WWW.TUNGZANGNEWS.COM

 
Zomi Nam Ni a lawhtak (Outcome)

Sisanpih Ngaihteng,

Tutung Zomi Nam Ni-pen lungkimhuai tak-in akhual atual-ah nasia tak-in leh eima' hihtheihzah ciat-a I' bawlciatna-in "Zomi Khanlawhna" lianpi ahihna mitmuh-in hong taksuah ahihman-in Zomi Neipa A' min kiphat tawntung tahen!

Laaitui Khua-ah Zomi Nam Ni ahitheih zah-in kibawl-a, khuaveeng khempeuh zawn-in, Milipsimna Laaihawm (Guun Gaal Thelnah Leeng) akihawm kawm-in khua-kim kizawn-hi. Ahun toiluatman leh vaai tuamtuam ziak-in khohna-ah hong kipai kimzo lo-hi. Ahizong-in, ahun toi paulap-in neilo-in hong haanciam taitai-a Zomi Nam Ni hong uapkhawm khuate anuai-abang ahihi:

Tuitawh Khua
Tuidiil Khua
Tuicinluui Khua
Tongsial Khua
Mualnuam Khua
Keizaang/Ciingpikot Khua
Haaimual Khua Luui
New Eden (Haaimual Khua Thak gei-a)
Cikmah hun-a kilawmtaatna leh ki unauna-tawh sahkhua kithuahkhopna (social interaction) a-om ngeilo kimlaai tukum Zomi Nam Ni-in maa hong patsak-hi.

Zinmaangpipa Rev. Dr. Do Suan Muang (General Secretary: Global Zomi Alliance)-inzong ama' mipihte hong khual-in, Tuithang Khua pan-in gimpi, tawlpi mah-in hongdelh caucau-in, leivuui teng thuak, suanghuum lak-ah kitatsuk kitatto kawm-in thugenna limci mahmah hong neihsak-hi. Minam itna bulphuh-a makaai aseem ahihziak bekbekmah hikeileh Laaitui Khua Zomi Nam Ni vaaihawmpawl-in bangmah peuhmah piakzawh kineilo, niangtui lim siusiau nangawn kitah siamlo kawmkaal-ah aminam itna hong zanghkhia Sia Mung' tung-ahzong naakpi-in lungdamna kahong taangko uhhi.

Ngah nading peuhmah lamet omlo himahleh Zomi Nam Ni vaaihawmpawl-in alunggulhna hong dipsak Lasasiam Pa Kaam Seen leh Hip Hop & Rapper Pa Teng Khai te lawmta-teng' tung-ahzong naakpi-in lungdamna kahong taangko uhhi. Minam itna bekbek masuan-a Zomi Nam Ni-ah hong phungcingsak, hong luunsak sanggamte Pasian-in note' itna-tawh kizuui-in Zomi minam sung-ah akizangh seemseem, amuiibunh seemseem ding-in na' siamnate-uh, na' awluan khumnote-uh Pasian-in hong phungvuhsak seemseem tahen!

Laaitui Khua Zomi Nam Ni alawhtaak leh thunuazuui (outcome) hoihpen:

