WWW.TUNGZANGNEWS.COM

 
Leenlaai Malaysia @Zomi Laainat

2005 June kha 16 ni in  Kawlgam Democracy Makaaipi Daw Aung San Suu Kyi kum 60 cinna phawkna leh  Gaalkaap kumpi in thumanlo a akhumcip Daw Suu, U Khun Tun Oo te akhah khiatnading un Kawlte, Mualtungmi tuamtuam te leh Zomi 34 avek akigawm mi 68 in Peaceful Demonstration Myanmar Embassy,Malaysia maai ah nasia tak in zingsang 10AM kakipan uha, Zomi tengpeen Zomi National Congress Liberated Area member vive ka hi uhhi.

Pudu Jail kici Kualalumpur khualaaizang a nidang a mikhawng akikhailup ziahziahna thong innpi sung ah ongpuak in thongsung luutding takciang Lipkhap huaitak in ongbawlsia bilbel uha, Zomi khat bang Tubuang dingbuang kawmsa in billeensak kawm in Kawlgam Lapi abeidong sasak se uhhi. Hih thong Inn sung ah  ni 7 sung ongkoih uha, Suangpeektung ah kilum ahihman in cidam meello pawl lingpah hithit in kabuai pianpah uhhi. Kawlgate bang a Budha uh nasia ongbia uh ahihman in thong inn sungteng khuaimu haam bangngaungau in kigamlum tuam nong hi.

Hih Pudu thongpi pan in ni 7 khitciang Sungai Buluh thong Innpi kici Kumpi langpang Makaai in ahi Anwar Ibrahim I lamsa leh thongkiatna mun ah kha 8 sung ka om uhhi. Thong inn sung ahihmah bang in bawlsiatna, hamsatna tuamtuam omtham himah leh Hih mun ah thupi mahmah khat in banghiam cihleh Zomi teng peen aneu peenpeen teng kahi uha, ahizong in thungen khawmden., Thuman thumanlo ah kigum ngiat in ka om uhciang Thongkia pawlkhat bang in Pasian ongmuhlawh, cidamlawh cihte ban ah Mite in thupi ongsa in ongzawhthawh bawl ngamngei lo ban ah nahoih tampi kaseem kha uhhi. Lawmte pawlkhat bang in Pongmoh neekbaangte zang in Hindu te Pasian ding bawnglim cih khawng tampi tak nabawlsak man uhhi.

 Thongsung peen atamzaw migilo vive kikhumna ahihman in migilo thei mahmah a khatvei Kala Thongbu pawl in Zomi te ongnopneh ongsimmawh pian ahihman in kaki phingphial uha, Tun Australia aom Pu Nacin bang kala makaaipa amaitang atup sawm leh baanlo ahihman in kiluaito in atupsawm leh migol kala pa lau mahmah in ongthuum kik zen uhhi.  Attorney te advised na tawh kizui in Zomi pawlkhat Phalna ngahlo pi in Assembly bawlkha mah ung ci in thukhenpipa maai ah kathum uhleh ongmaisak in gamdangmite kikoihna Camp acihna ah mi 18 ongpuak ahihman in Zomi khennih kaphata uhhi.

Saminyih Camp sung katun uhciang  Mihonpikhat ana omkhitna innpi sung ah ongkhum kik uhhi. Mun le Mual kilim ngahmeello baan ah Muslim ten nikhat 5 vei thungetna neiden in muntampipi deih uh ahihman in engiaugiau bek in kasu nuampianpian hi. Zingsangkhat Ann ongkihawm ciang ongkigamlum ngeingaai ahihman in Pu Na CIn ., JK Liang Thang cihtepawl honkhattawh kakhua daak uhleh Zomi nihte Annkhamlo a kawltetawh buai kamu uhhi. Athu in Zomi nihte mawhzaw himah leh Sisankhat cihna tawh kadiangkhia pah a, Hih minih te nasuk ding uhleh angap bangbang ongpai kivaat ziahziah ding kacih leh Rohingja, Mon,Kachin,Karen,Rakhaing,Burma,Shan cihteng peen ongkigawmlian in Nga Bama Bee De Chin Di Akong tatpit laih me ongcivial uh ahihman tawlkhat kakiksawk zalzal man uhhi. Khalkha Falam mi 15 khawng aompeen onglimhuh mahmah bilbel uhhi.

