WWW.TUNGZANGNEWS.COM

 
 
Chile gam Santiago khuapi pan hopihna hong hopih ing.




Innlam ah cesus vai ZOMI vaite makai te leh mipite nakpitak hanciam in i hihna maan mite, kumpite inhong ciapteh ding athupi mahmah nasep lianpi i sep laitak in lawm leh gualte geelna vaihawmna a omsa bangin Chile gam ka zin khia hi. Ka tunna mun khempeuh ah ZOMI ka hihna pulaak bek thamlo in mite zong Zo puan Zo nikte ka teengsak aa hoihsa mahmah uh in, lungdam thei mahmah uh hi. Ka limte facebook sungah ka guag aa Jacob Mung ah na en thei ding uh hi.



Chile gam sung khuapi 5 te ah CLC teamte hi ta leh Pasian nasepna ah mapang khawm mitampitak tawh mission conference 5 vei ka nei thei hi. Chile gam pen sak leh khang kigamla mahmah aa Kawlgam bang dan in tuat le hang Santiago pen Yangon khuapi bang dan hi. Sak lam ah Antofagasta khua ka phakna pen Yangon pan Myitkyina a gamlat dan mah bang hi. Khang lam khuapite Concepcion, Temuco khuate pen Myeik, Kawthawng khuate bang dan hi. Santiago tawh a kinai pen khuapi seaport in Valparaiso hi aa Km 90 kigamla in mawtaw tawh nai 1:30 kipai hi. Chile gam sungah mi 17 million teenga, Santiago ah 6 million teeng hi. Christian pen 10% bang pha uh hi

Chile gam ii nisuah na lam ah Andy mountain range om hi. Santiago pan in a saklam gam khempeuh mual leh guam a tam zaw hi aa singkung lopa om vet lo in, kawlh mang hi. Antofagasta khua kiim ah sumngo tawhna mun 9 om aa leitungah sumngo pianna a tamna munpen khat hi. Khuahun pen vot lua lo lum lua lo in nop bektak hi. Santiago khua pan a khang lam te ah khuahun vot in mun khatkhat ah kum tawn tung vukkhal in tuam cip hi.



Hih ka zin kawikawina munte ah Pasian in a lamdang na a sepnate tawm khat hong pulaak nuam ing. Minamdang lakah Pasian na ka sepna ka lawhcin mahmah na mun khat ahih manin Pasian tungah lungdam bektham lo in, ZOMI khat lei mong ciang Pasian thugen dinga hong puakna ka angtanna leh Pasian nasepnate hangin ka ZOMI pihteng hong hawmsawn nuam ka hi hi.



Antofagasta khua ah CLC Jesus te Llama pawlpi bulphunin ka thugenna tungtawnin mi 21 in Zeisu Khazih gumpa leh honpa in saangin 40 taang in Pasian tungah kiaapthakna leh Pasian geelsakna bang nuntak nading lunggulhin hong ki-ap thak uh hi. Khangno pasal khat in Pasian nasem dingin hong kipumpiak pah hi. Tua banah Maranatha Baptist Church ah zong Pasian tungah thumaantaka nungta nuam mi 1 hong ki.ap hi. Concepcion khua ah mission nasepna ah khantawntung kipumpiak dingin kipsakna siavuan a sinlai numei 3 te leh kum 12-16 kiim apha naupang 5 te mission nasem dingin kipumpiak uh hi. Temuco,Valparaiso leh Santiago khua ah zong mi tampi in thangah ban ah Pasian ading nungta dingin thathak laakna nei uh hi.



Hihte ka et tak ciangin aww Pasian in ZOMI te Zogam, vaigam leh leimong dong Ama nasem dinga hong puak kawikawi mi tampite in Pasian muh lawh banah Pasian nasem ding kipsakna leh ki-apna nei thei banah, Pasian ading nuntaknopna athak ki-apnate aneih uh ka muh ciangin Pasian tungah lungdam lua ka hih manin hong hawmsawn hing. ZOMIte hong mangngilh lo, hong ciamteh leh hong lamsang Pasian in phatna, pahtawina, minthanna, vanliatna, ukzawhna khempeuh tang tungtawn ta hen.



Khazih sungah


Jacob Mung
Santiago, Chile


 


Comments




Leave a Reply