WWW.TUNGZANGNEWS.COM

 

ZAM Thupuak
ZAM :: Zomi Association of Malaysia



Australia Form fillup hangin a kitelkhial thu pawlkhat

Kipawlna tuamtuam pan leh mimal in Australia form ki fillup ciat a, ZAM panin zong tuteng palai teng tuavai tawh mipih te ading deih sakna tawh kibuai mahmah hi. ZAM pan sum leh pai form fillup man ki ngenlo a, ahih hangin lai print na laitui man, laidal man, lai-ip man, copy bawlna tuatuam leh Zumpi panin a kisam mahmah ahi Zomi hihna theih pihna lai (Recommendation) tawh kiten sak khawmpah a, tua teng ading akigawm RM50 kikhia sak hi. Form fillup man sum bang mah ki ngenlo hi. Zumah a print khia nuamlo te in apua lamah amau le amau print khia thei hi.

Post Office pan a khakna ding athei vetlo te bek zum panin DHL tawh amanlang in ki khaksak a, a khakman leh lamsapding in RM100 kila hi. Amau le amau a khak thei te nasep tampi hong dawn pah a, vaitawm pen hong suak hi. Form teng khempeuh pen register tawh kikhak ahih manin angah dingte a om kei leh laihawm te in puakik ahih manin laikhak ngah dingte a inn vuah a om ding thupi mahmah hi. Laihawm te hong pai laitak a om kei a leh a zumah na kan kulta ding hi. Tampi zekai tuam ding hi.

Maan (photo) pen Times Square ah kizaih sak leng RM30 hong ngen a, paipih ding palai kicin loh man leh mipi te ading a nemtuamding ngaihsut sakna tawh zumah RM20 tawh ki zaihsak, ki print sak hi. Apua lam pan kizaihsa a puate zong kingah hi.

Hih bang a form a ki fillup ngeingai ciangin thu le la kan tel masa lopi in mi laklawh pawl khat in mipi phattuamna ding nasem teng pen sum deih ci thei uh hi. Bekthamlo in thu telcianlo pawl khat in USA lam kikhakta cih khawngin thu na ban gen mawkmawk lai uh ahih manin mipi lung himawh mahmah uh hi. Tua thu hang a lung himawhteUSA in August 17, 2010 ma UN card ngahsa ahih nak leh a laksa mah bangin lala lai hi. Tua khit zawh a UN ngahte ahih leh a innkuan pih USA a tungsa neite lo buang ngakngak ding hiphot hi. Tellohna a om leh Zomi zumpi ZAM ah hong dong zaw unla, tha na piak zawh kei leh zong zumthu a manlo gen kei zaw in. Mipi te in zong tellohna a om leh a theilo te gen up sangin a thei zum a te dot huai zaw hi.

Theih ding: ZAM zumpi pan form ki fillup khempeuh pen na file uh mai lam hong kisap kik teh etkik nopna na neih leh etkik theih tawntung dingin kikem sitset a, Zomi zumpi panin zum min tawh theihpihna (Recommendation) zong kigelh sak pah hi. ZAM ah form fillup ding khempeuh in ZAM Card hongpua hamtang unmaw.

Tg. Pau Deih Cin ading huhngetna

A tunga thu tawh kizui in 19/04/2014 ni in Nguasing khuami pa Lian Za Ding leh nu Ning Lian Vung te' tapa Tg. Pau Deih Cin, ZAM - 20509 in a nasepna Bukit Besi, Dungun ah Motor tung pan kia in a kawngguhpi kitan a hih manin Kuala Terengganu zatopi ah kipuaka alu leh akhut themthem lobuang a pumpi dangte'n khua bang mah phawklo hi.


A ki bawlna ding tawh kisai in Siavuante'n Rm.10,000 - 12,000 (tulsawm pan tulsawm leh tulnih) kikal pelhlo in bei ding hong ci uh a, ko neihsa bek tawh ki bawl zolo ka hih manun mimal, pawlpi leh ki pawlna khat peuhpeuh pan a hi zongin nong huh zawh zahzah un ma hong panpih a nong uap ciat na dingun zahtakna lianpi tawh ih biak Topa' min suangin huhna kong ngen uh hi.

Huhna ngetsak, a pano:
Rev. Dr. Nang Lian Khual
Ph: 017 337 3442
Bethel Christian Church Pastor
Bandar Sungai Long
Kajang, Malaysia.

Innkuan sung kitot, kisel, kivuakna

Malaysia om Zomi khempeuh, innkuan sung hamsatna, kitot, kisel, kivuakna hangin omna ding neilo a om leh ZAM in ICMC tawh kithuah inkisem khawm a, omna ding (shelter) zong mun 4 bangah kinei hi. Tua dan a hamsatna khak te'n a manlang thei penpen in ZAM zumpi ah hong zasak un. Hong kipan pih ding hi.

