajaya ah hongci ziau in adang bangmah kidong theilo in, kadot hangzong hongdawng nawnlo hi. Tuaciangin OPI kapai leuleu leh angei bangin na sanggam pa/nu koi ah kiman, etc., hongdot ngeisa teng uh apatpan atawp dong athei kha ngeilo bangin hong dong zellel mawk uh a, hih kal (2) sungin bangciang hong sepsak cih peuhmah genkha lo hi. Tua banah, na sanggam pa/nu vai thuthak a
omleh hongpuak beh in maw hongci zawsop uh hi. Nungkum sawn lamin zonghihbang dan meltheih sanggam khat mah kiman in OPI ah thu kapuak pah hi. Akimat pan thukhenzum atun dong OPI ah thu kapuak puak hangin bangmah kilam danna omlo in atawpna ah thong kia veve hi. Thong akiatkhit phitphet, Immigration te gilbem a tunkik zawh kha (2) val ciangin tua sanggam pa/nu hong suakta zo pan hi.


Hihtawh kisai in OPI te’n agen ciangun kimat kihen atuak a-om a, akicingin thu hongkipuak leh ko Putrajaya Immigration zumpi ah hih pa/nu ko UNHCR te’ mi hi cih theihsakna leh thumna lai nakhak ung ci-uh hi. Tua zumpi panin thukimna lai hongtun kikciang bekin akiman te hong kithoh khiathei pan ci hi. Ahi zongin OPI te’n
thu kipuak hunhun in lai naten pahpah lo uh a, khat veivei akal bangin sawt thei mawk uh hi. Immigration zumpi panin zong thukimna lai athuh kikding uh akha bangin sawt theilai a, pawlkhat bang khahkhia nuam kei ung acih uhleh amau thu himiau hi. Hih zum khat le khat lai kikhak kikal in thong kiading te nakia manlua mahmah hi. Banghang hiam cihleh Malaysia thukhun ah mikhat akimat leh akimat ni pan ni (14) sungin thu kibawl a, thukhenzum kitun hamtang hi. Thukhenzum pan thu akikhen leh thongkia, akikhen keileh akimatna gilbem mah puak kik, ahih keileh mundang gilbem puak cihdan hi. Galtai (refugees) te bang thu kikhen a mawhna aneih keileh zong khahkhia lo-in Immigration te’ gilbem ah UN te tatkhiat dong khumcip veve uh hi. Abeisa hun danin hong kimat leh OPI te’n hong tankhia pah cih thadah, hong delh thiangthiang dinguh zong lamet huailo hi. Tua genloh gilbem khat nangawn kha (2) ciang khatvei ta bek phazo uh hi.  


Galtai mi khempeuh in hih atung a igen bangdan atuak hi zenzen lo hi. Malaysia pute’n zong nisim naisim in munkhempeuh ah miman den hisam lo hi. Ahi tei tab zongin Zomi zong kitamta ihih manin mat-le-hen a-om ciangin pawlkhat mah kihel khapuut zel hihang. Gam ui/Ngia tawh kibang Malaysia pute (Police, Immigration/Rela) dawi-ha-vang kal ah gamtat luhek pilvang mahmah kul hi. Nahih theih tawp in kimat-kihen pelh ding hoihpen hi. Hong kimat leh suahtak theih ding lampi a-om leh thupi pah hi. Tualo a, atuan tual OPI te’ zia-le-tong nangak khak leh
kiallap loding hi. Galtaite (refugees) pen athu-in hong ki mawkmat theihloh hangin hongmat khaknak uhleh thu hongbawl in hongman khialphial tale uh UN card tawi pipi mah bangmah neilo te bangin thongsung hong tunzo veve uh hi. Hih mimat cialpi (2) veina ciangah, ei galtai gambel te hizah ciang hong sawkkha uh cileng, mailam ah cialpi hong zomto lai-uh henla agensa bangun gamdang mi 400,000 amat zawhdong uh hong zomto le-uh, adang aki sailo ei galtai gambel mi bangzah hongnawk khalai ding uh hiam cih lungkham huai gige hi.


Hih atunga igen thute dung zui-in, UN card tawi pipi amawkmat tepawl uh leh, nungdeuh a ZRC te’n hong suahsak apasal UN card nei napi, azi nausuak tung Zatopi ah pangliang a, Immigration palik te’n amat tepawl uh hoihtak ciapteh (Documentation) kipan leng hoih sa-ing. Tunzong honpikhat omkhin kha dingin um ing. Mailam mimat cialpi (operasi) te ah zong honkhat omto khalai ding hi. Tua ahih manin ZAM, ZRC, MZO, MSO leh adang kipawlna tuamtuam te’n zong buai tale uhcin na member te sung panun manlo pi a mat-le-hen tuak mimal te’ thu-le-la avuicing takin kaikhawm in hongkhak zo le uhcin tuateng gawmkhawm in Human Rights Organizations atuamtuam ahi zongin, akisap leh UN Human Rights Council dongah report puak huai sa-ing. Tua hileh, Malaysia pute’n zong thuman lopi a mi mawkmat kidawm tuam mahmah ding uh hi. US leh gamkim gampam te’ pangbel a anungta gamkhat ahih manun akidop kei uhleh tampi suplawh laiding uh hi.


Thupuak,
Zam Sian Sum
Contact: 014-3266834
E-mail: zamsian83@gmail.com/zamsiansum@yahoo.com

 

 


Comments




Leave a Reply