Zomi Nam Ni lungsiitlo-a hong-uap khuaveengte' tungpan-a akingah lawhtaak (outcome) masapen: "Zomi I-cih ciang-in 'Chin pen ei' pau-a amawk cihcih akisa hi-in tu'n telsiang mahmah hang-ei, I' dinkip nading kitel ta-ei" cihthu gah masapen ahihi.
Laaitui Khuamite ataangpi-in, "914-ah Zomi kicih nading vaai-pen political party te' pawlzotna" cianglel-a angaihsut khitsa-uhpen hih Zomi Nam Ni leh "Guun Gaal Thelnah Leeng" ziak-in naakpi-a khanlawhna piang-a, gah manpha mahmah gahkhia ahihna mitmuh-in kilangh-hi.
Cialpi-ah Zomi taangthu leh Zomi Nam Ni taangthute hoihtak-in kisuut ahihman-in khangthakte' sung-ah khaici manpha kivawh khin, po khinta, hing-in hong khangpha laaiding mitmuh ahihi.
Laaitui Khuasaatpipa Pahtawina leh Guun Gaal Ngalliam Taangpaal Pahtawinate kibawl ahihman-in khuadangte inzong Khuasaat Tuikhuatte' thupiitna phawk ciat-in pahtawi theihna aneihciat nading lampi masa suak-hi. Khuasaat Tuikhuatte Zogam-ah kimangngilh bawl-in akipaampaih man-a I' thuak minam haksatna leh minam mabinna tampi-omding cihthu kei mimal' upmawhsansaat ahihi. "Mualkhawl masa-zong kizahtaak" pupate' thuciin-pen khangthakte-in ki mangngilh ta-a, kuate zahtaak bawlding cih-a kipan uzawte zahtaakna nangawn kiamsuk gawpta ahihman-in minam sung-ah hih "atung-a akibawl pahtawina"-in khanlawhna piangsak ding-in lametna lian-hi.
Laaitui Khua Hausa upa-a kipan khuaveeng palaai taángmite-in "milipsimna" tungtaang athupi mahmah ding-a aseh khollohna pan-in "Kawlgam-ah Zomite Pasian-in namlian khat-a hong lapsaang nading lampi hoih mahmah khat" ahihlam phawkthak-in telcian-uh ahihman-in minam phungcin nading khaici hoih mahmah apo khinta hongsuak-in, sawtlo-in agah kine dinghi.
Laaitui Khua Zomi Nam Ni vaaihawmpawl:

Abeisa hunte-ah Guun Gaal Kuam-ah "Zomi Nam Ni" cihkhawng akiza cianglel hi-a, thupi kisa khollo ahihkeileh "thuneite' khaam thapaai-tawh" ci-in akibawl ngeilo zahdong ahihi. Minam itlo hilo napi-in minam tawisaang nading lampi khat-inzong kiseh khollo, Kawlgam political party te' ki-elna, kikosiatna, kigensiatna, adiak-in 1990 Kiteelna pan-a hong kilimzaak Zomi vaai-pen party vaaiciang bang-in akisehna, a-party te mahmah inzong minam itna leh minam lian I' hihna pulaakna leh minam mit keuhsak nading mapanna' sang-in mè/vote ngah nading ciangmah muiituum-in akineih man-in "Zomi"-ah akikhanlawhding zah-in kikhanglo theilo, akilawpding zah-in kilawp zolo dinmun ahihi.

Bangbang ahizong-in minam-pen pupa' ngeina leh tawnzia-tawh aki lungngaih ciang-in "Minam Lian taktak, akip, akho minam" I-hihna kiphawk kiik-a, hih I' hihna maan I' dinkippih theih nading lunggulhna omteng kigawm khawm-in Guun Gaal Zomi Federation, Laaitui Siamsin Kipawlna, Laaitui Khua Hausa Upate leh Biakna Makaai Upateng-in hun toicik/tomcik sung-a akivaaihawm ahihi. Vaaihawmpawl upate' tungpan-in "Minam Ni abawltaak mahmah" ahihna aziak mitmuh tampi-tawh lungkimna leh angtanna kiza-hi.

Laaitui Khua Zomi Nam Ni leh "Guun Gaal Thelnah Leeng" aki vaaihawm nading-in "phulluum phuul nading leikha-in petlet" acihbang-in hong petlet beklo-in sumtang mahmah-tawh hong mapang Pa Langh Sian Khai (Haatlangh) tung-ah Minam Ni vaaihawmpawl khempeuh-inlungdamna leh kipaak taktakna thu kahong puak uhhi. Pa Langh Sian Khai-pen midik hiithiat, acitak mahmah, minam avei mahmah khat hi-a, hih vaai khempeuh hong pianna naakpi ahihi.

