WWW.TUNGZANGNEWS.COM

 
ZAM Thupuak
ZAM :: Zomi Association of Malaysia

 

“31 March 2014 (Monday) ni Sialsawm pawi ah paisawm ciatni.”

 

Dahpihna pulakna

Tongsial khuami Pu Cin Za Thang leh Pi Khup Kho Zen, Naulak te’ tapa neu pen, Upa Gin Khan Suan (kum 74, ZAM-15801) ZCF Canaan Pawlpi Upapi huh (Vice President) in lam-et loh lai takin Tuap natna tawh General Hospital Kuala Lumpur pan March 19, 2014 Wed, 10:10 PM hun in piangsak pa Pa Pasian kiangah hong ciahsan ta ahih manin Zomi Social Welfare of Malaysia (ZSM) zumpi pan in dahpihna lai ih puak hi. Ong nusiat a it mahmah Pi Vung Za Nian leh tate tungah Topa kiang pan hong pai hehnepna in athak in hong om ta hen.

 

Upa pa’n hong nusiat na thu ZCF Canaan Pawlpi in ZSM zumpi hong koh ciangin zato, UNHCR, JPN(Lahwohkah), Police leh hantan theih na’ngin vai teng kisem pah hi. ZSM ah mimal in a lut manloh hangin ZCF Canaan pawlpi in ZSM tawh kizop na nei ahih manin sivui Pawlpi tungah RM500.00 tawh panpih na kipia ding a, ZAM card hing lai ahih manin ZAM zumpi in RM500.00 tawh dahpihna kinei hi.

 

Upa pa ii luanghawm tawh a nunung pen hun bawlna anuai a hungel na bangin kinei ding ahih manin Zomi u leh nau nu leh pa akua mapeuh in kihel kim theih ding hanciam ciat ni.

 

Ani : 22.03.2014 (Sat)
Ahun : 10:00-12:00AM
Amun : ZCF-Canaan
Hanmual : Sungai Buloh

 

Nusiat Zi leh tate, sanggam te, khuapih te leh Pawlpi te tawh kibangin dahna sungah; Zomi Genvai kipawlna (Zomi Social Welfare of Malaysia)

 

Sialsawm leh Zomi kumthak pawipi ah sapna

Malaysia gamsung aom Zomi khempeuh in hongtungding 31 March 2014 (Zingkha ni 1, 2014) Monday ni in “A thumveina kumcin Sialsawm leh Zomi kumthak muakna” pawipi nopcitak in ki bawlding ahih manin, nongkihel hamtang nading in zahtakna lianpi tawh kongsam uhhi. Ahun: 11am - 4pm, Amun: St. Anthony Biakinn (Tung Shin Hospital mai)

 

Kawlgam Census vai panpihna ki khakkhin

Kawlgam sungah mimal simna Census pen 30 March pan 10 April sungding hi a, maikal hongbeileh aki panding hita hi. Malaysia gamsung aom khuamakai, pawlpi makai leh minam vai avei, alunglut mipi honkhat ki muhkhopna pan khentatna zui in Census vai ah agim atawl te panpih nading huhna ki donsak a, khua kipawlna leh pawlpi panin tampitak hongki piatek ahih manin hong piakhia akua maciat tungah lungdam ihko hi. Ihbiak Pa Pasian in azah tampitak in na thuhsakkik tahen!

 

Sum aki ngahteng ki kaikhawm in ki khakpah a, avekpi in akigawm Ks.2,000,000 (Teng sawmnih) kikhak khinta hi.


