WWW.TUNGZANGNEWS.COM

 
Thuthak Tomkimcing 13 Apr 2014

A. Zomi leh Sialsawm

Sialsawm hun cih pen khuakal laitak bangmah neih loh hun laitak, Zogam ah singteh te aheu hun laitak, Lokho te ading in khaicii kivawh khit hun cih ding ahihi. Sialsawm pen nidang hun in kumkhat khatvei khuazangbup in tual athoih ni, tual athoih hun ahihi. Beh sung Siampi tuul pi te ankuang um khop ni, Lo lai anno po te aliim cii a gahpha asuah na ding, Huih siia, Guah siia, Lolai miimpi ciim , leh Zusa, Vasa te gamsa Vom, Zawng, Ngau te tawh an kituh, kisuk siat sak loh na ding in Tual thoih ni tual thoih hun sung Sial sawm ahihi.

Tualthoih na ah siampi te in thualthoihnasa ci asawh loh ni, Satui bek tawh ameh ni ahihi. Thu hat ah khangno te gal kikhita in honhon ki kisawm a, Asawmsawm in giak khawm teng an kikup khop ni ahih man in Sial ngawh loh in sa kicing lo ahih te sial gawh kul a, sawmsawm in an nek ni ahihi. Tual thoihna ah Siampi tampi kipha thei ahih teh vok tawh thoih sang in Gamsial tawh thoih ding ding alungngulhna ni in Sialsawm ni ahihi. Hih sialsawm ni in lei kito lo sawl kivulsak lo, Siampi teen imeh ci al kei acih theih loh ni ahihi. Tuhun teh Biakna siamkhempeuh kipawl khawm in guah tui hoih luan na ding vanglian pa tung ngetna anei khawm khua kitam nawnlo saseh sawm pawi hita hi.

B. Galtai mi 7000 kim phata

KIA leh Kawlgal kap te kikap kik na huzaap in gal lau in galtai 7000 kim pha zo uh ahihi cihi. Tua galtai te Namkham ah khuapi zuan uh ahihi. UNHCR leh Christian biakna siate in makaih in galtai paipih in lungmuan na khuapi bel sak uh ahihi. Galtai te Mengwang gyi ah mi 2000 koih uh a, Muse leh Nam kham ah akigawm in 5000 val khol phot uh ahihi.

C. Kalaymyo ah zong Tuibuah pawi

Kalaymyo ahzong Kawlmi te ngeina tuibuah pawi nop citak in kibawl ahihi. Hih hun sung in Mawtaw leh Cycle nawh sa tak in hawl loh ding Kalay kivenhut pawl in kham uh ahihi. Skynet te makaihna tawh mipi gualnop na ding Khua lai ah liimsung tau nop citak in kibawl khin zo ahihi.

D. Chile gam Valparaiso khuapi inn 500val meikang

Chile gam nitumna saklam tuipi piauzang tembaw khawlna Valparaiso khuapi meikang in mi 2 si a, inn500val kangtum ahihi. Pacific tuipi ngei ahih man in huih tha khauh pai mahmah a, mei phelh zawh pak ding ol lo ahihi cihi.

Hau Thang

 

Kammal Thupi Pawlkhat ~ GZA Khawmpi Tedim

GZA Khawmpi A 2 Veina Tedim Khuapi sunga i angtanpih Dr. Do Suan Mung phuhkhia FaithBaptist Theological Seminary Hallpi panin, Minam makaite kipum khat takin thu sunna leh kikupna hong neih lingling Youtube panin kana en kha hi. Ka ngak lahlah Zomi sung kipum khatna pen hih himawk hi.



Kammal Thupi Pawlkhat:

* Leitungbup in hong zahtak sak Theologian khat ahi, Rev. Dr. S. Pau Khan En;

* Zomi dinpih akhangno cil pan kipan tudong Zomi adinga azu-aham, simmawh-bawlsiat, mat le hen thuak a mapang toto Politician khat ahi, Pu Cin Sian Thang:

* Zomi sungah Secular lamah Ph.D ngah masa thum lak ah kihel mipil pen khat a ingak, Prof. Dr. C. Thang Za Tuan.

Hih atunga i mipil taltak 3 tepen alo-theilo munah hong mapang khawm lingling uh ahih leh ei anuai a tengin banghang in zuipah lel loding ihihiam? By: Rev. Do Suan Mung, D.D.

