WWW.TUNGZANGNEWS.COM

 
Zomi ulehnau,

Yangon pan lai ong khaak ing.
Census vai 914 - Zomi ci aa gelh ding i innlam aa om, i innkuanpih ciat in 914 - Zomi ci aa agelh nading un hoihtak, gina tak, khauhtak laikhaak ciatding kisamhi.


Malaysia Zomi Namni in hoihtak kivaikhak ahihman in innlam ah innkuan 4000 val in atheikhin hipahhi. Tuabang ciat in vaikhak lehang innkuan atul sawm aa sim hipah dinghi.


Tangtat, tuamtat ding vaihawmteng zong hoihtak kimuhpih lehang tel lian uh ahihman in, mipi tung gina tak gending lunggulh ciat uhhi.


Tuni zong Gamngai pan aa sanggampa khat tawh kakimu aa GZA ngimna, lungtup gina tak kakuppih leh, GZAte kalsuannopna pen tu aa zin kawikawi te aa sang picing sazaw ahihman in akhuakhua aa genzawh ding, mipi theihsak ding lunggulh mahmahhi.


ZOMI, Zo minam cihpen CHIN nuai aa omding minam hilaizanglo hihang cih hilelhi.


Chin kici kei lehang CHIN State vaihawmna ah thu neilo ding cihpeuh pil ding aa kilawmte paulap hilai zen ahihman in, a ciangen theiding kisam mahmahhi.


U Khin Yee thugen muan ding hikei, Kawl Kumpi vaihawm muanding hikei cihpeuh paulap in kinei aa, tutung census pen Gambup vaihawmna, Hlutdaw khensatna ahihlam khencian theilo honkhat ki omlaihi.


2015 kuang lui ding tawh kigawmkhawm niloh ahihman in, (mimal mahmah zong), muan ding teng zong dauta uhhi.


914 - Zomi aa gelh tawh minam kingahpah ding a sa zong honkhat ki om aa, mailam sepding maban tampi om ahihlam kitheilohi.


Zomi kicih ding i hanciam sang zinghuan nitaak huan ding akisam i mipihte hamsatna hanciam huaizaw acipeuh ki om aa, sep khat in nasep khatbek a semthei bek akisa zong om hihang.


Code ngahsa tengin a code ngah uh pammaihsa mahmah uh aa, Zomi in kigelh hilehang Code neihsa amangpahding a sa zong honpi khat om leuleuhi. I code neihsa teng CHIN cihna thulupi nuai pan ZOMI cihna thulupi(nampi) nuai aa kituahding aa kalsuan ihihlam kician theih nailohi. Tuahangin ZOMi cih kideihciat mahmah napi kikalsuan khia ngamlohi.


I hihna lui i taisat ngam kei leh hihna thak kingah ngeilo ding cih kalthak suankhiat ding kingaap mahmahlohi.


Umlui sung aa lenggahtui thak thunsawm vive kihi laihi.


ZOMI tawh kalsuan aa i kikhenkhap sang aci honkhat om aa Zomi aa kigawm ding lam in ngaihsun khalo uhhi. Hih kalsuanna pen a kikhenkham teng gawm nading hizaw hi. Tuasang in ahizaw khat in, "i hihna" lahkhiat ding cih ahihi. Kikhenkhapna i sak leh, akikhenkhamlo dingin thumang ciat in Zomi ciciat pah lehang hilel lohiam kicih huai mahmahhi.


Zomi in koiciang huamsak ding ihihiam? cihpen dotna hoih mahmah in kinei aa, "Zomi in gol huam hetlo ding hihang, nang bek kihuamsak in, Zomi na kicih leh nang Zomi na hi aa, na kicih kei leh nahikei hi, akici nuamlote huamlohi" cih i sankim ciat theihding thupihi.


Chin kici kei lehang Chin State vaihawmna sung ah kihel khaloding ci aa thu gengen honkhat zong ki omlai hi. Muhna behlap lai ding kisamhi.


Zomi kicih ding deihlo khangno honkhat in, "Khangnote mailam ding ong ngaihsut sak un, mailam aa maimawl loh nading" ci uh aa "Amau mailam genloh Zomite khangtampi aa ding gelna ahizawklam theikhalo uhhi. Tutak aa Chin tawh neektawm zongte bel sukha thei mah dinghi.


Kimuh khopna khat ah, ZOMI agelhlo khangno tezong ZOMI in ong sim veve un cihna khat om aa, Zomi gelhlote gengen loh gelh khuan mahmah zong angahlo gamdang aa om i mipihte zong Zomi mah hivevehi cih tawh kidawngkikhi.


Tangtawng aa kipan Zomi kici lua hang, tu sansan aa vaihawm hipeuhmah kei a ci om aa tuate in Kumpi ciaptehna ngah nailo, ciaptehna ngah nading aa kalsuan saansaan ihihlam thei nailo dan hihtuak uhhi.


Pawlkhat leuleu in federal ngah peuh lehang hihte tua hun ciang aa gending hi ci uh aa, tua hun pek ngak takei lehang, tu'n ong kipiak laitak gelhsuk pakding hilo ding hiam, baih zawlai hilohiam? cih dotkikloh ong phamawhhi. "Sik asat laitak sat un"


Ong kipia i laak kei leh ei thanemna ahihi.

Khat veivei mipi tawh a kalsuan khawmlo, kalsuan khopding asang zolo mikheltat nih leh thum te a min apuam aa kitheihsak ding zong thupi sa dekdek ta ing.

Tutak kineihna tawh kalsuan honkhat om ahihman in kidawm ni. Thu kanlopi in agal pan mawk gamtat hetkeini. Muanding aa kilawmpipi lam etna neuno khat tawh na muanhuai nawn hetlohi. Kipawlna honkhat zong na muanhuai nawnlo mawk uhhi.


Pawl ahihloh hang, gal hinailo ahihman in gal suahloh ding thupi hi.

Sia Khen Za Sian leh immigration lamsai makaite kimuhna pan, "914 (Zolai aa gelh ding) - Zomi (Kawllai aa gelh ding) cih ong deihsaak uh ahihman in tua bang aa gelh ding hidinghi" cihi.

Kawlpi tunciang Siamsinte in laipiak ding khat ongneih tuaklam, Zingsol Editor in ong genkhol aa, Siamsinte ong laipiakding ama' gelsak cihna ahihman in ama' tung lungdam na kako kholhi.

Hang Khan Lian
camp - Yangon

-- 
Hang Khan Lian
Block 646#13-115
Jalan Tenaga
Singapore 410646

 


Comments




Leave a Reply