Mimalkim' Mapanna themcik:

"Guun Gaal Thelnah Leeng (914 Zomi kicih nading laaihawm)" leh "Zomi Nam Ni" vaaihawmna-a sumbei vekpi Kawlsum tuulza 20 vaal bei-hi.

Amasapen-in hih vaaihawmna hong piankhiatna bulpi ahi Pa Langh Sian Khai-in tuulza 5.3 hong luuikhia-hi.
Anihna-ah USA-a ateeng Pa Thang Khua Lian-in tuulza 2 hong luuikhia-hi.
Laaitui Khua-ah Tumging siamsinna-tawh laaiphahpi angah masapen ahi Pa Suang Go Kaap Pahtawina Laaiphahpi-pen Zomi Nam Ni vaaihawmpawl-in pia-a, anuazuui ding-in daat githa (electric guitar) tuulza 5 kiim manh khat-pen USA-a Tg. Khup Siing (Mung Lian Khup Za Siing)-in hong luuikhia-hi.
Adang sumlehpaai khempeuh-pen innpi leh sanggamte nangawn panpih zolo, cihmawh dongtuak kawmkawm mah-in ahithei bang-in kahong sik ahihi.
Guun Gaal Thelnah Leeng laaihawmna' ading-in 
Pa Hau Baan Nang (Pa Hau; Australia- Heilei Khua)-in AU$ 100, 
Pa Cin Go Pau (Pa Ciipau; Australia - Tungzaang Khua)-in AU$ 50,
Tg. Khup Lam Thang (Tg. Thangpi; Australia - Haupi Khua)-in AU$ 60,
Tg. Suan Sian Lian (Tg. Sian; Australia - Anlangh Khua)-in AU$ 50,
cihbang-in aki mapang diimdiam ahihi.

Sum-tawh akituat theilo, amanh akiseh theilo vaaihawmna, mapanna, hunpiakna, thalehngal zatna leh gimteng tawlteng apua-pen Laaitui Siamsin Kipawlna hi-a, Makaaipi Pa Thawng Lam Pau (Thawng Pau) leh Suan Siing-a kipan mimal kim-in kitukalhna leh kasuan khialhna om kiuhkeuh lo-in, kizentak leh kiciantak-in hong mapang-in mual hong suahpih ahihman-in naakpi-in angtang hihang! Zomi buppi sung-ah etteh taakcing mahmah kipawlna ahihlam mitmuh-a hong kilangh ahihman-in maailam-ah minam' ading-in Pasian-in hong naakzat zawkaan dinghi. Vaaihawm siamna, kithuhualna limhoihpen khat ahihlam Zomi lak-ah hong gahkhiasak Laaitui Siamsin Kipawlna Pasian-in hong phungvuh seemseem tahen!

Laaitui Khua-a akibawl Zomi Nam Ni mahbang-in mun tuamtuam-a akibawl Zomi Nam Ni Cialpi khempeuh-in minam sung-ah khanlawhna, kithuhualna leh ki-itna abulphuh mapankhopna hong lawhtaak sakkim ding-in lametna leh lawpna I-nei uhhi. Kigensiatna, ki-elna, kipaampaihna, kihumtuamna, kilangpanna, kihazaatna, kiheekna/kilehheekna khempeuh nusia-in itna sung-ah aluangkhawm diamdiam ding-in Zomite' Piangsakpa-in Thupha hong buaksuk tahen!

Zomi Nam Ni Thupha!

&

Zomi Pasian' Thupha!


Zokhai
Zomi Nam Ni Thupuak!

Anuai-a mp4 themcik aki endik naailo hong maleep pak-ing.
*********************************************** 
T. Zokhai ITNA-IN GUABANG HINNA-HI 
60 Narr-Maen Drive 
Croydon Hills VIC 3136 
Melbourne, AU 
Tel: +61 39723 0460 
Mob: +61 420 800 560 
***********************************************

 


Comments




Leave a Reply