2. Zomi tawh kisai akisap leh UNO dongah ma ipang toto dinghi. By: Rev. Gin Khan Khual, Ph.D (Theology)

3. Awsuah zui in, Lai leh Laisiangtho tuam bawlbawl ding hilo hi. By: Sia Dal Sian Pau, Ph.D (Linguistics)

Dal Sian Hung

Thuthak Tomkimcing 12 Apr 2014

A. Kawlpi Indai Kyi ah Bawng leng leh Hino pi kiphul mikhat si

Kalay myone Indai Kyi ah 11 Apr 2014 zingsang lam daak 4 pawl in Hino Nahge/2221 leh mi nga tuan na Bawng leng ki tangphul giap ahihi. Bawng leeng tungtuang Ma Nein Eih San kum 14 si pah hi. Numei kum 19 leh 23 apha nih liam uh ahihi. Hino mawtaw hawl Ee Pauh Sah (b) Aung Kyaw Lin ki man ahihi.

B. Rohinya te ki khumlo ahi cih U Khin Yee in gen khia kik

Kawlgam sung mi sim na Census vai tuamtuam 11 April ni in holiimna Yangon ah Ministry ofImmigration and Population te in kibawl ahihi. Rohinya te mimal simna kaikhawm zen mawk leh Gammi ham phat na te i supna tampi om ding ahihi. Buaina tam semsem ding ahihi cihi. Rakhine genloh Yangon kim ah zong kikai khawm ikhum om a, ahih hang Sayin ah kilutsak lo hi U Khin Yee in cihi. Tang tawng hun pan kipan 2012 April 30 dong ah UN palai Vijay Nam Biar min ki kuihna lai tung ah zong in Rohinya ki khumna min om nailo ahihi U Khin Yee in ci ziau ta ahihi. Abei kum census hun in zong omlo ahih na gen khia hi. Bang hiam cih leh Minam 135 kitawh dap phahna omlo ahihi.

C. Lai tomang Siampi Pu Dal Za Khai lungdam pihna

A(66) kumcin Laipian Laisang kikhop pi na Muizawl khua thak ah tu hun sung in bawl uh ahihi. Tua hunsung in Muizawl Khuathak Laipian Pasian paaina sang in thak honna, Gungal Section 6 Laipian Khawk zum in honna te nei uh ahihi. Gunngal Section 6 sung ah vai khempeuh makaih leh Lai tomang Siampi asem Muizawl khua Pu Dal Za Khai leh Pi Ciang Za Cing te in Laipian misingtho sung ah a innkuan un cidamtak in nuntak khua sakna uh leh Siampi sep kum 25 ci'n na pawi bilkham na Laipian Laisang khawmpi hunsung in bawl thei ahihi. Pasian in thupha pia in ata atute USA leh Malaysia ah sumzong khual zin kicingtak nei ahihi.

D. KIO gam sung zong nipi kal 8 sung Census kila veve ding?

Kawlgam mimal sim hun 30 March- 10 April hunsung akisem man lo KIO gam huam sung leh Rakhine gam lampi kikawmna hamsatna mun te ah Mimal simna nasep sem lai ding kumpi lampan thu thupia kik ahihi. Hih sung kal ngiat, kha 2 sung hun la lai ding uh ahihi. Rakhine ah ahih leh Rohinya te la tuanlo ding ahihi.

E. Tui pailoh teh Tuibual tuitawh naupang te sil kei in

Malaysia ah tui kicinglo in avenveng in Tui kihawm thiamthiam ahihi. Adiak in Mentary Courtsung ah Tui bual na mun pi nih om a, minam tampi kibual na ahihi. Tui pailoh teh tuatui mitam pi tawi uh ahihi. Tui nam sia in, zaa kisawh zong hi a, ektui buah ding simloh Maiphiatna, Naupang silna in zat huai lo ahihi. Nau pang asilkha te aci pualngawp kici hi.

Hau Thang

 

Census khit maban - Zomi Kalsuana Kizomto nading. Zomi National Movement

Dear lai sim u leh nau teng,

Zomi Kalsuanna thahat in kizomto na ding vai.
Zomi National Movement continues to gain momentum.