Zomi nihte mundang thong inn sung ah puakding in munkhat ah khum tak uhciang kapusuak pheipah a , Police officer pa kiang ah hih Zomi nihte mundang napuakding leh napuak ma in nangsang alianzaw Ulianpi tetawh kei ongkimusak in kagennop omhi hehpihna tawh kacih leh., ongpia bilbel ahihman in palik zalianpi te kiang ah kapai a kongtun kik mateng Kuaman Ann nanekei un ci in Zomi kheempeuh kavaaikhak hi. Palik Liante kiang ah Kawlgam Politics katelciang leh Minam omzia kasuut leh ongtelsiam mahmah bilbel ahihman in Namun ah napai kik inla ko ongphone sak nung in nevek un meeting naneiding uhhi ongcihciang ka Khan ah lungdam tak in ciahkik in ka Zomi pihteng kiang ah report kapia pah hi.

Nikaai ciang in Kawlte in meeting ongsampah uha, Kei, Sia Na Cin leh Falam Puteek khat kapaipah uhhi. Kawlten nobang utpeen nahi uhhiam ongcih ciang ken hamphatna kikim leeng ut ung kaciziau hi. Amau tua ahihleh sumzuak nuamzaw no Captain seemnuam zaw cih ongdong leuleu uha, Captain kateel ban uh-ah Ann vaai akibuai ci in Ann hawmding Zomi mi 5 ongsehsak un ci in kagen leh kingah hi. Ka Zomi pih tengtawh kikum in kua in Captain seemtheiding ci in kakikup uhciang lawmten Nangmah in ongseem in ci uh ahihman in Captain kaseem hi.

Tawlkhat khitciang ka omna uh Innpi tui paikhiatna kikhaaktan ahihman in nasialua in adang munkhat ah kakituah uhhi. Innteekna sa mun ah vankicing ban ah munhoih kineisa leengla in munkhat kitung ahihman in hamsa kisatek ahihman Palik Bupa kiang ah Bupa aw ka omna inn uh ko le ko in hahsiang nung in kazawh uhciang kituahnung kacih uhleh aw hoihlua nasepzawh uhtaak in ci in kamciam ongpia hi. Kala 1,Kawlte 1, Kei leh Zomi Volunteer pawlkhat tawh kahah ziahziah uhleh ninih sung in kazo pah uhhi.

Kazawh uhciang Thongkongpua ah ongcing Palik Sannih khat in ongpusuak saknawnlo a kangetnget hang ongkam khauh ahihman in kaheh ongsuakvat a Palik san 2 pakiang ah Malaysia te Law te nathei hiam kacih leh ongheh mahmah in ongsaatvial ahihman keizong aciang manpah in tawmvei kabuai ngengngang uhhi. Nisa sovelvel lak ah Zomi tengbek ahilo ko Mundangpan a akituahteng samkhia in Kuaman Ann nelo ding innpua ah pusuak in Lungphona neiding kacih leh mi 200 taang in ongzui ngeingaai sam in Kadiangkhengkhang uhleh Malaysia palik ten kei leh Kawlte khat Kala tekhat amakaai thum zumpi ah ongsam Vankham zang a akhamkhawng ongsanong in zunkawng ongsit in thudotna kihona ongneih pih in Lungphona tawh kisai khawlding leh amau lampan ahitheizah a kodeihna ongsepsakding in kithukimna kangah khit uhciang ongciah sak in mipi lungphona kidaai phot hi.

***********Zomi te peen neutiltel napin Pakistan te pi 7 aphading alian mahmah khat pan Mipi tuineekna tuibeemsung a tui akhuttawh la in asil nasawpna ahihman Zomi commando khat  khawl in acihleh nathupi simlo ahihman khatvei atup ek leh leitang kisaatna in khasia mahmah a, Ka Captain zum ah ongkitun ngei uhhi.********

Thang Khawm Pau Zomi

HIh thu te Mikaang laai in ki en kik thei ee anuai ah

http://www.humanrights.asia/news/urgent-appeals/UP-82-2005


-- 
Thang Khawm Pau ZOMi
1009 Bryant Way Apt B
Bowling Green , KY, 42103
USA
Cell- 270 -217 9593
joseptpau@gmail.comThang.pau@perdue.com
www.perdue.com , www.zomipau.wordpress.com


Itna icih bangcihtheih ding ihihiam cih leh Khris in eite ading in anuntakna hongpia hi. Eite zong i khristian imipihte ading in inuntaakna ipiakngamding ahihi. (John masa 3:16)
 


Comments




Leave a Reply