Apiasa khua kipawlna leh pawlpi te

Pau Khen Khup (Sakollam) RM50, Suanghoih RM100, Tungzang RM100, Dongh Sawm Tung (Cingpikot) RM100, Mualzang RM100, Kansau RM100, Tungtuang RM100, EBC KL RM200, Cingpikot RM100, Saipimual RM100, Muizawl RM100, Dimlo RM100, Zampi RM100, Chantagyi RM100, Mualbeem RM100, Luangel RM100, Ngalzang RM100, Zozaang RM100, Laibung RM100, Gawngmual RM120, Anlangh RM100, Haiciin RM200, Lingthuk RM100, ZCF Kota D’sara RM200, SDA RM200, Tuithang RM200, ZCCM RM200, Vongmual RM100, IZCC RM200, Kaptel RM100, Lailo RM300, Ngalbual RM100, Sezaang RM200, Vangteh RM200, Mualnuam RM100, Zion UPC RM200, Singunau RM100, CMF RM200, Sunway Emmanuel RM200, Pangzang RM100, Tuitawh RM100, Cikha RM100, Mualpi RM200, Haupi RM100, Laitui RM200, Dampi RM50, ZCF Kajang RM200, ZEM Bukit Tinggi RM200, ZCA RM200, Khual Suan Cin RM100, Lailui RM200, Thang Sian Pau RM50, Phaiza RM200

 

Midang te Bank Card zatsak kei in

Eimi sungah mi pawlkhat te’n alengkhinsa te ii Bank Card khawng zatsakthei uhhi. Tuapen alauhuai mahmahkhat ahihi. Banghanghiam cihleh na Bank Card mangsak lecin Bank ah na kankik ciangin na Bank Card aki bawlmasakna UNHCR Card hongki ngen hamtang dinghi. Tuahun ciangin laktheikei lecin na Bank Card zat ki ngahkik nawnloding a, asungah nakhol phitphet naneihsa sumkhempeuh asup lawhding nahihi. Hih lai asimkha tektek te’n midang Bank Card zatsakkei khamahni, ahi zongin na meltheih tanau sungah tuabang in azangkha natheih aomleh hehpihna tawh na gensawn in. Lauhuai hi, ki dop huai hi. Bank te thukhun tawhzong ki tuaklo a, ataktak in Bank te’n hongthei masa uh hileh na Bank Account pen hong khakcipsakthei ahihi.

 

Innkuan lutpihding DS a ngakte

UN ah Innkuan lutpihding DS a ngakte abanban in kisamsamta ahih manin, alutpihte leh alutpih dingte’n na Phone Number piak uh hoihtak nalen un. Tuaban ah innkuan ki lutpihding nahih mahbang un nazi, napasal ii tangthu, sanggam phazah, suahni suahkha, ki teenni cihte nengneng ki gingkholsa in om hamtang un. Bangmah thulela kigingkhollo pi in UN ah Interview dingin mawklut kei un. Kammalkhat na genkhialh khak uhleh tua kammalkhat in navai uh kumtampi hong ziakaisak theihi.

 

Tuaban ah Phone Number akhel, alaih ahih keileh amangsak te’nzong amanlang in UN zumah na Phone Number thak uh piapahpah un. Phone ki saptheihloh hangin navai uh khatvei ki pelhleh UN te’n mi tampi tawh na asemkhawm uh ahih manin nanghun hong tunkikding atawmpenpen kha 3 bang na ngakkik hongkul pahhi. Tuaban ah midang, na meltheihte Phone Number napiak lehzong namin napuam hoihtak hilhkhol in. Pawlkhat te’n khuamakai, pawlpi makai te Phone Number khawng genkhollopi in muanna lianpi tawh napiaksak mawkmawk uhhi. Ihki muanpen lungdamhuai hi. Ahi zongin na makai te’n innlam ah nang hongtheihna minleh tu’n nazat min akibat lohciang buaina omthei hi. Atelsiam dingin Topa’n thupha hongpia tahen!