914-Zomi in a gelh mimal 150,000 val kipha ding in ki lamen hi. Myanmar Census 2014 March 30 - April 10 (Kawlgam Mikisimna 2014) kizota hi. Lahwakah zum pan in U Maung Maung Than in Kawlgam bup mipi sazine aki lakha lo 1% bang bek om thei ding ci in Mizzima Daily ah April 9, 2014 ni in gen hi.



Hih mikisim na pen UN, United Nations Fund for Population Activities (UNFPA) leh a khangtosa gam te’ng maa pang khawm uh ahih man in, Zomi te'n minam vai ah kipumkhat in i sepkhiatna te lawh cing in kiptak in kiphutkhin ta hi. UN a ki pan, leitung bup gam tuam tuam te leh Kawlkumpi in Zomi te minam lian khat in ong ciam teh ta ding hi. Zomi te minamvai Kalsuanna (Zomi National Movement) thupi in ong lawh cing sem sem ta hi.



914-Zomi lawp tak in a gelh mimal khat ciat leh Zomi vai ah a gim a tawl te tung ah lung damna ong ko ing.



914-Zomi vai ah makai leh apan pih Zomi Congress for Democracy (GZA), Global Zomi Alliance (GZA), Zomi Youth Association (ZYA), Tedim Youth Association (TYF), Zomi Innkuan Singapore (ZIS), Zomi Association of Malaysia (ZAM), Zomi Association of Thailand (ZAT), tuipi gal aom Zomi Innkuan Norway, Zomi Innkuan USA (ZIUSA), Zomi Association of United States(ZAUS), Zomi Association of Australia (ZAA), Zomi Association of Japan (ZAJ), etc. te khua leh tui kipawl na tuam tuam te ban ah Tongsan, ZoAw media te ma pan na te thupi hi.



Minam vai kalsuanna ah Zomi te’n Rev. Dr. Martin Luther King Jr. makaihna Civil Rights kalsuan zia et teh ding hoih sa ing. Minam vai na sepna ah ngongh tat lo ding (non-viloence), minam ki deidan lo ding (anti-discrimination), minam khem peuh tual niam tual sang om lo in, ikikim theih na ding (racial equality) ngaih sut ding in thupi hi. Zomi in ong sang thei nai lo te leh Zomi te ong haza in ong nen niam nuam te gal bawl kei phot ni. Ei lam pan in nampi lung sim nei in pi cin na tawh, I lang te lawm bawl theih ding in ngaih sun ni. MLK bang in itna galhiam “weapons of love” zang leeng, Zomi inhabited land sung pan aa khang khia Zo suan te khat leh khat ki gal bawl kei le hang, I mi nam pih te tawh ki khen thang lo ding hi hang. Zomi namvai ah i dinna, I sepna, maa pan na te khem peuh kangtampi ong ki mang ding hi.



Martin Luther King Jr. and Malcolm X are very prominent African American individuals throughout history. MLK’s approach to civil rights/equality was non-violence, passive resistance, and what he called, “weapons of love.’ He always wanted everyone, all races to come together and form equality. Malcolm X’s approached for segregation and for races to be separated.



Tu hun Kawlgam democracy lam ah aki hei zia zui in ei Zomi ten zong I khan toh na ding ngaih sun dih ni. Kum 60 sung tualgal a kido Kawl te leh Karen, Kachin, Shan, Wa te ahi zong in, amau leh amau aki do KNU leh DKBA te’n Kawlgam ah galveng na ding in kilemna bawl khin uh hi.



Yangon ah April 8, 2014 ni in Kawlgam Kumpi te leh mualmi thautawi 17 te ki pawl naNationwide Ceasefire Coordination Team (NCCT) te in Kawlgambup galveng na ding in thukikupna nei uh hi. May kha ciang in meeting nei kik ding uh hi. Kumpi te ngim na ah 2014 kum sung in mualmi thautawi te khem peuh tawh ki muh thei ding in ngaih sut na nei uh hi.



Zogam (Zomi Inhabited Land) leh Zomi te khantoh na ding in veina leh deihsak na tawh nasem, Zogam nitumna lam a om ZRO, Kawlgam leh gam dang aa om:- gamvai ZCD, biakna vai GZA, Zomi activist Zomi Associations, civil society Zomi Innkuan, WZC, Gullu Encik Pawl, media lamte leh kipawlna tuam tuam te in ei mau maban ciat I sep kawm in, khat leh khat tha ki pia in ki huh ki pan pih tek ding hang aa, Zomi vai kalsuanna (Zomi National Movement) a tha hat sem sem na ding in maa pang khawm in sem khawm ding ki sam hi.