Lungdam kohna

  • Zomi Catholic (ZCCM, St. Joseph Church, Sentul) pan tukal Thupuak bawlna ding RM50 hong piakhia leuleu uh ahih manin lungdam ihko hi. ZCCM Pawlpi tawh na kizop nop leh: Francis Khampi 016 269 1351
  • Ever Smile Ministry pan ZAM Thupuak bawlnading in RM50 phalna taktawh hong piakhia uh ahih manin lungdamna kong pulak uhhi. Topa’n “Ever Smile Ministry” thupha hong piaksak henla, Zomi te sungah Pasian zatsemsem ama nasem te hong suaksak tahen!
Aussie painuam te theihding a kisam thu

Tulaitak in Zomi sungah ih buaipih mahmah a hi 914 le 842 cihpen ih theihsa tek hi. 914 pen kawlgamsung ah mimal kisamna hi a, a mankhin kicithei ta hi. A result bek kingak lai hi. Hih pen Zomi movement lakpan a nasia pen khat leh tulai khangthak te ih theihpih le ih zak thute a hihi. Hih pen minam ading in ciaptehna ihdeih man in ki sukvak, ki tovak ziahziah in, a hithei bang in 914 ah kipumkhat ni kici ziahziah hi. Hih pen minam min ih ngahzawh nading ahihi. Hih pen Kawlgam sungah aom te in lawhcinna zong ngah ding a kuamah ciat in lametna ihnei hi.

Tuanung deuh a sawtlo deuh hun a kipan (914 tawh ih buai khit) 842 ci in number khat hong minthang lua leuleu in pawlkhat sinkhamna le lung hihmawhna tawh hong kidim leuleu hi. Hih 842 pen minam dinmun hong hitak nawnlo in minam sungah a mite, nuntakna nei mite vai hong hi leuleu hi. Tua a hihman in a diakdiak in Malaysia gamsungah om gambeel siau te adingin hong thupi mahmah hi. Hih thupen nuntakna nei mihingte mailam ading a hihman in nasiatak in ngaihsut huai mahmah khat hong hi kik behlap hi.

2010 March kha a kipan 2014 dong UNHCR ii minsanna a ngahkhin ih mipihte ading hoih kasa mahmah hi. Tua a hihman in hihlai a simkha mikim in na sanggamte uh hanthawn in 914 na at ciat un ci a, innlam phone tawh ih hopih ziahziah dan in Malaysia gamsungah ih sanggam, khuapihte phone tawh hopih in 842 form ah na min napia mengmeng un ci a, ih gen mengmeng kisam hi. A hun pen ni 20 khawngbek cianlai hi.

Form Fillup ding akisam teng:

  • Na Nulepa leh Sanggam laiguizom te min leh suahkum
  • Zi neikhinte’n na Sungpa, Sungnu, Zi te unau leh na tate ii min leh suahkum
  • Malaysia gamsung ah na omna Address akician sitset
  • Na UN tangthu (inn pan nataini, Thai gamgi kanni, Malaysia tunni)
  • Zi neikhin te na kitenni
  • Abeisa kum 10 sung omna Address (2004 kum pan abanban in gualsukding)
  • Abeisa kum 15 sung nasepna leh na Boss min (1999 kum pan abanban in gualsukding)
  • Australia pan hongsamdingpa ii Minpi, Address leh Phone Number
  • Australia Passport Size (mikhat pong 8 kisam a, anung ah namin leh UN Number kiciantak in gelhding)
  • Malaysia gamsung naungeksuak naneihleh Birth Certificate copy 1, UN Card copy 1
  • Na sangkah kipatcil kum leh Tan bangzahciang zo? Nazi, na tate sangkahkum zong avek in kisam hi.
Sponsor neilote panpih ding

Aussie gamsungah meltheih neilote hita le sponsor hongpiading omlo ci a, a lungkham khempeuhte in na lung himawh kei ta peuh unla, na form uh manlangtak in ZAM ah na ap un. Sponsor form pen fill up kuullo in anuai ateng tawh ZAM zum ah na ap mengmeng un.

  • Australia Passport Size Photo (mikhat pong 8 kisam a, anungah namin leh UN Number kiciantak in gelhding) UN Card ~ copy 1
  • Malaysia gamsung naungeksuak naneihleh Birth Certificate ~ copy 1
Sponsor form pen ei buaina omlo in ih form teng a gamsung atunkhitteh hong buaipihding Aussie gamsung pan RC Biakna kipawlna lian mahmah khat in hong vaihawmsak ding hi.

Aussie gamsungah RC Pawlpi lian mahmah khat in hong panpihthei ding hi ung cihna tawh kizui in hih thu a hong tangko khia ka hihi.