 

Kimat kihen natuah leh

Deihlohpen kimat kihen na tuahkhak zenzenleh ZAM Card tawi peuhmah in ZAM Palai te (Tuangpu: 016-254 4093, Thaa Mung: 016-646 5375) na hopihpah in. Kimat kihen na tuahhunding pen ki genkhol theilo ahih manin hih atung a Phone Number nihpen na Phone sungah kemkholden hamtang lecin khialhluat omlo ding hi. Tuaban ah kimat kihen ahi zongin, cimawh dongtuak in na omhunciang nabelh, nakoh ngamding leh hong vanzo takpiding in namuan penpen kipawlna khatah Member lut a, na Member Card ahing in na omsak detdingzong thupi mahmah hi. Nihlehthum bawlthuah neunau kullo hi. Akician kipawlna, namuan penpen khatah Member Card bawlziaulel lecin phazo hi. Koi ah Card bawlding cihpen ZAM in hong thagum sawlloding a, NANG ngaihsutding ahihi.

 

Pudu leh Kotaraya sungteng ah nisimphial in akiman omden ahih manin vaksuk vaktohna ah kidopding thupi mahmah hi. Kiman khinleng sumlehpaai tampi abei banah nasep silbawl zong tampi kipelhpah ahih manin ihki dopsiamding ei mawhpuakzong hiveve hi. Mimante pen Uniform silhlo CID te hiphadiak a, tualo palik tezong munkhempeuh ah miman in buaimahmah uhhi. Kidawm ciatni.

 

UNHCR-CDU te Kajang ah hawhding

ZAM Palai te vaihawmna tawh maikal 25 March (Tuesday) ni inZomi te kikhopna biakinn khat ahi Kajang ZCF ah UNHCR-CDU te honghawhding uhhi. Hong hawhhunding uhpen zingsang 10:00am - 12:00pm kikal hiding hi. Hih UNHCR-CDU te honghawhhun sungin Interview ki samtheilo te leh UN vai dotnop tuamtuam ki dongthei hi. Note: Paidanding atheilo te’n Sia Khoi Tuang na hopih un. Ph: 010 286 6189

 

ZAM zum ah Ngeina Puan athak honkhat hong tunbeh

Kawlgam pekpan in aki vaikhak ngiat ahi ih ngeina puan tuamtuamte zanni in athak pawlkhat hong tunbeh leuleu hi. Alunglut adeih peuhmah in ZAM zumpi ahdeihzahzah ki leitheita hi. Aki ngahthei van te: Zopuan (pasal), Zopuan (numei), Puandum, Zodial, Zodial naikhau (silk), Puanlaisan, Tanghciin, Khephiau leh Zokhi namtuamtuam
Dotbehnop aomleh >>> Siama Ngaih Hau (010-823 0571)

 

Lungdam kohna

Zomi Catholic (ZCCM, St. Joseph Church, Sentul) pan tukal Thupuak bawlna ding RM50 hong piakhia leuleu uh ahih manin lungdam ihko hi. ZCCM Pawlpi tawh na kizop nop leh: Francis Khampi 016 269 1351
Rev. Cin Kap Tuang in ZAM Thupuak bawlnading in RM50 hong piakhia ahih manin lungdamna ih pulak hi.

 

ZAM Palai sungpan kua tawh kizomding
Kimat kihen natuahkhakleh:
Sia Tuangpu : 016-254 4093
Sia Thaa Mung : 016-646 5375
Sia Kam Mung : 016-995 6231

 

Zato vai kisapna aomleh:
Sia Khoi Tuang : 010-286 6189
Sia Kam Sang : 016-918 9692
Sia Kep Lian : 014-369 4897

 

Nasep leh Bank Card vai:
Sia Mangpu : 019-510 6413

 

ZAM Card vai:
Sia David Mungno : 017-333 4320

 

ZEC Sangvai:
Sia Francis Lamthang : 014-225 9458

 

Laibu thak kizuakding

Hongtungding 31 March 2014 (Monday) ni kumcin Sialsawm leh Zo kumthak muakna pawi ah “Tutmun mikaangpau sinna” leh “Eden ah ciahkik ni” cih laibu te ki zuakding ahih manin akua mapeuh in tha pia ciatni. Zongeina Saihadial (Zodial) zong ki zuakding hi. Ih Zodial neihsawm ciatni.