Sep ding maban ngaih sut na pawl khat ong sung nuam ing, Kawlgam ah minam dang te’n a sep san lai tak uh hi. Zomi te’n zong I sep zawh ding thu hi. Aki sam bang in beh lap to ni.



1) Kawlgam ah federal democracy kiukna aom nading vai hawm na, minam khat leh khat kilemna a omna ding vai leh daihna a om na ding vai hawmna te ah mapang ding.
- To be involved in Federal Democratic Reforms, ethnic reconciliation and peace process in Burma.



(2) Kawlgam ah human rights om nading, minam vai, numei leh pasal kikimna aom na ding, biakna leh press suahtakna om nading in mapang ding.
- To participate in advocacy for human rights, racial and gender equity, freedom of religion and press.



3) Zomi te ki pumkhat na ding hanciam in, Zomi leh Zogam kep cing na ding in, Zomi Re-unification Organization (ZRO) te panpih in thapia ding.
- To serve for Zomi unity and support ZRO for the security and safeguard of Zoland.



(4) Kawlgam Census 2014 vai ah ZCD leh GZA te vai hawm na thukim pih panpih ding.
- To endorse ZCD and GZA statement on Zomi to be printed on Myanmar Census 2014.



(5) Zogam bup khantoh na ding, nuntakna nop tuam na ding akisam bulpi teng sem ding.
- To engage in infrastructure and services to help raise the standard of living and quality of life.



(6) Zogam kiim leh paam, logam, singkunglopa gamsa te leh leisung sum piang te kep cing zawh na ding.
- To protect the environment including farmland, forests, wildlife and natural resources such as minerals.



(7) Singkung phuk nawnloh na ding in, ni leh huih tha pan Khuaphelep meitha bawl ding.
- To develop renewable energy including solar and wind power in order to reduce reliance on wood.



(8) Paletwa-Cikha Zogam lamzikpi bawl in, Mizogam leh Manipur gam tawh ki zopna gel ding.
- To recommend Paletwa jetty - Cikha state highway construction to link Mizoram & Manipur State.



(9) Gullu – nickel vai ah environment laws zuih ding, summet te sehhawm ding, Zomi te’n nasep ngah ding.
- To advocate for Gullu mining and nickel refinery factory in Zoland, only under the strictest environment laws with mandatory revenue-sharing and employment for the Zo people.



(10) Zogam ah industrial parks (setmuh zones) bawl ding.
- To establish clean industrial parks (economic and manufacture zone) in Zoland.



(11) Zogam khantoh nading in asem nuam khempeuh tawh, minam deidan lo in sem khawm ding.
-To collaborate with groups those have similar objectives regardless of their national origin.



(12) Kipawlna te Kawlkumpi leh U.S. kumpi te law zui-in, matpongten bawlin na sem ding.
- Organizations should register under the Laws of Myanmar and the U.S.



Zomi te lung kituak hanlung ciam, khangto diam. God bless Zomi.



Topa thupha.
King Mang
Portland, OR
April 11, 2014

Huhngetna (Palo Alto, California Kim le pam Zomi kipawl na)

Portland, OR mualtung zatopi akici Oregon Health & Science University (OHSU) ah zato lumin tuapanin 
US nitum nalam naupang zato hoihpen khat ahi Stanford University Hospital(SMC) Palo Alto, California ah
zanhal in hong kikhinsuk ahi kum 4 phakhin Julia/ Julie leh a sanggam nu khattawh omkhawm uhhi.

OHSU/SMC social worker 
tein huhna hongnget na ah Palo Alto kim leh kiangah Zomi kipawlna a omhiam, a omleh kithuza in unau te natveh,
thungetsak leh kisapna khatpeuh ana vanzel theidingin contact kisam ung hongci ahihman in hong tangko sawn kahihi.

Unau tegel pen SMC ah a kha a sim tawlnga thei khading in lametna omhi. Organ donor ngak in omding cihi. 
Julie/ Julia nu le pa pen Khuadam, Cikha township pan hi.

Dammawhveh theiding na om uhleh hongzasak unla, ke'n SMC social worker tetawh hong kizom saksawn dinghi'ng.