Hihvai khempeuh ZAM zumpi tawh kipawl in nasep kul a hihman in hunlap in sanggam u le nau te theisak, zasak sawn ciat ni… Khampi Gualnam

ZAM Palai te buaipihdiak pawlkhat

Zomi thongkia teng amin List ki kaihkhopsak a, UN OPI Department ah ki Report sak hi.
Vung Ngaih Kim (Thangkhai Suangpi) leh apsala Tin Cho Oo te zato pan nausuak aciah ciangin palik te’n na matsak ahih manin avai ki buaipih a, hong suakta theihi.
Tual Lian Piang (Thangzang) pen thongkia ahih manin azi ata te tawh UN ah Report ki buaipih hi.
Pau A (Valvum) pen palik te’n na matsak ahih manin Dang Wangi ah ki buaipih hi.
Khual Sian Mang (Suangzang) zong CID te mat hi a, Dang Wangi ah ki buaipih hi.
Cin Muan Tuai (Suangpi) pen Operasi tawh kiman a, avai ki buaipih toto hi.
Pau Ngaih Khup (Ngalzang) pen Jingjang Lockup ah ki buaipih hi.
Neih Thiam (Tungzang) pen IPR zato ah Appointment ki buaipih hi.
Kai Sian Mung (Vangteh) pen Ampang Specialist Eye ah Appointment ki buaipih hi.
Hau Deih Niang (Tauleng) pen Pudu Clinic ah Appointment ki buaipih hi.
Khan Lam Mang (Zampi), Go Deih Tung (Zampi), Hau Do (Singunau), Kam Lian Tuang (Bumzang), Nang Khen Tuang (Saihkhen) te nakiman uh a, Dangwangi CID te kiangah kidelh in hong suakta hi.
Tual Lian Piang (Thangzang) pen Sungai Buloh thong ah ki buaipih hi.
Pau Ngaih Khup (Ngalbual) pen Jingjang Lockup ah ki buaipih hi.
Nang Khan Suan (Kaptel) pen lamkal ah palik te’n naman a, Phone tawh ki gensak in hong suakta theihi.

UN Card na mansuah leh

Deihlohpen UN Card na mansuahleh na omna vengkiim aom anaipenpen Police Station ah na Report pah in. Tuapan laikhat hong piading uh a, tua na ngahkhit ciangin UN zumah paipan zaw in. Tua hileh (na kamphatleh) UN Card ki ngahkikthei khading hi. Police Report omlo in napai leh UN Card na ngahkik keiding a, laidal khat hong paikik ziauding ahih manin, laidal tawidaldal pen lemkhin denlo hi.

ZAM Card tawi Zomi te ading nasep

1. Klang Apo Sea Food Restaurant 
ah nasem ding mi 2 ki deih. Kal 1 khat vei Off, Nasep hun 4pm pan 12am. Kha sum RM1000.

2. Cheras Berrys Coffe House 
ah nasem ding mi 5 ki deih (nasem siamsa deih). Omna leh anpia, kha sum RM 1200 tawh kipan ding, Asiamsa ahih leh tua sang tamzaw ngah ding. Nasep hun 9am pan 11pm sun khawl hun om.

3. Selayang Jaya Restaurant
Ah nasem ding mi 3 ki deih. Malay pau tawmtawm, ahih keileh Senpau tawmtawm atheite ki deihzawkan hi. Kha sum RM1000 pan RM1200

A lunglut peuh in ZAM Palai nasepvaisai Sia Mangpu 019 510 6413 na hopih un.

ZAM Palai sungpan kua tawh kizomding

Hih anuai a Phone Number te na ciamteh lecin nakisap mahmah hunkhat hong omthei khading hi. Nakisap hun aom hetkeileh alungdamhuai hiding a, ahi zongin na ciamteh veve lecin akisamkhat aomciang na piasawnthei pahding hi. Adiakdiak in matlehhen natuahkhit ciangin navai hong vanpihding Palai te Phone Number khawng nadotpan duakduak pen ziakailua theihi.

Kimat kihen natuahkhakleh:
Sia Tuangpu : 016-254 4093
Sia Thaa Mung : 016-646 5375
Sia Kam Mung : 016-995 6231

Zato vai kisapna aomleh:
Sia Khoi Tuang : 010-286 6189
Sia Kam Sang : 016-918 9692
Sia Kep Lian : 014-369 4897

Zato kahdingte theihding thuphamawh

Malaysia gamsung aom UN Card neinailo peuhmah in damlohna tuamtuam tawh zato kahding na om uhleh Chowkit aom Hospital Kuala Lumpur na zuankei zawle uhcin hoihpen hi. Immigration leh palik te’n UN Card neilo te nawngkaisak in hong matsuaksak thei uhhi. Nausuakding te’n UN Card na neihkei uhleh ZAM hong zasak masa unla, UN Card neite’n nasuahma un UN zumah na Report un.

Address:

155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  zomiassociationmls@gmail.com

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

 


Comments

That is interesting, knowing about the whole situation and what's been happening in there. I've really admired all the efforts which have taken in there and I am looking forward to it. I want to sign up for ZAM Card Street Zomi as it seems interesting enough.

Reply



Leave a Reply