 

ZAM leh UN card tawite ading nasep hoih khat om

Electronic (TV, DVD player leh etc..) van bawl lam asiam Zomi pasal khat kideih kin mahmah hi. Amun: Kepong Aman Puri, Kha sum RM1500, Omna pialo, Sun an pia. Public Holiday, Saturday leh Sunday nite off ding. Nasep hun zingsang nai 9:00am - 6:00pm dong hiding. Malay or English tawmtawm pau thei ding. Alunglutte'n: Sia David Mungno: 017-333 4320 ah kidawp thei.

 

Namsiaza ki ngahkikta

Zan ihmutheilo liangin hong nawngkaisakden na innnuai namsia te na galdo nading in ZAM zumah Namsiaza ki leitheikik tahi.

 

Mimang hong kanpih un

Langzang khuami Rev. Bil Khua Ngin leh Nu Zam Khua Lem te tanu Lia Pau Sian Deih pen Malaysia atunzawh kum 2 bang sawtkhin a, ahi zongin innlam tawh thuki zakna omlo hi. Tua ahih manin hih sanggamnu atheikha, amukha na om uhleh Malaysia ah ZAM zum ahi zongin, Kawlgam ah apa te Ph: 0095 947213220, 0095 9250089748 ahi zongin nong zaksak nading un kongthuum uhhi.

 

ZAM Palai te buaipihdiak pawlkhat

Dim Hau Niang (Tauleng), Cung Dim (Tualzang), Cing Theih Lian (Tualzang), Ruth Sein (Shan), Don Hau Niang (Tauleng), Cing Sawm Man (Tungzang), Kai Sian Mung (Vangteh), Zam Sian Lian (Thangkai Suangpi), Gin Khan Khual (Sakhankyi), Thawn Khan Sut (Lailo), Dal Sian Piang (Lailo), Tuangpi (Tuilangh), Thang Khen Cin (Chiantakyi), Dong Khan Khai (Takkhawl), Thang Khan Kim (Takkhawl), Ngin Khan Pau (Takkhawl), Pau Thawn Dal (Tuithang), Sian Khan Thang (Mualpi), Sian Gum Khan Khual (Mualpi), Ngin Cin Khai (Tampi), Thang Sian Tung, Kam Do Khen (Chantakyi), Dong Sian Muang (Chiantakyi), Tual Khan Cin (Chiantakyi), Kai Za Lian (Thangzang), Kap Suan Cin (Buan), Heng Ma Lin (Takkhawl), Zam Sian Tuang (Tungzang), Kam Sian Hung (Tungzang), Vum Suan Khup (Tungzang), Tual Sian Sang (Gawng), Thang Hawm Sian (Chiantagyi), Dim Suan Cing (Mualpi), Sum Lian (Laitui)

 

ZAM Hall ki kawmthei

ZAM Hall pen Session khat (nai 4 sung) RM200 ki lading a, nai 4 khitciang azatbehtoh nopleh naikhat RM50 ki lading hi. Aki zangthei vanteng: Aircon, Tutphah 150, Sound System, Drum Set 1, Wired Mic 1, Wireless Mic 2, Usher Counter leh adang tuamtuam. Alunglut te’n hih Phone 010-823 0571 ah naki zom un. Note: Guihtheih khamtheih zat ki phallo hi.

 

Khual gamla pan CO Class nakahleh

US nalending ciangin Tentan (Culture Orientation Class) hongki kahsak hamtang khading hi. Tua CO Class nakah ciangin Kuala Lumpur leh Selangor pualam pan ahi gentehna Ipoh, Johor pan nongpaileh nongpaina Bus Ticket, Train Ticket te hoihtak kem khinkhian in. CO Class natun ciangin Kamphen te kiangah laklecin asumbeizah hong piakikding uhhi.

 

Address:

155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  zomiassociationmls@gmail.com

 


Comments




Leave a Reply