​Thupha bawlding ahunlem khat om hi, neih leh lam kicin'hun aa piakkhiat keeiding cihzongh hikhin tuanlo hi. ​

Note: Naupang a cing a kem zato thunei te'n huhna hongngen hizaw aa, amau innkuanpih te'n hongngetsak hilo hi.


ZH

Gah hoih tampi

Topa’ leenggah huan-ah ka mapan theihna kum sawm thum hong cing hi ta hi. Hih hun sungin Topa in gahhoih tampi hong pia hi. Ka neutung a kipan ka ut loh le ka lunglut loh penpen nasep ahi hi. Bang hang hiam cihleh amaute’n ta tampipi nei in zawng thei mahmah uh hi. Mi te’n zahtak bawl loin, thu don lo uh hi. En theihna ding om lo hi.

Zolai sangsia kum tampi ka sep khit hun-in, a nungta Pasian tawh ka kimu kha a, Topa Pasian in ama leenggah huan-ah nasem dingin, hong samin sathau hong nilh hi. Tua hun laitak-in innsung khat ah kumpi nasem khat om leh innkuan bup vak zo hi. Ka nu le ka pa-in ka nasep tawp ding hong phal lo uh hi. “Na u te nasem a om hangin kawlgamah om uh ahih man ko phattuampih lo hi-ung, sangkhak sung pawlpina na sem ding hi” ci uh hi. Topa Pasian kiangah “Ka nu le pa te’n hong phal lo uh hi, ka nasep tawp thei lo ding hi ing” ka cih leh, Mate 10:37 tawh hong dawng hi, “Kei sangin a nu a pa a it zawte kei tawh kilawm lo,” ci ahih man-in ka sangsia ka tawp san hi.
India gam-ah Lai Siangtho sang kum tampi ka kah hi. Sum kisamte nu le pa tung kingen ngam lo ahih manin amau hong gotsa ka bilbah, khutbuh cihte ka zuak hi. Ka pianna ka pa in “Siamah Man Niang tawh saklam ah haitai uh hi”, ci ngei napi a nung ciangin “Zomi numei lamlak aksi” ci-in ka nih un ong pahtawikik hi. Zomi numei pawl khat in “Siamah Man Niang tawh Manglai Siangtho na tawi uh ong eng ung” ci-in sang kah khawng hong om ciangin kilungdam mahmah hi.

Saklam pan Lai Siangtho ka man khit ciangin CMBC (Cope Memorial Baptist Church) ah tawl khat sung na ka sem hi. Tua hun sungin nasep ka hanciam mahmah hi. Ahih hangin TBA sia kipawlna ah ka lut zo kei hi. India sangkah pen lamgei a te hi ci-in hong kithu simsak lo hi. Pawl khatte in “Siamahnu aw khasia kei-in TBA sia kipawlna ah a ngah zo lo nangbek hi kei the, Sia Enno zong hi” ci-in ong kihehnem zel hi. Sia Enno tawh kizakim ka hih manin lungdam mahmah ing.

CMBC ah tawlkhat nasep khit ciangin, Munlai Tuiphum Pawlpi-ah kituahin ka nupa un nasep ka huh uh hi. Munlai pan-in 1995 kumin Falam khua Zomi Theological College ah ka innkuan un ka kituah uh hi. 1999 kum Gospel kum zakhat cin Hakha khua ah pawi ka siim khit uh ciangin Yangon-ah ka kituah leuleu uh hi. Yangon ka om khit uh ciangin CMBC le Munlai Tuiphum pawlpite in a biakinn lui uh laih nuam ciatin biakinn thak lam ding hong kipan uh hi. Ka hih theih zah un ka panpih ciat uh hi.

Yangon ah TBC-Y (Tedim Baptist Church-Yangon) ah ka kikhawm uh hi. 2002 kum in TBC-Y ah nasep ka huh hi. Ka khasum pen tul sagih hi-in antang ip khat kilei zo hi. A sawt loin tulsawm in ong khang hi, antang ipkhat man mah ahi hi. Nipi ni khat upate nisa lak ah siate khasum khansak ding vai sawtpi hong kikum uh a, tul khat ong khan uh in, amau khan thei kisa mahmah uh hi. Tua hun laitak in Full Gospel Pawlpi ah a sem hi leng kha sum pen tul za khat hi-in zakhan nading zong lampi tampi om hi.

TBC-Y in Kyauktada home cell ah a makai dingin tavuan hong pia uh hi. Tua hun lai-in inn thum bek ka pha uh hi. Pansodan ah Pi Bawite (Mrs. Col. Dal Za Kam), 40th St. ah Bu Neng Lian Pau te le 39th St. ah kei le ka tate nih Kang Kang le Ben Ben tawh ka hi uh hi. Friday nitak sim-in kikhop ding ka hanciam uh hi. Naupang nih a nei Bu Pau te’n ka kikhawm zaw uh hi. Amau penKawlte lak-ah galkapna kum tampi a sep khit ciangin pension la-in uh hi a, Bupa in pension khit ciangin American Embassy ah security nasep semkik hi. Kikhop ka kipat hun-un inntek te manlahna a tuamtuam na nei thei zel uh hi. Naupangte dam lo, zin nei, a zinte uh dam lo, vai tuamtuam na om zel ahih man-in kikhop ding lawp huai het lo hi. Kei ka lawp loh ni ka tate in ‘pai ni’, amau a lawp loh ni in ke’n ‘pai ni’ ci-in ka kihanthawn zel uh hi. Bupa in ‘ka nasep pen part-time bek hi in, full-time ka ngah theih na dingin thu ong nget sak un’ hong ci hi. Ko nuta teng zong ‘i upna lak nuam hang’ ci-in nakpi takin thu ka ngetsak uh leh, a nasepna hong sem thei nawn loin ka mai uh zum in home cell pai ding zong ka thanem mahmah uh hi.

Ahih hangin amau innkuan in ko hong hehnemkik in hoihtakin ka home cell uh ka zom thei uh hi. Nuamsa deuhdeuh ki-it deuhdeuh-in, ka haksatnate uh kikum thei-in Pasian hoihna tampi ka mu deuhdeuh uh hi. Biakinn ah zong hong inntek ta uh a, bupa pen kikhop khit tutphah teng kaikhopna ah zong a mahmah in seppih hi. Pasal kipawlna ah zong hong kihel hi. A sawt loin upa nasep zong hong ngah hi. Hih pen ko home cell i gah hoih khat ahi hi.

TBC-Y pen 1997 hong kipan khia pawlpi khat ahi hi. Leitang tung a a po biakinnpi khat lam nading lunggulhna kinei ciat hi. 2004 kum in Pasian in leitang khat pia hi. 2005 kum a kipan biakinn lam theihna ding kisiausiau-in kingah zo lo hi. 2009 kum ciangin Bu Neng Lian Pau in a pu lui ahi ngei ---- kiangah hong ngetsak hi. A pu in ‘nang a ding bek ong gen in, kong pia ding hi’ ci na pi-in TBC-Y biakinn lam theih nading bek ngenin, hong ngah takpi a tua kum akipan biakinn lam kipan thei pah hi.

Pu Awn Za Pau in Bu Neng Lian Pau pen ‘TBC-Y Hero’ ci-in pahtawina pia hi. Kei mah in zong Bu Neng Lian Pau pen ‘TBC-Y Ngalliam Salpha’ tawh ka pahtawi nuam hi.
Kum sawmthum sung Pasian in ama leenggah huan-ah gah hoih tampi hong pia hi. Tu laitakin pawl khat Ph. D. sin, Doctorate sin zong om hi. Pawl khatte pawlpi sungah makai muanhuai, tuucing muanhuai mahmah in om uh hi. Tedim Myoma, Khukpi vengte in ‘Veng kikhop nangma nong patsak hi’ ci-in kum sawm a cin pawi ah sial khat le vok khat go uh a, zo thungkuah le temta a paai tawh a kithuah khat ong pia uh hi.

Kum sawm thum sung Topa’ leenggah huan a ka mapan na-ah thu hong ngetsakte, sum le paai tawh hong huhte, neihsa lamsa tawh hong huhte, thatang pilna siamna, aw khum tawh hong panpihte, lampi mann hong hilhte, deihsakna tawh thu hong hilhte tungah ka lungdam mahmah hi. Hih gah hoih tampi tawh thupha hong pia Pasian in note tungah zong hong piakim ciat ta hen.

Don Ngaih lian
April, 2014. Columbus OH. USA

 


Comments




Leave a Reply